Jehova​—Esun Vigoroso den Poder

“Debí n’e abundancia di energia dinámico, pasobra tambe e ta vigoroso den poder, ni un di nan no ta falta.”—ISAIAS 40:26.

1, 2. (a) Di ki fuente di energia físico nos tur ta dependé? (b) Splica di con Jehova ta e Fuente original di tur energia.

PODER ta algu cu hopi di nos no ta para ketu ariba. Por ehempel, nos no ta para pensa mashá riba e energia eléctrico cu ta duna nos lus i calor, of e cumbinencia di por cende cualkier aparato eléctrico cu nos tin. Ta ora coriente bai di ripiente so nos ta realisá cu sin energia eléctrico, hende su ciudadnan prácticamente lo stop di funcioná. Mayoria dje electricidad cu nos ta dependé di dje ta bini indirect for dje fuente di energia mas confiabel di tera, esta, solo. * Cada seconde e reactor solar aki ta usa cincu miyon ton di combustibel nuclear, i ta baña tera cu energia vital pa sostené bida.

² Di unda tur e energia solar aki ta bini? Ta ken a traha e planta di energia celestial aki? Jehova Dios. Papiando di dje, Salmo 74:16 ta bisa: “Abo mes a prepará e lus di shelu, sí solo.” Sí, Jehova ta e Fuente original di tur poder, mescos cu e ta e Fuente di tur bida. (Salmo 36:9) Nunca nos no mester balotá su poder. Pa medio di profeta Isaías, Jehova ta corda nos pa hisa cara wak e cuerponan celestial manera solo, luna i strea, anto meditá riba con nan a yega na existí. “Hisa boso wowo na haltu i mira. Ken a crea e cosnan aki? Ta Esun cu ta saca e ehército di nan asta pa number, cu tur e ta yama asta pa nomber. Debí n’e abundancia di energia dinámico, pasobra tambe e ta vigoroso den poder, ni un di nan no ta falta.”—Isaías 40:26; Jeremías 32:17.

3. Con nos ta beneficiá di manifestacionnan di Jehova su poder?

³ Ya cu Jehova ta vigoroso den poder, nos por keda trankil cu solo lo sigui percurá e lus i calor cu nos bida ta dependé di dje. Sin embargo, no  ta pa nos necesidadnan físico básico so nos ta dependé riba Dios su poder. Nos liberacion for di picá i morto, nos speransa pa futuro i nos confiansa den Jehova, tur ta mará den un forma inseparabel na su uso di poder. (Salmo 28:6-9; Isaías 50:2) Bijbel ta yen di ehempel cu ta mustra cu Jehova tin poder pa crea i libra, pa salba su pueblo i pa destruí su enemigunan.

Dios Su Poder Ta Bisto den Creacion

4. (a) Ki efecto observacion di shelu di anochi tabatin riba David? (b) Kico e cuerponan celestial ta revelá tocante e poder di Dios?

⁴ Apostel Pablo a splica cu nos Creador su ‘poder eterno por ser percibí claramente den e cosnan cu el a traha.’ (Romanonan 1:20) Siglonan promé, e salmista David, cu como un wardadó di carné lo mester a hisa cara wak shelu di anochi hopi bes, a capta e grandesa di universo i e poder di Esun cu a trah’é. El a skirbi: “Ora mi mira bo shelunan, obra di bo dedenan, e luna i e streanan cu bo a prepará, kico homber mortal ta pa bo tene cuenta cuné, i e yu di hende terenal pa bo percurá p’e?” (Salmo 8:3, 4) Apesar cu su conocimentu di cuerponan celestial tabata limitá, David a comprendé cu e tabata masha insignificante na comparacion cu e Creador di nos enorme universo. Awe astrónomonan sa hopi mas tocante e inmensidad di universo i e poder cu ta sosten’é. Por ehempel, nan ta bisa nos cu cada seconde nos solo ta emití mes tantu energia cu explosion di 100.000 miyon megaton di dinamit. * Ta un parti masha chikitu dje energia ei ta yega tera; tog e ta suficiente pa sostené tur bida riba nos planeta. I esei cu nos solo ta leu di ta e strea mas poderoso den shelu. Algun strea ta saca den un solo seconde, tur e energia cu solo ta saca den henter un dia. Imaginá bo anto, tur e poder cu Esun cu a crea e cuerponan celestial ei ta disponé di dje! Elihú a proclamá corectamente: “Pa loke ta e Todopoderoso, nos no a averigu’é; e ta halsá den poder.”—Job 37:23.

