E Mundu Nobo—Abo Lo T’ei?

“No tin nada mihó pa nan cu alegrá i haci bon durante bo bida; i tambe pa tur hende come i en berdad bebe i mira e bon pa tur su trabou duru. Esei ta e don di Dios.”—ECLESIASTES 3:12, 13.

1. Di con nos por ta optimista tocante futuro?

HOPI hende ta imaginá cu Dios Todopoderoso ta estricto, severo. Tog, loke e texto aki riba ta mustra ta un berdad cu bo por haña den su Palabra inspirá. E ta na armonia cu e echo cu Jehova ta “e Dios felis,” i cu el a pone nos promé mayornan den un paradijs riba tera. (1 Timoteo 1:11; Génesis 2:7-9) Segun cu nos ta purba haña un mihó comprendimentu dje futuro cu Dios ta primintí su pueblo, nos no mester keda strañá di siña tocante condicionnan cu lo trece disfrute duradero pa nos.

2. Kico ta algun cos cu bo ta spera riba dje cu anhelo?

² Den e artículo anterior nos a examiná tres dje cuater lugánan den Bijbel caminda e ta predicí “shelu nobo i un tera nobo.” (Isaías 65:17) Un dje prediccionnan confiabel ei ta registrá na Revelacion 21:1. E versículonan cu ta sigui ta conta di un tempu ora Dios Todopoderoso lo trece un mehoransa drástico den condicionnan riba tera. Lo e seca lágrima di duele. Hende lo no muri mas di behes, enfermedad ni accidente. Lamentacion, sclamacion i dolor lo a disparcé. Esta un dushi  speransa! Pero nos por ta sigur cu lo e cumpli? I ki impacto e speransa aki lo por tin riba nos for di awor?

Motibunan pa Confia

3. Di con nos por confia e promesanan di Bijbel tocante nos futuro?

³ Nota con Revelacion 21:5 ta sigui. E ta cita Dios, sintá riba su trono celestial, cu ta declará: “Mira! Mi ta haci tur cos nobo.” E promesa divino ei ta mihó cu cualkier declaracion nacional di independencia, cualkier declaracion actual di derecho of cualkier aspiracion humano pa futuro. E ta un declaracion absolutamente confiabel di parti di Esun cu, segun Bijbel, “no por gaña.” (Tito 1:2) Ta di comprendé cu kisas lo bo sinti cu nos por keda te aki, gosa dje speransa exkisito aki i confia den Dios. Pero nos no tin nodi para aki. Tin mas cos pa nos siña tocante nos futuro.

4, 5. Cua profecianan di Bijbel cu nos a trata caba por reforsá nos confiansa den loke tin nos dilanti?

⁴ Refleccioná riba loke e artículo anterior a mustra relacioná cu e promesanan di Bijbel tocante shelu nobo i un tera nobo. Isaías a profetisá di un sistema nobo asina, i su profecia a cumpli ora e hudiunan a bolbe na nan patria i reestablecé adoracion berdadero. (Esdras 1:1-3; 2:1, 2; 3:12, 13) Pero ta na esei so e profecia di Isaías a señalá? Definitivamente cu no! E cosnan cu el a profetisá lo a cumpli na un escala mas grandi leu den futuro. Pakico nos ta yega na e conclusion ei? Dor di loke nos ta lesa na 2 Pedro 3:13 i Revelacion 21:1-5. E pasashinan ei di Bijbel ta mustra cu lo tin shelu nobo i un tera nobo cu lo beneficiá cristiannan riba un escala mundial.

⁵ Manera nos a mira caba, Bijbel ta usa e expresion “shelu nobo i un tera nobo” cuater bes. Nos a considerá tres di nan i a yega na conclusionnan masha animador. Bijbel ta profetisá bon cla cu Dios lo eliminá maldad i otro causanan di sufrimentu, i despues bendicioná humanidad den su sistema nobo primintí.

