Un Homber Ehemplar Cu A Aceptá Coreccion

“CROCODILNAN di Zambia Ta Come 30 Hende pa Luna.” Asina un korant africano a informá algun aña pasá. Segun un zoólogo cu a capturá e reptilnan aki pa studia nan, “tabatin mester di 12 homber pa tene un crocodil.” Debí cu crocodil tin un rabu fuerte i un kakumbein poderoso, e por ta un animal spantoso!

Ta parce cu e Creador a referí na crocodil como “Leviatan,” ora el a usa e “rey riba tur bestia salbahe mahestuoso” aki pa siña su sirbidó Job un les importante. (Job 41:1, 34) Esaki a tuma lugá rond di 3.500 aña pasá den e tera di Uz, probablemente un caminda na nort Arabia. Segun Dios a describí e creacion aki, el a bisa Job: “Niun hende ta asina prufiá pa excit’é. I ken ta esun cu por mantené su mes firme mi dilanti?” (Job 41:10) Ki cierto esei ta! Si nos tin miedu di crocodil, cuantu mas nos mester tin miedu di papia contra Esun cu a cre’é! Job a mustra aprecio p’e les aki dor di confesá su eror.—Job 42:1-6.

Ora mencioná Job su nomber, kisas nos ta corda riba su ehempel fiel den soportá prueba. (Santiago 5:11) Eigenlijk, Jehova tabatin goso den Job asta promé cu su fe a ser poné na prueba severo. Na opinion di Dios, n’e tempu ei no tabatin “ningun manera e riba tera, un homber sin culpa i recto, temeroso di Dios i apartá di loke ta malu.” (Job 1:8) Esaki mester motivá nos pa siña mas tocante Job, ya cu esei lo yuda nos mira con nos tambe por agradá Dios.

Su Relacion cu Dios Tabata na Promé Lugá

Job tabata un homber ricu. Ademas di oro, e tabatin 7.000 carné, 3.000 camel, 500 buricu hembra, 1.000 baca i un cantidad grandi di sirbidó. (Job 1:3) Pero Job a confia den Jehova, no den rikesa. El a razoná: “Si mi a pone oro como mi siguridad, of mi a bisa oro: ‘Abo ta mi confiansa!’ Si mi tabatin custumber di alegrá pasobra mi tabatin hopi propiedad, i pasobra mi man a haña hopi cos . . . , esei tambe lo tabata un eror p’e atencion dje huesnan, pasobra lo mi a nenga e Dios  berdadero cu ta ariba.” (Job 31:24-28) Mescos cu Job, nos mester considerá un relacion íntimo cu Jehova Dios di hopi mas balor cu cos material.

Trato Hustu cu Próhimo

Con Job a trata su sirbidónan? Job su palabranan mes ta indicá cu nan a hañ’é un persona imparcial i acercabel: “Si mi tabatin custumber di rechasá e derecho di mi esclabo homber of di mi esclabo muher den nan caso den corte contra mi, anto kico mi por haci ora Dios lanta? I ora e pidi cuenta kico mi por respond’é?” (Job 31:13, 14) Job a apreciá Jehova su misericordia i p’esei el a trata su esclabonan cu misericordia. Ki un ehempel excelente, foral pa esnan cu tin e funcion di supervisá den e congregacion cristian! Nan tambe mester ta hustu, imparcial i acercabel.

Job a mustra interes tambe den esnan cu no ta miembro di su famia di cas. Revelando su interes den otro hende el a bisa: “Si mi tabatin custumber di retené esnan di condicion humilde di nan goso, i mi a laga wowo dje biuda faya, . . . si mi a move mi mannan p’aki p’aya contra e mucha homber huérfano di tata, ora mi a mira cu tabatin mester di mi yudansa den e porta, laga mi blat di scouder cai for di mi scouder, i laga mi propio man kibra for dje wesu di ariba.” (Job 31:16-22) Laga nos mustra e mésun consideracion pa esnan den nos congregacion cu nos sa ta pasando den dificultad.

Debí na su interes inegoista, Job a mustra hospitalidad na hende stranhero. P’esei, e por a bisa: “Ningun residente stranhero no tabata pasa anochi pafó; mi tabata tene mi portanan habrí pa caminda.” (Job 31:32) Ki un excelente ehempel esaki ta pa Dios su sirbidónan awe! Ora esnan recien interesá den berdad bíblico bini Salon di Reino, e manera hospitalario cu nos ricibí nan por contribuí na nan progreso spiritual. Claro cu superintendentenan biahero i otro cristiannan tambe tin mester di nos hospitalidad amoroso.—1 Pedro 4:9; 3 Juan 5-8.

