Con e Spiritu di Dios Ta Obra Awe?

E TABATA coho for di matris di su mama. Tur dia e tabata sinta n’e porta di tempel cu yama Bunita pa por pidi regalo di misericordia for di esnan cu tabata drenta tempel. Sin embargo, na un ocasion, e limosnero desabilitá aki a ricibí un regalo cu tabatin muchu mas balor cu un par di cen largá. El a ser curá!—Echonan 3:2-8.

Aunke apostel Pedro cu Juan tabata esnan cu a “lant’é” di manera cu “su plant’i pia . . . a bira firme,” nan no a tuma mérito p’e curacion. Pakico no? Pedro mes a splica: “Hombernan di Israel, pakico boso ta straña riba esaki, of pakico boso ta keda wak nos como si fuera ta cu poder personal of mediante debocion na Dios nos a pon’é cana?” En berdad, tantu Pedro como Juan a realisá cu no tabata pa medio di nan poder, sino ta pa medio dje spiritu santu di Dios cu nan por a haci un cos asina.—Echonan 3:7-16; 4:29-31.

E tempu ei, Dios a percurá pa tal “obranan poderoso” p’e demostrá cu e congregacion cristian recien establecí tabatin su apoyo. (Hebreonan 2:4) Pero despues cu esakinan a sirbi nan propósito, apostel Pablo a bisa cu lo a “eliminá” nan. * (1 Corintionan 13:8) Pues, awor aki den e congregacion cristian berdadero nos no ta mira curacion di parti di Dios mas, ni mensahe profético ni sacamentu di demoño.

Pero esei ta nificá cu e spiritu santu di Dios no ta activo mas? Sigur cu no! Laga nos considerá algun otro manera den cua e spiritu di Dios tabata activo den e promé siglo i con e ta activo den nos tempu.

“E Spiritu dje Berdad”

Un dje maneranan cu e spiritu santu di Dios ta obra awe ta dor di informá, iluminá i revelá berdadnan. Djis promé cu su morto, Jesus a bisa su disipelnan: “Mi tin hopi cos pa bisa boso ainda, pero boso no por soportá nan actualmente. Sin embargo, ora esun ei yega, e spiritu dje berdad, lo e guia boso den tur e berdad.”—Juan 16:12, 13.

Dios a drama “e spiritu dje berdad” na Pentecoste di 33 E.C. ora rond di 120 disipel cu a reuní na Jerusalem den un sala djariba, a ser bautisá cu spiritu santu. (Echonan 2:1-4) Apostel Pedro tabata entre esnan presente p’e fiesta anual ei. Yená cu spiritu santu, Pedro a “lanta para” i a amplia, of clarificá, cierto berdadnan tocante Jesus. El a conta por ehempel con “Jesus e nazareno” a ser “halsá te na e man drechi di Dios.” (Echonan 2:14, 22, 33) Tambe e spiritu di Dios a impulsá Pedro pa declará cu curashi na su oyentenan hudiu: “Laga henter e cas di Israel sa cu tur siguridad cu Dios a hacié Señor i tambe Cristo, e Jesus aki cu boso a claba na staca.” (Echonan 2:36) Como resultado di Pedro su mensahe inspirá pa spiritu, rond di tres mil persona “a aceptá su palabra di buena gana” i a ser bautisá. Den e manera aki, e spiritu santu di Dios a yuda guia nan na e berdad.—Echonan 2:37-41.

Tambe Dios su spiritu santu a sirbi como maestro i un forsa pa yuda hende corda cosnan. Jesus a bisa: “E yudante, e spiritu santu, cu e Tata lo manda den mi nomber, esei lo siña boso tur cos i pone boso corda tur loke mi a bisa boso.”—Juan 14:26.

Con e spiritu santu a obra como maestro? E spiritu di Dios a habri mente dje disipelnan pa cosnan cu nan a tende di dje anteriormente  cerca Jesus, pero cu nan no a comprendé completamente. Por ehempel, e apostelnan tabata sa cu durante su prueba, Jesus a bisa e gobernadó romano di Hudea, Poncio Pilato: “Mi reino no ta parti dje mundu aki.” Tog, n’e tempu cu Jesus a subi na shelu mas cu 40 dia despues, ainda e apostelnan tabatin e punto di bista ekibocá cu lo a establecé e Reino aki riba tera. (Juan 18:36; Echonan 1:6) Aparentemente, e apostelnan no por a capta completamente e nificacion di Jesus su palabranan sino te despues cu e spiritu santu di Dios a drama riba nan na Pentecoste di 33 E.C.

