Jehova Ta Mas Grandi Cu Nos Curason

“JEHOVA tin placer den esnan cu ta tem’é,” e salmista a skirbi. Sí, e Creador ta alegrá ora e observá cada un di su sirbidónan humano miéntras nan ta haci esfuerso pa tene nan mes na su normanan hustu. Dios ta bendicioná su sirbidónan leal, ta animá nan i consolá nan den tempu di desesperacion. E sa cu su adoradónan ta imperfecto, p’esei, e ta realístico den loke e ta verwagt di nan.—Salmo 147:11.

Kisas nos no tin problema pa kere cu Jehova ta stima tur su sirbidónan en general masha hopi. Sin embargo, tin algun persona cu ta demasiado preocupá cu nan debilidadnan, cu nan ta convencí cu Jehova lo no por stima nan nunca. Nan por yega n’e conclusion: “Mi ta muchu imperfecto pa Jehova stima mi.” Ta natural cu tempu-tempu, nos tur tin sintimentunan negativo. Pero ta parce cu algun hende ta hiba un lucha constant contra e sintimentu di cu nan no tin balor.

Sintimentunan di Desanimacion

Den tempu bíblico, vários persona fiel a sufri di desanimacion pisá. Job a odia bida i el pensa  cu Dios a bandon’é. Na un tempu Hana, cu a bira mama di Samuel, tabata sumamente infelis pasobra e no tabatin yu i el a yora amargamente. David a “dobla te abou na suela,” i Epafrodito tabata angustiá pasobra noticia tocante su malesa a haci su rumannan tristu.—Salmo 38:6; 1 Samuel 1:7, 10; Job 29:2, 4, 5; Filipensenan 2:25, 26.

Kico di cristiannan awe? Kisas malesa, edad avansá of otro circunstancianan personal ta stroba algun di nan di haci mes tantu cu nan ta deseá den sirbishi sagrado. Esaki por laga nan concluí cu nan ta fayando cu Jehova i cu nan compañeronan creyente. Of otronan ta culpa nan mes constantemente pa fayonan di pasado, i nan ta duda cu Jehova a pordoná nan. Por ta otronan cu ta bini di famianan cu problema ta convencí cu simplemente nan no ta merecé amor. Con esaki por ta posibel?

Tin hende ta lanta den famia caminda e spiritu cu ta prevalecé no ta esun di amor, sino di egoismo, sarcasmo i miedu. Kisas nunca nan no ta conocé un tata cu ta stima nan profundamente. Un tata cu ta busca oportunidad pa elogiá i animá nan, cu ta pasa por haltu di nan malechonan chikitu, i cu ta cla pa pordoná asta erornan mas serio i kende su calor di amistad ta laga henter e famia sintié sigur. Ya cu nan nunca no tabatin un tata terenal amoroso, lo por ta difícil pa nan comprendé kico kier men tin un Tata celestial amoroso.

Por ehempel, Fritz ta skirbi: “Mi tata su manera sin amor tabatin un gran influencia riba mi infancia i mi hubentud. * Nunca el a yega di encomendá mi, i nunca mi a sinti cu nos tabatin un relacion íntimo. Eigenlijk, mayor parti di tempu, mi tabatin miedu di dje.” Esei tabatin como resultado cu Fritz, kende awor ta den su 50 i picu aña, ainda ta sinti cu e no ta sirbi. I Margarette ta splica: “Mi mayornan tabata friu i sin amor. Ora mi a cuminsá studia Bijbel, tabata difícil pa mi imaginá mi kico ta un tata amoroso.”

Sintimentunan asina, sea cual sea e motibu, por nificá cu tin biaha nos sirbishi na Dios no ta ser motivá primeramente pa amor, sino pa un gran parti dor di culpa of miedu. Ta parce cu nunca lo mihó di nos no ta suficiente. E deseo pa agradá Jehova i nos compañeronan creyente por laga nos sinti cu nos ta traha fuera di nos forsa. Como resultado, por ta nos no ta logra nos metanan, i nos ta culpa nos mes i ta sinti nos deprimí.

Kico por haci? Kisas nos tin cu recordá nos mes con comprensivo Jehova ta. Un persona cu a comprendé e aspecto amoroso aki di Dios su personalidad tabata apostel Juan.

