Tende Loke e Spiritu Tin di Bisa
Tende Loke e Spiritu Tin di Bisa
“Bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.”—ISAIAS 30:21.
1, 2. Con Jehova a comunicá cu hende atrabes di historia?
RIBA e isla di Puerto Rico tin e dish di radio telescop mas grandi i mas sensitivo na mundu. Ya pa décadanan, científiconan ta spera di ricibí mensahe for di bida extraterestre, usando e instrumento grandísimo aki. Pero hamas nan a ricibí mensahenan asina. Pero, ta un ironia cu tin mensahenan masha cla for di pafó dje region humano cu nos tur por ricibí ki ora cu ta, anto sin usa ekipo sofisticá. Esakinan ta bini di un Fuente muchu mas elevá cu cualkier supuesto extraterestre. Ken ta e Fuente di tal comunicacion, i ken ta ricibí nan? Kico e mensahenan ta bisa?
2 E registro di Bijbel ta contené vários relato di ocasionnan ora orea humano a tende mensahe di orígen divino. Algun biaha tabata criaturanan spiritual cu a sirbi como mensahero di Dios pa entregá e mensahenan aki. (Génesis 22:11, 15; Zacarías 4:4, 5; Lucas 1:26-28) Na tres ocasion, hende a tende e stem di Jehova mes. (Mateo 3:17; 17:5; Juan 12:28, 29) Tambe Dios a papia mediante profeta humano i hopi di nan a skirbi loke el a inspirá nan pa bisa. Awe, nos tin Bijbel, cu ta incluí un registro skirbí di hopi dje comunicacionnan aki, i tambe e siñansanan di Jesus i su disipelnan. (Hebreonan 1:1, 2) Jehova en berdad a transmití informacion na su criaturanan humano.
3. Kico ta e propósito di Dios su mensahenan, i kico ta ser verwagt di nos pa haci?
3 Tur e mensahenan inspirá aki for di Dios ta revelá masha poco tocante e universo físico. Nan ta enfocá riba asuntunan mas importante, cuanan tin un impacto riba nos bida awor i den futuro. (Salmo 19:7-11; 1 Timoteo 4:8) Jehova ta usa nan pa comunicá su boluntad i ta ofrecé nos su guia. Esei ta un dje maneranan cu e palabranan di profeta Isaías ta hañando su cumplimentu: “I bo propio oreanan lo tende un palabra bo tras ta bisa: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:21) Jehova no ta obligá nos scucha su “palabra.” Ta keda na nos pa sigui Dios su instruccion i cana den su caminda. P’e motibu ei e Scritura ta encurashá nos pa scucha na comunicacion cu ta bini di Jehova. Den e buki di Revelacion, e animacion pa “tende loke e spiritu ta bisa” ta aparecé shete bes.—Revelacion 2:7, 11, 17, 29; 3:6, 13, 22.
4. Ta razonabel pa spera cu den nos tempu Dios ta comunicá directamente cu nos for di shelu?
4 Awe, Jehova no ta papia cu nos directamente for dje region celestial. Asta den tempu di Bijbel, e comunicacionnan sobrenatural aki tabata sosodé rara bes, tin biaha despues di hopi siglo. Atrabes di historia, mayoria biaha Jehova a comunicá cu su pueblo den maneranan mas indirecto. Esei ta e caso den nos tempu. Laga nos considerá tres manera den cua Jehova ta comunicá cu nos awe.
“Tur Scritura Ta Inspirá”
5. Kico ta Jehova su instrumento principal di comunicacion awe, i con nos por beneficiá for di dje?
5 E instrumento principal di comunicacion entre Dios i hende ta Bijbel. E ta inspirá pa Dios, i tur loke ta den dje por ta beneficioso pa nos. (2 Timoteo 3:16) Bijbel tin masha hopi ehempel di hende real cu a ehercé nan boluntad liber ora di dicidí si nan ta scucha Jehova su stem of no. Ehempel asina ta corda nos pakico ta vital pa scucha loke e spiritu di Dios ta bisa. (1 Corintionan 10:11) Tambe Bijbel ta contené sabiduria práctico. E ta duna nos conseho cu por yuda nos ora nos tin cu tuma decisionnan den bida. Ta como si fuera Dios ta nos tras, papiando den nos orea e palabranan: “Esaki ta e caminda. Cana den dje.”
