‘O Dios, Manda Bo Lus’

“Manda bo lus i bo berdad. Cu esakinan mes guia mi.”—SALMO 43:3.

1. Con Jehova ta revelá su propósitonan?

JEHOVA ta mustra hopi consideracion den e manera cu e ta haci su propósitonan conocí na su sirbidónan. En bes di revelá e berdad den un tiru cu un rayo di lus muchu skerpi, e ta iluminá nos progresivamente. Bo por compará nos biahe trabahoso den bida cu un caminata largu cu un hende ta haci riba un caminda di cabritu. E ta cuminsá mainta trempan i no ta mira casi nada. Ora solo cuminsá sali lentamente na horizonte, e biahero por distinguí algun cos di su alrededor. E resto e ta  mira vago asina. Pero segun cu solo ta sigui sali, e por mira mas i mas leu. Asina ta cu e lus spiritual cu Dios ta percurá. Unu-unu e ta laga nos dicerní algun cos. Jesucristo, e Yu di Dios, a percurá iluminacion spiritual den un manera similar. Laga nos considerá con Jehova a iluminá su pueblo den antigwedad i con e ta haci esei awe.

2. Den ki manera Jehova a percurá iluminacion den tempunan pre-cristian?

² Probablemente e compositornan di Salmo 43 tabata e yunan di Core. Como levita, nan tabatin e privilegio di siña e pueblo e Ley di Dios. (Malakías 2:7) Ta claro cu ta Jehova tabata nan Magnífico Instructor, i nan a acudí na dje como e Fuente di tur sabiduria. (Isaías 30:20) “O Dios, . . . manda bo lus i bo berdad,” e salmista a pidi den oracion. “Cu esakinan mes guia mi.” (Salmo 43:1, 3) Tanten cu e israelitanan tabata fiel na dje, Jehova a siña nan su camindanan. Siglonan despues, Jehova a faborecé nan cu un clase di lus i berdad masha remarcabel. Dios a haci esei ora el a manda su Yu na tera.

3. Den ki manera e siñansa di Jesus a pone e hudiunan na prueba?

³ Como e homber Jesucristo, e Yu di Dios tabata “e lus di mundu.” (Juan 8:12) El a siña hende “hopi cos usando ilustracion,” esta, cos nobo. (Marco 4:2) El a bisa Poncio Pilato: “Mi reino no ta parti dje mundu aki.” (Juan 18:36) Esei tabata un idea nobo pa un romano i sigur pa hudiunan nacionalista, pasobra nan a pensa cu e Mesías lo a derotá e Imperio Romano i restorá Israel na su gloria anterior. Jesus tabata reflehá lus for di Jehova, pero su palabranan no a agradá gobernantenan hudiu cu “a stima e gloria di hende mas cu asta e gloria di Dios.” (Juan 12:42, 43) Hopi hende dje pueblo a scoge pa pega na nan tradicion humano en bes di aceptá lus i berdad spiritual for di Dios.—Salmo 43:3; Mateo 13:15.

4. Con nos por sa cu e disipelnan di Jesus lo a sigui crece den comprendimentu?

⁴ Sin embargo, algun homber i muher di curason onrado a aceptá cu goso e berdad cu Jesus a siña. Nan a progresá bon den nan comprendimentu dje propósitonan di Dios. Ma segun cu e bida terenal di nan Maestro tabata yegando su fin, ainda nan tabatin hopi mas di siña. Jesus a bisa nan: “Mi tin hopi cos pa bisa boso ainda, pero boso no por soportá nan actualmente.” (Juan 16:12) Sí, e disipelnan lo a sigui crece den comprendimentu dje berdad di Dios.

E Lus Ta Sigui Briya

5. Ki pregunta a surgi den e promé siglo, i ken tabatin e responsabilidad di resolv’é?

⁵ Despues di Jesus su morto i resureccion, lus for di Dios a briya mas cla cu nunca promé. Den un vision cu Pedro a haña, Jehova a revelá cu djei padilanti gentilnan incircuncidá por a bira siguidó di Cristo. (Echonan 10:9-17) Esei sí tabata un revelacion! No obstante, despues a lanta un pregunta: Jehova a exigí p’e gentilnan ei circuncidá despues cu nan a bira cristian? E vision no a contestá e pregunta ei, i e asuntu a bira un tópico di debate cayente entre cristiannan. Mester a resolvé e cuestion aki p’e no caba cu nan unidad precioso. P’esei, “e apostelnan i e ancianonan a reuní huntu [na Jerusalem] pa considerá e asuntu aki.”—Echonan 15:1, 2, 6.