5. Ki evidencia di Jehova su forsa nos ta haña den su obranan?

 ⁵ Si nos ‘busca Dios su obranan’ manera David a haci, nos lo mira evidencia di su poder tur caminda: den bientu i ola, den bos cu weerlicht, den riu poderoso i ceru mahestuoso. (Salmo 111:2; Job 26:12-14) Ademas, manera Jehova a corda Job, bestia ta duna testimonio di Su forsa. Entre nan tin Behemot, esta hipopótamo. Jehova a bisa Job: “Su poder ta den su heup . . . Su wesunan fuerte ta manera bara di heru batí.” (Job 40:15-18) E poder spantoso di toro salbahe tambe tabata bon conocí den tempu di Bijbel, i David a resa pa spar e dje “boca di leon, i dje cachunan di toro salbahe.”—Salmo 22:21; Job 39:9-11.

6. Kico toro ta simbolisá den Bijbel, i di con? (Mira nota na pia di página.)

⁶ Pa motibu di su forsa, Bijbel ta usa toro pa simbolisá e poder di Jehova. * E vision cu apostel  Juan a haña di Jehova su trono ta duna un representacion di cuater criatura bibiente, i un di nan su cara tabata manera cara di toro. (Revelacion 4:6, 7) Evidentemente, un di Jehova su cuater atributonan principal cu e kerubinnan aki a representá, ta poder. E otronan ta amor, sabiduria i husticia. Ya cu poder ta un faceta asina importante di Dios su personalidad, un bon comprendimentu di su poder i con e ta us’é, lo hala nos mas cerca di dje i yuda nos imitá su ehempel dor di haci bon uso dje poder cu nos ta disponé di dje.—Efesionan 5:1.

“Jehova di Ehércitonan, e Poderoso”

7. Con nos por ta sigur cu bondad lo triunfá riba maldad?

⁷ Den Scritura, Jehova ta ser yamá “Dios Todopoderoso,” un título cu ta corda nos cu nunca nos no mester balotá su poder of duda di su abilidad di por anikilá su enemigunan. (Génesis 17:1; Exodo 6:3) E sistema di cosnan malbado di Satanas por parce di tin fundeshi sólido, pero den Jehova su bista “e nacionnan ta manera un gota for di un hember; i manera e capa di stof riba balansa a considerá nan.” (Isaías 40:15) Danki na tal poder divino, no tin duda cu bondad lo triunfá riba maldad. Den e tempu aki cu maldad ta plamá, nos por tin e consuelo di sa cu “Jehova di ehércitonan, e Poderoso di Israel” lo eliminá maldad pa semper.—Isaías 1:24; Salmo 37: 9, 10.

8. Ki ehército celestial ta bou di Jehova su mando, i ki indicacion nos tin di nan poder?

⁸ E expresion “Jehova di ehércitonan,” cu ta aparecé 285 bes den Bijbel, ta otro recordatorio di Dios su poder. E “ehércitonan” mencioná aki ta referí na e multitud di criatura spiritual cu Jehova tin bou di su mando. (Salmo 103:20, 21; 148:2) Den un solo anochi, un dje angelnan aki so a mata 185.000 soldá asirio cu tabata menasá Jerusalem. (2 Reynan 19:35) Si nos reconocé e poder di Jehova su ehércitonan celestial, lo no ta fácil pa opositornan intimidá nos. Profeta Eliseo no a preocupá ora e tabata rondoná dor di henter un ehército cu tabata busk’é, pasobra na contraste cu su criá, e por a mira cu wowo di fe un enorme multitud di guerero celestial ta apoy’é.—2 Reynan 6:15-17.

9. Di con nos mester confia den proteccion divino, mescos cu Jesus?

⁹ Jesus tambe tabata conciente di apoyo angelical ora el a enfrentá un multitud armá cu spada i palu den hofi di Getsémani. Despues cu el a manda Pedro pone su spada bek na su lugá, Jesus a bis’é cu si tabata necesario, E por a apelá na su Tata pa “mas cu diesdos legion di angel.” (Mateo 26:47, 52, 53) Si nos tin un aprecio asina p’e ehércitonan celestial cu Dios ta disponé di dje, nos tambe lo confia plenamente den apoyo divino. Apostel Pablo a skirbi: “Kico, anto, nos lo bisa tocante e cosnan aki? Si Dios ta pa nos, ken lo ta contra nos?”—Romanonan 8:31.

