Historia di Bida

Gradiciendo Jehova—Mediante Sirbishi di Tempu Completo!

SEGUN E RELATO DI STANLEY E. REYNOLDS

Mi a nace na 1910 na Londen, Inglatera. Despues di Promé Guera Mundial, mi mayornan a muda bai un pueblo chikitu di Wiltshire cu yama Westbury Leigh. Como mucha, hopi bes mi tabata puntra mi mes: ‘Ken ta Dios?’ Nunca ningun hende no por a bisa mi. I nunca mi no por a comprendé pakico un comunidad asina chikitu manera esun di nos tabatin mester di dos kapel i tambe un misa pa adorá Dios.

NA 1935, cuater aña promé cu Segundo Guera Mundial a cuminsá, ami cu mi ruman homber chikitu Dick a core riba nos baiskel bai Weymouth n’e costa sur di Inglatera pa kampeer den vakansi. Ora nos tabata sinta den nos tent ta scucha awaceru cai i ta puntra nos mes kico nos lo bai haci, un cabayero di edad a acercá mi i a ofrecé mi tres buki pa studia Bijbel. Nan tabata E Harpa di Dios, Lus I i Lus II. Mi a tuma nan contentu cu mi a haña algu pa kibra e monotonia. Mesora mi a keda fasiná cu loke mi a lesa, pero e ora ei mi no tabatin ni e mínimo idea cu lo e cambia mi bida completo−i esun di mi ruman homber tambe.

Ora mi a bai cas bek, mi mama a bisa mi cu Kate Parsons, cu ta biba den nos pueblo, ta parti e mésun tipo di literatura bíblico. E tabata bon conocí pasobra, aunke e tabatin basta edad, e tabata core un motosaikel chikitu pa bishitá hende cu ta biba leu for di otro den nos comunidad. Mi a bai bishit’é, i gustosamente el a duna mi e bukinan Creacion i Rikesanan huntu cu otro publicacionnan di Sociedad Watch Tower. Tambe el a bisa mi cu e ta un Testigo di Jehova.

Despues di a lesa e bukinan huntu cu mi Bijbel, mi a haña sa cu Jehova ta e Dios berdadero i mi kier a ador’é. Pues, mi a manda un carta den cua mi ta distanciá mi mes for di nos iglesia  i mi a cuminsá asistí na studionan di Bijbel den cas di John cu Alice Moody. Nan tabata biba na Westbury, e stad mas cerca di nos. Nos shete so tabata asistí n’e reunionnan einan. Promé i despues dje reunionnan, Kate Parsons tabata toca harmonia miéntras nos a canta canticanan di Reino huntu, cu vigor!

Na Comienso

Mi por a ripará cu nos tabata biba den un tempu crucial, i mi tabatin un anhelo pa participá den e trabou di predicá cu Mateo 24:14 a profetisá. P’esei, mi a stop di huma, mi a cumprá un tas, i mi a haci un dedicacion na e Gran Dios, Jehova.

Den augustus 1936, Joseph F. Rutherford, presidente di Sociedad Watch Tower, tabata di bishita na Glasgow, Escocia, pa papia riba e tema “Armagedon.” Maske Glasgow tabata mas o ménos 600 kilometer leu, mi tabata decididu pa bai ei i bautisá n’e congreso. Dor cu mi no tabatin hopi cen, mi a bai cu mi baiskel riba trein te na Carlisle, un stad na frontera escoses, i mi a core mi baiskel bai 160 kilometer den direccion nort. Mayor parti dje caminda pa cas tambe mi a core riba baiskel, yegando cas bek físicamente agotá pero spiritualmente fortificá.

Desde e tempu ei, ki ora cu mi a bai compartí mi fe cu hende den e pueblonan cu ta keda cerca, mi a bai riba mi baiskel. E tempunan ei, tur Testigo tabatin un karchi di testimonio cu un mensahe bíblico p’e doño di cas lesa. Tambe nos a usa tocadisco portátil pa toca grabacion di discursonan bíblico dje presidente di Sociedad. I claro cu semper nos tabatin un tas di revista, * cu a identificá nos como Testigonan di Jehova.

