“Lo Mi Marcha Rond di Bo Altar, O Jehova”
“Lo Mi Marcha Rond di Bo Altar, O Jehova”
“LO MI laba mi mannan den inocencia mes, i lo mi marcha rond di bo altar, o Jehova.” (Salmo 26:6) Cu e palabranan aki rey David di antigwedad a proclamá su debocion na Jehova. Pero, pakico i den ki sentido el a “marcha rond” di Jehova su altar?
Pa David, e tabernáculo cu su altar di sacrificio cubrí cu koper tabata e centro di adoracion di Jehova. I durante su reinado esaki tabata situá na Gabon, nort di Jerusalem. (1 Reynan 3:4) E altar tabata midi mas o ménos 2 meter cuadrá so, hopi mas chikitu cu e magnífico altar cu despues nan a traha den e patio dje tempel di Sálomon. * Tog, David tabatin gran goso den e tabernáculo i su altar, cu tabata e centro di adoracion puru na Israel.—Salmo 26:8.
Nan tabata ofrecé ofrenda kimá, sacrificio di comunion i ofrenda di culpa riba e altar, i riba e Dia di Expiacion anual tabata ofrecé sacrificionan na fabor dje nacion. E altar i su sacrificionan tin nificacion pa cristiannan awe. Apostel Pablo a splica cu e altar a representá Dios su boluntad, mediante cua El a aceptá un sacrificio apropiado p’e liberacion di humanidad. Pablo a bisa: “Dor di dicho ‘boluntad’ nos a ser santificá mediante e ofrecementu dje curpa di Jesucristo una bes pa semper.”—Hebreonan 10:5-10.
Ora e sacerdotenan tabata cerca di bai sirbi n’e altar, nan tabatin e custumber di laba nan man den awa pa nan ta limpi. P’esei, ta apropiado cu rey David a laba su mannan “den inocencia mes” promé cu e ‘cana rond dje altar.’ El a actua “cu integridad di curason i cu rectitud.” (1 Reynan 9:4) Si e no a sigui e procedura aki pa laba su mannan, su adoracion, esta, su ‘canamentu rond dje altar,’ lo no tabata aceptabel. Claro cu David no tabata un levita i e no tabatin e privilegio di rindi sirbishi di sacerdote n’e altar. Aunke e tabata un rey, e no tabatin mag di ni sikiera drenta e patio dje tabernáculo. Sin embargo, como un israelita fiel, el a obedecé e Ley di Moises i a trece regularmente su ofrendanan pa presentá riba e altar. El a cana rond dje altar den e sentido cu el a laga su bida drei rond di adoracion puru.
Nos por sigui David su ehempel awe? Sí. Nos tambe por laba nos mannan den inocencia i marcha rond dje altar di Dios si nos ta ehercé fe den e sacrificio di Jesus i ta sirbi Jehova di henter nos alma cu ‘mannan inocente i curason limpi.’—Salmo 24:4.
[Nota]
^ par. 3 E altar ei tabata mas o ménos 9 meter cuadrá.
[Plachi na página 23]
E altar a prefigurá Jehova su boluntad, mediante cua e ta aceptá un sacrificio apropiado p’e liberacion di humanidad.