Esnan Cu Ta Lucha Contra Dios Lo No Prevalece!

“Nan lo bringa contra bo sigur, pero nan lo no prevalecé contra bo.”—JEREMIAS 1:19.

1. Ki comision Jeremías a ricibí, i con largu su trabou a dura?

JEHOVA a comisioná e hóben Jeremías pa ta un profeta p’e nacionnan. (Jeremías 1:5) Esaki a sosodé durante e reinado di bon rey Hosías riba Huda. Jeremías su ministerio profético a sigui durante e periodo turbulento promé cu Babilonia a conkistá Jerusalem i te ora a hiba e pueblo di Dios den exilio.—Jeremías 1:1-3.

2. Con Jehova a lanta e ánimo di Jeremías, i lucha contra e profeta ei a nificá kico?

² E mensahenan di huicio cu Jeremías tabatin cu declará, lo a lanta oposicion sigur. P’esei, Dios a fortifik’é pa loke tabatin su dilanti. (Jeremías 1:8-10) Por ehempel, e palabranan aki a lanta su ánimo: “Nan lo bringa contra bo sigur, pero nan lo no prevalecé contra bo, pasobra ‘mi ta cu bo,’ ta e expresion di Jehova, ‘pa libra bo.’” (Jeremías 1:19) Lucha contra Jeremías lo a nificá lucha contra Dios. Awe, Jehova tin un grupo di sirbidó cu ta fungi como profeta; i nan trabou ta similar na esun di Jeremías. Mescos cuné, nan ta declará Dios su palabra profético cu curashi. I e mensahe aki tin efecto riba tur persona i nacion, sea pa bon of pa malu, dependiendo di nan reaccion riba dje. I, mescos cu den tempu di Jeremías, tin hende cu ta lucha contra Dios dor di oponé su sirbidónan i nan actividadnan cu el a asigná nan.

 Jehova Su Sirbidónan bou di Atake

3. Pakico Jehova su sirbidónan tabata bou di atake?

³ Jehova su pueblo tabata bou di atake for di cuminsamentu di siglo 20. Den hopi pais, hende cu mal intencion a trata na stroba—sí, silenciá—e proclamacion dje bon noticia dje Reino di Dios. Diabel, nos Adversario principal cu “ta cana rond manera un leon cu ta grita, buscando un hende pa devorá,” a instigá nan. (1 Pedro 5:8) Despues cu “e tempu señalá dje nacionnan” a terminá na 1914, Dios a instalá su Yu como e Rey nobo di tera, i a dun’é e mandamentu: “Bai, dominando meimei di bo enemigunan.” (Lucas 21:24; Salmo 110:2) Eherciendo su poder, Cristo a saca Satanas for di shelu i a restringié n’e becindario di tera. Dor cu Diabel sa cu su tempu ta corticu, e ta baha su rabia riba e cristiannan ungí i nan compañeronan. (Revelacion 12:9, 17) Kico tabata e resultado dje atakenan constante na man dje personanan aki cu ta lucha contra Dios?

4. Ki pruebanan e pueblo di Jehova a pasa aden durante e época di Guera Mundial I, pero kico a sosodé na 1919 i 1922?

⁴ Durante Guera Mundial I, e sirbidónan ungí di Jehova a confrontá hopi prueba di fe. Hende a ridiculisá i a calumniá nan, multitudnan desordená a core nan tras i hende a bati nan. Manera Jesus a pronosticá, nan a bira  “obheto di odio di parti di tur nacion.” (Mateo 24:9) Meimei dje histeria di guera, enemigunan dje Reino di Dios a haci uso di un táctica cu nan a usa contra Jesucristo. Nan a tilda e pueblo di Jehova falsamente di ta instigá rebelion, i nan a dal net e curason dje organisacion visibel di Dios un golpi. Na mei 1918, nan a saca un órden di aresto federal contra e presidente di Sociedad Watch Tower, J. F. Rutherford, i shete di su socionan mas íntimo. Nan a duna e ocho hombernan aki castigu di prizon pisá i a manda nan n’e prizon federal na Atlanta, Georgia, Merca. Nuebe luna despues nan a sali liber. Na mei 1919 e corte di apelacion a dicta cu e acusadonan no a haña un huicio imparcial, i p’esei a anulá e sentencia. A manda pa trata e caso di nobo, pero despues gobiernu a retirá e cargo, i nan a exonerá ruman Rutherford i su socionan completamente. Nan a reanudá nan actividadnan, i e congresonan cu nan a tene na Cedar Point, Ohio, na aña 1919 i na 1922 a duna e obra di predicacion di Reino un empuhe nobo.