10. Na fabor di ken Jehova ta usa su poder?

¹⁰ Pues, nos tin tur motibu pa confia den Jehova su proteccion. Semper e ta usa su poder pa haci bon i na armonia cu su otro cualidadnan, esta, husticia, sabiduria i amor. (Job 37:23; Jeremías 10:12) Aunke hopi bes hende poderoso ta trapa esnan pober i humilde pa nan probecho egoista, Jehova ta ‘lanta esun di condicion humilde for di stof mes,’ i e ta “abundá den poder pa salba.” (Salmo 113:5-7; Isaías 63:1) Manera Maria, Jesus su mama modesto i sin pretension, a comprendé, “e Poderoso” ta ehercé su poder na moda inegoista na fabor di esnan cu ta tem’é, i ta humiyá esnan orguyoso anto halsa esnan humilde.—Lucas 1:46-53.

Jehova Ta Revelá Su Poder na Su Sirbidónan

11. Di ki prueba di Dios su poder e israelitanan tabata testigo na aña 1513 P.E.C.?

¹¹ Jehova a mustra su forsa na su sirbidónan vários bes. Un dje biahanan ei tabata na ceru di Sinaí, na aña 1513 P.E.C. Durante e aña ei  ya e israelitanan a mira evidencia impresionante di Dios su poder. Dies plaga devastador a revelá Jehova su man fuerte, i e impotencia dje diosnan egipcio. Poco despues, e forma milagroso cu nan a crusa laman Corá i e destruccion dje ehército di fárao a duna prueba adicional di Dios su forsa. Tres luna despues, na pia di ceru di Sinaí, Jehova a invitá e israelitanan pa bira su “propiedad special for di tur otro pueblo.” Di nan banda, nan a primintí: “Tur loke Jehova a papia, nos ta dispuesto na haci.” (Exodo 19:5, 8) E ora ei Jehova a duna un demostracion bibu di su poder. Cu bos cu weerlicht i un zonido fuerte di cachu, ceru di Sinaí a huma i tembla. E pueblo, pará na un distancia, tabata morto spantá. Pero Moises a bisa nan cu e experencia aki mester a siña nan tin temor di Dios, un temor cu lo a motivá nan pa obedecé nan único Dios berdadero i todopoderoso, Jehova.—Exodo 19:16-19; 20:18-20.

12, 13. Ki circunstancianan a pone Elías bandoná su asignacion, pero con Jehova a fortalec’é?

¹² Vários siglo despues, den tempu di Elías, ceru di Sinaí tabata testigo di un otro demostracion di poder divino. E profeta a yega di mira Dios su poder den accion caba. Pa tres aña i mei, Dios a “cera shelu” pa motibu dje apostasia dje nacion di Israel. (2 Crónicanan 7:13) Durante e tempu di secura cu a bini como resultado, raf a alimentá Elías den e vaye torencial di Kerit, i despues, e tiki hariña i zeta cu un biuda tabatin den cas a keda rende milagrosamente pa percurá cuminda pa Elías. Jehova a asta duna Elías poder pa resucitá e yu homber dje biuda. Finalmente, den un prueba dramático riba ceru di Carmelo pa sa ken ta Dios, candela a baha for di shelu i come Elías su sacrificio. (1 Reynan 17:4-24; 18:36-40) Tog, no muchu tempu despues, Elías a haña miedu i a perde curashi ora Jezabel a menasá di mat’é. (1 Reynan 19:1-4) El a hui for dje pais, pensando cu su trabou como profeta a caba. Pa fortalec’é i dun’é confiansa, bondadosamente Jehova a dun’é un demostracion personal di poder divino.

¹³ Ora Elías tabata sconde den un cueba, el a mira un exhibicion impresionante di tres forsa cu Jehova ta controlá: un bientu fuerte, un temblor i por último un candela. Sin embargo, ora Jehova a papia cu Elías, el a papia cu “un stem calmu i abou.” El a asign’é mas trabou pa haci, i a inform’é cu ainda tabatin 7.000 adoradó fiel di Jehova den e pais. (1 Reynan 19:9-18) Si mescos cu Elías, un dia nos sinti nos mes descurashá dor cu nos ministerio no ta producí masha resultado, nos por pidi Jehova pa “poder mas ayá di loke ta normal,” un poder cu por fortalecé nos pa sigui predicá e bon nobo sin baha man.—2 Corintionan 4:7.

Jehova Su Poder Ta un Garantia Cu Su Promesanan Lo Cumpli

14. Kico Jehova su nomber personal ta revelá, i di ki manera su poder ta relacioná cu su nomber?

¹⁴ Jehova su poder ta estrechamente relacioná tambe cu su nomber i cu cumplimentu di su boluntad. E nomber único, Jehova, cu kier men “E Ta Causa pa Bira,” ta revelá cu e ta haci su mes bira e Cumplidor di promesa. Niun hende ni nada por prevení Dios di realisá su propósitonan, sin importá con improbabel hende sképtico por pensa cu nan ta. Manera Jesus a yega di bisa su apostelnan: “Pa Dios tur cos ta posibel.”—Mateo 19:26.

