Pisca Hende den Laman Egeo

CU E península di Grecia n’e parti nort i west, e isla di Creta na zuid, i Turkia na oost, laman Egeo ta cubri un área enorme di oost Mediteráneo. Laman Egeo, e cuna di algun civilisacion grandi di ántes, ta yen di isla grandi i chikitu plamá den dje. E silueta iregular dje islanan, cu aki aya casnan chikitu blancu ta lombra den solo, a inspirá un poëta pa compará nan cu “cabainan di piedra cu klina pa nan cuenta.”

Nada straño anto cu e islanan aki a bira un dje atraccionnan turístico mas popular na mundu! E bon cualidadnan dje homber i muhernan cu ta biba i traha einan ta enrikesé e bunitesa físico dje islanan. Dor cu e personanan aki ta humilde i hospitalario, i tog independiente, nan ta agregá un toke special n’e singularidad dje área.

Hopi dje isleñonan ta gana nan pan cu piscamentu den e awanan di laman Egeo. Sin embargo, den e área ei tin un otro clase di “piscamentu” cu ta producí resultadonan abundante. “Piscadó di hende,” esta, evangelisadó dje bon nobo di Dios su Reino, ta crusa bai e islanan den Egeo i nan ta haci disipel cristian.—Mateo 4:18, 19; Lucas 5:10.

Mas o ménos 19 siglo pasá, evangelisadónan cristian a bishitá e islanan den Egeo. Rond di aña 56 E.C., ora apostel Pablo tabata bolbe for di su tercer biahe di misionero, el a para brevemente n’e islanan Lésvos, Kíos, Sámos, Kos i Rodas. Ya cu semper Pablo tabata un predicadó celoso, e mester a predicá na algun dje isleñonan. (Echonan 20:14, 15, 24; 21:1, 2) Despues cu el a pasa dos aña den prizon na Roma, casi sigur el a bishitá Creta i a participá den actividad cristian einan. Cerca e fin di promé siglo, nan a manda apostel Juan den exilio n’e isla di Pátmos “pasobra [el] a papia tocante Dios i a duna testimonio di Jesus.” (Revelacion 1:9) Con ta bai cu proclamadónan moderno dje bon nobo n’e islanan aki?

Campañanan di Predicacion Recompensador

Ta difícil pa predicá riba e islanan aki i e ta exigí hopi. E ta rekerí gran esfuerso i sacrificio propio. Algun isla ta keda hopi leu for di otro. Pa algun di nan, transporte cu boto of cu avion no ta riba un base regular, i tin otronan cu no tin esakinan mes, foral den tempu di winter. Laman por ta brutu, foral ora meltemia—bientunan fuerte di nort den cierto temporada—ta supla. Ademas, e pueblitonan riba hopi dje islanan ta isolá i difícil pa alcansá debí cu casi bo no por pasa riba e camindanan di tera no asfaltá. Tin algun pueblito cu ta cu boto chikitu so bo por yega na nan.

Tuma por ehempel, e isla Icaria. E 11 publicadónan dje bon nobo di Reino den e congregacion chikitu einan, no por cubri tur e pueblitonan riba e isla ei i riba e islanan chikitu eibanda, nan so. P’esei, rumannan cristian for di Sámos ta bin yuda nan predicá n’e pueblo di Icaria, i tambe na esnan riba e islanan di Foúrnoi, Pátmos i Lipsos. Recientemente, durante un campaña  asina di dos dia, e Testigonan a laga 650 revista, 99 foyeto i 25 buki basá riba temanan bíblico! Nan a keda sorprendí di topa hende cu no tabatin niun idea di ken ta Jehova, hende cu a roga nan pa keda i siña nan mas for di Bijbel. Un señora a bisa un Testigo: “Bon, awor bo ta bai. Pero ainda mi tin hopi pregunta tocante Bijbel. Ken ta bai yuda mi?” E ruman muher cristian a primintí di sigui cultivá su interes via telefon, i dje manera ei el a cuminsá un studio di Bijbel.

Ora un superintendente biahero a bishitá Icaria, el a haci areglo pa cubri henter e isla den un fin di siman. El a busca yudansa di mas o ménos 30 publicadó di Reino for di Sámos. E rumannan bishitante mester a paga pa nan estadia di dos anochi na un hotel i pa huur auto i vehículonan ‘four-wheel-drive.’ Awaceru duru a caba di cai pa dos dia largu, i pronóstico di tempu p’e fin di siman no tabata pinta muchu bon. Pero e rumannan no a laga esaki stroba nan, ya cu nan a corda e palabranan di Eclesiástes 11:4: “Esun cu ta para vigilá bientu lo no sembra, i esun cu ta mirando e nubianan lo no cosechá.” Mas lat, e weer a drecha un tiki, i despues cu e rumannan a cubri henter e isla cu nan mensahe importante, nan a bolbe cas felis i satisfecho.