6. Kico un di cuater profecia cu ta mencioná “shelu nobo i un tera nobo” ta predicí?

⁶ Awor, laga nos examiná e otro caminda cu e expresion “shelu nobo i un tera nobo” ta aparecé, esta, na Isaías 66:22-24: “‘Mescos cu e shelu nobo i e tera nobo cu mi ta bai crea ta pará mi dilanti,’ ta e expresion di Jehova, ‘asina boso yunan i boso nomber lo keda para. I lo sosodé sigur cu di luna nobo pa luna nobo i di sabat pa sabat, tur carni lo bini pa buig mi dilanti,’ Jehova a bisa. ‘I nan realmente lo sali i wak e cadavernan di hende cu tabata cometé transgresion contra mi; pasobra bichi mes cu ta riba nan lo no muri i nan candela mes lo no paga, i nan tin cu bira algu repugnante pa tur carni.’”

7. Pakico nos por concluí cu Isaías 66:22-24 lo tin un cumplimentu den futuro?

⁷ E profecia aki a aplicá riba e hudiunan cu a reestablecé nan mes na nan pais. Pero lo tabatin un otro cumplimentu. Esei lo mester a tuma lugá hopi aña despues cu a skirbi e di dos carta di Pedro i e buki di Revelacion, pasobra nan a referí na ‘shelu i tera nobo’ como den futuro. Nos por spera e cumplimentu grandioso i completo ei den sistema nobo. Considerá algun dje condicionnan cu nos por anticipá di gosa di dje.

8, 9. (a) Den ki sentido Dios su pueblo lo “keda para”? (b) Kico ta e nificacion dje profecia cu ta bisa cu Jehova su sirbidónan lo adorá “di luna nobo pa luna nobo i di sabat pa sabat”?

⁸ Revelacion 21:4 a indicá cu lo no tin morto mas. E pasashi na Isaías capítulo 66 ta di acuerdo cu esei. Na versículo 22 nos por mira cu Jehova sa cu e shelu nobo i e tera nobo lo no ta temporal, di duracion limitá. Ademas, su pueblo tambe lo permanecé; nan lo “keda para” su dilanti. Loke cu Dios a haci caba pa su pueblo scogí ta duna nos motibu pa nos confia. Cristiannan berdadero a enfrentá persecucion cruel, asta intentonan fanático pa caba cu nan. (Juan 16:2; Echonan 8:1) Tog, asta enemigunan sumamente poderoso di Dios su pueblo, manera e emperador  romano Nero i Adolf Hitler, no a logra eradicá e lealnan di Dios cu ta carga su nomber. Jehova a conserbá e congregacion di su pueblo, i nos por ta sigur cu e por yud’é keda para permanentemente.

⁹ Di manera similar, esnan fiel na Dios cu ta parti dje tera nobo, e sociedad di adoradónan berdadero den e mundu nobo, lo keda para individualmente dor cu nan lo ta rindi adoracion puru na e Creador di tur cos. Nan adoracion lo no ta de bes en cuando of con-cu-ta. Dios su Ley, cu el a duna Israel mediante Moises, a rekerí cierto actonan di adoracion tur luna, manera e luna nobo a indicá, i tur siman, manera e sabat a indicá. (Levítico 24:5-9; Númeronan 10:10; 28:9, 10; 2 Crónicanan 2:4) Pues, Isaías 66:23 ta indicá adoracion regular i continuo di Dios, siman aden siman afó, luna aden luna afó. Ateismo i hipocresia religioso lo no existí e tempu ei. “Tur carni lo bini pa buig” dilanti Jehova.

10. Pakico bo por confia cu hende malbado lo no daña e mundu nobo permanentemente?

¹⁰ Isaías 66:24 ta sigurá nos cu nunca e pas i e husticia dje tera nobo lo no ta den peliger. Hende malbado lo no ruin’é. Corda cu 2 Pedro 3:7 ta bisa cu “e dia di huicio i di destruccion di hende malbado” ta nos dilanti. Ta hende malbado ta esnan cu lo yega na nan fin. Nada malu lo no pasa hende inocente. Lo no ta manera ta pasa hopi bes den gueranan humano, caminda tin mas morto di civil cu di soldá. E Gran Hues ta garantisá nos cu su dia lo ta un destruccion di hende malbado.

