Bijbel Tin un Código Scondí?

ROND di dos aña despues dje asesinato dje Promé Minister israelí Yitzhak Rabin na 1995, un reportero a declará cu el a descubrí cu yudansa di tecnologia di computer, un pronóstico dje suceso ei scondí den e texto bíblico na hebreo original. E reportero, Michael Drosnin, a skirbi cu el a purba spierta e promé minister mas cu un aña promé cu e asesinato, pero esei no a yuda.

Awor hende a publicá otro buki i artículonan cu ta pretendé cu e código scondí aki ta duna prueba absoluto cu Bijbel ta inspirá di Dios. E código ei ta existí? Un código scondí mester ta e base pa kere cu Bijbel ta inspirá di Dios?

Un Idea Nobo?

E idea di un código scondí den e texto bíblico no ta nobo. E ta un concepto central di Cabala, esta, di misticismo hudiu tradicional. Segun maestronan di Cabala, e nificacion simpel di Bijbel no ta su berdadero nificacion. Nan ta kere cu Dios a usa e letternan individual dje texto bíblico na hebreo como símbolo, i cu ora hende comprendé nan bon, nan ta revelá un berdad mas grandi. Segun nan punto di bista, Dios a pone cada letter hebreo i su posicion den e texto bíblico cu un propósito specífico na mente.

Segun Jeffrey Satinover, un investigadó dje código bíblico, e místiconan hudiu aki ta kere cu e letternan hebreo cu a usa pa registrá e relato di creacion den Génesis ta contené un tremendo poder místico. E ta skirbi: “En resúmen, Génesis no ta simplemente un descripcion, e ta e propio instrumento dje acto di creacion mes, un mapa den mente di Dios manifestá den un forma físico.”

Un rabi di Cabala di siglo 13, Bachya ben Asher di Saragossa, Spaña, a skirbi tocante cierto informacion scondí cu a ser revelá na dje dor di lesa cada 42 letter den un porcion di Génesis. E método aki, esta, di bula letter segun un secuencia en particular den un intento pa descubrí mensahenan scondí, ta e base dje concepto moderno di código den Bijbel.

 Computer Ta “Revelá” e Código

Promé cu e era di computer, hende su abilidad di examiná e texto bíblico den e manera aki tabata limitá. Sin embargo, na augustus 1994, e revista Statistical Science a publicá un artículo den cua Eliyahu Rips dje Universidad Hebreo di Jerusalem huntu cu su coleganan di investigacion a bin cu algun afirmacion sorprendente. Nan a splica cu dor di kita tur espacio entre e letternan i usa un secuencia di bula cada tantu letter den e texto hebreo di Génesis, nan a descubrí e nomber di 34 rabi famoso hincá via código den e texto, huntu cu otro informacion, manera nan fecha di nacementu of di morto, pegá cu nan nomber. * Despues di a ripití e test vários biaha, e investigadónan a publicá nan conclusion, esta, cu e informacion hincá via código den Génesis tabata segun estadística, fuera di alcanse di casualidad. I pa nan, esei a proba cu miles di aña pasá informacion inspirá a ser hincá deliberadamente den Génesis den forma di código.

Siguiendo e método aki, reportero Drosnin a haci su propio testnan, en busca di informacion scondí den e promé cincu bukinan dje Scritura Hebreo. Segun Drosnin, el a haña e nomber Yitzhak Rabin hincá den texto bíblico dor di sigui un secuencia di cada 4.772 letter. Dor di areglá e texto bíblico den liñanan di 4.772 letter, el a ripará cu e nomber di Rabin (lesá verticalmente) ta crusa un liña (Deuteronomio 4:42, cu ta core horizontal) cu Drosnin a traducí como “asesino cu lo asesiná.”

Eigenlijk, Deuteronomio 4:42 ta papia di un matadó cu a mata inintencionalmente. Pues, hopi hende a criticá Drosnin su método arbitrario, bisando cu su métodonan cu no tin nada científico cu nan, por ser usá pa haña mensahenan similar den cualkier texto. Pero Drosnin a keda para riba, i a reta: “Na momento cu mi críticonan haña un mensahe tocante e asesinato di un Promé Minister scondí via código den [e buki] Moby Dick, lo mi kere nan.”

Prueba di Inspiracion?

Profesor Brendan McKay, dje Departamento di Ciencia di Computer na e Universidad Nacional di Australia, a aceptá e reto di Drosnin i a haci investigacion extenso cu computer den e texto na ingles di Moby Dick. * Usando e mésun método cu Drosnin a describí, McKay ta bisa cu el a haña “pronósticonan” dje asesinato di Indira Gandhi, Martin Luther King, Jr., John F. Kennedy, Abraham Lincoln, i otronan. Segun McKay, el a descubrí cu Moby Dick tambe a “profetisá” e asesinato di Yitzhak Rabin.