6. Pakico Bijbel ta muchu mas superior cu tur otro obra skirbí?
6 Pa por tende loke e spiritu ta bisa mediante e páginanan di Bijbel, nos tin cu les’é regularmente. Bijbel no ta djis un buki popular, bon skirbí, un dje hopinan cu ta disponibel awe. Bijbel ta inspirá p’e spiritu di Dios i ta contené su pensamentunan. Hebreonan 4:12 ta bisa: “E palabra di Dios ta bibu i ta ehercé poder i ta mas skerpi cu cualkier spada di dos fila i ta penetrá asta pa separá alma i spiritu, i djoint i nan tuti, i por dicerní pensamentunan i intencionnan di e curason.” Segun cu nos ta lesa Bijbel, su contenido ta penetrá manera un spada te den nos pensamentunan profundo i motivacionnan, i ta revelá te na ki grado nos bida ta armonisá cu e boluntad di Dios.
7. Pakico ta vital pa lesa Bijbel, i nos ta ser animá pa haci esei cu ki frecuencia?
7 E “pensamentunan i intencionnan di e curason” por cambia segun cu tempu ta pasa i segun cu nos experencianan den bida ta influenciá nos—tantu esnan agradabel como desagradabel. Si nos no studia e Palabra di Dios constantemente, nos pensamentu, actitud i emocionnan lo no ta na armonia mas cu Dios su principionan. P’esei Bijbel ta encurashá nos: “Sigui pone boso na prueba pa mira si boso ta den e fe, sigui duna prueba di loke boso mes ta.” (2 Corintionan 13:5) Si nos kier sigui tende loke e spiritu ta bisa, nos mester haci caso dje conseho pa lesa e Palabra di Dios tur dia.—Salmo 1:2.
8. Ki palabranan di apostel Pablo ta yuda nos examiná nos mes en coneccion cu lesamentu di Bijbel?
8 Un recordatorio importante pa lector di Bijbel ta esaki: Permití suficiente tempu pa asimilá loke bo ta lesa! Den nos esfuerso pa cumpli cu e conseho pa lesa Bijbel tur dia, nos lo no kier haña nos mes ta pasa purá-purá dor di vários capítulo sin ta capta e sentido di loke nos ta lesa. Aunke lesamentu di Bijbel cu regularidad ta vital, nos motivacion no mester ta solamente pa keda al dia cu un programa; nos mester tin un deseo sincero pa siña tocante Jehova i su propósitonan. En coneccion cu esaki, nos por wel usa e palabranan aki di apostel Pablo pa haci un examinacion personal. Ora el a skirbi compañeronan cristian, el a bisa: “Mi ta dobla mi rudianan n’e Tata, afin cu e por duna boso . . . pa mediante boso fe e Cristo biba den boso curason cu amor; pa boso saca rais i ser establecí riba e fundeshi, pa boso ser henteramente capas pa capta mentalmente cu tur e santunan loke ta e hanchura i largura i haltura i profundidad, i conocé e amor di e Cristo cu ta surpasá conocimentu, pa boso ser yená cu tur e plenitud cu Dios ta duna.”—Efesionan 3:14, 16-19.
9. Con nos por cultivá i profundisá nos deseo pa siña for di Jehova?
9 Ta berdad cu algun di nos di naturalesa no gusta lesa, miéntras cu otronan si stima un lesamentu. Pero, sin importá nos caracter individual, nos por cultivá i profundisá nos deseo pa siña for di Jehova. Apostel Pedro a splica cu nos mester tin un anhelo pa conocimentu di Bijbel, i el a reconocé cu kisas nos tin cu desaroyá un deseo asina. El a skirbi: “Manera criaturanan recien nací, desaroyá un anhelo p’e lechi no-adulterá cu ta pertenecé n’e palabra, pa mediante dje boso por crece na salbacion.” (1 Pedro 2:2) Disiplina propio ta vital si nos kier “desaroyá un anhelo” pa studia Bijbel. Mescos cu nos por desaroyá un smak pa un cuminda nobo despues di purb’é vários bes, nos por mehorá nos actitud pa cu lesa i studia si nos disipliná nos mes pa sigui un rutina regular.
“Alimento n’e Debido Tempu”
10. Ken ta forma e “esclabo fiel i discreto,” i con Jehova ta usando nan awe?
10 Un otro medio cu Jehova ta usa pa papia cu nos awe ta loke Jesus a identificá na Mateo 24:45-47. Ei el a papia dje congregacion cristian ungí cu spiritu, esta, “e esclabo fiel i discreto” nombrá pa percurá ‘alimento spiritual n’e debido tempu.’ Como individuo, e miembronan dje clase aki ta Jesus su “domésticonan.” Nan, huntu cu “un multitud grandi” di ‘otro carné,’ ta ricibí animacion i guia. (Revelacion 7:9; Juan 10:16) Hopi dje alimento aki n’e debido tempu ta bini den forma di publicacionnan imprimí, manera E Toren di Vigilancia, Spierta!, i otro publicacionnan. Tambe nan ta ricibí mas alimento spiritual den forma di discurso i demostracion na congreso, asamblea i reunionnan di congregacion.