Trahando Pionero den Tempu di Guera

Mi ruman homber a bautisá na 1940. Segundo Guera Mundial a cuminsá na 1939, i nos tur dos a mira e urgencia pa bira predicadó di tempu completo. Pues, nos a entregá nos solicitud pa pionero. Nos a keda contentu cu nos tur dos a haña asignacion pa bai n’e cas di pionero di Bristol, pa einan nos djoin Edith Poole, Bert Farmer, Tom cu Dorothy Bridges, Bernard Houghton i otro pioneronan, kende nan fe nos a admirá pa hopi tempu.

No a dura mashá cu un vèn chikitu cu “TESTIGONAN DI JEHOVA” skirbí cu letternan diki riba dje na tur dos banda, a bin busca nos. E shofer tabata Stanley Jones, cu despues a traha como misionero na China i cu nan a encarcelá pa shete aña largu su so pa motibu di su actividad di predicá.

 Segun cu e guera tabata avansá, rara bes nos por a drumi un anochi completo. Bom tabata cai rondó di nos cas di pionero, i constant nos mester a vigilá pa proyectilnan flamabel. Un anochi, nos a bandoná e centro di ciudad di Bristol despues di un excelente asamblea cu tabatin un asistencia di 200 Testigo i nos a yega nos cas cu tabata relativamente safe meimei di un yobida di huls di granada for di arma contra atake aéreo.

E siguiente mainta ami cu Dick a bolbe bai e stad pa coge algun cos cu nos a laga atras. Nos a keda boca habrí. Bristol tabata un ruina. Henter e centro di ciudad tabata destruí i kimá. Park Street, caminda nos Salon di Reino tabata situá, tabata un bola di piedra cu huma saliendo for di dje. Sin embargo, ningun Testigo no a ser heridá ni matá. Felismente, nos a muda nos literatura bíblico caba for dje Salon di Reino i a distribuyé den cas dje miembronan dje congregacion. Nos a gradicí Jehova pa tur dos cos.

Libertad Inesperá

Pa ora mi a ricibí mi papelnan pa drenta servicio militar, Congregacion Bristol, unda mi a sirbi como superintendente presidente, a aumentá te na 64 minister. Hopi Testigo a ser encarcelá debí na nan posicion neutral, i mi a verwagt cu mi libertad pa predicá lo ser kitá mescos. A trata mi caso n’e tribunal local di Bristol, unda ruman Anthony Buck, un ex-funcionario di prizon, a defendé mi. E tabata un homber cu curashi i sin miedu, un apoyadó leal di berdad bíblico, i como resultado di su excelente defensa, mi a ser exonerá inesperadamente for di servicio militar bou dje condicion cu mi ta sigui cu mi ministerio di tempu completo!

Mi a keda emocioná di tin mi libertad, i tabata decididu pa us’é pa predicá mas tantu posibel. Ora mi a haña un yamada pa presentá n’e oficina di sucursal di Londen pa papia cu Albert D. Schroeder, superintendente di sucursal, di mes mi tabata curioso pa sa kico tabata warda mi. Imaginá bo mi sorpresa ora mi a haña invitacion pa bai Yorkshire pa sirbi como superintendente biahero, bishitando un congregacion diferente tur siman pa yuda i animá e rumannan. Mi tabata sinti mi ègt incapas pa cumpli cu un asignacion asina, pero mi tabatin mi exoneracion for di servicio militar i mi tabata liber pa bai. Pues, mi a aceptá Jehova su direccion i a bai boluntariamente.

Albert Schroeder a introducí mi n’e rumannan na un asamblea na Huddersfield, i na april 1941, mi a cuminsá cu mi asignacion nobo. Esta un goso tabata pa siña conocé e kerido rumannan aki! Nan amor i cariño a pone mi apreciá mas ainda cu Jehova tin un pueblo completamente dedicá na dje i cu ta stima otro.—Juan 13:35.