15. Con Abraham cu Sara a ser recordá cu nada no ta muchu extraordinario pa Jehova?

¹⁵ Por ehempel, Jehova a yega di primintí Abraham cu Sara cu lo e haci nan desendientenan bira un nacion grandi. Pero pa hopi aña nan a keda sin yu. Tur dos tabata hopi bieu ora Jehova a bisa nan cu e promesa tabata cerca di cumpli, anto Sara a hari. Como contesta, e angel a bisa: “Tin un cos cu ta muchu extraordinario pa Jehova?” (Génesis 12:1-3; 17:4-8; 18:10-14) Cuater siglo despues, ora finalmente Moises a reuní Abraham su desendientenan—cu a bira un nacion grandi —n’e yanuranan di Moab, el a corda nan cu Dios a cumpli cu su promesa. Moises di: “Bo ta sigui biba, pasobra [Jehova] a stima bo antepasadonan, di manera cu el scoge nan simia despues di nan i a saca bo dilanti su bista for di Egipto cu su gran poder, pa expulsá nacionnan mas grandi i mas poderoso cu bo for di bo dilanti, pa hiba bo paden, pa duna bo nan tera como herencia manera ta sosodé awe.”—Deuteronomio 4:37, 38.

16. Di con e saduceonan a cai den e eror di nenga cu tin resureccion di mortonan?

¹⁶ Siglonan despues, Jesus a censurá e saduceonan, kendenan no tabata kere den resureccion. Di con nan a nenga di kere Dios su promesa di cu lo e trece hende morto bek? Jesus a bisa nan: “Boso no conocé ni e Scritura ni e poder di Dios.” (Mateo 22:29) E Scritura ta sigurá nos cu ‘tur esnan cu ta den grafnan conmemorativo lo tende e bos dje Yu di hende i lo sali.’ (Juan 5:27-29) Si nos sa loke Bijbel ta bisa tocante resureccion, nos confiansa den e poder di Dios lo convencé nos cu mortonan lo lanta. Dios ‘lo realmente traga morto pa semper, . . . pasobra Jehova mes a papi’é.’—Isaías 25:8.

17. Ki dia den futuro nos confiansa den Jehova lo ta esencial den un manera special?

¹⁷ Den futuro cercano, lo bini un tempu ora cada un di nos lo tin cu confia den un manera special den Dios su poder pa salba. Satanas e Diabel lo lansa un atake contra Dios su pueblo, cu lo parce di ta sin proteccion. (Ezekiel 38:14-16) E ora ei Dios lo mustra su gran poder na nos fabor, i tur hende lo mester sa cu e ta Jehova. (Ezekiel 38:21-23) Awor ta e tempu pa edificá nos fe i confiansa den Dios e Todopoderoso pa nos no tambaleá n’e tempu crucial ei.

18. (a) Ki beneficionan nos ta saca ora nos meditá riba Jehova su poder? (b) Ki pregunta nos lo considerá den e siguiente artículo?

¹⁸ Sin duda, tin hopi motibu pa meditá riba Jehova su poder. Ora nos ta contemplá su obranan, nos ta ser motivá humildemente pa alabá nos Magnífico Creador i gradicié cu e ta usa su poder den un manera asina sabí i amoroso. Nunca nos lo no ser intimidá si nos ta confia den Jehova di ehércitonan. Nos fe den su promesanan lo no tambaleá. Pero corda cu nos ta creá den Dios su imágen. Pues, nos tambe tin poder, maske ta na un grado limitá. Con nos por imitá nos Creador den e manera cu nos ta usa nos poder? Nos lo considerá esaki den e siguiente artículo.

[Nota]

Bo Por Contestá e Preguntanan Aki?

• Con creacion ta duna testimonio di Jehova su poder?

• Ki ehércitonan Jehova por usa pa sostené su pueblo?

• Cua tabata algun ocasion cu Jehova a demostrá su poder?

• Ki garantia nos tin cu Jehova lo cumpli cu su promesanan?

[Preguntanan di Estudio]

[Plachinan na página 10]

“Hisa boso wowo na haltu i mira. Ken a crea e cosnan aki?”

[Rekonosementu]

Potret di Malin, © IAC/RGO 1991

[Plachinan na página 13]

Meditá riba demostracionnan di Jehova su poder ta edificá fe den su promesanan