6. Ki procedura e apostelnan i ancianonan a sigui ora nan a considerá e asuntu di circuncision?

⁶ Con esnan presente n’e reunion ei por a determiná kico tabata e boluntad di Dios p’e gentilnan creyente? Jehova no a manda un angel pa dirigí e discusionnan, ni e no a duna esnan presente un vision. Tog, e apostelnan i ancianonan no tabata completamente sin guia. Nan a considerá e testimonio di cierto cristiannan hudiu cu a mira con Dios a cuminsá trata cu hende dje nacionnan, dramando su spiritu santu riba gentil incircuncidá. Tambe nan a busca guia den e Scritura. Como resultado, disipel Santiago a duna un recomendacion basá riba un texto iluminador. Ora nan a meditá riba e evidencia, e boluntad  di Dios a bira bisto. Hende dje nacionnan no tabatin nodi circuncidá pa por haña Jehova su aprobacion. E apostelnan i ancianonan no a perde tempu i a pone e decision por escrito pa esei por a guia nan compañeronan cristian.—Echonan 15:12-29; 16:4.

7. Den ki manera e cristiannan di promé siglo tabata progresivo?

⁷ Distinto di lider religioso hudiu, cu a pega na tradicion di nan antepasadonan, mayoria cristian hudiu a alegrá ora nan a ricibí e comprendimentu nobo remarcabel aki di Dios su propósito en cuanto hende dje nacionnan, maske cu pa aceptá esei nan mester a cambia nan punto di bista relacioná cu gentil en general. Jehova a bendicioná nan spiritu humilde, i “e congregacionnan a sigui ser hací firme den fe i aumentá na cantidad dia tras dia.”—Echonan 15:31; 16:5.

8. (a) Con nos por sa cu por a spera mas lus segun cu e promé siglo tabata yegando su fin? (b) Ki preguntanan relevante nos lo considerá?

⁸ Lus spiritual a sigui briya den henter e promé siglo. Pero Jehova no a revelá tur aspecto di su propósito n’e promé cristiannan. Apostel Pablo a bisa compañeronan cristian di promé siglo: “Actualmente nos ta mira pa medio di un spiel di metal un forma vago.” (1 Corintionan 13:12) Un spiel asina no tabatin e mihó refleho. Na principio anto, comprendimentu di lus spiritual lo tabata limitá. Despues di morto dje apostelnan, pa un tempu e lus a bira dòf, pero den tempunan recien conocimentu bíblico a bira abundante. (Daniel 12:4) Con Jehova ta iluminá su pueblo awe? I con nos mester respondé ora e amplia nos comprendimentu dje Scritura?

E Lus Ta Bira Mas i Mas Cla

9. Ki método único i eficas di studia Bijbel e promé Studiantenan di Bijbel a usa?

⁹ Den tempu moderno, e promé berdadero rayo di lus a cuminsá aparecé den e último cuartal di siglo 19 ora un grupo di homber i muher cristian a cuminsá un studio sincero dje Scritura. Nan a desaroyá un método práctico pa studia Bijbel. Un hende tabata lansa un pregunta; anto e grupo tabata analisá tur e textonan di Bijbel relacioná cuné. Ora un versículo di Bijbel a parce di contradicí un otro, e cristiannan sincero aki a haci esfuerso pa cuadra nan. Distinto dje lidernan religioso dje tempu ei, e Studiantenan di Bijbel (manera Testigonan di Jehova tabata yamá e tempu ei) tabata determiná pa laga e Scritura Santu, i no tradicion  of doctrina di hende, guia nan. Despues cu nan a considerá tur evidencia bíblico disponibel, nan tabata traha un registro di nan conclusionnan. Den e manera ei nan a clarificá nan comprendimentu di hopi doctrina básico di Bijbel.

10. Ki yudansa útil pa studia Bijbel Charles Taze Russell a skirbi?

¹⁰ Un dje Studiantenan di Bijbel cu a sobresalí tabata Charles Taze Russell. El a skirbi un seri di seis volúmen útil pa studia Bijbel, titulá Studio den e Scritura. Ruman Russell tabatin intencion di skirbi un di shete volúmen, cu lo a splica e bukinan bíblico di Ezekiel i Revelacion. “Manera mi haña e clave,” el a bisa, “lo mi skirbi Volúmen Shete.” Pero, el a agregá: “Si Señor duna un otro hende e clave, é por skirbié.”

