Haciendo Tur Cos Nobo—Manera A Ser Profetisá

“Esun sintá riba e trono a bisa: ‘Mira! Mi ta haci tur cos nobo.’ Tambe, e ta bisa: . . . ‘E palabranan aki ta fiel i berdadero.’”—REVELACION 21:5.

1, 2. Di con hopi hende tin bon motibu pa duda di considerá loke futuro lo trece?

BO A yega di bisa of pensa, ‘Ken sa kico mañan lo trece?’ Ta di comprendé di con hende ta pensa dos bes promé cu nan purba rei kico futuro lo trece, of confia esnan cu kisas ta core pretendé cu nan por pronosticá loke tin nos dilanti. Hende simplemente no tin e abilidad di por pronosticá cu exactitud loke lo sosodé den e luna of añanan binidero.

² E revista Forbes ASAP a dedicá un di su edicionnan na tempu. Den dje e presentadó di documentario di television Robert Cringely a skirbi: “Tardi of trempan tempu ta humiyá nos tur, pero niun hende no ta sufri mas na man di tempu cu esnan cu ta pronosticá futuro. Purba rei futuro ta un wega cu casi semper nos ta perde. . . . Tog e asina yamá expertonan ta sigui pronosticá.”

3, 4. (a) Ki optimismo algun hende tin tocante e milenio nobo? (b) Ki expectativa realístico otronan tin tocante futuro?

³ Lo bo por a ripará cu, awor cu tin asina tantu atencion p’e milenio nobo, ta parce cu tin mas hende ta pensa riba futuro. Na comienso di aña pasá e revista Maclean’s a bisa: “Pa mayoria  canades, aña 2000 por ta djis un aña mas riba kalender, pero lo por sosodé cu e ta cai pareu cu un comienso berdaderamente nobo.” Profesor Chris Dewdney di Universidad di York a duna e motibu aki pa optimismo: “E milenio aki ta nificá cu nos por laba man for di un siglo realmente teribel.”

⁴ Esei ta zona manera soñamentu lantá? Na Cánada ta 22 porciento so di esnan cu a respondé na un encuesta “ta kere cu aña 2000 lo trece un comienso nobo pa mundu.” De echo, casi mitar di nan “ta spera un otro conflicto mundial,” esta un guera mundial, den e promé 50 añanan. Claramente, mayoria ta sinti cu un milenio nobo no por core cu nos problemanan i haci tur cos nobo. Sir Michael Atiyah, ex-presidente di Sociedad Real Británico, a skirbi: “E cambionan rápido . . . ta nificá cu siglo 21 lo trece desafionan crucial pa henter nos civilisacion. Ya caba nos ta haña nos cu e problemanan di aumento di poblacion, scarcedad di recurso, contaminacion di ambiente i pobresa extenso, i mester atendé nan cu urgencia.”

5. Unda nos por haña informacion confiabel tocante loke tin den futuro?

⁵ Kisas bo ta puntra bo mes: ‘Ya cu hende no por pronosticá nos futuro, no ta mihó nos djis ignorá futuro?’ E contesta ta no! Ta berdad cu hende no por pronosticá loke tin den futuro cu exactitud, pero nos no mester pensa cu ningun persona por. Wel, ta ken por anto, i di con nos lo mester ta optimista tocante futuro? Bo por haña contesta satisfactorio den cuater pronóstico specífico. Nan ta registrá den e buki mas plamá i lesá cu ta existí, i a la bes e buki mas ampliamente mal comprendí i ignorá, esta Bijbel. Sin importá kico bo ta pensa di Bijbel, i sin importá con bon bo conoc’é, lo ta bon pa bo mes si bo considerá e cuater pasashinan fundamental aki. Nan ta predicí un futuro masha bunita. Ademas, e cuater profecianan clave aki ta describí con bo futuro i di bo sernan kerí por ta.

6, 7. Na ki tempu Isaías a profetisá, i con su profecianan a cumpli na manera asombroso?

