Apoya Siñansa Divino Firmemente
Apoya Siñansa Divino Firmemente
“Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.”—PROVERBIONAN 3:5, 6.
1. Con nos ta exponé na conocimentu humano manera nunca promé?
ACTUALMENTE, tin mas o ménos 9.000 korant di tur dia den circulacion rond mundu. Na Merca so nan ta publicá 200.000 buki nobo tur aña. Segun un cálculo, pa mart 1998, tabatin mas o ménos 275 miyon página di Web riba Internet. Nan ta bisa cu e cifra aki ta crece cu un 20 miyon página pa luna. Manera nunca promé, hende tin acceso na informacion riba cualkier tópico. Aunke e situacion aki tin su aspectonan positivo, un superabundancia asina di informacion a causa su problemanan.
2. Kico por ta e problemanan ora hende tin acceso na un superabundancia di informacion?
2 Algun individuo a bira adicto na informacion. Constant nan ta alimentá un deseo insaciabel pa ta al dia, miéntras nan ta neglishá cosnan mas importante. Otronan ta haña informacion incompleto riba terenonan complicá anto despues ta considerá nan mes experto. Basá riba solamente un comprendimentu limitá, nan ta tuma decisionnan crucial cu por causa daño na nan mes of na otro hende. I semper tin e peliger di exponé bo mes na informacion falsu of inexacto. Hopi bes no tin un manera confiabel pa verificá si e avalancha di informacion ta exacto i balansá.
3. Ki spiertamentu relacioná cu buscamentu di sabiduria humano nos ta haña den Bijbel?
3 Pa hopi tempu caba curiosidad ta un característica humano. For dje tempu di rey Sálomon caba hende a reconocé e peligernan di perde demasiado tempu buscando informacion inútil of asta perhudicial. El a bisa: “Aceptá un advertencia: Na trahamentu di hopi buki no tin fin, i dedicá bo mes muchu na nan ta cansancio p’e carni.” (Eclesiástes 12:12) Siglonan mas despues apostel Pablo a skirbi Timoteo: “Warda loke a ser confiá na bo, apartando bo mes for di papiamentu bano cu ta violá loke ta santu i for dje contradiccionnan di loke falsamente ta ser yamá ‘conocimentu.’ Pasobra den nan despliegue di tal conocimentu algun a desviá for dje fe.” (1 Timoteo 6:20, 21) Sí, awe cristiannan tin cu evitá di exponé nan mes innecesariamente na ideanan perhudicial.
4. Mencioná un manera cu nos por manifestá nos confiansa den Jehova i su siñansanan.
4 Tambe Jehova su pueblo ta haci bon di tuma na pechu e palabranan di Proverbionan 3:5 i 6: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” Confia den Jehova ta encerá rechasá cualkier idea cu ta na conflicto cu e Palabra di Dios, sea esei ta originá for di nos mes razonamentu of for di nos próhimo. Pa protehá nos spiritualidad, ta vital pa nos entrená nos facultadnan perceptivo pa nos por identificá informacion dañino i evit’é. (Hebreonan 5:14) Laga nos considerá algun fuente di tal informacion.
Un Mundu Dominá pa Satanas
5. Kico ta un fuente di ideanan perhudicial, i ken ta tras di dje?
5 E mundu seglar ta un fuente fértil di ideanan perhudicial. (1 Corintionan 3:19) Jesucristo a pidi Dios den oracion tocante su disipelnan: “Mi ta pidi bo, pa no saca nan for di mundu, sino pa vigilá riba nan pa causa di e malbado.” (Juan 17:15) Jesus su peticion pa su disipelnan ser protehá for di “e malbado” a reconocé e influencia cu Satanas tin den mundu. E echo cu nos ta cristian no ta protehá nos automáticamente for dje mal influencianan dje mundu aki. Juan a skirbi: “Nos sa cu nos a originá cu Dios, pero henter e mundu ta drumí den poder dje malbado.” (1 Juan 5:19) Foral durante e parti final aki dje último dianan, Satanas i su demoñonan lo mester ta saturando mundu cu informacion perhudicial.
6. Con asina e mundu di diberticion por pone hende perde nan heful moral?
6 Ta probabel tambe cu parti dje informacion perhudicial aki por parce inofensivo. (2 Corintionan 11:14) Considerá por ehempel, e mundu di diberticion, cu su shownan na television, película, música i literatura. Hopi hende ta eens cu den mas i mas caso, cierto formanan di diberticion ta promové prácticanan degradá, manera inmoralidad, violencia i uso di droga. Na promé instante, ora un auditorio mira un forma di diberticion cu a baha na un nivel mas abou cu nunca, esei por shok nan. Pero ora nan wak e mas biaha esei por pone nan perde heful. Hamas nos mester mira diberticion cu ta promové ideanan perhudicial como aceptabel of inofensivo.—Salmo 119:37.
