E Manera Cu Jesucristo Por Yuda Nos

LOKE Jesucristo a haci pa yuda hende tempu cu e tabata riba tera tabata maraviyoso. Esaki tabata asina cierto cu, despues di a conta tocante vários suceso di Jesus su bida, un testigo ocular a bisa: “En realidad, tin hopi otro cos mas cu Jesus a haci, i mi ta suponé cu, si un dia nan ser skirbí cu tur detaye, e mundu mes lo no por contené e rolnan skirbí.” (Juan 21:25) Siendo cu Jesus a haci asina tantu riba tera, kisas nos ta puntra nos mes: ‘Con e por ta nos yudante den shelu? Nos por saca beneficio for di Jesus su tierno compasion awor?’

E contesta ta masha conmovedor i trankilisante. Bijbel ta bisa nos cu Cristo a drenta “den shelu mes, awor pa presentá dilanti dje persona di Dios pa nos.” (Hebreonan 9:24) Kico el a haci pa nos? Apostel Pablo ta splica: “[Cristo] a drenta, no, no cu sanger di cabritu i di torito, sino cu su mes sanger, una bes pa semper den e lugá santu [“shelu mes”] i a obtené liberacion eterno pa nos.”—Hebreonan 9:12; 1 Juan 2:2.

Esta un bon noticia! En bes di pone fin na Jesus su obra maraviyoso na fabor di hende, su subimentu na shelu a permitié haci asta mas pa humanidad. Esei ta pasobra Dios, den su gran bondad inmerecí, a nombra Jesus pa sirbi como “un sirbidó público”—un sumo sacerdote—“na man drechi dje trono dje Mahestad den shelu.”—Hebreonan 8:1, 2.

“Un Sirbidó Público”

Jesus anto lo ta un sirbidó público den shelu pa humanidad. Lo e haci un trabou manera esun cu e sumo sacerdote di Israel a haci na fabor di Dios su adoradónan den tempu antiguo. I kico e trabou ei tabata? Pablo ta splica: “Tur sumo sacerdote ta ser nombrá pa ofrecé tantu ofrenda como sacrificio; pues tabata necesario pa esun aki [Jesucristo cu a subi na shelu] tambe tin algu pa ofrecé.”—Hebreonan 8:3.

Loke Jesus tabatin pa ofrecé tabata muchu mas superior cu loke e sumo sacerdote antiguo a ofrecé. “Si e sanger di cabritu i di torito” por a trece un grado di limpiesa spiritual na Israel di antigwedad, “cuantu mas e sanger di e Cristo . . . [lo] haci nos concenshi limpi di obranan morto pa nos por rindi sirbishi sagrado na e Dios bibu?”—Hebreonan 9:13, 14.

Jesus ta un sirbidó público sobresaliente tambe, pasobra el a ricibí inmortalidad. Den Israel di antigwedad “hopi tabatin cu bira sacerdote un tras di otro pasobra morto a stroba nan di sigui como tal.” Pero kico di Jesus? Pablo ta skirbi: “Su sacerdocio ta sin ningun sucesor. P’esei tambe e por salba completamente  esnan cu ta acercá Dios mediante dje, pasobra e semper ta bibu pa boga pa nan.” (Hebreonan 7:23-25; Romanonan 6:9) Sí, nos tin na Dios su man drechi den shelu, un sirbidó público cu ‘semper ta bibu pa boga pa nos.’ Djis pensa kico esei ta nificá pa nos awor!

Tempu cu Jesus tabata riba tera, hende a basha bini cerca dje pa yudansa, i tin bes nan a biaha distancia grandi pa probechá di su yudansa. (Mateo 4:24, 25) Den shelu, Jesus ta fácilmente accesibel pa hende di tur nacion. For di su posicion den shelu, semper e ta disponibel como un sirbidó público.

Ki Sorto di Sumo Sacerdote Jesus Ta?