⁶ Esun promé ta na Isaías capítulo 65. Promé cu bo les’é, forma un cuadro mental dje marco di circunstancia, esta, na ki tempu a skirbi e material aki, i ki situacion el a trata. Dios su profeta Isaías, cu a skirbi e palabranan aki, a biba mas cu un siglo promé cu e reino di Huda a yega na su fin. E fin a yega ora cu Jehova a kita su proteccion for dje hudiunan infiel, i a laga e babilonionan destruí Jerusalem i bai cu su habitantenan den exilio. Esei a sosodé mas cu shen aña despues cu Isaías a profetis’é.—2 Crónicanan 36:15-21.

⁷ Relacioná cu e marco histórico dje cumplimentu, corda cu bou di Dios su guia Isaías a profetisá nomber di Ciro, e rey perso cu mester a nace ainda, i cu finalmente a derotá Babilonia. (Isaías 45:1) Ciro a habri caminda pa e hudiunan por a bai nan patria bek na aña 537 P.E.C. Asombrosamente, Isaías a profetisá e restoracion ei, manera nos por lesa na capítulo 65. El a enfocá riba e situacion cu e israelitanan lo por a gosa di dje ora nan bolbe na nan patria.

8. Ki futuro felis Isaías a profetisá, i cua expresion ta specialmente interesante?

⁸ Na Isaías 65:17-19 nos ta lesa: “Pasobra ata mi ta crea shelu nobo i un tera nobo; i e cosnan anterior lo no ser recordá, ni nan lo no subi na curason. Pero boso hubilá i sea gososo pa semper den loke mi ta crea. Pasobra ata mi ta crea Jerusalem un causa di goso i su pueblo un causa di alegria. I lo mi ta gososo den Jerusalem i hubilá den mi pueblo; i lo no tende e zonido di yoramentu ni e zonido di un sclamacion tristu den dje mas.” Sigur-sigur, e condicionnan cu Isaías a describí tabata hopi mas mihó cu esnan cu e hudiunan a biba aden na Babilonia. El a profetisá di alegria i gosamentu. Awor, examiná e expresion “shelu nobo i un tera nobo.” Esaki ta e promé dje cuater besnan cu e expresion ei ta aparecé den Bijbel, i e cuater pasashinan bíblico aki por tin un coneccion directo cu nos futuro. Nan por asta pronostik’é.

9. Di ki manera e hudiunan di antigwedad tabata enbolbí den e cumplimentu di Isaías 65:17-19?

⁹ E promé cumplimentu di Isaías 65:17-19  tabatin di haber cu e hudiunan di antigwedad cu, net manera Isaías a profetisá cu exactitud, a bolbe na nan patria caminda nan a reestablecé adoracion puru. (Esdras 1:1-4; 3:1-4) Bo ta realisá sí, di mes, cu e patria cu nan a bolbe na dje tabata riba e mésun planeta, no un otro caminda den universo. E realisacion ei por yuda nos comprendé loke Isaías tabata kier men cu shelu nobo i un tera nobo. Nos no tin nodi speculá, manera algun hende ta haci tocante profecianan vago di Nostradamus of di otro pronosticadónan humano. Bijbel mes ta clarificá kico Isaías tabata kier men.

10. Con nos mester comprendé e “tera” nobo cu Isaías a profetisá?

¹⁰ Den Bijbel, no ta semper “tera” ta referí na nos planeta. Por ehempel, Salmo 96:1 ta bisa literalmente: ‘Canta pa Jehova, henter tera.’ Nos sa cu nos planeta—tera firme i e enorme océanonan—no por canta. Ta hende ta canta. Sí, Salmo 96:1 ta referí na hende riba tera. * Pero Isaías 65:17 ta mencioná “shelu nobo” tambe. Si e “tera” ta representá un sociedad nobo di hende n’e patria dje hudiunan, kico e “shelu nobo” ta?

11. Na kico e expresion “shelu nobo” a referí?

¹¹ Cyclopædia of Biblical, Theological, and Ecclesiastical Literature, di M’Clintock i Strong, ta declará: “Ki ora cu mencioná shelu den un vision profético, e ta nificá . . . e grupo completo di podernan na mando . . . cu ta riba e súbditonan i ta manda riba nan, mescos cu shelu natural ta riba tera i ta manda riba dje.” Pa loke ta e expresion combiná “shelu i tera,” e Cyclopædia ta splica cu ‘den lenguahe profético e expresion ta nificá e condicion político di personanan di diferente rango. Shelu ta e soberanonan; tera ta e súbditonan, e hendenan cu esnan di rango mas haltu ta manda ariba.’