5. Con a bai cu Testigonan di Jehova na Alemania nazi?

⁵ Den añanan ’30, dictaduranan a lanta, i Alemania, Italia i Hapon a uni pa forma un aliansa militar. Na principio dje década ei, a cuminsá un persecucion brutal contra e pueblo di Dios, foral na Alemania nazi. Gobiernu a imponé prohibicion. A listra casnan i arestá nan habitantenan. A cera miles di nan den camponan di concentracion pasobra nan a nenga di comprometé of renunciá nan fe. Meta dje lucha contra Dios i contra su pueblo tabata pa exterminá Testigonan di Jehova for dje teritorio totalitario ei. * Ora Testigonan na Alemania a bai corte pa lucha pa nan derecho, e Ministerio di Husticia dje Reich a prepará un declaracion largu pa haci sigur cu nan lo no a sali liber. El a bisa: “Corte no mag faya djis pa motibu di aparente formalidadnan legal; sino mester busca i haña maneranan pa cumpli cu nan deber exaltá, apesar dje dificultadnan formal.” Esaki a nificá cu lo no por tabatin husticia. E nazinan a para ariba cu e actividadnan di Testigonan di Jehova tabata hostil i cu nan ‘a perturbá e construccion nacional socialista.’

6. Ki esfuersonan a ser hací pa para nos trabou durante Guera Mundial II i despues?

⁶ Durante Guera Mundial II, Australia, Cánada i otro paisnan cu a cai bou dje Mancomunidad Británico na Africa, Asia i islanan di Caribe i di Pacífico a imponé prohibicion i restriccion riba e pueblo di Dios. Na Merca, enemigunan influyente i hende malinformá a ‘forma trobel via decreto.’ (Salmo 94:20) Pero e Testigonan a bai corte i a bringa casonan tocante saludá bandera i ordenansanan di comunidad cu a prohibí predicacion di cas-pa-cas. Decisionnan di corte na nos fabor na Merca a lanta un baluarte cu ta sostené libertad di adoracion. Danki na Jehova, esfuerso di enemigu no a prevalecé. Ora guera a terminá na Europa, nan a kita e prohibicionnan. E miles di Testigonan prezu den camponan di concentracion a sali liber. Pero e lucha no a caba. Asina cu Guera Mundial II a yega su fin, e Guera Friu a cuminsá. E nacionnan di Oost Europa a trece mas preshon riba e pueblo di Jehova. E nacionnan ei a tuma accion oficial pa stroba i para nos actividad di predicá, stop e fluho di literatura bíblico, i caba cu asambleanan público. Nan a encarcelá hopi ruman of a manda nan camponan di trabou forsá.

Padilanti cu e Trabou di Predicá!