Tambe e spiritu di Dios a sirbi como un recordatorio, dor di trece bek na nan mente e vários siñansanan di Jesus. Por ehempel, profecianan relacioná cu e morto i resureccion di Cristo, a haña un nificacion nobo cu yudansa di spiritu santu. (Mateo 16:21; Juan 12:16) Dor di corda e siñansanan di Jesus, e apostelnan por a defendé nan posicion cu curashi dilanti rey, hues i lidernan religioso.—Marco 13:9-11; Echonan 4:5-20.

Ademas, Dios su spiritu santu a yuda dirigí e promé cristiannan na teritorio fructífero den e ministerio. (Echonan 16:6-10) Tambe e spiritu di Dios a impulsá e promé cristiannan pa participá den skirbimentu dje Palabra di Dios, Bijbel, p’e beneficio di henter humanidad. (2 Timoteo 3:16) Claramente anto, spiritu santu tabata activo den vários manera durante e promé siglo. Dios no a mand’é solamente pa haci milager.

 Spiritu Santu den Nos Tempu

Mescos tambe den nos tempu spiritu santu ta obra na fabor di cristiannan berdadero. Esaki a bira bisto pa un grupo chikitu di studiante di Bijbel na Allegheny, Pennsylvania, Merca, den e último parti di siglo 19. E studiantenan sincero di Bijbel aki a anhelá pa conocé “e berdad.”—Juan 8:32; 16:13.

Un miembro dje grupo aki, Charles Taze Russell, a bisa relacioná cu su búskeda pa berdad spiritual: “Mi a pidi Dios den oracion . . . p’e yuda mi saca for di mi mente i curason cualkier prehuicio cu kisas ta para den caminda i pa su spiritu guia mi den e comprendimentu corecto.” Dios a bendicioná su oracion humilde.

Segun cu Russell i su asociadonan tabata coba diligentemente den e Scritura, un cantidad di cos a clara. “Nos a descubrí cu pa siglonan,” Russell a splica, “vários secta i grupo a parti e doctrinanan di Bijbel den nan cu nan, mesclando nan, un mas cu otro, cu speculacion i eror humano.” Segun e, dor di esei “nan a perde e lugá dje berdad.” Sí, e berdadnan bíblico a ser derá bou di un monton di siñansa pagano cu a infiltrá cristiandad durante siglonan. Pero Russell tabata decididu pa siña conocé i declará e berdad.

Atrabes dje páginanan dje Toren di Vigilancia di Síon i Anunciante dje Presencia di Cristo, Russell i su asociadonan cu curashi a denunciá doctrina religioso falsu cu a malrepresentá Dios. Nan a dicerní cu—contrali na opinion religioso popular—alma ta mortal, cu ora nos muri nos ta bai graf i cu Jehova ta e único Dios berdadero i p’esei no ta parti di un Trinidad.

Pero manera bo por imaginá, clero di cristiandad a rabia formal ora a desenmascará e siñansanan falsu ei. Determiná pa mantené nan posicion di influencia, hopi miembro di clero católico i protestant a organisá campañanan pa desacreditá Russell. Pero ni e ni su asociadonan no a entregá. Yen di confiansa, nan a busca e guia dje spiritu di Dios. “Nos Señor a garantisá nos,” Russell a bisa, “cu . . . e spiritu santu dje Tata lo ta nos instructor, mandá pa causa i riba peticion di Jesus nos Rescatador, Mediador i Cabes.” I debidamente el a instruí nan! E Studiantenan di Bijbel sincero aki a sigui bebe e awanan puru dje berdad for di Bijbel i proclamá nan rond mundu.—Revelacion 22:17.

E organisacion moderno di Testigonan di Jehova a sigui respondé mesora n’e guia di Dios su spiritu santu pa mas cu un siglo caba. Segun cu Jehova su spiritu ta iluminá nan vision spiritual progresivamente, di buena gana e Testigonan ta haci e ahustenan necesario pa adaptá nan n’e comprendimentu actualisá.—Proverbionan 4:18.

“Boso Lo Ta Testigonan di Mi”

Jesus a identificá un otro manifestacion mas di Dios su spiritu santu ora el a bisa su disipelnan: “Boso lo ricibí poder ora e spiritu santu  yega riba boso, i boso lo ta testigonan di mi . . . te na e parti mas lehano dje tera.” (Echonan 1:8) Jesus su promesa pa duna su disipelnan “poder” i “spiritu santu” pa por efectuá e trabou cu Dios a asigná na nan, ta aplicá te ainda.

Como grupo, Testigonan di Jehova ta bon conocí pa nan actividad di predicá. (Mira e cuadro.) Sí, Testigonan di Jehova ta papia e mensahe dje berdad den mas cu 230 pais i grupo di isla. Bou di tur condicion imaginabel, incluso riscando nan bida den áreanan asotá dor di guera, nan ta hisa nan bos cu curashi pa apoyá e Reino di Dios. Nan celo p’e ministerio cristian ta duna evidencia poderoso cu spiritu santu ta obra awe. I ta bisto cu Jehova Dios ta bendicionando nan esfuersonan.