12. Con e hudiunan di antigwedad a experenciá “shelu nobo i un tera nobo”?

¹² Ora e hudiunan a bolbe na nan patria, nan a haña loke lo por yama un sistema di cosnan nobo. Tabatin un cuerpo gubernamental nobo. Zorobabel, un desendiente di rey David, tabata gobernadó, i Hosué tabata sumo sacerdote. (Ageo 1:1, 12; 2:21; Zacarías 6:11) Nan a forma un “shelu nobo.” Riba kico? E “shelu nobo” tabata riba “un tera nobo,” e sociedad  limpi di hende cu a bolbe nan tera pa reedificá Jerusalem i su tempel pa adorá Jehova. Pues, den e sentido real aki, tabatin shelu nobo i un tera nobo den e cumplimentu relacioná cu e hudiunan dje tempu ei.

13, 14. (a) Cua otro ocurencia dje expresion “shelu nobo i un tera nobo” nos mester considerá? (b) Di con e profecia di Pedro ta di interes special den e tempu aki?

¹³ Tene cuidou pa no pasa e sentido por alto. Esaki no ta un intento académico pa interpretá Bijbel ni djis un bistaso riba historia antiguo. Bo por comprendé esei dor di bai na un otro lugá caminda e expresion “shelu nobo i un tera nobo” ta aparecé. Bo por hañ’é na 2 Pedro capítulo 3, i wak cu e ta enbolbé nos futuro.

¹⁴ Apostel Pedro a skirbi su carta mas cu 500 aña despues cu e hudiunan a bolbe na nan patria. Como un dje apostelnan di Jesus, Pedro tabata skirbiendo e siguidónan di Cristo, e “Señor” mencioná na 2 Pedro 3:2. Na versículo 4, Pedro ta mencioná e “presencia primintí” di Jesus. Esei ta duna e profecia hopi importancia pa awe. Tin evidencia amplio ta mustra cu Jesus ta presente desde Promé Guera Mundial, den e sentido cu e tin autoridad como Gobernante den e Reino celestial di Dios. (Revelacion 6:1-8; 11:15, 18) E asuntu aki ta haña un nificacion special en bista di un otro cos cu Pedro a profetisá den e capítulo aki.

15. Con e profecia di Pedro tocante e “shelu nobo” ta cumpliendo?

¹⁵ Na 2 Pedro 3:13 nos ta lesa: “Tin shelu nobo i un tera nobo cu nos ta spera segun su promesa, i den esakinan husticia lo tin cu biba.” Kisas bo a siña caba cu den shelu Jesus ta e Gobernante principal den e “shelu nobo.” (Lucas 1:32, 33) Sin embargo, otro textonan di Bijbel ta mustra cu e no ta goberná su so. Jesus a primintí cu lo tin lugá den shelu p’e apostelnan i otro hende manera nan. Den e buki di Hebreonan, apostel Pablo a describí eseinan como “participante dje yamada celestial.” I Jesus a bisa cu esnan dje grupo ei lo sinta riba trono den shelu huntu cuné. (Hebreonan 3:1; Mateo 19:28; Lucas 22:28-30; Juan 14:2, 3) E punto ta cu tin otronan ta reina cu Jesus como parti dje shelu nobo. Kico Pedro tabata kier men anto cu e expresion “tera nobo”?

16. Ki “tera nobo” ta existí caba?

¹⁶ Mescos cu den e cumplimentu antiguo, cu tabata e regreso dje hudiunan na nan patria, e cumplimentu actual di 2 Pedro 3:13 ta enbolbé hende cu ta someté nan mes n’e gobernacion dje shelu nobo. Awendia bo por haña miyones di hende cu gustosamente ta someté nan mes na e gobernacion ei. Nan ta beneficiá di su programa educacional, i ta haci esfuerso pa sigui su leynan cu ta pará den Bijbel. (Isaías 54:13) Nan ta forma e fundeshi di “un tera nobo” den e sentido cu nan ta un sociedad mundial di tur nacionalidad, idioma i rasa, i ta traha huntu, sumiso na e Rey reinante, Jesucristo. Un echo significativo ta cu abo por ta parti di esaki!—Mikéas 4:1-4.

