Nos Ta e Clase Cu Tin Fe

Compartiendo e Speransa Cristian na Senegal

PISCÁ ta un cuminda básico desde antigwedad. Hende tin miles di aña ta pisca den laman, lago i riunan dje tera. Algun dje apostelnan di Jesucristo tabata piscadó den e laman di Galilea. Sin embargo, Jesus a introducí un otro clase di piscamentu na nan. Esaki tabata un piscamentu spiritual cu lo a beneficiá no solamente e piscadó, sino e piscá mes tambe.

Relacioná cu esaki, Jesus a bisa Pedro e piscadó: “Djawor padilanti lo bo pisca hende bibu.” (Lucas 5:10) Awe e clase di piscamentu aki ta tuma lugá den mas cu 230 pais, incluso na Senegal. (Mateo 24:14) Den e pais aki, “piscadó di hende” di nos tempu moderno ta compartí cu curashi nan speransa cristian cu otronan.—Mateo 4:19.

Senegal ta situá te n’e punta mas west di Africa. E ta extendé for dje área di desierto yen di santu na rand di Sahara n’e parti nort, te na e selvanan húmedo den e region sur di Casamance. Senegal ta un pais caminda tantu e bientu cayente di desierto como e brisa friu i refrescante di Atlántico ta supla. Tin mas cu nuebe miyon hende ta biba einan. Habitantenan di Senegal ta conocí pa nan hospitalidad. Mayoria di nan no ta cristian. Hopi di nan ta wardadó di carné, miéntras otronan ta cria baca, camel i cabritu. Tambe tin cunukero cu ta cultivá pinda, catuna i aros. Sí, tin piscadó tambe cu ta trece reda yen di piscá for di océano Atlántico i di diferente riu grandi cu ta crusa dor di e pais. E negoshi di piscá ta hunga un papel importante den e economia di Senegal. De facto, nan famoso plato nacional ta ceebu jën, un plato sabroso di aros, piscá i berdura.

“Piscadó di Hende”

Na Senegal tin 863 predicadó celoso dje Reino di Dios. Piscamentu spiritual a cuminsá einan na principio di añanan ’50. Na 1965 a habri un oficina di sucursal di Sociedad Watch Tower na e capital Dakar. Misioneronan “piscadó” a cuminsá yega for di hopi pais lehano. Trabou di “piscamentu” a cuminsá i compartimentu dje speransa cristian na Senegal a bai dilanti cu pasonan firme. Cu tempu a traha facilidadnan di sucursal nobo na Almadies, na rand di Dakar, i a dedicá nan na Jehova na juni 1999. Ki un tempu di goso!

E Desafio di Aceptá e Berdad

Cu regularidad e rumannan ta bishitá hende cu ta varia masha hopi for di otro pa loke ta nan antecedente, i algun a reaccioná faborabel n’e mensahe di speransa hañá den e Palabra di Dios. Maske hopi di nan no tin conocimentu di Bijbel, nan ta keda contentu pa sa cu pronto Jehova Dios lo cumpli cu loke el a primintí fiel profetanan di antigwedad.

Hopi biaha bo tin mester di curashi pa para firme na fabor di principionan cristian, foral ora tradicion i custumbernan di famia ta enbolbí. Por ehempel, poligamia ta ser practicá ampliamente na Senegal. Considerá e caso di un homber cu tabatin dos esposa ora el a cuminsá studia Bijbel. Lo e tabatin e curashi pa aceptá e berdad cristian i armonisá su bida cu e rekisito bíblico pa ta esposo di un solo esposa? (1 Timoteo 3:2) I lo e keda cu e esposa di su hubentud, esta, e señora cu el a casa cuné promé? Esei ta loke el a haci, i awor e ta sirbi como un anciano celoso den un dje congregacionnan grandi den e teritorio di Dakar. Su promé esposa tambe a aceptá e berdad huntu cu tur su 12 yunan, 10 di su promé esposa i 2 di su segundo ex-casá.