11. Con nos ta mustra cu nos ta receptivo na loke e spiritu tin di bisa mediante “e esclabo fiel i discreto”?
11 E informacion cu “e esclabo fiel i discreto” ta percurá ta diseñá pa fortalecé nos fe i entrená nos facultadnan perceptivo. (Hebreonan 5:14) E conseho ei por ta di un caracter general pa asina permití cada un haci un aplicacion personal. De bes en cuando tambe nos ta ricibí conseho cu ta trata cu aspectonan specífico di nos conducta. Ki actitud nos mester tin si nos di berdad ta scucha loke e spiritu ta bisa mediante e clase di esclabo? Apostel Pablo ta contestá: “Sea obediente na esnan cu ta hiba delantera den boso i sea sumiso.” (Hebreonan 13:17) Ta cierto cu tur persona enbolbí den e areglo aki ta hombernan imperfecto. Tog, aunke nan ta imperfecto, Jehova tin deleite den usa su sirbidónan humano pa guia nos den e tempu di fin aki.
Guia di Nos Concenshi
12, 13. (a) Ki otro fuente di guia Jehova a duna nos? (b) Ki influencia positivo e concenshi por tin asta riba hende cu no tin un conocimentu exacto dje Palabra di Dios?
12 Jehova a duna nos un otro fuente mas di guia: nos concenshi. El a crea hende cu un sentido interno di bon i malu. Esei ta parti di nos naturalesa. Den su carta n’e romanonan, apostel Pablo a splica: “Ki ora cu hende dje nacionnan cu no tin ley ta haci di naturalesa e cosnan dje ley, e hendenan aki, aunke nan no tin ley, ta un ley pa nan mes. Nan ta net esnan cu ta demostrá cu e substancia dje ley ta skirbí den nan curason, miéntras cu nan concenshi ta duna testimonio cu nan i, entre nan mes pensamentu, nan ta ser acusá of asta dispensá.”—Romanonan 2:14, 15.
13 Te na cierto grado, hopi hende cu no conocé Jehova por armonisá nan pensamentu i accionnan cu principionan divino di bon i malu. Ta como si fuera leu aya nan ta tende un stem di paden ta guia nan den e direccion corecto. Si esaki por ta e caso cu esnan cu no tin un conocimentu exacto dje Palabra di Dios, cuantu mas e stem di paden ei mester papia den e caso di cristiannan berdadero! Sigur anto, un concenshi cristian cu ta ser refiná pa un conocimentu exacto dje Palabra di Dios i cu ta obra na armonia cu Jehova su spiritu santu por percurá guia confiabel.—Romanonan 9:1.
14. Con un concenshi bíblicamente entrená por yuda nos sigui e guia dje spiritu di Jehova?
14 Un bon concenshi, unu cu ta bíblicamente entrená, por recordá nos dje caminda den cua e spiritu kier pa nos cana. Por tin biaha cu ni e Scritura ni nos publicacionnan basá riba Bijbel no ta comentá specíficamente riba un situacion particular cu nos por ta aden. Ma nos concenshi por bati alarma, spiertando nos contra un curso potencialmente dañino. Den tal caso, si nos ignorá e impulsonan di nos concenshi, esei eigenlijk ta nificá cu nos ta ignorando loke e spiritu di Jehova ta bisa. Di otro banda, dor di siña dependé riba nos concenshi cristian entrená, nos por tuma decisionnan sabí asta ora no tin instruccion specífico por escrito. Sin embargo, ta vital pa tene na mente cu ora no tin un principio, regla of ley cu Dios a duna, lo ta inapropiado pa imponé e opinion di nos concenshi riba compañeronan cristian den cosnan cu ta netamente personal.—Romanonan 14:1-4; Galationan 6:5.
15, 16. Kico por pone nos concenshi funcioná malu, i con nos por prevení esei di sosodé?
15 Un concenshi limpi i bíblicamente entrená ta un bon regalo di Dios. (Santiago 1:17) Pero nos tin cu protehá e regalo aki for di influencianan corupto si nos kier p’e funcioná corectamente como un sistema di siguridad moral. Si nos sigui custumber i tradicionnan local cu ta na conflicto cu e normanan di Dios, esei por pone nos concenshi funcioná malu i keda sin pui nos den e direccion corecto. Nos por resultá di ta incapas pa husga asuntunan corectamente i lo por asta gaña nos mes i kere cu un mal acto en realidad ta bon.—Compará cu Juan 16:2.