11. Segun Isaías ta mustra, kico lo ta futuro di tur esnan cu bai contra Dios i su adoracion?

¹¹ E hustunan cu sobrebibí lo mira cu Dios su palabra profético ta berdad. Versículo 24 ta predicí cu “e cadavernan di hende cu tabata cometé transgresion contra” Jehova lo ta un prueba di su huicio. E descripcion bibu cu Isaías a duna por zona horibel, pero e ta cuadra cu un echo histórico. Pafó dje muraya di antiguo Jerusalem tabatin dùmp pa tira sushi i, ocasionalmente, cadaver di criminalnan ehecutá cu nan a considerá di no ta merecé un entiero decente. * Ei e bichinan i e candela consumidó tabata eliminá tantu e sushi como e cadavernan den poco tempu. Evidentemente, e descripcion di Isaías ta ilustrá con definitivo Jehova su huicio riba transgresornan ta.

 Loke El A Primintí

12. Ki otro indicacion Isaías ta duna tocante bida den e mundu nobo?

¹² Revelacion 21:4 ta conta nos kico ta algun cos cu lo no existí den e sistema nobo binidero. Pero, kico sí lo existí n’e tempu ei? Con bida lo ta? Nos por haña algun idea confiabel? Sí. Isaías capítulo 65 ta describí proféticamente algun condicion cu nos lo disfrutá di dje si nos haña Jehova su aprobacion pa biba ora cu e crea e shelu nobo i tera nobo aki den un sentido final. Esnan bendicioná cu un lugá permanente den e tera nobo lo no bira bieu i muri inevitablemente. Isaías 65:20 ta sigurá nos: “Lo no tin un yu na pechu mas di un par di dia bieu, ni un homber bieu cu no ta cumpli su dianan; pasobra un hende lo muri manera djis un mucha, aunke e tin shen aña di edad; i pa loke ta e pecadó, aunke e tin shen aña di edad, lo inbocá malu contra dje.”

13. Con Isaías 65:20 ta sigurá nos cu Dios su pueblo lo gosa di siguridad?

¹³ Tempu cu esaki a cumpli originalmente riba e pueblo di Isaías, e tabata kier men cu e babynan den e pais tabata fuera di peliger. No tabatin enemigu ta bin, manera e babilonionan a yega di haci, pa bai cu e babynan of mata hombernan den nan vigor di bida. (2 Crónicanan 36:17, 20) Den e mundu nobo binidero, hende lo ta safe, den siguridad, capas pa disfrutá di bida. Si un hende scoge pa rebelá contra Dios, lo no lagu’é sigui biba. Dios lo elimin’é. Kico si e pecadó rebelde tin shen aña di edad? Lo e muri “manera djis un mucha,” na contraste cu haña bida eterno.—1 Timoteo 1:19, 20; 2 Timoteo 2:16-19.

14, 15. A base di Isaías 65:21 i 22, ki actividadnan recompensador bo por anticipá?

¹⁴ Na lugá di concentrá riba con lo bai eliminá un pecadó deliberá, Isaías ta describí e condicionnan di bida cu lo reina den e mundu nobo. Purba visualisá bo mes den e esena. Kisas e promé cosnan cu lo bini den bo mente ta e cosnan cu mas ta interesá bo. Isaías ta trata nan na versículonan 21 cu 22: “Nan siguramente lo traha cas i biba den nan; i nan siguramente lo planta hofi di wijndruif i come nan fruta. Nan lo no traha cas i otro hende biba aden; nan lo no planta i otro hende come. Pasobra e dianan di mi pueblo lo ta mescos cu e dianan di un palu; i mi scogínan lo gosa completamente dje trabou di nan mes man.”

