Bo Ta Recomenda Bo Mes na Otronan?

‘Mi no tin cunes kico otro hende ta pensa!’ Kisas den un momento di rabia of frustracion bo a yega di expresá bo mes den un manera intrépido asina. Pero una bes e ola di curashi a baha, kisas preocupacion inkietante ta molestiá bo. Di con? Pasobra en realidad, mayoria di nos sí tin cunes cu loke otro hende ta pensa di nos.

SÍ, NOS mester ta interesá den sintimentu di otro hende. Foral nos como cristian, esta, ministernan ordená di Jehova Dios, mester tin un interes apropiado den con otro hende ta mira nos. Al fin i al cabo, nos ta “un exhibicion teatral pa e mundu.” (1 Corintionan 4:9) Na 2 Corintionan 6:3 i 4, nos ta haña e conseho sano di apostel Pablo: “Di ningun manera nos ta duna un motibu pa tropieso, pa hende no haña falta den nos ministerio; pero di tur manera nos ta recomendá nos mes como ministernan di Dios.”

Pero, kico kier men recomendá nos mes na otronan? E ta nificá promové nos mes of yama indebido atencion na nos mes i nos abilidadnan? No. Pero sí e ta rekerí pa aplicá e palabranan di 1 Pedro 2:12: “Mantené boso conducta excelente entre e nacionnan, pa . . . nan, como testigo ocular di boso obranan excelente, por glorificá Dios.” Cristiannan ta recomendá nan mes dor di laga nan conducta papia pa su mes! Na final di cuenta, esaki ta trece alabansa, no na nos, sino na Dios. Sin embargo, recomendá nos mes na otronan por tin beneficio personal tambe. Laga nos examiná tres área den cua esaki por resultá di ta cierto den bo caso.

Un Posibel Partner Matrimonial

Tuma por ehempel, e asuntu di matrimonio. E ta un don for di Jehova Dios, esun “na ken  tur famia den shelu i riba tera ta debe nan nomber.” (Efesionan 3:15) Kisas bo ta deseá di casa un dia. Si ta asina, te na ki grado bo ta recomendá bo mes como un posibel partner matrimonial? Sí, ki reputacion bo tin como un homber of muher cristian soltero?

Den algun pais, esaki ta hopi importante pa famianan. Por ehempel na Ghana, ora dos persona ta deseá di casa cu otro, segun tradicion, e futuro pareha mester informá nan mayornan. Esakinan, na nan turno, ta informá otro miembronan di famia. E famianan dje homber ta bai haci sigur dje reputacion cu e mucha muher tin den bario. Ora e mayornan ta convencí cu e muher ta adecuá, nan lo informá famianan dje muher di nan yu su intencion di casa cu nan yu muher. Awor e famia dje muher ta bai chek e reputacion dje homber promé cu nan consentí cu e matrimonio. P’esei, un dicho ghanes ta bisa: “Puntra esnan cu mester conoc’é, promé cu bo casa.”

Kico di paisnan den Occidente, caminda por lo general ta permití individuonan mes scoge nan partner matrimonial? Asta einan, lo ta sabí pa un homber of muher cristian maduro busca recomendacionnan franco for di otronan cu conocé e potencial partner bon. Eseinan por ta mayornan of amigunan maduro. Segun e buki E Secreto pa Felicidad den Famia, un muher hóben por puntra: “‘Ki sorto di reputacion e homber aki tin? Ken ta su amigunan? E ta desplegá dominio propio? Con e ta trata personanan di edad? Di ki clase di famia e ta bini? Con e ta trata cu su famia? Kico ta su actitud pa cu placa? E ta bebe demasiado bebida alcohólico? E tin mal beis, asta ta violento? Ki responsabilidadnan e tin den e congregacion, i con e ta atendé na nan? Lo mi por respet’é profundamente?’—Levítico 19:32; Proverbionan 22:29; 31:23; Efesionan 5:3-5, 33; 1 Timoteo 5:8; 6:10; Tito 2:6, 7.” *

Mescos un homber tambe lo kier haci pregunta tocante e muher cristian cu ken e tin pensá di casa. Bijbel ta bisa cu Boaz a mustra un interes asina den Rut, e muher cu ken el a casa despues. Ora Rut a puntra: “Con bini mi a haña fabor den bo bista, di manera cu bo ta tuma nota di mi, siendo cu mi ta un stranhero?” Boaz a bisa: “Nan a duna mi un informe completo di tur loke bo a haci.” (Rut 2:10-12) Sí, Boaz no solamente a observá personalmente cu Rut tabata un muher leal, dedicá i trahadó, pero tambe el a ricibí comentarionan faborabel for di otro hende.

Mescos tambe, bo conducta ta loke lo determiná si otronan ta haña bo un bon partner matrimonial of no. Con exactamente bo ta recomendá bo mes na otronan den e aspecto aki?