Analfabetismo por ta un otro obstáculo pa aceptá e speransa cristian. Esaki ta nificá cu un persona cu no por skirbi ni lesa no por aceptá e berdad i practik’é? Absolutamente cu no. Considerá e ehempel di Marie, un mama cu ta traha duru i cu tin ocho yu chikitu. Mesora el a mira e importancia di considerá tur dia un texto di Bijbel cu su yunan promé cu nan bai scol i e bai trabou. Pero con e por a haci esaki, ya cu e no por a lesa? Tur mainta trempan, e tabata coge e foyeto  Examinando e Scritura Diariamente i a para riba e caminda di santu dilanti su cas. E tabata puntra e hendenan cu pasa eibanda si nan por lesa. Ora e haña un persona cu por lesa, e ta dun’é e foyeto i bis’é sinceramente: “Mi no por lesa, por fabor, bo por lesa e parti aki pa mi awe?” E ta scucha atentamente miéntras e persona ta lesa. Despues e ta yama e persona aki danki i mesora e ta drenta su cas i ta tene un consideracion animá dje texto cu su yunan promé cu nan bai scol!

Tur Clase di Hende Ta Reaccioná

Na Senegal, bo por haña hende riba caya ta bende piscá i berdura of fruta den marshe of sintá bou di un palu grandi di baobab ta bebe ataya, un te berde cu ta smak un poco marga. Decididu pa compartí e bon nobo cu tur hende cu nan topa, dos ruman homber a papia cu un homber desabilitá cu tabata pidi limosna riba caya. Despues di a cumind’é nan a bisa: “Hopi hende ta duna bo cen, pero nan no ta para combersá. Nos a bini pa papia cu bo di algu hopi importante cu tin di haber cu bo futuro.” E limosnero a keda sorprendí. E rumannan a sigui: “Nos kier a haci bo un pregunta. Di con segun bo, tin asina tantu sufrimentu riba mundu?” E limosnero a contestá: “Esei ta boluntad di Dios.”

Anto e rumannan a razoná cuné for dje Scritura i a splik’é loke Revelacion 21:4 ta bisa. E limosnero a keda profundamente emocioná debí n’e mensahe di speransa aki, i debí n’e echo cu tabatin hende suficientemente interesá den dje pa para i papia cuné tocante Bijbel. Su wowonan a yena cu awa. En bes di pidi nan cen, e limosnero a roga e rumannan pa nan bai cu tur e placa cu e tabatin den su bleki di pidi limosna! El a insistí asina tantu cu esaki a hala atencion di tur hende cu a pasa eibanda. Ta cu masha hopi dificultad e rumannan a logra persuadié p’e keda cu su cen. Por fin el a bai di acuerdo, pero el a insistí pa nan bolbe bishit’é.

E universidad grandi na Dakar tambe ta contribuí n’e cantidad di piscá den e net di pisca spiritual. Einan un studiante di medicina, Jean-Louis, a cuminsá studia Bijbel. El a aceptá e berdad masha lihé, a dedicá su bida na Jehova i bautisá. Su deseo tabata pa sirbi Dios den e sirbishi di pionero di tempu completo, pero el a disfrutá di su studio di medicina tambe. Debí n’e combenio cu e tabatin cu su pais natal, e mester a completá su estudio. Pero, el a cuminsá traha pionero auxiliar n’e mésun tempu. Djis despues cu el a ricibí su diploma como un dokter cualificá, el a haña invitacion pa sirbi den un cas di Betel grandi na Africa como e dokter di cas. Un otro hóben cu rumannan a drenta den contacto cuné n’e Universidad di Dakar, tambe ta sirbi awor huntu cu e famia di Betel den su pais natal.

Piscamentu spiritual na Senegal ta recompensador en berdad. E hendenan ta apreciá literatura bíblico di Testigonan di Jehova mashá i awor nan ta ser producí den e idioma local wolof. Dor di tende e bon nobo den nan lenga materno, hopi hende sincero a ser animá pa reaccioná cu gratitud. Cu Jehova su bendicion, sin duda lo coge hopi mas piscá simbólico, segun cu Senegal su celoso “piscadónan di hende” ta sigui compartí e speransa cristian fielmente i cu curashi.

[Mapa/Plachi na página 31]

(Pa e teksto den su formato kompleto, wak e publikashon)

SENEGAL

[Plachi]

Compartiendo e speransa cristian na Senegal

[Rekonosementu]

Mountain High Maps® Copyright © 1997 Digital Wisdom, Inc.