Job tabatin e actitud corecto asta pa su enemigunan. E no a alegrá debí na calamidad cu lo por a bini riba un persona cu a odi’é. (Job 31:29, 30) Mas bien, e tabata dispuesto pa haci loke ta bon pa hende asina. Nos por mira esaki den e echo cu e tabata cla pa haci oracion pa su tres consoladónan falsu.—Job 16:2; 42:8, 9; compará cu Mateo 5:43-48.

Sexualmente Puru

Job tabata leal na su partner matrimonial, i nunca el a permití su curason desaroyá un cariño inapropiado pa un otro muher. Job a bisa: “Mi a cera un pacto cu mi wowo. Pues, con mi por mustra mi atento na un  bírgen? Si mi curason a laga su mes ser seducí pa cu un muher, i mi a keda loer n’e entrada mes di mi compañero, laga mi esposa mula pa un otro homber, i laga otro homber hinca rudia over di dje. Pasobra esei lo ta conducta relahá, i esei lo ta un eror pa atencion dje huesnan.”—Job 31:1, 9-11.

Job no a laga deseonan inmoral corumpí su curason. En bes di esei, el a sigui tras di un curso recto. Nada straño anto cu Jehova Dios tabatin goso den e homber fiel aki, kende a lucha contra tentacionnan inmoral!—Mateo 5:27-30.

Interesá den Spiritualidad di Su Famia

De bes en cuando, Job su yu hombernan a organisá bankete na cua tur Job su yu hombernan i yu muhernan tabata presente. Despues cu e dianan dje banketenan aki a pasa, Job tabata masha preocupá debí cu e tabatin miedu cu su yunan lo a peca contra Jehova den un manera of otro. Pues Job a tuma accion, pasobra e relato bíblico ta bisa: “Tabata sosodé cu ora e dianan di bankete a pasa e circuito completo cu Job tabata manda busca nan i santificá nan; i e tabata lanta mainta trempan i tabata ofrecé sacrificio kimá di acuerdo cu e cantidad di nan tur; pasobra, Job tabata bisa, ‘kisas mi yunan a peca i a maldicioná Dios den nan curason.’” (Job 1:4, 5) Esaki mester a inculcá den Job su miembronan di famia con interesá e tabata pa nan tin un temor respetuoso pa Jehova i cana den Su camindanan!

Awe, cabesnan di famia cristian mester instruí nan famia den e Palabra di Dios, Bijbel. (1 Timoteo 5:8) I sigur ta apropiado pa haci oracion pa miembronan di famia.—Romanonan 12:12.

El A Wanta Fielmente bou di Prueba

Mayoria lesadó di Bijbel ta conocí cu e pruebanan severo cu Job a pasa aden. Satanas e Diabel a sigurá cu bou di prueba Job lo a maldicioná Dios. Jehova a aceptá e reto aki, i sin tarda Satanas a trece calamidad riba Job. El a perde tur su bestianan. Pió ainda, tur su yunan a muri. Djis despues di esei, Satanas a dal Job cu blufein maligno for di cabes te pia.—Job, capítulo 1 i 2.

Kico tabata e resultado? Ora Job su esposa a urgié pa maldicioná Dios, Job a bisa: “Manera un dje muhernan insensato ta papia, abo tambe ta papia. Nos lo aceptá meramente loke ta bon for dje Dios berdadero i no aceptá tambe loke ta malu?” E registro bíblico ta agregá: “Den tur esaki Job no a peca cu su lipnan.” (Job 2:10) Sí, Job a wanta fielmente i a proba asina cu Diabel ta un mentiroso. Laga nos tambe wanta pruebanan den un manera similar i duna prueba cu nos sirbishi na Dios ta motivá dor di amor puru pa Jehova.—Mateo 22:36-38.