Como un Trahadó

Lugá di empleo ta un otro área caminda mantené un bon conducta por ta na bo beneficio. Competencia pa trabou por ta fuerte. Hopi bes, trahadónan cu ta conocí pa desobedencia, pa ta semper lat i desonesto ta haña nan retiro.  Tin biaha tambe companianan ta kita trahadónan experenciá for di trabou pa baha gastu. Ora personanan desempleá ta busca trabou, por ta nan ta ripará cu companianan ta verificá cu nan doño di trabou anterior pa haci sigur di nan custumbernan di trabou, nan actitud i experencia. Hopi cristian a recomendá nan mes cu éxito na doño di trabou debí na nan conducta respetuoso, areglo personal modesto, manera placentero i cualidadnan cristian sobresaliente.

Onestidad ta un cualidad asina, unu cu hopi doño di trabou ta duna masha prioridad. Mescos cu apostel Pablo, nos kier “comportá nos mes onradamente den tur cos.” (Hebreonan 13:18) Den un compania di mina na Ghana, nan a raportá ladronicia. E supervisor n’e planta di tratamentu, un Testigo, a keda cu su trabou miéntras cu nan a kita otronan for di trabou. Di con? Pasobra atrabes di añanan e gerente a observá cu e ruman ta onesto. Tambe su trabou duru i respet pa autoridad tabata bon conocí. Sí, su conducta recto a scapa su trabou!

Cua ta algun cos mas cu un cristian por haci pa recomendá su mes riba e mercado laboral? Sea cual sea e trabou cu nan duna bo, wak pa bo ta ábil den dje. (Proverbionan 22:29) Traha diligentemente i conciencialmente. (Proverbionan 10:4; 13:4) Trata bo doño di trabou i bo supervisor cu respet. (Efesionan 6:5) Puntualidad, onestidad, eficiencia i traha duru, ta cualidadnan cu doñonan di trabou ta apreciá, i e cualidadnan aki por yuda bo haña trabou asta ora cuponan di trabou ta scars.

Privilegionan den Congregacion

Awor mas cu nunca, tin mester di hombernan maduro pa hiba delantera den congregacion cristian. E motibu? Isaías a profetisá: “Haci e lugá di bo tent mas espacioso. I laga nan rek e telanan di tent di bo magnífico tabernáculo.” (Isaías 54:2) Na cumplimentu dje profecia aki, e congregacion mundial di Jehova ta sigui crece.

Pues, si bo ta un homber cristian, con bo por recomendá bo mes como un persona cualificá pa sirbi den un posicion nombrá? Considerá e ehempel dje yoncuman Timoteo. Lucas ta informá cu “e rumannan na Listra i Iconio a duna bon informe” di Timoteo. Sí, dor di su conducta excelente, e yoncuman aki a recomendá su mes na otronan den dos diferente stad. P’esei, Pablo a invitá Timoteo pa djoin e den su ministerio biahero.—Echonan 16:1-4.

Con un homber awe por ‘percurá pa alcansá un puesto di superintendente’ den un manera apropiado i cu ta demostrá debocion na Dios? Sigur no dor di hiba un campaña p’e ser nombrá, sino dor di cultivá cualidadnan cristian necesario pa cumpli cu e responsabilidadnan ei. (1 Timoteo 3:1-10, 12, 13; Tito 1:5-9) Tambe e por mustra cu e ta “deseoso di un trabou excelente” dor di tin un participacion completo den e trabou di predicá i haci disipel. (Mateo 24:14; 28:19, 20) Esnan cu ta recomendá nan mes como hombernan cristian responsabel, ta mustra interes sincero den bienestar di nan rumannan spiritual. Nan ta sigui e conseho di apostel Pablo: “Compartí cu e santunan conforme cu nan necesidadnan. Sigui e caminda di hospitalidad.” (Romanonan 12:13) Dor di haci asina, un homber cristian por realmente ‘recomendá su mes como un minister di Dios.’

Tur Ora

Recomendá nos mes na otronan no ta nificá aparentá of cu nos ta “complacé hende” so. (Efesionan 6:6) Na final di cuenta, e ta nificá recomendá nos mes na nos Creador, Jehova Dios, dor di sigui su ley i principionan conciencialmente. Si bo desaroyá bo spiritualidad i fortalecé bo relacion cu Jehova Dios, otronan lo ripará un adelanto den e manera cu bo ta trata cu miembronan di bo famia, coleganan di trabou i compañeronan cristian. Tambe nan lo observá bo stabilidad i balansa, bo bon sentido di distinguí asuntu, bo abilidad pa trata cu responsabilidad i bo humildad. Esaki lo pone bo gana nan amor i respet i, mas importante ainda, lo bo gana e aprobacion di Jehova Dios pasobra bo a recomendá bo mes na otronan!

[Nota]

[Plachi na página 19]

Sabiamente hopi mayor ta informá tocante e reputacion dje persona cu nan yu homber of yu muher ta interesá pa casa cuné

[Plachi na página 20]

Un ruman homber ta recomendá su mes pa privilegionan di sirbishi dor di mustra consideracion na otronan