Historia di Bida

Manteniendo Nos Bida Simpel pa Sirbi Jehova

SEGUN E RELATO DI CLARA GERBER MOYER

Mi tin 92 aña di edad i apénas mi por cana, pero ainda mi mente ta cla i ta corda tur cos. Esta gradicidu mi ta cu mi tabatin e privilegio di sirbi Jehova desde cu mi tabata mucha! Hibando un bida simpel i no complicá, a contribuí inmensamente na e tesoro ei.

MI A nace dia 18 di augustus 1907, na Alliance, Ohio, Merca. Mi tabata e mayó di cincu yu. Tempu mi tabatin ocho aña, un minister di tempu completo di Studiantenan di Bijbel, manera tabata yama Testigonan di Jehova e tempu ei, a bini riba baiskel na nos hacienda di producí lechi. El a topa mi mama, Laura Gerber, na porta i el a puntr’é si e tabata sa di con Dios ta permití maldad. Semper Mama a puntra su mes esei.

Despues di a puntra Tata, kende tabata pafó den mangasina, Mama a bestèl e set di seis volúmen Studio dje Scritura. El a lesa nan cu smak, i e berdadnan bíblico cu e tabata siña a conmov’é profundamente. El a studia volúmen 6, E Creacion Nobo, i a comprendé bon cla cu pa cumpli cu e bautismo cristian, hende mester bai bou di awa. Dor cu e no tabata sa con pa haña e Studiantenan di Bijbel, el a pidi Tata pa bautis’é den e riu chikitu cu tabatin n’e hacienda, aunke tabata durante e luna friu di mart 1916.

No muchu tempu despues di esei, Mama a mira un aviso den korant cu tabata anunciá un discurso n’e Sala di Yu Muhernan di Veterano na Alliance. E discurso tabatin e tema “E Plan Divino di Epocanan.” Mama a reaccioná mesora, ya cu volúmen 1 di Studio dje Scritura tabatin mésun tema cu e discurso. Nos a prepará e kitoki i e famia completo a bai nos promé reunion riba cabai cu kitoki. For di e tempu ei padilanti, nos a  sigui asistí na reunionnan den cas di rumannan riba diadomingo i diarason anochi. Djis despues, un representante dje congregacion cristian a bautisá Mama atrobe. Cu tempu Tata, kende semper tabata ocupá cu trabou di hacienda, a mustra interes den studio di Bijbel, i el a bautisá un par di aña despues.

Encuentro cu Esnan Cu Ta Hiba Delantera

Dia 10 di juni 1917, J. F. Rutherford, e tempu ei presidente di Sociedad Watch Tower, a bishitá Alliance pa papia riba e tema: “Di Con Nacionnan Ta den Guera?” Mi tabatin nuebe aña i mi a bai e reunion huntu cu mi mayornan i mi dos ruman hombernan Willie cu Charles. Nos tabatin un excelente asistencia di mas cu shen hende. Despues dje discurso di ruman Rutherford, mayoria di esnan presente a para pa saca potret pafó dilanti Columbia Theather, caminda el a duna su discurso. E siguiente siman, n’e mésun sitio, A. H. Macmillan a duna un discurso riba e tema: “Dios Su Reino Binidero.” Pa nos tabata un privilegio cu e rumannan aki a bishitá nos pueblo chikitu.

Promé Congresonan Memorabel

E promé congreso na cua mi a asistí tabata na 1918 na Atwater, Ohio, un par di kilometer for di Alliance. Mama a puntra e representante di Sociedad si mi tabata suficiente grandi pa bautisá. Ami a sinti cu mi a haci un dedicacion válido na Dios pa haci su boluntad, p’esei nan a permití mi bautisá e dia ei den un riu chikitu cerca di un plantacion grandi di apel. Mi a cambia paña den un tent cu e rumannan a arma pa e propósito ei i mi a bautisá den un japon diki bieu.

Na september 1919, ami cu mi mayornan a bai Sandusky, Ohio, na lago Erie, cu trein. Einan nos a subi feri, i djis despues nos a yega Cedar Point unda nos congreso memorabel mester a tuma lugá. Ora nos a baha for di boto, tabatin un stènd chikitu ta bende cuminda riba waf. Mi a tuma un hamburger, cu e tempu ei tabata realmente un luho pa mi. El a smak asina bon! E asistencia máximo di nos congreso di ocho dia tabata 7.000 hende. Dor cu no tabatin un sistema di zonido, mi tabatin cu scucha cu masha atencion.