7. Ki clase di sabiduria humano por caba cu nos confiansa den Bijbel?
7 Considerá un otro fuente di informacion potencialmente dañino: e avalancha di ideanan publicá dor di algun científico i erudito cu ta desafiá e autenticidad di Bijbel. (Compará cu Santiago 3:15.) Tal material ta aparecé cu frecuencia den revistanan principal i bukinan popular, i esei por caba cu confiansa den Bijbel. Algun individuo ta haña un satisfaccion ora nan debilitá e autoridad dje Palabra di Dios cu speculacionnan interminabel. Un peliger similar a existí den tempu dje apostelnan, manera e palabranan di apostel Pablo ta mustra claramente: “Tene cuidou: Kisas por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental dje mundu i no segun Cristo.”—Colosensenan 2:8.
Enemigunan dje Berdad
8, 9. Con apostasia ta manifestá su mes awe?
8 Hende apóstata por ta un otro menasa mas pa nos spiritualidad. Apostel Pablo a profetisá cu apostasia lo a lanta cabes entre esnan cu a afirmá di ta cristian. (Echonan 20:29, 30; 2 Tesalonicensenan 2:3) Na cumplimentu cu su palabranan, despues di morto dje apostelnan, un gran apostasia a hiba n’e desaroyo di cristiandad. Awe, no tin un gran apostasia ta tuma lugá den e pueblo di Dios. Tog, algun individuo a bandoná nos filanan, i tin di nan ta determiná pa difamá Testigonan di Jehova dor di plama mentira i informacion incorecto. Un par di nan ta traha cu otro gruponan lantando oposicion organisá contra adoracion puru. Dor di haci esei, nan ta tuma parti pa hustamente e promé apóstata: Satanas.
9 Algun apóstata ta usando cu mas i mas frecuencia vários forma di comunicacion masal, incluso Internet, pa plama informacion falsu tocante Testigonan di Jehova. Como resultado, ora individuonan sincero ta investigá nos creencianan, nan por topa cu propaganda apóstata. Asta algun Testigo a exponé nan mes sin cu nan sa n’e material dañino aki. Ademas, de bes en cuando apóstatanan ta participá den programanan na radio of television. Kico ta e curso sabí pa sigui en bista di esaki?
10. Con ta e mihó manera pa reaccioná riba propaganda apóstata?
10 Apostel Juan a instruí cristiannan pa no aceptá apóstatanan den nan cas. El a skirbi: “Si un hende ta bini cerca boso i no ta trece e siñansa aki, no ricibié nunca den boso cas ni salud’é. Pasobra esun cu ta salud’é, ta participante den su obranan malbado.” (2 Juan 10, 11) Evitá tur contacto cu e oponentenan aki lo protehá nos for di nan pensamentu corupto. Si nos exponé nos mes na siñansa apóstata atrabes dje vários medionan di comunicacion moderno, ta mes perhudicial cu ricibí e apóstata mes den nos cas. Hamas nos mester permití curiosidad lok nos den un curso calamitoso asina!—Proverbionan 22:3.
Den e Congregacion
11, 12. (a) Kico tabata un fuente di ideanan perhudicial den e congregacion di promé siglo? (b) Con algun cristian a mustra cu nan no tabata firme den apoyá siñansa divino?
11 Considerá un otro posibel fuente di informacion perhudicial. Aunke un cristian dedicá su intencion no ta pa siña falsedad, e por desaroyá e custumber di papia sin pensa. (Proverbionan 12:18) Pa motibu di nos naturalesa imperfecto, de bes en cuando nos tur ta faya cu nos lenga. (Proverbionan 10:19; Santiago 3:8) Evidentemente, den tempu di apostel Pablo, tabatin algun persona den congregacion cu no a dominá nan lenga i a cuminsá piki pieu den debatenan tocante palabra. (1 Timoteo 2:8) Tabatin otronan cu tabatin un opinion demasiado halsá di nan mes i a asta bai asina leu di desafiá e autoridad di Pablo. (2 Corintionan 10:10-12) Un spiritu asina a resultá den conflictonan innecesario.
