Bo Ta Mira Hende Violento Manera Dios Ta Mira Nan?
Bo Ta Mira Hende Violento Manera Dios Ta Mira Nan?
Pa hopi tempu hende a admira i onra hombernan poderoso, esta, esnan cu a desplega gran forsa fisico i curashi. Un homber asina tabata e heroe mitologico di antiguo Grecia, Heracles, of Hercules manera e romanonan tabata conoc’e.
HERCULES tabata un superhéroe di gran fama, e luchadó di mas poderoso. Segun leyenda, e tabata un semi-dios, yu dje dios griego Zeus i di Alcmene, un mama humano. Su hazañanan a cuminsá miéntras cu e tabata apénas un baby den wieg. Ora un diosa yalurs a manda dos colebra grandi pa mat’é, Hércules a choca nan mata. Mas despues den su bida el a bringa batayanan, vence monsternan i a lucha contra morto pa salba un amiga. Tambe el a destruí stad, violá hende muher, benta un mucha homber for di un toren, i mata su casá i yunan.
Aunke e no tabata un persona real, for di tempunan remoto e figura mitológico Hércules a ser describí den cuentanan di paisnan di antigwedad cu e griegonan tabata conocé. Romanonan a ador’é como dios; comerciante i biaheronan a haci oracion na dje pa haña prosperidad i proteccion for di peliger. Pa miles di aña cuentanan tocante su hazañanan a fasiná hende.
Orígen dje Leyenda
Relatonan tocante Hércules i otro héroenan mitológico ta basá riba realidad? Den un sentido, kisas. Bijbel ta conta nos di un tempu, na principio di historia di hende, durante cua “diosnan” i “semi-diosnan” en berdad a cana riba tera.
Describiendo e temporada ei, Moises a skirbi: “Awor a sosodé cu ora hende a cuminsá aumentá na cantidad riba superficie di suela i yu muher a nace di nan, anto e yunan di e Dios berdadero a cuminsá ripará yu muher di homber, cu nan tabatin bunita aparencia; i nan a cuminsá tuma esposa pa nan mes, esta, tur loke nan a scoge.”—Génesis 6:1, 2.
“E yunan di e Dios berdadero” aki no tabata hende; nan tabata yunan angelical di Dios. (Compará cu Job 1:6; 2:1; 38:4, 7.) E escritor bíblico Hudas ta relatá cu algun angel “no a warda nan posicion original sino a bandoná nan propio i debido lugá di biba.” (Hudas 6) Cu otro palabra, nan a bandoná nan lugá asigná den e organisacion celestial di Dios, pasobra nan a preferá di biba cerca muhernan bunita riba tera. Hudas ta agregá cu e angelnan rebelde aki tabata mescos cu e hendenan di Sódoma i Gomora, kendenan “a cometé fornicacion den exceso i a bai tras di carni pa uso innatural.”—Hudas 7.
Bijbel no ta duna tur detaye dje actividad dje angelnan desobediente aki. Sin embargo, leyendanan antiguo di Grecia i di otro lugánan ta describí cantidad di dios i diosa, sea visibel of invisibel, cu tabata move entre humanidad. Ora nan a bisti curpa humano, nan tabata masha bunita mes. Nan a come, bebe, drumi i tene relacion sexual nan cu nan mes i tambe cu hende. Aunke supuestamente nan tabata santu i inmortal, nan tabata gaña, pleita i bringa, seducí i violá hende. Kisas e relatonan mitológico ei ta reflehá, aunke den un forma floreá i trocí, e condicion real cu a existí promé cu Diluvio segun e buki bíblico Génesis.
E Poderosonan di Antigwedad, Hombernan di Fama
E angelnan desobediente cu a bisti curpa humano a tene relacion sexual cu hende muher, i e muhernan aki a haña yu. Esakinan no tabata yunan normal. Nan tabata néfilim, mitar hende mitar angel. E relato di Bijbel ta bisa: “Néfilim a resultá di ta riba tera den e dianan ei, i tambe despues di esei, ora cu e yunan di e Dios berdadero a sigui tene relacion cu yu muher di hende i nan a haña yu di nan, nan tabata e poderosonan cu tabata di antigwedad, hombernan di fama.”—Génesis 6:4.