7. Kico Testigonan di Jehova a experimentá na Polonia, Rusia i otro paisnan den añanan recien?

⁷ Segun cu e décadanan a pasa, e predicacion di Reino a bira mas liber. Maske Polonia tabata bou di mando comunista ainda, nan a permití e rumannan tene congresonan di un dia na 1982. Nan a tene congresonan internacional na 1985. Despues a sigui congresonan internacional masha grandi na 1989, na cua miles di ruman for di Rusia i Ucrania a asistí. E mésun aña ei Hungria i Polonia a otorgá  reconocimentu legal na Testigonan di Jehova. Tabata den otoño di 1989 cu e Muraya di Berlin a cai. Un par di luna despues, nos a ricibí reconocimentu legal na Oost Alemania i djis despues di esei a tene un congreso internacional na Berlin. Na comienso dje último década di siglo 20, a haci intento pa haña contacto personal cu e rumannan na Rusia. A acercá algun funcionario na Moscú, i na 1991, Testigonan di Jehova a ricibí registracion legal. For dje tempu ei e trabou a bai hopi dilanti mes na Rusia, i tambe den e repúblicanan cu tabata forma parti di ex-Union Soviético.

8. Kico a sosodé cu e pueblo di Jehova den e 45 añanan cu a sigui despues cu Guera Mundial II a terminá?

⁸ Miéntras cu persecucion a stop den algun área, el a aumentá den otronan. Den e 45 añanan cu a sigui despues dje fin dje di dos guera mundial, hopi pais a nenga di duna reconocimentu legal na Testigonan di Jehova. Ademas, nan a pone prohibicion riba nos of riba nos actividad den 23 pais na Africa, 9 na Asia, 8 na Europa, 3 na Latinoamérica i na 4 nacion insular.

9. Kico Jehova su sirbidónan a pasa aden na Malawi?

⁹ Testigonan di Jehova na Malawi a pasa den persecucion salbahe cu a cuminsá na 1967. Debí na nan posicion neutral como cristian berdadero, nos compañeronan creyente no kier a cumpra karchi di partido político. (Juan 17:16) Despues di un reunion dje Partido di Congreso di Malawi na 1972, tabatin un ola nobo di brutalidad. Nan a saca e rumannan for di nan cas i a kita nan for di trabou. Miles di ruman a hui for dje pais pa no mata nan. Pero e hendenan cu a lucha contra Dios i contra su pueblo a prevalecé? Di ningun manera! Na 1999, despues di un cambio di circunstancia, un máximo di 43.767 publicadó di Reino a raportá na Malawi, i mas cu 120.000 hende a asistí na congresonan di distrito einan. Sociedad a construí un oficina di sucursal nobo den e capital.

Nan Ta Busca un Pretexto

10. Mescos cu den e caso di Daniel, kico opositornan dje pueblo di Dios dje tempu aki a haci?

¹⁰ Hende apóstata, miembro di clero i otronan, no por soportá nos mensahe for dje Palabra di Dios. Bou di preshon di cierto círculonan religioso di cristiandad, opositornan ta busca un asina yamá manera legal pa hustificá nan lucha contra nos. Ki táctica asina nan sa usa? Wel, kico e conspiradónan a scoge pa haci den nan atake contra profeta Daniel? Na Daniel 6:4 i 5 nos ta lesa: “E alto funcionarionan i e sátrapanan mes tabata busca constant pa haña un pretexto contra Daniel relacioná cu e reino; pero nan no por a haña ningun pretexto ni nada corupto, ya cu e tabata digno di confiansa i no a haña ningun negligencia ni nada corupto den dje. Consecuentemente, e hombernan físicamente fuerte aki a bisa: ‘Nos lo no haña ningun pero ningun pretexto den e Daniel aki, excepto nos tin cu hañ’é contra dje den e ley di su Dios.’” Awe tambe opositornan ta busca un pretexto. Nan ta lanta gritunan insistente tocante “cultonan peligroso” i ta purba catalogá Testigonan di Jehova como tal. Usando malrepresentacion, insinuacion i falsedad, nan ta atacá nos manera di adorá i nos apego na principionan divino.