Bayendo bek n’e texto hebreo di Génesis, profesor McKay i su socionan a reta tambe e resultadonan experimental di Rips i su socionan. Nan crítica tabata cu e resultadonan tabatin ménos di haci cu un mensahe inspirá presentá via código i mas di haci cu e método dje investigadónan, esta, e echo cu pa gran parti e investigadónan ta pone e datonan cuadra segun nan escoho individual. Debate escolástico riba e punto aki ta continuá.

Un otro cuestion ta lanta ora hende pretendé cu e mensahenan ei presentá via código a ser scondí deliberadamente den e texto hebreo “standard” of “original.” Rips i su coleganan ta bisa cu nan a haci nan investigacion riba e “texto standard i generalmente aceptá di Génesis.” Drosnin ta skirbi: “Tur Bijbel n’e idioma hebreo original cu ta existí awor ta mescos, letter pa letter.” Pero esaki ta e caso? En bes di un texto “standard,” awendia hende ta usa vários edicion dje Bijbel hebreo, basá riba diferente manuscrito antiguo. Aunke e mensahe bíblico no ta varia, e manuscritonan individual sí no ta idéntico letter pa letter.

Hopi traduccion djawe ta basá riba e Codex Leningrad—e manuscrito hebreo masorético mas bieu i completo—copiá rond di aña 1000 E.C. Pero Rips i Drosnin a usa un texto diferente,  esta Koren. Shlomo Sternberg, un rabi ortodox i matemático na Universidad di Harvard, ta splica cu e Codex Leningrad “ta distinto dje edicion Koren cu Drosnin a usa cu un diferencia di 41 letter den Deuteronomio so.” E Rolnan di Laman Morto ta incluí porcionnan dje texto bíblico copiá mas cu 2.000 aña pasá. E ortografia dje rolnan aki hopi biaha ta diferenciá for dje texto masorético skirbí mas despues. Den algun rol, cierto letter a ser agregá na abundancia pa indicá zonido di vocal, ya cu p’e tempu ei ainda nan no a inventá marcanan cu ta indicá cua vocal pa usa. Den otro rolnan, nan a usa ménos letter. Un comparacion entre tur manuscrito bíblico cu ta existí ta mustra cu e nificacion dje texto bíblico a keda mescos. Sin embargo, e ta mustra bon cla tambe cu e ortografia i cantidad di letter ta varia considerablemente di un texto pa otro.

E búskeda di un supuesto mensahe scondí ta dependé di un texto sin absolutamente ningun cambio. Un solo letter cambiá lo bruha e secuencia—i e mensahe si tin unu. Dios a conserbá su mensahe mediante Bijbel. Pero e no a conserbá cada letter intacto, como si fuera e tabata obsesioná cu asuntunan asina insignificante manera cambio di ortografia atrabes di siglonan. Esaki no ta indicá cu e no a dera ningun mensahe scondí den Bijbel?—Isaías 40:8; 1 Pedro 1:24, 25.

Nos Tin Mester di un Código Scondí den Bijbel?

Apostel Pablo a skirbi bon cla cu “tur Scritura ta inspirá di Dios i ta probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.” (2 Timoteo 3:16, 17) E mensahe cla i franco den Bijbel no ta muchu difícil pa comprendé ni pa aplicá, pero hopi hende ta scoge pa ignor’é. (Deuteronomio 30:11-14) E profecianan cu Bijbel ta presentá abiertamente ta duna un base sólido pa kere cu e ta inspirá. * Distinto di un código scondí, profecianan bíblico no ta arbitrario, i nan no ta “nace for di ningun interpretacion privá.”—2 Pedro 1:19-21.

Apostel Pedro a skirbi cu “no tabata dor di sigui cuentanan falsu mañosamente inventá cu nos a haci boso conocé e poder i presencia di nos Señor Jesucristo.” (2 Pedro 1:16) E concepto di un código bíblico tin su orígen den misticismo hudiu, usando métodonan “mañosamente inventá” cu ta obscurecé i deformá e nificacion simpel dje texto bíblico inspirá. E Scritura Hebreo mes ta condená bon cla e método místico ei.—Deuteronomio 13:1-5; 18:9-13.

Ki felis nos ta di tin e mensahe i instruccion cla di Bijbel, cu por yuda nos conocé Dios! Esaki ta hopi mas mihó cu purba siña tocante nos Creador dor di busca mensahenan scondí cu ta producto di interpretacion privá i di imaginacion cu yudansa di computer.—Mateo 7:24, 25.

[Nota]