Mas Privilegio den Sirbishi

Na 1941 a tene un congreso nacional inolvidabel di cincu  dia den De Montfort Hall di Leicester. Aunke cuminda tabata ser repartí bou di restriccion i transporte nacional tabata limitá, e asistencia a aumentá te na un máximo di 12.000 persona riba diadomingo. I esaki apesar cu n’e tempu ei tabatin solamente algu mas cu 11.000 Testigo den e pais. A toca grabacionnan di discurso dje presidente di Sociedad i a presentá e buki Yunan. E congreso ei tabata sigur un evento significativo den e historia teocrático dje pueblo di Jehova na Gran Bretania, ya cu el a ser tené meimei di Segundo Guera Mundial.

No masha tempu despues dje congreso aki, mi a ricibí un invitacion pa sirbi huntu cu e famia di Betel di Londen. Ei, mi a traha den e departamentonan di transporte i carga i despues den oficina, unda mi a atendé cu asuntunan dje congregacionnan.

E famia di Betel mester a biba dia i anochi cu atakenan aéreo riba Londen, i tambe cu e echo cu constant autoridadnan tabata inspeccioná e rumannan cu tabata ocupá puestonan di responsabilidad einan. Pryce Hughes, Ewart Chitty i Frank Platt, nan tur, a bai cerá pa motibu di nan posicion neutral, i cu tempu nan a deportá Albert Schroeder manda Merca. Apesar di e preshonnan aki, e interesnan di congregacion i di Reino a sigui ta bon cuidá.

Riba Caminda pa Galad!

Ora e guera a stop na 1945, mi a aplicá pa entrenamentu di misionero n’e Scol Bíblico di Galad di Watchtower, i mi a ser aceptá pa e di ocho klas na 1946. Sociedad a haci areglo pa un cantidad di nos, incluso Tony Attwood, Stanley Jones, Harold King, Don Rendell, i Stanley Woodburn, bai cu boto for dje haf di piscadó Fowey, na Cornwall. Un Testigo local a boek nos pasashi riba un boto di carga chikitu cu a transportá klei chines. Nos compartimentunan tabata masha chikitu, i generalmente e dek tabata cubrí cu awa. Ki aliviá nos tabata ora cu por fin nos a yega nos haf di entrada, esta, Filadelfia!

E campus di Galad tabata bunita situá na South Lansing den nort dje estado New York, i e entrenamentu cu mi a ricibí a nificá hopi pa mi. E studiantenan den nos klas a bini for di 18 nacion—tabata promé bes cu Sociedad a logra inscribí asina tantu minister for di paisnan stranhero—i nos a bira amigunan cerá. Mi a disfrutá mashá dje compania di mi compañero di kamber, Kallo Salavaara cu a bini di Finlandia.

Tempu a pasa masha lihé, i na final dje periodo di cincu luna, presidente di Sociedad, Nathan H. Knorr, a bini for dje sede principal na Brooklyn pa entregá nos nos diploma i bisa nos unda nos asignacion lo ta. E tempu ei, studiantenan no tabata sa unda nan lo a bai sino te ora cu anunci’é n’e ceremonia di graduacion. Mi a haña asignacion pa bai bek Betel di Londen i sigui cu mi trabou einan.

Bek na Londen

E añanan despues di guera tabata duru na Gran Bretania. Cuminda i hopi otro necesidad, incluso papel a sigui ser suministrá bou di restriccion. Pero nos a sobrebibí, i interesnan dje Reino di Jehova a prosperá. Ademas di traha na Betel, mi a sirbi na asambleanan di distrito i circuito i a bishitá e congregacionnan, incluso algun na Irlanda. Tambe tabata un privilegio di por a topa Erich Frost i otro rumannan for di Europa i pa haña sa for di nan tocante e integridad di compañeronan Testigo cu a enfrentá e horornan dje camponan di concentracion nazi. Sirbishi na Betel en berdad tabata un privilegio bendicioná.