E palabra hebreo “néfilim” ta nificá literalmente “tumbadónan,” esnan cu ta tumba otro, of cu ta pone otronan cai, mediante actonan violento. P’esei, no ta un sorpresa cu e relato di Bijbel ta agregá: “E tera a yena cu violencia.” (Génesis 6:11) E semi-diosnan mitológico, manera Hércules i e héroe babilónico Gilgamesh, ta masha parecido na néfilim.
Tuma nota cu tabata yama néfilim “e poderosonan” i “homber di fama.” Distinto for dje homber hustu Noe, kende a biba den e mésun periodo, néfilim no tabata interesá den promové e fama di Jehova. Nan tabata interesá den nan mes fama, gloria i reputacion. Mediante actonan poderoso cu sin duda a enbolbé violencia i dramamentu di sanger, nan a gana e fama cu nan tabata anhelá asina tantu cerca e mundu malbado rond di nan. Nan tabata e superhéroenan di nan tempu—temí, respetá i aparentemente invencibel.
Aunke néfilim i nan tatanan angelical degradá por tabatin fama den bista di nan contemporáneonan, den bista di Dios sí, sigur nan no tabatin bon nomber. Nan manera di biba tabata detestabel. Consecuentemente, Dios a tuma accion contra e angelnan degradá. Apostel Pablo a skirbi: “Dios no a tarda pa castigá e angelnan cu a peca, sino, tirando nan den Tártaro, el a entregá nan na cuebanan di scuridad diki pa ser reservá pa huicio; i e no a keda sin castigá un mundu di antigwedad, sino a warda Noe, un predicadó di husticia, sano i salbo cu shete otro ora el a trece un diluvio riba un mundu di hende malbado.”—2 Pedro 2:4, 5.
N’e Diluvio mundial, e angelnan rebelde a kita nan curpa humano i a bolbe n’e region spiritual, den un condicion desaprobá. Dios a castigá nan dor di prohibí nan di bisti curpa humano atrobe. Tur néfilim, e desendientenan sobrehumano dje angelnan desobediente, a muri. Ta Noe cu su famia chikitu so a sobrebibí e Diluvio.
Hombernan di Fama Awe
Awe no tin dios i semi-dios ta cana riba tera mas. Sin embargo, tin abundancia di violencia. Buki, película, television i música ta glorificá hombernan di fama di actualidad. Nunca nan lo pensa pa bira otro banda di cara, stima nan enemigunan, busca pas, pordoná of bai for di violencia. (Mateo 5:39, 44; Romanonan 12:17; Efesionan 4:32; 1 Pedro 3:11) Mas bien, hende ta admirá e poderosonan djawe pa nan forsa i nan abilidad di bringa i tuma vengansa i p’e echo cu nan ta usa superviolencia pa contrarestá violencia. *
Desde e dianan di Noe, Dios su punto di bista tocante e personanan aki no a cambia. Jehova no ta admirá stimadónan di violencia, ni e no ta gosa cu nan hazañanan. E salmista a canta: “Jehova mes ta examiná e hustu i tambe e malbado, i cualkier persona cu ta stima violencia, Su alma ta odia sigur.”—Salmo 11:5.
Un Clase di Fortalesa Diferente
E homber di mas famoso cu hamas a yega di biba, Jesucristo, un homber di pas, ta un contraste skerpi cu hombernan poderoso di violencia. Miéntras e tabata riba tera, e “no a cometé violencia.” (Isaías 53:9) Ora su enemigunan a bini pa arest’é den e hofi di Getsémani, su siguidónan tabatin algun spada. (Lucas 22:38, 47-51) Nan por a forma un grupo di luchadó i purba prevení p’e ser entregá n’e hudiunan.—Juan 18:36.