17, 18. Di con e palabranan na 2 Pedro 3:13 ta duna nos motibu pa mira futuro cu speransa?

¹⁷ No sinti como si fuera e asuntu ta caba aki, cu nos no tin ningun comprendimentu cla i detayá di futuro. De echo, ora bo examiná e contexto di 2 Pedro capítulo 3 lo bo topa indicacionnan di un cambio grandi nos dilanti. Na versículonan 5 i 6, Pedro ta skirbi tocante e Diluvio den tempu di Noe, esun cu a caba cu e mundu malbado dje tempu ei. Na versículo 7, Pedro ta mencioná cu “e shelu i tera cu t’ei awor,” tantu e gobernacionnan como e masanan di hende, ta reservá pa “e dia di huicio i di destruccion di hende malbado.” Esaki ta confirmá cu e expresion “shelu i tera cu t’ei awor” no ta referí na e universo material, sino na hende i nan gobernacionnan.

¹⁸ Despues Pedro ta splica cu e binidero dia di Jehova lo trece un gran limpiesa, i habri caminda pa e shelu nobo i tera nobo mencioná na versículo 13. Paga tinu riba e final dje versículo ei—“den esakinan husticia lo tin cu biba.” Esei no ta indicá cu algun mehoransa fundamental lo mester tuma lugá? E no ta mustra riba e posibilidad di cosnan berdaderamente nobo, un  tempu ora hende lo tin mayor goso den bida compará cu loke nan tin awor? Si bo por mira esei, anto bo a haña un comprendimentu penetrante den loke Bijbel ta profetisá, un perspicacia cu relativamente poco hende tin.

19. Den ki marco di circunstancia e buki di Revelacion ta referí na “shelu nobo i un tera nobo” cu tin cu bini?

¹⁹ Pero laga nos bai mas aleu. Nos a examiná con e expresion “shelu nobo i un tera nobo” ta aparecé na Isaías capítulo 65 i atrobe na 2 Pedro capítulo 3. Awor ban na Revelacion capítulo 21, caminda e expresion aki ta bolbe aparecé den Bijbel. Un biaha mas, ta útil pa nos comprendé e marco di circunstancia. Dos capítulo promé, na Revelacion capítulo 19, nos ta topa un guera describí den símbolo masha bibu, pero no un guera entre nacionnan enemigu. Na un banda tin “E Palabra di Dios.” Posiblemente lo bo reconocé cu esei ta un título di Jesucristo. (Juan 1:1, 14) E ta den shelu, i e vision aki ta describié huntu cu su ehércitonan celestial. Contra ken e ta batayá? E capítulo ta mencioná “rey,” “comandantenan militar,” i hende di vários rango, “chikitu i grandi.” E bataya ta enbolbé e binidero dia di Jehova, e destruccion di maldad. (2 Tesalonicensenan 1:6-10) Siguientemente, Revelacion capítulo 20 ta habri describiendo con “e colebra original, cu ta Diabel i Satanas” ta ser kitá for di caminda. Esaki ta prepará nos pa considerá Revelacion capítulo 21.

20. Ki cambio significativo tin nos dilanti, segun Revelacion 21:1 ta mustra?

²⁰ Apostel Juan ta cuminsá cu e palabranan emocionante aki: “Mi a mira un shelu nobo i un tera nobo; pasobra e shelu anterior i e tera anterior a pasa bai, i laman no ta existí mas.” A base di loke nos a mira na Isaías capítulo 65 i 2 Pedro capítulo 3, nos por ta sigur cu esaki no kier men cu shelu literal i nos planeta cu su lamannan lo ser remplasá. Manera e paragrafnan anterior a mustra, hende malbado i nan gobernacion, incluso e gobernante invisibel Satanas, lo ser kitá. Sí, loke Revelacion ta primintí aki ta un sistema nobo di cosnan relacioná cu hende riba tera.