E cuadro cu e relatonan di Evangelio ta pinta di Jesucristo no ta laga duda tocante su disponibilidad pa yuda i tierno compasion. Cuantu el a sacrificá su mes! Na mas cu un ocasion, ora e cu su disipelnan tabata trata di haña e sosiegu cu tantu nan tabatin mester di dje, hende a interumpí Jesus su privacidad. En bes di sinti cu a priv’é di momentonan precioso di pas i trankilidad, “el a sinti duele” dje hendenan cu tabata busca su yudansa. Asta ora Jesus tabata cansá, i tabatin hamber i sed, “el a ricibí nan amablemente” i tabata dispuesto pa laga su cuminda un banda si e por a yuda pecadónan sincero.—Marco 6:31-34; Lucas 9:11-17; Juan 4:4-6, 31-34.

Conmoví cu duele, Jesus a dal pasonan práctico pa satisfacé hende su necesidad físico, emocional i spiritual. (Mateo 9:35-38; Marco 6:35-44) Ademas, el a siña nan haña alivio i consuelo duradero. (Juan 4:7-30, 39-42) Por ehempel, ki atractivo su invitacion personal ta: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma.”—Mateo 11:28, 29.

Jesus su amor pa hende tabata asina grandi cu finalmente el a entregá su bida pa humanidad pecaminoso. (Romanonan 5:6-8) En coneccion cu esaki, apostel Pablo a razoná: “[Jehova Dios] Esun cu no a spar ni su mes Yu sino a entregu’é pa nos tur, pakico lo e no duna nos tambe bondadosamente huntu cuné tur otro cos? . . . Cristo Jesus ta esun cu a muri, sí, mas bien esun cu a ser lantá for di morto, cu ta n’e man drechi di Dios, cu tambe ta boga pa nos.”—Romanonan 8:32-34.

Un Sumo Sacerdote Cu Por Comprendé pa Hende

Como ser humano, Jesus a pasa den hamber, sed, cansancio, angustia, dolor i morto. E stres i preshonnan cu el a wanta a ekip’é den un manera masha único pa sirbi como Sumo Sacerdote pa humanidad cu ta pena. Pablo a skirbi: “[Jesus] a keda obligá di bira mescos cu su ‘rumannan’ den tur sentido, p’e por a bira un sumo sacerdote misericordioso i fiel den cosnan cu tin di haber cu Dios, pa asina ofrecé un sacrificio di reconciliacion p’e picánan dje pueblo. Pasobra dor cu e mes a sufri ora el a ser poné na prueba, e por duna yudansa na esnan cu ta ser poné na prueba.”—Hebreonan 2:17, 18; 13:8.

Jesus a demostrá cu e ta cualificá i tambe dispuesto pa yuda hende hala mas cerca Dios. Pero esaki ta nificá cu e tin cu persuadí un Dios severo i sin misericordia cu no ta dispuesto na pordoná? Claro cu no, pasobra Bijbel ta sigurá nos cu “Jehova . . . ta bon i cla pa pordoná.” E ta bisa tambe: “Si nos confesá nos picánan, e ta fiel i hustu pa pordoná nos nos picánan i haci nos limpi di tur inhusticia.”  (Salmo 86:5; 1 Juan 1:9) En realidad, Jesus su palabranan i obranan tierno ta reflehá e compasion, misericordia i amor di su Tata.—Juan 5:19; 8:28; 14:9, 10.

Con Jesus ta trece alivio pa pecadó repentí? Dor di yuda nan haña goso i satisfaccion den nan esfuersonan sincero pa agradá Dios. Ora Pablo a skirbi compañeronan cristian ungí, el a resumí e situacion bisando: “P’esei, siendo cu nos tin un gran sumo sacerdote cu a pasa dor di shelu, Jesus e Yu di Dios, laga nos tene gará nos confesion di dje. Pasobra nos tin como sumo sacerdote no unu cu no por compadecé cu nos debilidadnan, sino unu cu a ser probá den tur sentido mescos cu nos mes, pero sin picá. P’esei, laga nos acercá e trono di bondad inmerecí cu frankesa di expresion, pa nos obtené misericordia i haña bondad inmerecí pa yudansa n’e tempu apropiado.”—Hebreonan 4:14-16.