12 Algun biaha e desacuerdonan aki a escalá bira “discusion violento tocante cosnan insignificante,” cu a perturbá e pas dje congregacion. (1 Timoteo 6:5; Galationan 5:15) Pablo a skirbi di esnan cu a causa e pleitunan aki: “Si cualkier hende ta siña otro doctrina i no ta aceptá palabranan saludabel, esnan di nos Señor Jesucristo, ni e siñansa cu ta bai di acuerdo cu debocion na Dios, e ta hinchá cu orguyo, i no ta comprendé nada, sino ta mentalmente enfermo riba cuestion i debatenan tocante palabranan. Di esakinan ta nace envidia, pleitu, abla ofensivo, sospecho malicioso.”—1 Timoteo 6:3, 4.
13. Con mayoria cristian den promé siglo a comportá nan mes?
13 Afortunadamente, den tempu dje apostelnan, mayoria cristian tabata fiel i a keda enfocá riba e trabou di declará e bon nobo dje Reino di Dios. Nan tabata activo cuidando ‘huérfano i biuda den nan tribulacion’ i a mantené nan mes “sin mancha di mundu,” sin gasta nan tempu riba debatenan inútil tocante palabra. (Santiago 1:27) Nan a evitá “mal asociacion” asta den e congregacion cristian pa asina protehá nan spiritualidad.—1 Corintionan 15:33; 2 Timoteo 2:20, 21.
14. Si nos no tene cuidou, con e intercambio normal di ideanan por degenerá yega na pleitunan perhudicial?
14 Mescos tambe, e situacionnan describí den paragraf 11 no ta característica dje congregacionnan di Testigonan di Jehova awe. Tog, nos ta haci bon di reconocé e potencial pa debatenan inútil asina. Claro cu ta normal pa papia riba relatonan di Bijbel of pa haci pregunta tocante aspectonan dje mundu nobo primintí cu ainda no a ser revelá. I no tin nada malu den intercambiá idea riba asuntunan personal, manera paña i areglo personal of preferencia den diberticion. Sin embargo, si nos bira inflexibel tocante nos ideanan i sinti nos ofendí ora otro hende no ta di acuerdo cu nos, e congregacion por bira dividí riba asuntunan menor. Loke ta cuminsá como papiamentu inofensivo riba cosnan insignificante en berdad por bira perhudicial.
Con pa Warda Loke Ta Confiá na Nos
15. Te na ki grado e “siñansanan di demoño” por perhudicá nos spiritualmente, i ki conseho e Scritura ta ofrecé?
15 Apostel Pablo ta spierta nos: “E expresion inspirá ta bisa definitivamente cu den periodo di tempu despues algun lo cai for dje fe, prestando atencion na expresionnan inspirá engañoso i siñansanan di demoño.” (1 Timoteo 4:1) Sí, ideanan perhudicial ta presentá un menasa real. Ta di comprendé anto cu Pablo a suplicá su amigu stimá Timoteo: “O Timoteo, warda loke a ser confiá na bo, apartando bo mes for di papiamentu bano cu ta violá loke ta santu i for dje contradiccionnan di loke falsamente ta ser yamá ‘conocimentu.’ Pasobra den nan despliegue di tal conocimentu algun a desviá for dje fe.”—1 Timoteo 6:20, 21.
16, 17. Kico Dios a confia na nos, i con nos mester warda esei?
16 Con nos awe por beneficiá for dje spiertamentu amoroso aki? Algu a ser confiá na Timoteo—algu balioso pa cuida i protehá. Kico esei tabata? Pablo ta splica: “Sigui retené e patronchi di palabranan saludabel cu bo a tende for di mi cu e fe i amor cu ta en relacion cu Cristo Jesus. Warda e depósito excelente aki confiá na bo, mediante e spiritu santu cu ta biba den nos.” (2 Timoteo 1:13, 14) Sí, e loke a ser confiá na Timoteo a encerá e “palabranan saludabel,” “e siñansa cu ta bai di acuerdo cu debocion na Dios.” (1 Timoteo 6:3) Na armonia cu e palabranan aki, awe cristiannan ta determiná pa protehá nan fe i e coleccion dje berdadnan cu a keda confiá na nan.
17 Warda e loke a ser confiá ei ta encerá cultivá cosnan manera bon custumber di studia Bijbel i perseverancia den oracion, miéntras cu nos ta obra “loke ta bon pa cu tur, pero specialmente pa cu esnan relacioná cu nos den e fe.” (Galationan 6:10; Romanonan 12:11-17) Pablo ta encurash’é mas aleu: “Sigui tras di husticia, debocion na Dios, fe, amor, awante, genio suave. Lucha e lucha excelente di fe, haña un gara firme riba e bida eterno pa cua bo a ser yamá i a ofrecé e excelente declaracion público dilanti hopi testigo.” (1 Timoteo 6:11, 12) Pablo su frasenan manera “lucha e lucha excelente” i “haña un gara firme” ta mustra bon cla cu nos tin cu resistí influencianan spiritualmente dañino na un manera firme i activo.