16 Si nos sigui ignorá e spiertamentunan di nos concenshi, su stem lo bira mas i mas débil te ora e cria cayo of nos perde heful moral. E salmista a papia di hende asina ora el a bisa: “Nan curason a bira sin heful mescos cu vet.” (Salmo 119:70) Algun hende cu ta ignorá e puinan di nan concenshi ta perde e abilidad di pensa na un manera sano. Nan no tin e guia mas di principionan divino i ta incapas pa tuma decision corecto. Pa evitá un situacion asina, nos mester ta receptivo p’e guia di nos concenshi cristian asta ora e asuntunan en cuestion ta parce insignificante.—Lucas 16:10.
Felis Ta Esnan Cu Ta Scucha i Obedecé
17. Segun cu nos ta scucha ‘e palabra nos tras’ i ta haci caso di nos concenshi bíblicamente entrená, con nos lo ser bendicioná?
17 Segun cu nos ta establecé un patronchi di scucha ‘e palabra nos tras’—cu e Scritura i e esclabo fiel i discreto ta percurá—i segun cu nos ta haci caso dje recordatorionan di nos concenshi bíblicamente entrená, Jehova lo bendicioná nos cu su spiritu. Na su turno, spiritu santu lo mehorá nos abilidad pa ricibí i comprendé loke Jehova ta bisa nos.
18, 19. Con e guia di Jehova por beneficiá nos tantu den nos ministerio como den nos bida personal?
18 Tambe Jehova su spiritu lo duna nos curashi pa enfrentá situacionnan difícil cu sabiduria i balentia. Mescos cu den e caso dje apostelnan, e spiritu di Dios por stimulá nos facultadnan mental i yuda nos pa semper actua i papia na armonia cu principio bíblico. (Mateo 10:18-20; Juan 14:26; Echonan 4:5-8, 13, 31; 15:28) E combinacion di Jehova su spiritu i nos mes esfuersonan personal lo duna nos éxito ora nos ta tuma decisionnan importante den bida. E ta duna nos e curashi pa pega n’e decisionnan ei. Por ehempel, kisas bo ta pensa na cambia bo estilo di bida pa saca mas tempu pa cosnan spiritual. Of kisas bo ta enfrentá decisionnan importante cu lo cambia bo bida, manera scoge un casá, evaluá un oferta di trabou of cumpra un cas. En bes di laga nos emocionnan humano ser e único factor ora di tuma nos decisionnan, nos mester scucha loke e spiritu di Dios tin di bisa i actua na armonia cu su guia.
19 Nos ta ègt apreciá e recordatorionan bondadoso i e conseho cu nos ta ricibí for di compañeronan cristian, incluso dje ancianonan. Sin embargo, no ta semper nos tin cu warda pa otro hende hala nos atencion riba un asuntu. Si nos sa e curso sabí pa sigui i ki ahustenan nos tin cu haci den nos actitud i conducta pa por agradá Dios, laga nos actua. Jesus a bisa: “Si boso sa e cosnan aki, felis boso ta si boso haci nan.”—Juan 13:17.
20. Ki bendicion ta bini pa esnan cu ta scucha ‘e palabra nan tras’?
20 Ta masha cla anto cu pa nan sa con agradá Dios, cristiannan no tin nodi tende un stem literal for di shelu, ni nan no tin nodi ricibí un bishita di angel. Nan ta bendicioná cu Dios su Palabra skirbí i guia amoroso mediante su clase ungí riba tera. Si cuidadosamente nan tuma e ‘palabra nan tras’ aki na pechu i sigui e guia di nan concenshi bíblicamente entrená, nan lo tin éxito den haci e boluntad di Dios. E ora ei sigur nan lo mira cumplimentu dje promesa di apostel Juan: “Esun cu haci e boluntad di Dios ta permanecé pa semper.”—1 Juan 2:17.
Un Repaso Breve
• Pakico Jehova ta comunicá cu su creacion humano?
• Con nos por beneficiá di un programa di lesa Bijbel regularmente?
• Con nos mester respondé na guia for dje clase di esclabo?
• Pakico nos no mester ignorá e impulsonan di un concenshi bíblicamente entrená?
[Preguntanan di Estudio]
[Plachi na página 13]
Hende no tin mester di ekipo sofisticá pa ricibí mensahe for di Dios
[Rekonosementu]
Courtesy Arecibo Observatory/David Parker/Science Photo Library
[Plachi na página 15]
Jehova ta papia cu nos mediante Bijbel i pa medio di “e esclabo fiel i discreto”