“Yudansa n’e Tempu Apropiado”

Ma kico nos por haci ora nos haña nos confrontá cu problema cu nos ta sinti ta mas grandi cu nos por trata—malesa serio, e carga aplastante di culpa, desanimacion total i depresion? Nos por haci uso di net e provision cu Jesus mes a dependé regularmente ariba, esta, e privilegio precioso di oracion. Por ehempel, durante e anochi promé cu el a duna su bida pa nos, “el a sigui haci oracion cu mas fervor; i su sodó a bira manera gota di sanger cu tabata cai na suela.” (Lucas 22:44) Sí, Jesus sa kico ta nificá haci oracion na Dios cu hopi intensidad. El “a ofrecé súplica i tambe peticion na Esun cu por a salb’é for di morto, cu sclamacion fuerte i lágrima, i el a ser tendé faborablemente pa su temor di Dios.”—Hebreonan 5:7.

Jesus sa con importante hende ta haña pa ser “tendé faborablemente” i fortalecí. (Lucas 22:43) Ademas, el a primintí: “Si boso pidi e Tata cualkier cos, lo e dun’é na boso den mi nomber. . . . Pidi i boso lo haña, pa boso goso ser hací completo.” (Juan 16:23, 24) P’esei, nos por haci peticion na Dios cu e confiansa cu lo e permití su Yu aplicá su autoridad i e balor di su sacrificio di rescate na nos fabor.—Mateo 28:18.

Nos por ta sigur cu den su capacidad celestial, Jesus lo percurá e tipo di yudansa corecto n’e tempu apropiado. Por ehempel, si nos a cometé un picá cu nos ta lamentá sinceramente, nos por saca consuelo for dje siguransa cu “nos tin un yudante cerca e Tata, Jesucristo, un hustu.” (1 Juan 2:1, 2) Nos Yudante i Consolador den shelu lo roga pa nos pa asina nos  oracionnan den su nomber i na armonia cu e Scritura ser contestá.—Juan 14:13, 14; 1 Juan 5:14, 15.

Mustra Aprecio p’e Yudansa di Cristo

Mas ta enbolbí cu solamente haci peticion na Dios mediante su Yu. Cu e balor di su sacrificio di rescate, “Cristo, via compra” a bira, den un sentido, “e doño cu a cumpra” e rasa humano. (Galationan 3:13; 4:5; 2 Pedro 2:1) Nos por mustra nos gratitud pa tur loke Cristo ta haci pa nos dor di reconocé cu e ta nos doño i respondé gustosamente na su invitacion: “Si un persona kier sigui mi, lagu’é nenga su mes i tuma su staca di tormento dia tras dia i sigui mi continuamente.” (Lucas 9:23) ‘Nenga nos mes’ no ta un simpel declaracion verbal di cu awor e ta nos doño. Al fin i al cabo, Cristo “a muri pa tur afin cu esnan cu ta biba no biba mas pa nan mes, sino pa esun cu a muri pa nan.” (2 Corintionan 5:14, 15) P’esei, aprecio p’e rescate lo tin un efecto profundo riba nos perspectiva, metanan i estilo di bida. E echo cu pa semper nos lo keda debe “Cristo Jesus, cu a duna su mes pa nos,” mester motivá nos pa siña mas tocante dje i su Tata amoroso, Jehova Dios. Tambe nos lo mester kier crece den fe, biba na armonia cu Dios su normanan beneficioso i keda “celoso pa obranan excelente.”—Tito 2:13, 14; Juan 17:3.