Dicernimentu Ta Necesario
18. Con nos por desplegá ekilibrio cristian den nos manera di trata cu informacion seglar?
18 Naturalmente, ora nos ta lucha e lucha excelente di fe, dicernimentu ta necesario. (Proverbionan 2:11; Filipensenan 1:9) Por ehempel, lo ta irazonabel pa desconfiá tur informacion seglar. (Filipensenan 4:5; Santiago 3:17) No ta tur idea humano ta na conflicto cu e Palabra di Dios. Jesus a referí indirectamente n’e necesidad pa hende malu consultá un dokter cualificá, cu ta un profesion seglar. (Lucas 5:31) Apesar dje caracter relativamente primitivo di tratamentu médico den tempu di Jesus, el a reconocé cu hende por a saca algun beneficio for dje yudansa di un dokter. Awe, cristiannan ta manifestá ekilibrio den e asuntu di informacion seglar, pero nan no ta exponé nan mes na nada cu por ta perhudicial den sentido spiritual.
19, 20. (a) Con ancianonan ta actua cu dicernimentu ora di yuda esnan cu no ta reflehá sabiduria den nan manera di papia? (b) Kico e congregacion ta haci cu esnan cu ta insistí na promové siñansa falsu?
19 Ta vital tambe pa ancianonan desplegá dicernimentu ora pidi nan yuda esnan cu no ta reflehá sabiduria den nan manera di papia. (2 Timoteo 2:7) Sa sosodé cu miembronan di congregacion por cai den e trampa di discutí riba cosnan insignificante i speculacionnan. Pa protehá e unidad dje congregacion, ancianonan mester ta lihé pa trata problemanan asina. Na mésun tempu, nan ta evitá di busca mal motibu tras di accion di nan rumannan i nan no ta muchu lihé pa mira nan como apóstata.
20 Pablo a describí cu ki spiritu mester duna yudansa. El a bisa: “Rumannan, aunke un homber dal un paso robes promé cu e realisá esei, boso cu tin cualidadnan spiritual, trata na reahustá e homber ei cu un spiritu di suavedad.” (Galationan 6:1) Papiando specíficamente di cristiannan cu ta lucha cu duda, Hudas a skirbi: “Sigui mustra misericordia na algun cu tin duda; salba nan dor di ranca nan for di candela.” (Hudas 22, 23) Claro cu si despues di vários spiertamentu un persona insistí na promové siñansa falsu, ancianonan tin cu tuma accion decisivo pa por protehá e congregacion.—1 Timoteo 1:20; Tito 3:10, 11.
Yena Nos Mente cu Cosnan Digno di Alabansa
21, 22. Tocante kico nos mester ta selectivo, i cu kico nos tin cu yena nos mente?
21 E congregacion cristian ta evitá palabranan dañino cu ta “plama manera gangrena.” (2 Timoteo 2:16, 17; Tito 3:9) Esaki ta e caso sea e palabranan ei ta reflehá “sabiduria” seglar engañoso, ideanan di apóstata of papiamentu descabeyá den e congregacion. Aunke un deseo saludabel pa siña cosnan nobo por ta beneficioso, curiosidad desenfrená lo por exponé nos na ideanan perhudicial. Nos no ta ignorante di Satanas su intencionnan. (2 Corintionan 2:11) Nos sa cu e ta haciendo gran esfuerso pa distraí nos pa asina reducí nos paso den nos sirbishi na Dios.
22 Como ministernan excelente, laga nos apoyá siñansa divino firmemente. (1 Timoteo 4:6) Laga nos haci uso sabí di nos tempu dor di ta selectivo den e tipo di informacion cu nos ta opta pa asimilá. E ora ei ideanan inspirá pa Satanas lo no sagudí nos fácilmente. Sí, laga nos sigui considerá “cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin.” Si nos yena nos mente i curason cu cosnan asina, e pas di Dios lo ta cu nos.—Filipensenan 4:8, 9.
Kico Nos A Siña?
• Con sabiduria seglar por ta un menasa pa nos spiritualidad?
• Kico nos por haci pa protehá nos mes for di informacion apóstata perhudicial?
• Ki manera di papia nos mester evitá den e congregacion?
• Con nos ta desplegá ekilibrio cristian ora di trata cu e superabundancia di informacion cu tin awe?
[Preguntanan di Estudio]
[Plachi na página 9]
Hopi revista i buki popular ta na conflicto cu nos balornan cristian
[Plachi na página 10]
Cristiannan por intercambiá di idea sin bira inflexibel