21, 22. Ki bendicionnan Juan ta sigurá nos di dje, i kico e secamentu di lágrima kier men?

²¹ Segun cu nos ta bai mas aleu den e profecia maraviyoso aki, e ta duna nos mas siguransa tocante esaki. E parti final di versículo 3 ta papia di un tempu ora Dios lo ta cu humanidad, den e sentido di dirigí su atencion pa beneficiá esnan cu ta cumpli cu su boluntad. (Ezekiel 43:7) Juan ta continuá na versículonan 4 i 5: “[Jehova] lo seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai. I Esun sintá riba e trono a bisa: ‘Mira! Mi ta haci tur cos nobo.’ Tambe, e ta bisa: ‘Skirbi, pasobra e palabranan aki ta fiel i berdadero.’” Esta un profecia animador!

²² Para ketu i saboriá loke Bijbel ta profetisá aki. ‘Dios lo seca tur lágrima di nan wowo.’ Esei no por ta referí na lágrima normal cu ta laba nos wowonan sensitivo, ni e no por ta referí na lágrima di alegria. No, e lágrimanan cu Dios lo seca ta esnan causá dor di sufrimentu, duele, desilusion, herida emocional i agonia. Con nos por sa sigur? Wel, e promesa remarcabel aki di Dios ta relacioná secamentu di lágrima cu desaparicion di ‘morto, lamento, sclamacion i dolor.’—Juan 11:35.

23. E profecia di Juan ta garantisá e fin di ki problemanan di salú?

 ²³ Esei no ta proba cu cancer, atake celebral, atake di curason, i asta morto mes lo a keda eliminá? Ken di nos no a perde un ser kerí debí na un enfermedad, accidente of desaster? Aki Dios ta primintí cu lo no tin morto mas. Esei ta duna di comprendé cu si mucha nace den e tempu ei, nan lo no tin nodi enfrentá e prospecto di crece pa bira bieu, i caba den morto. E profecia aki kier men tambe cu lo no tin mas malesa di verkalking, wesu cu ta bira bròs, carni na matris, preshon den wowo ni catarata, cosnan asina comun den behes.

24. Con e ‘shelu nobo i tera nobo’ lo resultá di ta un bendicion, i kico nos falta pa considerá?

²⁴ Sin duda lo bo ta di acuerdo cu lamento i sclamacion lo baha si morto, behes i enfermedad disparcé. Pero kico di pobresa aplastante, abusu di mucha i discriminacion opresivo a base di antecedencia of color? Si e cosnan ei cu ta asina comun den nos tempu mester sigui, nos lo no libra di lamento i sclamacion. Pues, bida bou di “un shelu nobo i un tera nobo” lo no ta dañá debí n’e causanan actual aki di tristesa. Esta un cambio! Pero te awor nos a considerá tres di e cuater ocurencianan so dje expresion “shelu nobo i un tera nobo” den Bijbel. Tin unu mas cu ta conectá cu loke nos a examiná, i cu ta enfatisá di con nos tin motibu pa anticipá e tempu ora Dios lo cumpli cu su promesa di “haci tur cos nobo,” i e manera cu lo e hacié. E siguiente artículo ta trata cu e profecia ei, i loke e por nificá pa nos felicidad.

[Nota]

Kico Bo Ta Corda?

• Cua ta tres caminda cu Bijbel ta profetisá di “shelu nobo i un tera nobo”?

• Con e hudiunan di antigwedad tabata enbolbí den un cumplimentu di “shelu nobo i un tera nobo”?

• Con nos ta comprendé cu e “shelu nobo i un tera nobo” cu Pedro a mencioná ta cumpli?

• Con Revelacion capítulo 21 ta indicá cu nos lo tin un futuro briyante?

[Preguntanan di Estudio]

[Plachi na página 10]

Net manera Jehova a bisa di antemano, Ciro a habri caminda pa e hudiunan por a bai nan patria bek na aña 537 P.E.C.