“Dios Ta Mas Grandi Cu Nos Curason”

Na fin di promé siglo E.C., Juan a skirbi su compañeronan creyente: “Den esaki nos lo sa cu nos ta originá cu e berdad, i nos lo sigurá nos curason dilanti dje en cuanto cualkier cos den cua nos curason por condená nos, pasobra Dios ta mas grandi cu nos curason i sa tur cos.” Di con Juan a skirbi e palabranan aki?—1 Juan 3:19, 20.

Ta bisto cu Juan tabata sa cu un sirbidó di Jehova por sinti cu su curason ta conden’é. Podisé Juan mes a yega di tin e sintimentunan ei. Tempu cu Juan tabata yoncuman cu un genio ardiente, Jesucristo a corigié na un ocasion pasobra el a trata otro hende muchu severo. De facto, Jesus a duna Juan cu su ruman homber Santiago “e bijnaam di Boanerges, cu kier men Yunan di Donder.”—Marco 3:17; Lucas 9:49-56.

Atrabes dje siguiente 60 añanan, edad i experencia a suavisá Juan i el a bira un cristian balansá, amoroso i compasivo. P’e tempu cu Juan, como e último sobrebibiente dje apostelnan, a skirbi su promé carta inspirá, e tabata sa cu Jehova no ta pidi cuenta di su sirbidónan pa cada un malecho chikitu cu nan cometé. Mas bien, e ta un Tata caluroso, comprensivo, generoso i compasivo, cu tin amor profundo pa tur cu ta stim’é i ta ador’é den berdad. Juan a skirbi: “Dios ta amor.”—1 Juan 4:8.

 Jehova Tin Goso den Loke Nos Ta Haci P’e

Dios conocé e debilidad i faltanan cu nos ta nace cuné, i e ta tene cuenta cu esakinan. “E mes sa bon con nos ta formá, cordando cu nos ta stof,” David a skirbi. Jehova sa ki un impacto nos antecedente tin den haci nos loke nos ta. De facto, e conocé nos muchu mas mihó cu nos mes.—Salmo 103:14.

E sa cu hopi di nos lo kier ta diferente, pero cu nos no por vence nos imperfeccionnan. Por compará nos situacion cu esun di apostel Pablo, cu a skirbi: “E bon cu mi ta deseá mi no ta haci, pero e malu cu mi no ta deseá ta loke mi ta practicá.” Nos tur tin e mésun lucha. Den algun caso esaki por pone cu nos curason mes ta condená nos.—Romanonan 7:19.

Semper corda esaki: Loke Jehova ta pensa di nos ta mas importante cu loke nos ta pensa di nos mes. Ki ora cu e mira cu nos ta purba agrad’é, e no ta reaccioná djis cu un satisfaccion leve pero cu alegria. (Proverbionan 27:11) Maske loke nos ta logra por parce relativamente poco den nos mes bista, nos buena gana i nos motibu corecto ta dun’é goso. E ta mira mas ayá di loke nos ta logra; e ta dicerní loke nos kier haci; e ta conciente di nos deseo i anhelonan. Jehova por lesa nos curason.—Jeremías 12:3; 17:10.

Por ehempel, hopi Testigo di Jehova di naturalesa ta hende tímido i reservá cu ta preferá di no hala atencion. Pa hende asina, predicá e bon nobo di cas pa cas por ta un tarea intimidante. Tog, motivá pa un deseo pa sirbi Dios i pa yuda nan próhimo, asta esnan tímido ta siña con pa abordá nan próhimo i papia tocante Bijbel. Kisas nan ta haña cu nan ta logra poco, i e sintimentu aki por horta nan di nan goso. Podisé nan curason ta duna nan cu nan ministerio no ta di balor. Pero e gran esfuerso cu e personanan ei ta haci den nan sirbishi, sigur ta haci Jehova alegrá. Ademas, nan no por ta sigur unda i ki ora e simianan dje berdad lo spruit, crece i duna fruta.—Eclesiástes 11:6; Marco 12:41-44; 2 Corintionan 8:12.

Otro Testigonan tin hopi tempu cu problema di salú of nan ta birando bieu. Pa nan, asistencia regular na reunionnan na Salon di Reino por bai acompañá cu hopi dolor i ansiedad. Ora nan scucha un discurso tocante e trabou di predicá, esei lo por pone nan corda loke nan tabata haci ántes i loke nan kier haci ainda, pero cu malesa ta stroba nan. Personanan asina por haña sintimentunan di culpa pasobra nan no por sigui e conseho manera nan lo kier. Tog, Jehova sigur ta balorá nan lealtad i perseverancia. Tanten cu nan keda leal, nunca lo e lubidá nan registro fiel.—Salmo 18:25; 37:28.