11. Ki coneccion tin entre momento oportuno i nos comprendimentu dje propósitonan di Dios?

¹¹ E declaracion ei di C. T. Russell ta ilustrá un factor importante den nos abilidad pa comprendé cierto pasashi di Bijbel—e momento oportuno. Ruman Russell tabata sa cu e no por a obligá e lus briya riba e buki di Revelacion mescos cu un hende ansioso pa cana no por pone solo sali promé cu su tempu.

Revelá—Pero na Dios Su Debido Tempu

12. (a) Ki ora por comprendé profecia di Bijbel mihó? (b) Ki ehempel ta mustra cu nos abilidad pa comprendé profecia di Bijbel ta dependé di Dios su orario? (Mira nota na pia di página.)

¹² Mescos cu ta te despues dje morto i resureccion di Jesus numa e apostelnan a comprendé hopi profecia relacioná cu e Mesías, awe ta despues cu un profecia di Bijbel cumpli cristiannan ta comprend’é den detaye completo. (Lucas 24:15, 27; Echonan 1:15-21; 4:26, 27) Revelacion ta un buki profético, pues nos mester spera di comprend’é mas cla segun cu e sucesonan cu e ta describí ta desaroyá. Por ehempel, C. T. Russell no por a comprendé e nificacion corecto dje bestia salbahe simbólico color scarlata mencioná na Revelacion 17:9-11, ya cu e organisacionnan cu e bestia ta representá, esta, e Liga di Nacionnan i Nacionnan Uní, no a ni existí sino te despues di su morto. *

13. Kico ta sosodé tin biaha ora Dios clara un cierto tema bíblico?

¹³ Ora e promé cristiannan a haña sa cu gentilnan incircuncidá por a bira compañeronan creyente, esei a hiba na un pregunta nobo relacioná cu e necesidad pa hende dje nacionnan circuncidá. Esaki a impulsá e apostelnan i ancianonan pa examiná di nobo henter e cuestion di circuncision. E mésun patronchi ta aplicabel awe. Tin biaha un rayo skerpi di lus riba un tema bíblico ta pone Dios su sirbidónan ungí, “e esclabo fiel i discreto,” bai examiná di nobo temanan relacioná cuné, manera e siguiente ehempel recien ta ilustrá.—Mateo 24:45.

14-16. Con un ahuste den nos punto di bista relacioná cu e tempel spiritual tin efecto riba nos comprendimentu di Ezekiel capítulo 40 pa 48?

¹⁴ Na 1971, e buki na ingles “E Nacionnan Lo Sa Cu Ami Ta Jehova”—Con? a presentá un splicacion dje profecia di Ezekiel. Un capítulo dje buki ei a considerá brevemente Ezekiel su vision di un tempel. (Ezekiel, capítulo 40 pa 48) E tempu ei, e enfoke tabata riba con Ezekiel su vision di tempel lo a cumpli den e mundu nobo.—2 Pedro 3:13.

¹⁵ Sin embargo, dos artículo publicá den E Toren di Vigilancia na spañó di 1 di juni 1973 [na ingles, 1 di december 1972], tabatin un efecto riba nos comprendimentu di Ezekiel su vision. Nan a trata e gran tempel spiritual cu apostel Pablo a describí den Hebreonan capítulo 10. E Toren di Vigilancia a splica cu e  compartimentu Santu i e patio interior dje tempel spiritual tin di haber cu e condicion dje ungínan na momento cu nan ta riba tera. Añanan despues, ora a revisá Ezekiel capítulo 40 pa 48, a dicerní cu mescos cu e tempel spiritual ta funcioná awe, asina e tempel cu Ezekiel a mira den vision tambe mester ta funcioná awe. Con asina?

¹⁶ Den Ezekiel su vision, ta mira sacerdotenan move rond den e pationan dje tempel segun cu nan ta sirbi e tribunan no-sacerdotal. Ta bisto cu e sacerdotenan aki ta representá e “sacerdocio real,” Jehova su sirbidónan ungí. (1 Pedro 2:9) Sin embargo, nan lo no ta sirbiendo den e patio dje tempel terenal durante henter e Reino di Mil Aña di Cristo. (Revelacion 20:4) Durante mayor parti dje periodo ei, si no ta tur, e ungínan lo ta sirbiendo Dios den e Santísimo dje tempel spiritual, “shelu mes.” (Hebreonan 9:24) Siendo cu ta mira e sacerdotenan drenta i sali e pationan dje tempel di Ezekiel, e vision ei lo mester ta cumpliendo awe, miéntras cu algun dje ungínan ainda ta riba tera. P’esei mes, e edicion di 1 di mart 1999 dje revista aki, a presentá un punto di bista revisá riba e tema aki. Asina, te na fin di siglo 20, Dios a drama lus spiritual riba Ezekiel su profecia.