Na e congreso aki, a presentá e revista compañero di E Toren di Vigilancia, titulá E Epoca di Oro (awor Spierta!). Pa mi a bai congreso mi mester a perde mi promé siman di scol, pero a bale la pena. Cedar Point tabata un centro di vakansi, i den e restaurant einan tabatin koki cu a prepará cuminda p’e delegadonan. Pero pa un of otro motibu, e koki i waiternan tabata welga. P’esei, rumannan cristian cu tabata sa con pa prepará cuminda a bula den i a prepará cuminda p’e delegadonan. Despues di esei, pa hopi década e pueblo di Jehova a prepará nan mes cuminda na asamblea i congreso.

Tambe nos tabatin e privilegio di bolbe na Cedar Point na september 1922 pa asistí na un congreso di nuebe dia cu tabatin un asistencia máximo di mas cu 18.000 persona. Ta einan ruman Rutherford a animá nos pa “anunciá, anunciá, anunciá e Rey i su reino.” Sin embargo, mi ministerio personal a cuminsá vários aña promé cu distribucion di tratado i E Epoca di Oro.

Aprecio p’e Ministerio

Na principio di 1918, mi a participá den e trabou di parti e tratado E Caida di Babilonia n’e haciendanan den becindario. Debí n’e weer friu, nos tabata keinta un piedra riba konfó na cas, i bai cuné den e kitoki pa tene nos pianan cayente. Nos tabata bisti jas i sombré diki ya cu e kitoki tabata tapá cu paña ariba i na banda so, pero e no tabatin verwarming. Tog, esakinan tabata tempunan felis.

Na 1920, a prepará un edicion special di E Misterio Terminá, yamá ZG, den forma di un revista. * Ami cu mi mayornan a sali bai predicá cu e publicacion aki den Alliance. Den e dianan ei, tur hende tabata bai di cas pa cas nan so, pues yen di miedu mi a acercá un veranda cu diferente hende sintá. Despues cu mi a haci mi  presentacion, un señora a bisa: “E pida spich cu el a duna ta bunita, no?” i el a aceptá e publicacion. E dia ei, e promé biaha cu mi a duna un presentacion formal mas largu di cas pa cas, mi a laga 13 ZG.

Ora mi tabatin rond di 15 aña, mi mama a haña pulmonia i a keda mas cu un luna na cama. Debí cu mi ruman muher chikitu, Hazel, tabata baby, mi a kita for di scol pa yuda cu trabou di hacienda i cuida e muchanan. Tog, nos famia a tuma berdad bíblico na serio, i nos tabata asistí na tur reunion di congregacion riba un base regular.

Na Memorial di Cristo su morto na 1928, tur presente a haña un tratado cu e tema “Unda e Nuebenan Ta?” E tratado a considerá Lucas 17:11-19, caminda Bijbel ta bisa cu ta un so di e dies leprosonan cu Jesus a haci limpi a gradicié humildemente p’e curacion milagroso. Esei a conmové mi curason. Mi a puntra mi mes: ‘Con gradicidu ami ta?’

Ya cu awor cosnan tabata bai bon na cas i mi tabatin bon salú i mi no tabatin ningun responsabilidad cu por stroba mi, mi a dicidí di bandoná cas i drenta e sirbishi di pionero, manera ta yama e ministerio di tempu completo. Mi mayornan a animá mi pa haci esei. Pues, ami cu mi partner Agnes Aleta a haña nos asignacion, i dia 28 di augustus 1928, pa 9’or di anochi nos a subi trein. Nos tur dos tabatin un maleta so i un tas di scouder pa carga nos Bijbel i literatura. Mi ruman muhernan i mi mayornan a yora na stacion, i nos tambe. Ya cu nos a kere cu Armagedon tabata cerca, mi a pensa cu kisas lo mi no a mira nan nunca mas. E siguiente dia, nos a yega nos asignacion na Brooksville, Kentucky.

Nos a huur un kamber den un penshon i a cumpra blekinan di spageti i tambe a drecha sandwich. Tur dia nos tabata cana den un direccion diferente, trahando nos so i ofreciendo doñonan di cas cincu buki pa un contribucion di $1,98. Tiki-tiki nos a cubri e stad, i nos a topa hopi hende cu tabata bastante interesá den Bijbel.

Den mas of ménos tres luna, nos a predicá cerca tur hende den Brooksville i tambe Augusta i nan alrededor. P’esei, nos a muda pa bai traha den e stadnan Maysville, Paris i Richmond. Durante e tres añanan cu a sigui, nos a cubri hopi condado na Kentucky unda no tabatin congregacion. Hopi bes nos a haña yudansa di amigu i miembronan di famia for di Ohio, cu a bini abou cu auto i djoin nos den e ministerio pa un siman of mas.

Otro Congresonan Memorabel

E congreso na Columbus, Ohio, dia 24 pa 30 di juli 1931, tabata realmente memorabel. Tabata n’e congreso ei cu nan a anunciá cu nos lo ser identificá cu e nomber bíblico Testigonan di Jehova. (Isaías 43:12) Promé cu esei, ora hende puntra nos di ki religion nos ta, nos tabata bisa, “Studiantenan Internacional di Bijbel.” Pero e nomber ei no tabata distinguí nos bon, pasobra tabatin studiantenan di Bijbel cu tabata afiliá na vários otro grupo religioso.