¹⁵ Si ainda bo no a gana experencia den construccion of no a yega di planta, Isaías su profecia ta sugerí cu bo tin cos pa siña. Pero, lo bo ta dispuesto pa siña cu yudansa di instructornan capas, kisas bisiña amabel cu ta keda contentu di duna bo un man? Isaías no a bisa si bo cas ta bai tin bentana grandi sin glas cu ‘blinds,’ pa bo por disfrutá dje bientu tropical, of bentana di glas cerá pa bo por observá cambionan di temporada. Lo bo diseñá un  cas cu dak schuin pa yobida i sneu basha bini abou? Of p’e clima local lo tin mester di un dak plat, manera esnan na Medio Oriente, caminda bo por sinta cu bo famia disfrutá di cuminda i combersacion?—Deuteronomio 22:8; Nehemías 8:16.

16. Di con bo por spera cu e mundu nobo lo duna satisfaccion permanente?

¹⁶ Na lugá di e tipo di detayenan ei, ta mas importante pa sa cu lo bo tin bo propio cas. Lo e ta di bo, no manera awe, ora podisé bo ta traha duru pa construí algu, anto un otro persona ta probechá di dje. Tambe, Isaías 65:21 ta bisa cu lo bo planta i come e fruta. Claramente, esei ta resumí e situacion general. Lo bo saca profundo satisfaccion for di bo esfuersonan, e fruta di bo propio labor. Lo bo por haci esei durante un bida largu, “mescos cu e dianan di un palu.” Definitivamente esei ta cumpli cu e descripcion: “tur cos nobo”!—Salmo 92:12-14.

17. Cua promesa mayornan lo haña specialmente animador?

¹⁷ Si bo ta un mayor, e palabranan aki lo conmové bo: “Nan lo no traha duru por nada, ni nan lo no duna lus pa disturbio; pasobra nan lo ta e desendencia componí di esnan bendicioná dor di Jehova, i nan desendientenan huntu cu nan. I realmente lo sosodé cu promé cu nan yama, mi mes lo contestá; miéntras nan ta papia ainda, mi mes lo tende.” (Isaías 65:23, 24) Bo conocé di experencia propio e dolor di ‘duna lus pa disturbio’? Nos no tin nodi mencioná e cantidad di problemanan cu yunan por tin cu ta causa disturbio pa mayornan i otro hende. Relacioná cu esei, nos tur a yega di mira mayornan cu ta asina preocupá cu nan propio carera, actividad of placernan, cu nan tin poco tempu pa nan yunan. Na contraste, Jehova ta sigurá nos cu lo e tende i respondé na nos necesidadnan, i asta anticipá nan.

18. Di con bo por spera di disfrutá di bestia den e mundu nobo?

¹⁸ Segun cu bo ta pensa riba loke lo bo por disfrutá di dje den e mundu nobo, visualisá e esena cu Dios su palabra profético ta describí: “‘E lobo i e lamchi mes lo come huntu, i e leon lo come yerba mescos cu e toro; i pa loke ta e colebra, su cuminda lo ta stof. Nan lo no haci daño ni causa ningun ruina den henter mi ceru santu,’ Jehova a bisa.” (Isaías 65:25) Artistanan humano a yega di purba pinta e esena, pero esaki no ta djis un descripcion imaginario producí cu gran libertad artístico. Lo e ta real. Pas lo prevalecé entre hende, i mescos, lo tin pas cu bestia. Hopi biólogo i amante di  bestia ta dedicá e mihó añanan di nan bida na siña tocante algun sorto di bestia, of kisas un solo especie of rasa. Na contraste, pensa riba loke lo bo por siña ora bestia lo no ta dominá pa miedu di hende. E ora ei lo bo por acercá asta para i criaturanan chikititu cu ta biba den mondi of selva, sí, observá, siña for di nan i disfrutá di nan. (Job 12:7-9) Lo bo por haci esei sin ningun riesgo, liber di peliger di hende of bestia. Jehova ta bisa: “Nan lo no haci daño ni causa ningun ruina den henter mi ceru santu.” Lo ta un cambio masha grandi for di loke nos ta mira i experenciá awendia!