Aña pasá, por ehempel, nan a dedicá hopi mas cu mil miyon ora na predicá e bon nobo dje Reino di Dios. Cu ki resultado? Un 323.439 persona a simbolisá nan dedicacion na Dios dor di presentá nan mes pa bautismo bou di awa. Ademas, nan a conducí 4.433.884 studio di Bijbel semanal cu hende recien interesá. Na tur, nan a laga 24.607.741 buki, 631.162.309 revista i 63.495.728 foyeto. Ki un testimonio poderoso di Dios su spiritu den accion!

E Spiritu di Dios i Abo

Ora un persona respondé faborablemente n’e bon nobo, ta armonisá su bida n’e normanan di Dios i ta expresá fe den e percuracion dje rescate, esei ta habri caminda pa un posicion limpi dilanti Dios. Apostel Pablo a bisa hende asina: “Dios . . . ta pone su spiritu santu den boso.”—1 Tesalonicensenan 4:7, 8; 1 Corintionan 6:9-11.

Ora bo tin e spiritu di Dios, esei ta resultá den hopi bunita bendicion. Ki tipo di bendicion? Di promé, Dios su Palabra inspirá ta bisa: “Fruta di spiritu ta amor, goso, pas, gran pacenshi, amabilidad, bondad, fe, suavedad, [i] dominio propio.” (Galationan 5:22, 23) P’esei, e spiritu santu di Dios ta un forsa poderoso pa logra loke ta bon, i esei ta permití bo desplegá cualidadnan di Dios.

Ademas, si bo lesa Bijbel i aplicá loke bo ta siña, e spiritu di Dios por yuda bo crece den sabiduria, conocimentu, perspicacia, dicernimentu i abilidad di pensa. Rey Sálomon a ricibí “sabiduria i comprendimentu na un midí masha grandi i un hanchura di curason” dor cu el a busca pa agradá Dios en bes di hende. (1 Reynan 4:29) Siendo cu ta Jehova a duna Sálomon spiritu santu, sigur lo e no retené su spiritu santu for di esnan cu ta busca pa agrad’é awe.

Tambe, Dios su spiritu santu ta yuda cristiannan lucha contra Satanas i e demoñonan, e sistema di cosnan malbado aki, i e tendencianan pecaminoso di nan carni imperfecto. Con esei ta posibel? Apostel Pablo ta contestá: “Pa tur cos mi tin e forsa den birtud di esun cu ta duna mi poder.” (Filipensenan 4:13) Kisas spiritu santu no ta eliminá prueba ni tentacion; ma e por yuda bo wanta nan si. Dor di dependé riba e spiritu di Dios, nos por ricibí “poder mas ayá di loke ta normal” pa trata cu cualkier problema of angustia.—2 Corintionan 4:7; 1 Corintionan 10:13.

Ora bo considerá tur e evidencia, no tin duda cu e spiritu santu di Dios ta obra awe. Jehova su spiritu ta duna su sirbidónan energia pa nan duna testimonio tocante su magnífico propósito. E ta sigui revelá rayonan di lus spiritual, i e ta fortificá nos fe, yudando nos pa keda leal na nos Creador. Ki gradicidu nos por ta cu Dios a cumpli cu su promesa dor di suministrá spiritu santu na su fiel sirbidónan awe!

[Nota]

[Kuadro na página 10]

Loke Otronan Ta Bisa di Testigonan di Jehova

“Miéntras otro misanan ta contratá expertonan pa atraé hende den banki di misa of ta lucha cu cuestionnan actual manera homosexualidad i aborto, e Testigonan no ta haci concesion na un mundu cu ta sigui cambia. Ainda nan ta hiba nan campaña di predicá sistemáticamente rond Mundu.”—The Orange County Register di Orange County, California, Merca.

“Relacioná cu plamamentu dje fe, masha poco denominacion ta mes entusiasmá . . . cu e Testigonan di Jehova.”—The Republic di Columbus, Indiana, Merca.

“Nan ta e úniconan cu ta bai di cas pa cas cu ‘e bon nobo,’ aplicando principionan di Bijbel.”—Życie Literackie, Polonia.

“Den e mayor campaña di predicacion hamas conocí, Testigonan di Jehova a hiba Jehova su mensahe rond mundu.”—News-Observer, Tamaqua, Pennsylvania, Merca.

[Plachinan na página 9]

E spiritu santu di Dios ta iluminá nos spiritualmente,

. . . ta promové excelente cualidadnan cristian,

. . . i ta apoyá nos den e obra mundial di predicá