Sea Dispuesto pa Ahustá Bo Punto di Bista

17. Ki ahustenan bo a haci den bo punto di bista personal desde cu bo a conocé e berdad, i con esakinan a beneficiá bo?

¹⁷ Ken cu kier conocé e berdad mester ta dispuesto pa “trece tur pensamentu bou di control pa hacié obediente na e Cristo.” (2 Corintionan 10:5) Esei no ta semper fácil, foral ora un punto di bista tin rais profundo. Por ehempel, promé cu bo a siña e berdad di Dios, kisas bo a gusta celebrá cierto dianan di fiesta religioso cu bo famia. Despues cu bo a cuminsá studia Bijbel, bo a realisá cu en realidad e celebracionnan aki ta di orígen pagano. Na promé instante, kisas bo no tabatin gana di aplicá loke bo a siña. Pero finalmente, amor pa Dios a resultá di ta mas fuerte cu emocion religioso, i bo a stop di participá den celebracionnan cu ta desagradá Dios. Jehova no a bendicioná bo decision?—Compará cu Hebreonan 11:25.

18. Con nos mester reaccioná ora nos comprendimentu dje berdad di Bijbel bira mas cla?

¹⁸ Semper nos ta beneficiá di haci cosnan na e manera di Dios. (Isaías 48:17, 18) Pues ora nos punto di bista di un pasashi bíblico keda clarificá, laga nos alegrá den e berdad cu ta progresando! Realmente, e echo cu continuamente nos ta ser iluminá, ta confirmá cu nos ta riba e caminda corecto. Ta “e caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.” (Proverbionan 4:18) Ta cierto cu actualmente nos ta mira “un forma vago” di algun aspecto di Dios su propósito. Pero ora Dios su debido tempu yega, nos lo mira e berdad den tur su bunitesa, basta nos a mantené nos pia firmemente establecí riba “e caminda.” Miéntras tantu, laga nos alegrá den e berdadnan cu Jehova a clarificá, sperando iluminacion riba esnan cu nos no ta comprendé bon cla ainda.

19. Den ki manera asina nos por mustra cu nos ta stima e berdad?

¹⁹ Con nos por demostrá nos amor p’e lus den un manera práctico? Un manera ta di lesa e Palabra di Dios regularmente, si ta posibel, tur dia. Abo tin un programa regular di  lesa Bijbel? E revistanan Toren di Vigilancia i Spierta! tambe ta duna nos un abundancia di alimento spiritual saludabel pa disfrutá di dje. Considerá tambe, e buki, foyeto i otro publicacionnan cu a ser prepará pa nos beneficio. I kico dje informenan animador dje actividadnan di predicacion di Reino cu ta ser publicá den e Anuario di Testigonan di Jehova?

20. Ki coneccion tin entre lus i berdad for di Jehova i nos asistencia na reunion cristian?

²⁰ Sí, na un manera maraviyoso Jehova a contestá e oracion expresá na Salmo 43:3. Na fin dje versículo ei, nos ta lesa: “Cu [bo lus i berdad] hiba mi na bo ceru santu i na bo magnífico tabernáculo.” Bo ta anhelá pa adorá Jehova huntu cu un multitud di otro persona? E instruccion spiritual presentá na nos reunionnan ta un manera importante cu Jehova ta iluminá nos awe. Kico nos por haci pa profundisá nos aprecio pa reunionnan cristian? Nos ta invitá bo pa huntu cu oracion bo considerá e tema aki den e siguiente artículo.

[Nota]

Bo Por Contestá?

• Pakico Jehova ta revelá su propósitonan di un manera progresivo?

• Con e apostelnan i ancianonan den Jerusalem a resolvé e cuestion di circuncision?

• Ki método di studia Bijbel e promé Studiantenan di Bijbel a adoptá, i pakico esaki tabata algu único?

• Ilustrá con lus spiritual ta ser revelá na Dios su debido tempu.

[Preguntanan di Estudio]

[Plachi na página 12]

Charles Taze Russell tabata sa cu lus lo a briya riba e buki di Revelacion na Dios su debido tempu