Informe di Proclamadonan di Reino

Bida di Famia Felis Ta Atraé Otro Hende na Dios

JEHOVA a bendicioná Josef cu hopi sabiduria i dicernimentu. (Echonan 7:10) Esei a pone cu Josef su comprendimentu penetrante “a parce bon den bista di fárao i di tur su sirbidónan.”—Génesis 41:37.

Awe tambe Jehova ta duna su pueblo comprendimentu penetrante i dicernimentu mediante nan studio di Bijbel. (2 Timoteo 3:16, 17) E sabiduria i dicernimentu aki ta producí bon fruta segun cu nan ta aplicá conseho basá riba Bijbel. Hopi bes nan bon conducta ‘a parce bon den bista di esnan cu a observ’é,’ manera e siguiente experencianan for di Zimbabwe ta ilustrá.

• Un señora su bisiñanan tabata Testigo di Jehova. Aunke e no a gusta Testigonan, el a admirá nan conducta, foral nan bida di famia. El a ripará cu e esposo i esposa tabatin un relacion hopi bon i cu nan yunan tabata obediente. Particularmente el a nota cu e esposo tabata stima su esposa mashá.

Un creencia comun den algun pueblo africano ta cu si un esposo stima su casá, e esposa mester a haci bruha pa “mans’é.” P’esei, e señora a acercá e esposa Testigo i a pidié: “Por fabor, bo por a duna mi e receta dje bruha cu bo a duna bo casá pa mi por duna mi casá p’e stima mi mescos cu bo casá ta stima bo?” E Testigo a respondé: “Sigur no, mañan atardi mi ta trec’é pa bo.”

E siguiente dia, e ruman muher a bishitá su bisiña cu su ‘receta di bruha.’ Kico e tabata? Un Bijbel, huntu cu e buki Conocimentu cu Ta Hiba na Bida Eterno. Despues cu nan a considerá e informacion for dje buki di Conocimentu bou dje tema “Edificando un Famia cu Ta Onra Dios,” e ruman a bisa e señora: “Esaki ta e ‘receta di bruha’ cu ami cu mi casá ta usa pa ‘mansa’ otro, i ta p’esei nos ta stima otro asina tantu.” Un studio di Bijbel a cuminsá, i e señora a progresá lihé te cu el a simbolisá su dedicacion na Jehova bou di awa.

• Dos pionero special asigná na un congregacion chikitu cerca dje frontera nortoost di Zimbabwe i Mozambique tabatin dos siman sin sali den e ministerio di cas pa cas. Di con? Pasobra e hendenan mes tabata bin cerca nan pa scucha loke nan tabatin di bisa. Un dje pioneronan ta conta con bini esaki a sosodé: “Nos tabata biaha 15 kilometer pa bai conducí un studio di Bijbel tur siman cu un persona interesá. No tabata fácil pa nos yega na e área. Nos mester a cana den lodo, i crusa riunan grandi cu tabata yega te na nos garganta. Esaki a nificá cu nos mester a pone nos sapatu i pañanan riba nos cabes, pasa dor dje riu, i despues ora nos yega n’e otro banda, bisti nos pañanan atrobe.

Nos celo a impresioná bisiñanan dje persona interesá mashá. Un di esnan cu a tuma nota di nos celo tabata e lider di un organisacion religioso local. El a bisa su siguidónan: ‘Boso no kier ta mes celoso cu e dos hombernan hóben Testigo di Jehova ei?’ E siguiente dia, hopi di su siguidónan a bini nos cas pa haña sa di con nos ta asina persistente. Ademas, e siguiente dos simannan, nos a hañá asina tantu bishita cu nos no tabatin ni chens di cushiná pa nos mes!”

Un dje personanan cu a bishitá cas dje pioneronan durante e dos simannan ei, tabata e lider religioso. Imaginá bo e goso cu e pioneronan a sinti ora el a aceptá un studio di Bijbel na cas!