Dor cu mi partner Agnes a casa i mi tabata mi so, mi a keda masha emocioná ora a ser anunciá cu esnan cu tabata busca un partner pionero, mester meldu na un cierto sitio. Einan mi a topa Bertha cu Elsie Garty i Bessie Ensminger. Nan tabatin dos auto i nan tabata en busca di un di cuater ruman muher pionero pa traha huntu cu nan. Nos a sali for di congreso huntu, aunke nunca promé nos no a conocé otro.

Durante zomer nos a traha den e estado di Pennsylvania completo. Anto ora winter tabata cerca, nos tabata pidi asignacionnan den e estadonan sur mas cayente di Nort Carolina, Virginia i Maryland. Durante primavera nos tabata bolbe bai nort. Esei tabata e custumber di pioneronan e tempu ei. Na 1934, John Booth cu Rudolph Abbuhl, kendenan a sigui e custumber aki, a trece huntu cu nan Ralph Moyer i su ruman homber mas yong Willard, na Hazard, Kentucky.

Mi a topa Ralph na vários ocasion, i nos a siña conocé otro mihó durante e congreso grandi na Washington, D.C., cu a ser tené di 30 di mei pa 3 di juni 1935. Ami cu Ralph tabata sinta huntu den tribuna ariba ora cu a tira e discurso tocante  e “multitud grandi.” (Revelacion 7:9-14) Te cu e momento ei, nos tabata kere cu esnan dje multitud grandi tabata un clase celestial ménos fiel cu e 144.000. (Revelacion 14:1-3) P’esei, mi no tabata kier ta un di nan!

Ora cu ruman Rutherford a splica cu esnan dje multitud grandi ta un clase terenal di fiel sobrebibiente di Armagedon, hopi hende a keda sorprendí. Anto el a invitá tur esnan dje multitud grandi pa lanta para. Wel, ami no a lanta para, pero Ralph sí. Despues cosnan a bira mas cla den mi mente, pues 1935 tabata e último bes cu mi a participá n’e emblemanan di pan i biña n’e Memorial di morto di Cristo. Sin embargo, Mama sí a sigui participá te na su morto na november 1957.

Un Partner Permanente

Ami cu Ralph a sigui skirbi otro. Mi tabata sirbi na Lake Placid, New York, i e na Pennsylvania. Na 1936, el a traha un trailer chikitu cu e por a hala cu su auto. El a muda cuné di Pottstown, Pennsylvania, pa Newark, New Jersey, p’e congreso cu a ser tené einan di 16 pa 18 di october. Un anochi despues dje programa, diferente di nos cu tabata pionero a bai wak Ralph su trailer nobo. Ami cuné tabata pará den e trailer na e baki chikitu di laba tayó ora el a puntra: “Bo gusta e trailer?”

Ora mi a sagudí cabes cu sí, el a puntra: “Bo tin gana di biba aden?”

Mi a respondé “sí,” i el a duna mi un sunchi tierno cu nunca lo mi lubidá. Un par di dia despues nos a haña permit pa casa. Dia 19 di october, e dia despues di congreso, nos a bai Brooklyn i nos a haña un tour den e facilidadnan di imprenta di Sociedad Watch Tower. Despues nos a pidi pa asigná nos na un teritorio. Grant Suiter tabata encargá cu teritorio, i el a puntra ken lo bai traha e teritorio. Ralph a bisa: “Nos, si nos logra casa.”

“Si boso bin bek 5’or di atardi, nos por regl’é,” ruman Suiter a respondé. Pues e atardi ei nos a casa na cas di un Testigo na Brooklyn Heights. Nos a come huntu cu algun amigu den un restaurant local i despues nos a coge transport público bai Ralph su trailer na Newark, New Jersey.

Djis despues di esei, nos tabata rumbo pa Heathsville, Virginia, nos promé asignacion di pionero huntu. Nos a traha e condado di Northumberland i despues nos a muda pa e condadonan Fulton i Franklin na Pennsylvania. Na 1939, Ralph a haña invitacion pa haci trabou di zona, un actividad durante cua nos tabata bishitá un cantidad di congregacion riba un base rotativo. Nos a sirbi congregacionnan den e estado di Tennessee. Nos yu homber Allen a nace e siguiente aña i na 1941 nos a stop di haci e trabou di zona. E ora ei nos a haña asignacion pa traha como pionero special na Marion, Virginia. E tempu ei, esei a nificá dedicá 200 ora pa luna den e ministerio.