E congregacion cristian ta e canal mediante cua nos ta ricibí alimento spiritual, animacion i guia oportuno. (Mateo 24:45-47; Hebreonan 10:21-25) Por ehempel, si cualkier hende ta spiritualmente enfermo, nan por “yama e ancianonan [nombrá] dje congregacion.” Santiago ta agregá e siguransa: “I e oracion di fe lo cura esun enfermo, i Jehova lo lant’é. Tambe, si el a cometé picá, lo e ser pordoná.”—Santiago 5:13-15.

Pa ilustrá: Un homber cu ta sinta un castigu di prizon na Sur Africa a skirbi un anciano di congregacion pa expresá aprecio pa “tur e Testigonan di Jehova cu ta haciendo e bon trabou cu Jesucristo a cuminsá di yuda hende haci esfuerso  den direccion dje Reino di Dios.” Anto el a skirbi: “Mi tabata masha contentu di por a ricibí bo carta. Bo interes den mi liberacion spiritual a toca mi profundamente. Mas motibu ainda pa mi cuminsá haci caso dje yamada di Jehova Dios pa repentí. Pa 27 aña largu mi a trompecá i dualu den e scuridad di picá, engaño, cosnan ilícito, prácticanan inmoral i religionnan cuestionabel. Despues cu mi a keda introducí na Testigonan di Jehova, mi ta sinti cu finalmente mi a haña e caminda—e caminda corecto! Tur loke mi tin cu haci ta siguié.”

Mas Yudansa den Futuro Cercano

E condicionnan di mundu cu cada bes ta bai mas atras ta evidencia claro cu nos ta bibando den e periodo di tempu crucial cu mester a bini djis promé cu “e tribulacion grandi” dal aden. Awor aki mes, un multitud grandi for di tur nacion, tribu, pueblo i lenga ta ‘laba nan pañanan largu i haci nan blancu den e sanger dje Lamchi.’ (Revelacion 7:9, 13, 14; 2 Timoteo 3:1-5) Dor di ehercé fe den Jesus su sacrificio di rescate, nan ta ricibí pordon di nan picánan i ta ser yudá pa drenta den un relacion íntimo cu Dios i, de facto, bira su amigu.—Santiago 2:23.

E Lamchi, Jesucristo, “lo pastoreá [sobrebibientenan dje tribulacion grandi] i lo guia nan na fonteinnan di awa di bida. I Dios lo seca tur lágrima di nan wowo.” (Revelacion 7:17) E ora ei Cristo lo completá su funcion como Sumo Sacerdote. Lo e yuda tur amigu di Dios beneficiá plenamente for dje “fonteinnan di awa di bida” den sentido spiritual, físico, mental i emocional. Anto loke Jesus a cuminsá na aña 33 E.C. i loke el a sigui haci for di shelu desde e tempu ei, lo ser hibá na perfeccion.

P’esei, nunca entregá den mustra aprecio profundo pa tur loke Dios i Cristo a haci—i ta haciendo—pa nos. Apostel Pablo a urgi: “Semper alegrá den Señor. . . . No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”—Filipensenan 4:4, 6, 7.

Tin un manera significativo pa bo mustra bo aprecio pa Jesucristo, nos Yudante den shelu. Riba diarason, 19 di april 2000, despues cu solo baha, Testigonan di Jehova rond mundu lo bini huntu pa celebrá e Memorial dje morto di Cristo. (Lucas 22:19) Esaki lo ta un oportunidad pa profundisá bo aprecio p’e sacrificio di rescate di Cristo. Bo ta keda cordialmente invitá pa asistí i tende con Dios su areglo maraviyoso pa salbacion mediante Cristo por beneficiá bo pa eternidad. Por fabor, chek cu Testigonan di Jehova local pa e lugá i ora exacto dje reunion special aki.

[Plachi na página 7]

Jesus sa kico ta nificá haci oracion intenso na Dios

[Plachinan na página 8]

Cristo lo yuda nos enfrentá problemanan mas grandi cu loke nos so por atendé

[Plachi na página 9]

Cristo ta yuda nos mediante ancianonan amoroso