Asina Tantu Necesidad di Consuelo!

“Mira! e lágrimanan di esnan oprimí, pero nan no tabatin consoladó; i di parti di nan opresornan tabatin poder, di manera cu nan no tabatin consoladó.”—ECLESIASTES 4:1.

BO TA buscando consuelo? Bo ta anhelá pa un rayo di animacion briya dor dje nubianan scur di desesperacion? Bo tin masha gana di haña maske ta un tiki animacion pa aliviá bo bida dañá dor di sufrimentu amargo i experencianan desagradabel?

Na un momento of otro, nos tur tin un gran necesidad di consuelo i animacion. Esei ta dor cu tin asina tantu cos den bida cu ta causa tristesa. Nos tur tin mester di proteccion, calor di amistad i cariño. Algun di nos a bira bieu, i nos no ta contentu cu esei. Otronan ta hopi desapuntá cu bida no a resultá manera nan a spera. I tin otronan cu ta profundamente preocupá dor di un resultado cu a bini for di laboratorio.

Ademas, mayoria hende lo no nenga cu sosodementunan di nos tempu a crea un enorme necesidad pa consuelo i speransa. Den siglo pasá so, mas cu shen miyon hende a muri den guera. * Casi tur a laga un famia atras ta pena—mama cu tata, ruman, biuda i huérfano—i cu gran necesidad di consuelo. Awe, mas cu mil miyon hende ta biba den pobresa extremo. Mitar dje poblacion di mundu no tin acceso regular na cuido médico i remedi di promé necesidad. Tin miyones di mucha bandoná ta dual den cayanan sushi di stadnan grandi, i hopi di nan ta usa droga i ta practicá prostitucion. Tin miyones di refugiado ta caba na nada den camponan horibel.

Sin embargo, maske cifra por ta hopi impresionante, nan no ta transmití e dolor i afliccion individual cu algun hende ta pasando aden den nan bida personal. Por ehempel, considerá Svetlana, un muher hóben dje region di  Balkan cu a nace den pobresa extremo. * E ta conta: “Pa por haña placa, mi mayornan tabata manda mi bai pidi cen of horta. Nos bida di famia a bai atras asina tantu cu mi a bira víctima di incesto. Mi a haña trabou como waiter, i mi mama cu tabata ricibí e cen cu mi a gana, a bisa cu si un dia mi perde mi trabou, lo e mata su curpa. Tur esaki a hiba mi den un bida di prostitucion. Diestres aña so mi tabatin. Despues mi a sali na estado i mi a cometé aborto. Ora mi tabatin 15 aña, mi a parce 30.”

Laimonis, un yoncuman di Latvia, ta conta nos di su necesidad di consuelo i dje mal recuerdonan cu a hacié un hende deprimí. Cu 29 aña el a hañ’é den un accidente di auto cu a lagu’é lam di su custia bai abou. El a sinti su mes completamente sin speransa, i a recurí na alcohol. Den cincu aña e tabata un desaster, un alcohólico lam i sin futuro. Unda e por a haña consuelo?

Of pensa riba Angie. Su casá a pasa den tres operacion di cabes cu a lagu’é parcialmente lam na cuminsamentu. Anto cincu aña despues dje último operacion, el a haña un accidente masha serio cu casi a mat’é. Ora Angie a drenta e sala di emergencia i mira su casá drumí den coma dor dje dañonan serio cu el a sufri na su cabes, e tabata sa cu tabatin un tragedia na caminda. E cu su famia tabatin cu bai pasa den tempu duru. Con e por a haña sosten i animacion?

Pa Pat, un dia di winter un par di aña pasá a parce di cuminsá normal. Pero e siguiente tres dianan a disparcé for di su memoria. Despues su esposo a cont’é cu e tabatin dolor fuerte den su pechu, anto a haña un atake di curason. Su curason a cuminsá bati masha lihé i pa loco, anto despues el a para completamente. El a stop di hala rosea. “De echo, mi tabata clínicamente morto,” segun Pat. Pero di un manera of otro el a sobrebibí. Tocante su estadia largu den hospital, e ta conta: “Hopi dje testnan tabata duna mi miedu, foral ora nan a purba haci mi curason tembla i para, manera el a haci promé.” Kico por a dun’é e consuelo i alivio cu e tabatin mester durante e tempu crítico ei?

Joe cu Rebecca a perde nan yu homber di 19 aña den un accidente di auto. Nan ta bisa: “Nunca nos no a haña nos enfrentá cu algu asina devastador. Apesar cu nos a yega di pena huntu cu otronan cu a perde sernan kerí, nos no a ègt yega di sinti e gran dolor di curason cu nos ta sinti awor.” Tin algu cu por calma asina un “gran dolor di curason,” e enorme duele di perde un hende cu bo ta stima hopi?

Sí, tur e hendenan aki, i miyones di otro hende, a haña un gran fuente di consuelo i alivio. Pa sa con bo tambe por beneficiá dje fuente ei, por fabor sigui lesa.

[Nota]

[Rekonosementu pa Potrèt na página 3]

UNITED NATIONS/PHOTO BY J. K. ISAAC

UN PHOTO 146150 BY O. MONSEN