E 16 publicadónan cu ta biba riba e isla Andros ta haci gran esfuerso pa cubri henter e isla. Ora dos ruman homber a yega un pueblito isolá, nan tabata decididu pa predicá na tur e habitantenan. Nan a papia cu hende den nan cas, riba caya i den cunucu. Asta nan a bishitá e warda di polis i a laga literatura einan. Convencí cu nan a papia cu tur e habitantenan dje pueblito, nan tabata cerca di bai cas. Ora nan tabata bayendo for dje plenchi central, nan a mira e pastor ortodox griego ta bini. Realisando cu nan no a dun’é testimonio, nan a dun’é un tratado cu el a aceptá cu smak. Awor sí nan tabatin sigur cu nan no a pasa ningun hende por haltu den nan esfuerso pa predicá!

Hende ta considerá Gavdos (of Cauda)—un isla chikitu di 38 habitante so, situá na barica di Creta—e punta di mas zuid di Europa. (Echonan 27:16) Un superintendente biahero i su casá, huntu cu un otro pareha casá, a pasa tres dia predicando einan. Pa spar cen, nan a drumi den tent. Nan a alcansá tur e habitantenan cu e bon nobo, i e rumannan tabata contentu cu e pueblo no tabatin prehuicio. Nan no a yega di tende nada, ni bon ni malu, di Testigonan di Jehova. E pueblo local, incluso e pastor, a aceptá 19 buki cu 13 foyeto. Ora e Testigonan tabata regresá Creta den un boto chikitu, laman a bira brutu i nan bida tabata na peliger. “Nos a gradicí Jehova cu nos a yega cas bibu, pero tambe nos a glorifik’é pasobra el a permití nos onra su nomber den e parti mas zuid aki di Europa,” nan a bisa.

Pátmos ta e isla caminda apostel Juan a skirbi e último buki di Bijbel, Revelacion. Te cu recientemente, no tabatin niun Testigo di Jehova na Pátmos. Cuidadosamente, e rumannan di Sámos a organisá un campaña pa predicá riba e isla ei. Nan tabata sa cu nan por a topa cu oposicion severo, pasobra e isla ta dominá pa Iglesia Griego Ortodox. Un señora na ken dos ruman muher tabata presentá e bon nobo, a invitá nan pa drenta su cas. Cu insistencia, esposo dje señora a puntra ken a manda e ruman muhernan na su cas. Ora cu nan a bis’é cu nan ta bishitando tur cas, el a puntra atrobe: “Boso ta sigur cu  niun bisiña no a manda boso aki?” E esposa, cu a cera conocí cu Testigonan di Jehova tempu e tabata na Zaire, a splica e rumannan despues kico a pasa e mainta ei. El a bisa: “Mi tabata haci oracion, manera mi sa haci tur dia, pidi Jehova manda un par di Testigo na e isla. Mi casá a hari mi. Ora mi a mira boso na porta, mi a keda sorprendí i mi casá tambe. Ta p’esei el a keda puntra ta ken a manda boso na nos cas.” Mesora e rumannan a cuminsá un studio di Bijbel cu e señora. Pa dies luna largu nan a conducí e studio aki via telefon, aunke esaki a costa tantu e ruman como e señora interesá hopi cen. El a bautisá i awor e ta e único Testigo riba e isla caminda apostel Juan tabata isolá 1.900 aña pasá.

“Piscando” den Haf

Barcunan crusero ta para den un cantidad di haf dje islanan di Egeo tur zomer, i nan ta trece un gran cantidad di turista di bishita. Pues, Testigonan di Jehova tin un oportunidad único di alcansá hende di hopi nacion i lenga. E congregacionnan tin un stock di literatura bíblico den hopi diferente idioma, i e publicadónan ta laga miles di revista cu e turistanan. Algun barcu crusero ta bishitá e mésun haf tur siman, loke ta duna e rumannan un excelente oportunidad pa haci rebishita i asta conducí studio di Bijbel cu algun miembro di tripulacion dje barcunan.

Den zomer di 1996, un ruman muher cu ta un predicadó di tempu completo na Rodas a duna testimonio na un yoncuman di Jamaica cu tabata traha riba un barcu crusero cu a bishitá e haf ei tur diabierne. E siguiente diabierne e homber a haña invitacion pa asistí na un congreso di distrito cu lo a bai tin riba e isla. Mediante un Bijbel na ingles, e ruman muher pionero a yud’é comprendé algun dje berdadnan bíblico cu e programa a presentá. E amor i calor di amistad cu e Testigonan a desplegá n’e congreso a impresioná e yoncuman mashá. E siguiente diabierne, el a invitá dos ruman homber pionero riba e barcu. E pioneronan a bai cu literatura na ingles i spañó. Nan tas di sirbishi a bira bashí den ménos cu un ora! E yoncuman di Jamaica a studia Bijbel tur diabierne te na fin di zomer. E siguiente zomer e tabata ei atrobe, cla pa reanudá su studio.  Pero e biaha aki, el a dicidí di cambia su trabou pa asina e por a haci progreso spiritual. Anto el a bolbe bai. Esta felis e rumannan na Rodas a keda ora nan a tende cu e yoncuman aki a bautisá na principio di 1998!