Pa dies aña largu mi a conocé Joan Webb, un pionero special cu tabata sirbi na Watford, un stad djis nort di Londen. Na 1952, nos a casa. Nos tur dos kier a keda den e sirbishi di tempu completo, pues nos a keda emocioná ora cu despues cu mi a sali for di Betel, mi a ser nombrá como superintendente di circuito. Nos promé circuito tabata a lo largu dje costa sur di Inglatera, na Sussex i Hampshire. E tempu ei e trabou di circuito no tabata fácil. Nos tabata biaha principalmente cu bus, baiskel i na pia. Hopi congregacion tabatin teritorionan grandi den cunucu cu hopi bes tabata difícil pa alcansá, pero e cantidad di Testigo a sigui crece cu pasonan stabil.

New York City 1958

Na 1957, mi a ricibí un otro invitacion for di Betel: “Bo tin gana di bin oficina i yuda cu e  areglonan di biahe p’e binidero asamblea internacional cu lo ser tené na Yankee Stadium i Polo Grounds na New York City na 1958?” No a dura mashá cu ami cu Joan tabata druk bezig ta trata cu e solicitudnan cu rumannan a haci pa bai cu e avion i botonan cu Sociedad a charter. Esaki a resultá den e famoso Asamblea Internacional Boluntad Divino, na cua un inmenso cantidad di 253.922 persona a asistí. N’e congreso aki, 7.136 persona a simbolisá nan dedicacion na Jehova mediante bautismo bou di awa—mas cu dos bes e cantidad di persona cu a bautisá n’e ocasion histórico di Pentecoste 33 E.C., segun Bijbel ta informá.—Echonan 2:41.

Nunca ami cu Joan lo lubidá e cariño di ruman Knorr ora el a invitá nos personalmente pa asistí n’e asamblea pa yuda percurá p’e delegadonan cu a yega New York for di 123 pais. Esei tabata un experencia felis i satisfaciente pa nos tur dos.

Bendicionnan di Sirbishi di Tempu Completo

Despues cu nos a regresá, nos a sigui den e trabou biahero te cu problemanan cu salú a surgi. Joan a bai hospital, i ami a haña un atake celebral leve. Nos a pasa pa e trabou di pionero special pero despues nos tabatin e privilegio di sirbi temporalmente den e trabou di circuito atrobe. Cu tempu, nos a bolbe Bristol unda nos a keda den sirbishi di tempu completo. Mi ruman homber Dick, ta biba cerca eibanda huntu cu su famia, i hopi bes nos ta sinta recordá pasado.

Na 1971 mi bista a daña iremediablemente dor di retinanan cu ta laga los. Desde e tempu ei, mi tin gran dificultad pa lesa, p’esei pa mi, e casetnan grabá cu literatura bíblico ta un provision maraviyoso di Jehova. Ainda ami cu Joan ta conducí studio di Bijbel na cas, i atrabes di añanan nos tabatin e privilegio di yuda mas o ménos 40 persona yega n’e conocimentu dje berdad i esaki a encerá un famia di shete persona.

Ora nos a dedicá nos bida na Jehova mas cu 60 aña pasá, nos deseo tabata pa drenta e sirbishi di tempu completo i keda den dje. Esta gradicidu nos ta cu ainda nos tin forsa pa sirbi e Gran Jehova, i esei ta e único manera cu nos por gradicié pa su bondad na nos i pa nos añanan di felicidad huntu!

[Nota]

[Plachi na página 25]

Huntu cu mi ruman homber Dick (te na man robes; Dick ta pará) i otro pioneronan dilanti e cas di pionero na Bristol

[Plachi na página 25]

E cas di pionero na Bristol na 1940

[Plachi na página 26]

Stanley cu Joan Reynolds dia nan a casa, 12 di januari 1952, i awe