19, 20. Di con Dios su pueblo ta basta diferente for di mayoria hende djawe?

¹⁹ Manera nos a mencioná caba, apesar dje interes i preocupacion reinante relacioná cu un milenio nobo, hende no por pronosticá futuro cu exactitud. Esei ta laga hopi di nan tur frustrá, confundí of desesperá. Peter Emberley, director di un universidad canades, a skirbi: “Hopi [adulto] por fin ta confrontá preguntanan básico relacioná cu nan existencia. Ken mi ta? Kico realmente mi kier alcansá den bida? Ki herencia mi ta laga p’e siguiente generacion? Awor cu nan ta na edad medio, nan ta luchando pa haña ordu i nificacion den bida.”

²⁰ Bo por comprendé di con esei ta e caso cu hopi hende. Kisas nan ta purba gosa di bida via hobi of formanan di recreo excitante. Pero nan no sa kico tin den futuro, pues pa nan, bida lo por carecé di importancia, ordu i berdadero nificacion. Awor, despues di loke nos a considerá, haci un contraste entre bo manera di mira bida i esun di nan. Bo sa cu den Jehova su shelu nobo i tera nobo primintí nos lo por wak rond i bisa di curason: ‘Di berdad Dios a haci tur cos nobo!’ Nos lo disfrutá di esei mashá!

21. Ki factor comun nos ta topa na Isaías 65:25 i Isaías 11:9?

²¹ No ta presumido pa nos imaginá nos mes ta biba den Dios su mundu nobo. Dios ta invitá nos i asta urgi nos pa ador’é awor cu berdad i pa cualificá pa bida ora ‘nan lo no haci daño ni causa ningun ruina den henter su ceru santu.’ (Isaías 65:25) Pero, bo tabata sa cu mas promé den su buki, Isaías a usa un descripcion similar, i cu el a incluí un factor cu ta crucial pa nos realmente disfrutá dje mundu nobo? Isaías 11:9 ta bisa: “Nan lo no haci ningun daño ni causa ningun ruina den henter mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.”

22. Nos consideracion di cuater profecia di Bijbel lo mester reforsá nos determinacion pa haci kico?

²² “E conocimentu di Jehova.” Ora Dios haci tur cos nobo, e habitantenan di tera lo tin un conocimentu exacto di dje i di su boluntad. Esei lo encerá hopi mas cu siña for di creacion animal. Su Palabra inspirá ta enbolbí. Por ehempel, refleccioná riba cuantu cos nos a haña sa dor di examiná djis e cuater profecianan cu ta mencioná “shelu nobo i un tera nobo.” (Isaías 65:17; 66:22; 2 Pedro 3:13; Revelacion 21:1) Bo tin bon motibu pa lesa Bijbel tur dia. Esei ta parti di bo rutina diario? Si no ta asina, ki ahustenan bo por haci pa tur dia bo lesa algu di loke Dios tin di bisa? Lo bo descubrí cu, ademas di anticipá di por gosa dje mundu nobo, lo bo haña mas goso for di awor, mescos cu e salmista.—Salmo 1:1, 2.

[Nota]

Con Lo Bo Contestá?

• Pakico nos por concluí cu Isaías 66:22-24 ta profetisá di cosnan cu ta den futuro ainda?

• Di tur e cosnan mencioná den e profecianan na Isaías 66:22-24 i Isaías 65:20-25, cua bo ta anticipá mas tantu?

• Ki motibunan bo tin pa mira bo futuro cu confiansa?

[Preguntanan di Estudio]

[Plachi na página 15]

Isaías, Pedro i Juan a predicí aspectonan di e “shelu nobo i un tera nobo”