Cogiendo “Piscá” Cu Ta Migra

Laman Egeo ta renombrá pa su abundancia di piscá cu ta migra, manera saldinchi i balaú tonini, cu ta crusa den su awa i ta terminá den reda di piscadó ábil. Den un manera similar, evangelisadónan di Reino ta haña hopi curason receptivo entre e trahadónan imigrante cu a bai Grecia for di hopi pais di Oost Europa.

Rezi tabatin dies aña ora cu pa promé bes el a lesa tocante Jehova i su propósitonan den e revistanan E Toren di Vigilancia i Spierta! Esei tabata na Albania. Tres aña despues el a muda huntu cu su famia p’e isla di Rodas. Un dia Rezi a pidi Jehova den oracion p’e yud’é haña Jehova su pueblo caminda e ta biba awor. E siguiente dia, pa Rezi su gran goso, su tata a bini cas cu e revistanan conocí, E Toren di Vigilancia i Spierta! Rezi a drenta den contacto cu e ruman muher cu a duna su tata e revistanan, i no a dura mashá cu el cuminsá un studio for dje buki Conocimentu cu Ta Hiba na Bida Eterno. Tabatin biaha cu e kier a studia tres bes pa dia! Despues di dos luna el a bira un publicadó no-bautisá, i na mart 1998, el a bautisá cu 14 aña di edad. E mésun dia ei el a cuminsá traha como pionero auxiliar, i seis luna despues el a inscribí como pionero regular, esta, un minister di tempu completo.

Un ruman homber dje isla di Kos tabata studia cu algun hende for di Rusia. Ora el a puntra nan si nan tabatin cualkier amigu cu lo tin gana di studia Bijbel, nan a dirigié na un pareha armenio—Leonidas cu su esposa Ophelia—den un pueblo un 30 kilometer mas leu. Tabatin un sorpresa ta spera e rumannan. E pareha armenio a saca un tas yen di literatura bíblico na armenio i ruso cu Sociedad Watch Tower a producí! Nan a splica cu nan a studia Bijbel cu Testigonan di Jehova te cu nan a bira publicadó no-bautisá. Debí na desórden político i dificultadnan económico, nan mester a bandoná nan pais natal. Asina cu nan a yega Kos, nan a cuminsá studia cu Leonidas su ruman muher i su mama, kendenan tabata einan caba. Di ripiente, e Testigo tabatin cu conducí tres studio di Bijbel nobo: unu cu Ophelia, unu cu Leonidas, i unu cu su mama i ruman muher. Esei a exigí p’e biaha cada bes 30 kilometer riba motosaikel, tres bes pa siman, ida i buelta. Algun luna despues Leonidas cu su esposa a bautisá. Ki un recompensa p’e spiritu di sacrificio propio dje ruman local!

Jehova Ta Haci Crece

Ta bisto cu Jehova ta bendicioná e esfuersonan incansabel dje mas cu 2.000 publicadónan di Reino activo riba e islanan di Egeo. Einan tin awor 44 congregacion i 25 grupo di Testigo di Jehova. Entre e gruponan tin 17 grupo di idioma stranhero, ya cu ta Jehova su boluntad pa “tur clase di hende ser salbá i yega na un conocimentu exacto dje berdad.” (1 Timoteo 2:4) Ademas, 13 pionero special ta sigui aumentá nan esfuerso pa alcansá hopi mas hende den e teritorionan isolá ei.

Pa siglonan caba, laman Egeo ta un centro di desaroyo cultural i di transaccion comercial. Den décadanan recien el a bira e resort preferí di cientos di miles di turista. Pero mas importante ainda, como “piscadó di hende,” proclamadónan di Reino a haña hopi hende sincero cu ta ansioso pa alabá Jehova riba e islanan aki. Huntu nan a respondé den gran manera n’e invitacion profético: “Laga nan atribuí gloria na Jehova, i riba e islanan laga nan anunciá asta su alabansa.”—Isaías 42:12.

[Mapa na página 22]

(Pa e teksto den su formato kompleto, wak e publikashon)

Laman Egeo

GRECIA

Lésvos

Kíos

Sámos

Icaria

Foúrnoi

Pátmos

Kos

Rodas

Creta

TURKIA

[Plachi na página 23]

Isla Lésvos

[Plachi na página 24]

E isla di Pátmos

[Plachi na página 24]

E isla di Creta