11. Kico algun opositor di Testigo di Jehova ta acusá nan falsamente di dje?

¹¹ Den algun pais, elementonan político i religioso no kier reconocé cu ta nos ta practicá “e forma di adoracion cu ta limpi i incontaminá desde e punto di bista di nos Dios.” (Santiago 1:27) Aunke nos ta efectuá nos actividadnan cristian den 234 pais, opositornan ta pretendé cu nos no ta un “religion conocí.” Djis promé cu un congreso internacional na 1998, un korant di Aténas a cita clero griego ortodox ta bisa cu “[Testigonan di Jehova] no ta un ‘religion conocí,’” apesar cu e decision di Corte Europeo di Derechonan Humano a bisa net lo contrario. Un par di dia despues, un otro korant den e mésun stad a cita un bocero di iglesia cu a bisa: “[Testigonan di Jehova] no  por ta ‘un congregacion cristian,’ ya cu nan no tin nada en comun cu e fe cristian den e persona di Jesucristo.” Esaki ta asombroso, pasobra ningun otro grupo religioso ta pone mas énfasis riba imitá Jesus cu Testigonan di Jehova!

12. Ora nos ta bringa nos guera spiritual, kico nos tin cu haci?

¹² Nos ta busca pa defendé i establecé e bon nobo via medionan legal. (Filipensenan 1:7) Ademas, nos lo no comprometé ni debilitá nos pegamentu firme na Dios su normanan di husticia. (Tito 2:10, 12) Mescos cu Jeremías, nos ta ‘faha nos heup i papia tur loke Jehova ta manda nos,’ i no ta laga luchadónan contra Dios hinca miedu den nos. (Jeremías 1:17, 18) Jehova su Palabra Santu a mustra bon cla cua ta e caminda corecto cu nos tin cu sigui. Hamas nos lo kier lèn riba e “brasa di carni” débil of busca “refugio den e sombra di Egipto,” esta, e mundu aki. (2 Crónicanan 32:8; Isaías 30:3; 31:1-3) Ora di bringa nos guera spiritual, nos tin cu sigui confia den Jehova cu tur nos curason, lagu’e dirigí nos pasonan i no lèn riba nos mes comprendimentu. (Proverbionan 3:5-7) A ménos cu nos tin Jehova su sosten i e mes ta protehá nos, tur nos trabou lo “ta por nada.”—Salmo 127:1.

Persiguí Pero sin Comprometé

13. Pakico nos por bisa cu e atake satánico contra Jesus a fracasá?

¹³ E ehempel principal den duna Jehova debocion sin comprometé ta di Jesus, kende nan a acusá falsamente di ta instigá rebelion i di ta perturbá órden establecí. Despues cu Pilato a examiná e caso di Jesus, e tabata dispuesto pa libr’é. Pero e multitud, instigá dor dje lidernan religioso, a grita pa claba Jesus na staca, aunke e tabata inocente. Nan a grita pa na lugá di Jesus, libra Bárabas, un homber encarcelá debí cu el a instigá rebelion i a cometé asesinato! Pilato a bolbe purba cambia e opinion dje opositornan irazonabel, pero al final el a sucumbí p’e clamor público. (Lucas  23:2, 5, 14, 18-25) Aunke Jesus a muri clabá na staca, e atake satánico horibel contra Dios su Yu inocente a fracasá completamente, pasobra Jehova a resucitá Jesus i a hals’é na Su propio man drechi. I riba e dia di Pentecoste di 33 E.C., mediante Jesus glorificá, a drama spiritu santu i asina establecé e congregacion cristian, esta, “un creacion nobo.”—2 Corintionan 5:17; Echonan 2:1-4.

14. Kico tabata e resultado ora e elemento religioso hudiu a actua contra Jesus su siguidónan?

¹⁴ Djis despues, e elemento religioso a menasá e apostelnan, pero e siguidónan ei di Cristo no a stop di papia tocante e cosnan cu nan a mira i tende. Jesus su disipelnan a pidi den oracion: “Jehova, presta atencion na nan menasanan, i duna bo esclabonan pa nan sigui papia bo palabra cu tur curashi.” (Echonan 4:29) Jehova a contestá nan súplica dor di yena nan cu spiritu santu i fortalecé nan pa sigui cu nan proclamacion intrépido. No a tarda hopi cu nan a bolbe manda e apostelnan stop di predicá, pero Pedro i e otro apostelnan a contestá: “Nos tin cu obedecé Dios como gobernante mas bien cu hende.” (Echonan 5:29) Menasa, aresto i sota, no por a stroba nan di expandé nan actividad di Reino.