El A Aceptá Coreccion Humildemente

Aunke Job tabata ehemplar den hopi manera, e no tabata un homber perfecto. E mes a bisa: “Ken por producí hende limpi for di hende cu no ta limpi? No tin ningun.” (Job 14:4; Romanonan 5:12) Pues, ora Dios a bisa cu Job tabata sin culpa, esaki tabata cierto den e sentido cu Job a cumpli cu tur loke Dios a verwagt di un di su sirbidónan humano imperfecto i pecaminoso. Esta un fuente di animacion!

Job a wanta su prueba, pero e prueba a revelá un debilidad. Tres supuesto consoladó a bishitá Job ora nan a tende di tur e calamidadnan cu a sosodé cuné. (Job 2:11-13) Nan acusá Job di cu Jehova tabata castigu’é pasobra el a cometé picánan grave. Ta claro cu e acusacionnan falsu aki a hùrt Job, i el a purba defendé su mes vigorosamente. Pero el a perde su balansa den su esfuerso pa hustificá su mes. Sí, Job a asta implicá cu e tabata mas hustu cu Dios!—Job 35:2, 3.

Dor cu Dios a stima Job, El a usa un yoncuman pa señalá riba Job su eror. E relato ta bisa: “E rabia di Elihú . . . a bira ardiente. Contra Job su rabia a cende dor cu el a declará su mes alma hustu mas bien cu Dios.” Manera Elihú a remarcá: “Job a bisa: ‘Mi tin rason sigur, pero Dios mes a apartá huicio for di mi.’” (Job 32:2; 34:5) Sin embargo, Elihú no a uni cu e tres “consoladónan” den e conclusion robes di cu Dios tabata castigá Job pa su picánan. En bes di esei, Elihú a expresá confiansa den Job su fieldad, i el a  conseh’é: “E caso hudicial ta dilanti [Jehova], i p’esei bo mester spera riba dje ansiosamente.” Sí, Job mester a spera riba Jehova en bes di defendé su mes den un manera imprudente. Elihú a sigurá Job: “Rectitud i abundancia di husticia [Dios] lo no menospreciá.”—Job 35:14; 37:23.

Mester a corigí Job su manera di pensa. P’esei, Jehova a dun’é un les tocante con insignificante hende ta, compará cu Dios su grandesa. Jehova a señalá na tera, laman, shelu yen di strea, bestia i hopi otro maraviya di creacion. Finalmente, Dios a papia di Leviatan—crocodil. Humildemente Job a aceptá e coreccion, i den esaki e ta pone un ehempel mas.

Aunke kisas nos ta haciendo un bon trabou den sirbishi di Jehova, nos lo cometé fayo. Si ta un fayo serio, Jehova kisas ta corigí nos den vários manera. (Proverbionan 3:11, 12) Por ta un texto di Bijbel cu ta pui nos concenshi ta bini na nos mente. Kisas E Toren di Vigilancia of cualkier otro publicacion di Sociedad Watch Tower ta bisa algu cu ta haci nos conciente di nos eror. Of tin posibilidad cu un compañero cristian lo mustra nos bondadosamente cu nos a keda sin aplicá un principio bíblico. Con nos lo reaccioná na tal coreccion? Job a manifestá un actitud arepentí ora el a bisa: “Mi ta hala atras, i di berdad mi ta repentí den stof i shinishi.”—Job 42:6.

Jehova A Recompens’é

Jehova a recompensá Job dor di permití su sirbidó biba 140 aña mas. Durante e tempu ei, el a ricibí hopi mas di loke el a perde. I aunke Job a muri finalmente, e ta sigur di un resureccion den Dios su mundu nobo.—Job 42:12-17; Ezekiel 14:14; Juan 5:28, 29; 2 Pedro 3:13.

Nos tambe por ta sigur di Dios su fabor i bendicion basta nos sirbié lealmente i aceptá tur coreccion basá riba Bijbel cu nos ta haña. Como resultado, nos lo tin e speransa sigur di bida den Dios su sistema di cosnan nobo. Mas importante ainda, nos lo onra Dios. Nos conducta fiel lo ser recompensá i lo duna mas prueba di cu Dios su pueblo ta sirbié, no pa motibunan egoista, sino debí na amor sincero. Ki privilegiá nos ta di por alegrá Jehova su curason mescos cu Job, kende a aceptá coreccion humildemente!—Proverbionan 27:11.

[Plachinan na página 26]

Job a mustra interes amoroso den huérfano, biuda i otro hende

[Plachinan na página 28]

Job a ser recompensá ricamente debí cu el a aceptá coreccion humildemente