“Sigurá Nos Curason”

Pa ora Juan a bira bieu lo e mester tabatin un comprendimentu amplio di Dios su comprension. Corda cu el a skirbi: “Dios ta mas grandi cu nos curason i sa tur cos.” Ademas, Juan a animá nos pa “sigurá nos curason.” Kico Juan tabata kier men cu e palabranan aki?

Segun Vine’s Expository Dictionary of Old and New Testament Words, e verbo griego traducí como “sigurá” ta nificá “aplicá persuasion, prevalecé riba of gana na bo banda, persuadí.” Cu otro palabra, pa sigurá nos curason, nos tin cu gana nos curason na nos banda, persuadié pa kere cu Jehova ta stima nos. Den ki manera?

Fritz cu e artículo aki a mencioná anteriormente, a sirbi como anciano den un congregacion di Testigonan di Jehova pa mas cu 25 aña i el a saca afó cu studio personal por sigurá su curason di Jehova su amor. “Mi ta studia Bijbel i nos publicacionnan regularmente i cuidadosamente. Esaki ta yuda mi pa no biba mas den pasado, sino pa mantené un bista cla di nos maraviyoso futuro. Tin biaha mi pasado ta aplastá  mi, i mi ta pensa cu nunca Dios lo no por stima mi. Pero por lo general, mi ta haña cu studio personal ta fortalecé mi curason, e ta aumentá mi fe i e ta yuda mi keda gososo i balansá.”

Ta cierto cu lesamentu di Bijbel i meditacion kisas no ta cambia nos situacion actual. Tog, e por cambia e manera cu nos ta mira nos situacion. Si nos hinca pensamentunan for dje Palabra di Dios den nos curason, esei por yuda nos pensa manera Dios. Ademas, studio ta aumentá nos comprendimentu di Dios su comprension. Tiki-tiki nos ta bin comprendé cu Jehova no ta culpa nos pa nos ambiente di infancia, i e no ta culpa nos pa nos enfermedadnan. E sa cu e problemanan cu hopi di nos tin—sea ta emocional of físico—hopi bes no ta debí na nos mes falta, i amorosamente e ta tuma esaki na cuenta.

Kico di Margarette cu nos a mencioná mas promé? Ora el a siña conocé Jehova, studia Bijbel tabata di gran beneficio p’e tambe. Mescos cu Fritz, e tambe mester a corigí e imágen cu e tabatin di un tata. Oracion a yuda Margarette consolidá loke el a siña mediante studio. Margarette ta bisa: “Pa cuminsá, mi a mira Jehova como un amigu íntimo, ya cu mi tabatin mas experencia cu amigunan amoroso cu di un tata amoroso. Tiki-tiki, mi a siña basha mi sintimentu, duda, ansiedad i problemanan dilanti Jehova. Bes tras bes mi a papia cuné den oracion, i na mésun tempu mi tabata hinca tur e cosnan nobo cu mi tabata siña di dje den otro manera puzel. Despues di algun tempu, mi sintimentunan pa Jehova a desaroyá te n’e grado cu awor ta masha poco mi tin problema pa mir’é como mi Tata amoroso.”

Alivio for di Tur Ansiedad

Miéntras tantu cu e sistema bieu malbado aki ta dura, niun hende no por spera di ta liber di ansiedad. Pa algun cristian esaki ta nificá cu sintimentu di ansiedad i duda den nan mes por lanta i causa angustia. Pero nos por ta sigur cu Jehova sa di nos bon motivacion i e esfuerso cu nos ta haci den su sirbishi. Nunca lo e lubidá e amor cu nos a mustra pa su nomber.— Hebreonan 6:10.

Den e binidero tera nobo bou dje Reino Mesiánico, tur hende fiel por verwagt liberacion for dje carganan dje sistema di Satanas. Ki un alivio esei lo ta! E ora ei nos lo mira asta mas evidencia di con comprensivo Jehova ta. Te cu e tempu ei, laga nos tur keda sigur cu “Dios ta mas grandi cu nos curason i sa tur cos.”—1 Juan 3:20.

[Nota]

[Komentario na página 30]

Jehova no ta un tirano severo, sino un Tata caluroso, comprensivo i compasivo

[Plachi na página 31]

Studia e Palabra di Dios ta yuda nos pensa manera Dios