15. Ken Gamaliel tabata, i ki conseho el a duna e opositornan religioso di Jesus su siguidónan?

¹⁵ Con e lidernan religioso a reaccioná? “Nan a sinti nan profundamente ofendí i kier a eliminá [e apostelnan].” Pero tabatin un maestro di Ley presente cu yama Gamaliel, un fariseo, cu tur hende tabata respetá. Despues cu el a saca e apostelnan pafó dje sala di Sanedrin pa un ratu, el a consehá e opositornan religioso ei: “Hombernan di Israel, presta atencion na boso mes en cuanto loke boso tin pensá di haci tocante e hendenan aki. . . . Mi ta bisa boso: No mete cu e hendenan aki, ma laga nan; (pasobra, si e proyecto of e trabou aki ta di hende, lo e caba na nada; pero si e ta di Dios, boso lo no por caba cu nan;) sino, kisas lo resultá cu boso ta lucha realmente contra Dios.”—Echonan 5:33-39.

Ningun Arma Formá Contra Nos Lo Tin Exito

16. Con lo bo expresá den bo mes palabranan e garantia cu Jehova ta duna su pueblo?

¹⁶ Gamaliel a duna bon conseho, i nos ta apreciá ora algun hende papia na nos fabor. Tambe nos ta reconocé cu decisionnan di corte di parti di huesnan imparcial a sostené e libertad di adoracion ei. Claro cu e echo cu nos ta pega n’e Palabra di Dios no ta cai na agrado di clero di cristiandad i otro lidernan di Babilonia e Grandi, e imperio mundial di religion falsu. (Revelacion 18:1-3) Aunke nan, huntu cu esnan cu nan ta influenciá, ta lucha contra nos, nos tin e garantia aki: “‘Ki arma cu nan forma contra bo lo no tin éxito, i ki lenga cu lanta contra bo den huicio, lo bo condená. Esaki ta e posesion hereditario dje sirbidónan di Jehova, i nan husticia ta bini di mi,’ ta e expresion di Jehova.”—Isaías 54:17.

17. Aunke opositornan ta lucha contra nos, pakico nos ta yen di ánimo?

¹⁷ Nos enemigunan ta bringa contra nos sin motibu, pero nos no ta perde ánimo. (Salmo 109:1-3) Hamas nos lo permití esnan cu ta odia nos mensahe bíblico intimidá nos pa comprometé nos fe. Aunke nos ta verwagt cu nos lucha spiritual lo bira mas intenso, nos sa e resultado. Mescos cu Jeremías, nos lo experimentá e cumplimentu dje palabranan profético: “Nan lo bringa contra bo sigur, pero nan lo no prevalecé contra bo, pasobra ‘mi ta cu bo,’ ta e expresion di Jehova, ‘pa libra bo.’” (Jeremías 1:19) Sí, nos sa cu esnan cu ta lucha contra Dios lo no prevalecé!

[Nota]

Con Lo Bo Respondé?

• Pakico Jehova su sirbidónan tabata bou di atake?

• Den ki maneranan opositornan a lucha contra Jehova su pueblo?

• Pakico nos por ta sigur cu luchadónan contra Dios lo no prevalecé?

[Preguntanan di Estudio]

[Plachi na página 17]

Jehova a garantisá Jeremías cu lo e ta cuné

[Plachi na página 18]

Sobrebibientenan di campo di concentracion

[Plachi na página 18]

Violencia di multitud desordená contra Testigonan di Jehova

[Plachi na página 18]

J. F. Rutherford i su socionan

[Plachi na página 21]

Den e caso di Jesus, luchadónan contra Dios no a prevalecé