 Nos A Haci Ahuste

Na 1943, mi a ripará cu mi mester a stop cu e ministerio di pionero special. Biba den un trailer chikitu, cuida un yu chikitu, prepará cuminda, percurá pa nos tur tin paña limpi, i dedicá rond di 60 ora den e ministerio tur luna tabata mas of ménos tur loke mi por a logra. Pero Ralph sí a sigui traha como pionero special.

Na 1945, nos a muda bai Alliance, Ohio, bek. Nos a bende e trailer cu a sirbi como nos hogar pa nuebe aña i a bai biba huntu cu mi mayornan den e cas n’e hacienda. Tabata einan, den porch dilanti, cu nos yu muher Rebekah a nace. Ralph a aceptá un trabou ‘part-time’ den stad i a sigui traha como pionero regular. Ami a traha riba e hacienda i tabata haci loke tabata na mi alcanse pa yud’é sigui cu e trabou di pionero. Aunke mi mayornan a ofrecé nos tereno i un cas pornada, Ralph a nenga. E no tabata kier ningun peso cu por strob’é, pa asina nos por a sigui plenamente tras di interesnan di Reino.

Na 1950, nos a bai biba na Pottstown, Pennsylvania, i nos a huur un cas pa 45 florin pa luna. Atrabes dje siguiente 30 añanan, e huur a subi yega te na 135 florin so. Nos a sinti cu Jehova tabata yuda nos mantené nos bida simpel. (Mateo 6:31-33) Ralph a traha tres bes pa siman como barbero. Tur siman nos tabata studia Bijbel cu nos dos yunan, asistí na reunionnan di congregacion i predicá e bon nobo di Reino como famia. Ralph a sirbi como superintendente presidente dje congregacion local. Dor di mantené nos bida simpel, nos por a haci hopi den sirbishi di Jehova.

Pérdida di Mi Kerido Casá

Dia 17 di mei 1981, nos tabata sintá den Salon di Reino ta scucha un discurso público. Ralph a sinti su curpa malu i el a cana bai patras den salon, i un usher a bin trece un nota pa mi cu ta bisa cu Ralph ta bai cas. Esaki tabata algu asina straño pa Ralph cu mi a pidi un ruman pa hiba mi cas mesora. Denter di un ora Ralph a muri di un atake celebral fuerte. Na fin dje studio di Toren di Vigilancia dje mainta ei, a anunciá n’e congregacion cu el a muri.

Durante e luna ei, Ralph a dedicá mas cu 50 ora caba den e ministerio. Su carera di tempu completo como pionero a cubri mas cu 46 aña. El a conducí studio di Bijbel cu mas cu shen persona, kendenan cu tempu a bira Testigonan bautisá di Jehova. E bendicionnan spiritual cu nos a ricibí a bal tur sacrificio cu nos a haci atrabes di añanan.

Gradicidu pa Mi Privilegionan

Pa e último 18 añanan aki, mi a biba mi so, asistí n’e reunionnan, predicá na otronan segun mi por i studia e Palabra di Dios. Awor mi ta biba den un apartamento di penshonado pa hende grandi. Mi tin solamente algun mueble i mi a dicidí cu mi no kier television. Pero mi bida ta yen i spiritualmente ricu. Mi mayornan i mi dos ruman hombernan a keda fiel te na nan morto, i mi dos ruman muhernan ta sigui fielmente den e caminda dje berdad.

Mi ta contentu cu mi yu homber Allen ta sirbi como anciano cristian. Pa hopi tempu el a instalá sistema di zonido pa Salon di Reino i Salon di Asamblea i a traha na e departamento di zonido na congreso. Su casá ta un sirbidó leal di Dios, i nan dos yu hombernan ta sirbi como anciano. Mi yu muher Rebekah Karres, a dedicá mas cu 35 aña den e ministerio di tempu completo, di cua cuater aña n’e sede mundial di Testigonan di Jehova na Brooklyn. E cu su esposo a dedicá e último 25 añanan aki den e trabou biahero na vários parti di Merca.

Jesus a bisa cu e Reino ta mescos cu un tesoro scondí cu por ser hañá. (Mateo 13:44) Mi ta gradicidu cu mi famia a haña e tesoro ei asina hopi aña pasá. Esta un privilegio pa wak atras riba 80 aña dedicá n’e sirbishi di Dios—sin niun tiki duele! Si mi por a biba mi bida atrobe, lo mi biba mescos, pasobra en berdad, ‘Dios su bondad amoroso ta mihó cu bida mes.’—Salmo 63:3.

[Nota]

[Plachi na página 23]

Nos a tende ruman Rutherford su discurso na 1917 na Alliance, Ohio

[Plachi na página 23]

Huntu cu Ralph, dilanti dje trailer cu el a traha

[Plachi na página 24]

Huntu cu mi dos yunan awe