De facto, apostel Pedro a saca su spada pa defendé Jesus, pero Jesus a bis’é: “Hinca bo spada bek na su lugá, pasobra tur esnan cu ta coge spada lo perecé pa spada.” (Mateo 26:) Sí, violencia ta producí violencia, manera historia humano a demostrá bes tras bes. Fuera dje oportunidad pa defendé su mes cu arma, Jesus tabatin otro medionan di defensa. Siguientemente, el a bisa Pedro: “Bo no ta kere cu mi por apelá na mi Tata p’e duna mi na e momento aki mas cu diesdos legion di angel?”— 51, 52Mateo 26:53.
En bes di recurí na violencia of proteccion di angel, Jesus a permití e hendenan cu lo a bai mat’é, captur’é. Di con? Un motibu tabata cu e tabata sa cu e tempu no a yega ainda pa su Tata celestial caba cu maldad riba tera. En bes di tuma cosnan den su mes man, Jesus a confia den Jehova.
Esaki no tabata un posicion di debilidad, sino unu di gran fortalesa interno. Jesus a demostrá fe fuerte cu Jehova lo corigí asuntunan na Su debido tempu i manera. Debí na su obedencia, Jesus a ser halsá na un puesto di fama secundario na Jehova so. Relacioná cu Jesus, apostel Pablo a skirbi: “El a humiyá su mes i a bira obediente te na morto, sí, morto na un staca di tormento. P’e motibu aki mes tambe Dios a hals’é na un puesto superior i bondadosamente a dun’é e nomber cu ta riba tur otro nomber, di manera cu den e nomber di Jesus tur rudia mester dobla, di esnan den shelu i di esnan cu ta riba tera i di esnan bou di suela, i tur lenga mester reconocé abiertamente cu Jesucristo ta Señor p’e gloria di Dios e Tata.”—Filipensenan 2:8-11.
E Promesa di Dios pa Caba cu Violencia
Cristiannan berdadero ta hiba nan bida di acuerdo cu e ehempel i siñansanan di Jesus. Nan no ta admirá ni imitá hombernan mundano di fama i violencia. Nan sa cu na Dios su debido tempu, e personanan ei lo ser eliminá pa semper, mésun sigur cu esei a sosodé cu e malbadonan den dia di Noe.
Dios ta e Creador di tera i di humanidad. Tambe e ta e Soberano legítimo. (Revelacion 4:11) Si un hues humano tin autoridad legal pa tuma decisionnan hudicial, Dios tin asta mas autoridad pa hacié. Su respet pa su propio principionan hustu, i tambe su amor pa esnan cu ta stim’é, lo impuls’é pa caba cu tur maldad i cu esnan cu ta practik’é.—Mateo 13:41, 42; Lucas 17:26-30.
Esaki lo trece pas duradero riba tera, pas cu un fundeshi sólido di husticia i rectitud. E profecia bon conocí, relacioná cu Jesucristo, a predicí esaki: “Un yu a nace na nos, un yu homber a ser duná na nos; i e gobiernu di prins lo yega di ta riba su scouder. I su nomber lo ser yamá Maraviyoso Consehero, Dios Poderoso, Tata Eterno, Prins di Pas. N’e abundancia dje gobiernu di prins i na pas lo no tin fin, i riba e trono di David i riba su reino pa establec’é firmemente i pa sosten’é pa medio di husticia i pa medio di rectitud, djawor padilanti i te na tempu indefiní. E celo mes di Jehova di ehércitonan lo haci esaki.”—Isaías 9:6, 7.
Cu bon motibu anto, cristiannan ta haci caso dje conseho inspirá di hopi tempu pasá: “No bira envidioso dje homber di violencia, ni scoge ningun di su camindanan. Pasobra e persona tramposo ta un cos detestabel pa Jehova, pero Su intimidad ta cu esnan recto.”—Proverbionan 3:31, 32.
[Nota]
^ par. 17 Hopi bes e personahenan violento den hopi wega di video i película di ciencia ficcion ta reflehá e rasgonan malbado i violento aki mas intensamente.
[Komentario na página 29]
HENDE TA ADMIRA HOMBERNAN PODEROSO DJAWE PA NAN FORSA I NAN ABILIDAD DI USA SUPERVIOLENCIA PA CONTRARESTA VIOLENCIA
[Rekonosementu pa Potrèt na página 26]
Alinari/Art Resource, NY