Informe di Proclamadonan di Reino

Nan Fe A Ser Recompensá

APOSTEL Pablo tabata un homber cu un fe sobresaliente, i el a animá su compañeronan creyente pa cultivá e mésun clase di fe. El a bisa: “Esun cu ta acudí na Dios mester kere cu e ta existí i cu e ta bira e recompensador di esnan cu ta busk’é cu empeño.” (Hebreonan 11:6) E siguiente experencianan for di Mozambique ta mustra con Jehova ta recompensá fe fuerte i contestá oracion sincero.

• Un ruman muher biuda dje provincia nort Niassa tabata preocupá con e cu su seis yunan lo por a logra asistí n’e Congreso di Distrito “Dios Su Caminda di Bida.” Su único fuente di entrada tabata bendementu di cos n’e marshe local. Pero ora e fecha di congreso a yega, e tabatin cen pa cumpra karchi di trein pa bai so, p’e i su famia. Sin embargo, el a dicidí di confia cu Jehova ta proveé i a sigui padilanti cu su plannan pa ta presente n’e congreso.

El a subi trein huntu cu su seis yunan. Durante e biahe e cobradó a bin pidié su karchi. Ora el a mira e ruman su badge, el a puntr’é ta ki clase di identificacion esei tabata. E ruman muher a cont’é cu e badge a identifik’é como un delegado dje congreso di distrito di Testigonan di Jehova. “Unda lo tene e congreso aki?” e cobradó a puntra. Despues cu el a haña sa cu e congreso tabata na Nampula, e siguiente provincia cu a keda 300 kilometer leu, sorprendentemente el a cobra e ruman solamente mitar dje prijs normal dje karchi! Anto pa e mitar cen sobrá el a duna e ruman i su famia karchi pa nan biahe di regreso. Ki felis e ruman tabata cu el a pone su confiansa den Jehova!—Salmo 121:1, 2.

• Pa mas of ménos 25 aña, un muher masha religioso tabata haci oracion na Dios pa mustr’é e manera corecto pa ador’é. E iglesia na cua e tabata asistí tabata combiná ceremonianan religioso cu ritonan tradicional, i e señora tabata duda cu e forma di adoracion aki tabata agradá Dios.

E ta relatá: “Semper mi a corda e palabranan di Jesus registrá na Mateo 7:7: ‘Sigui pidi, i lo duna na boso; sigui busca, i boso lo haña; sigui bati, i lo habri pa boso.’ Cu e texto di Bijbel aki na mente, mi tabata pidi Dios regularmente den oracion pa guia mi n’e berdad. Un dia e pastor di nos misa a pidi tur hende cu tabata traha den e marshe local pa trece p’e un cierto montante di cen i algun di nan productonan, pa asina e por a duna nan un bendicion. Mi a haña cu e peticion aki no tabata cuadra cu Bijbel, p’esei mi no a trece nada. Ora e pastor a mira cu mi no a trece un ‘ofrenda,’ el a cuminsá insultá mi dilanti tur e miembronan di iglesia. E dia ei mi a realisá cu esaki no tabata e manera cu Dios kier pa nos ador’é, i mi a bandoná e iglesia. Miéntras tantu, mi a sigui persistí den oracion pa haña e berdad.

Por fin, mi a tuma un curashi i a tuma contacto cu un famia cu ta Testigo di Jehova. El a ofrecé mi un tratado, i ora mi tabata les’é mi a realisá mesora cu Dios tabata contestando mi oracionnan. Cu tempu, mi compañero tambe a cuminsá apreciá berdadnan bíblico, i nos a legalisá nos matrimonio. Sin embargo, despues mi esposo a bira hopi malu. Pero te cu su morto, el a animá mi pa perseverá den e caminda dje berdad pa asina nos por topa atrobe den Paradijs.

Semper lo mi keda gradicidu na Jehova cu el a contestá mi oracionnan i a mustra mi e manera corecto pa ador’é. Mi oracion pa mira tur mi ocho yunan bira sirbidónan dedicá di Jehova, tambe a ser contestá.”