E Evangelionan—Historia of Mito?

ROND mundu e relato di Jesus di Názaret, un homber hóben cu a cambia e curso di historia humano, ta ankrá den e structura di sociedad. E ta parti di tantu e educacion formal como informal di hende. Hopi ta considerá e Evangelionan como e fuente di berdad i dichonan eterno, manera: “Laga boso palabra Sí nificá Sí, boso No, No.” (Mateo 5:37) Realmente, e relatonan di Evangelio kisas tabata e base pa e educacion cu bo mayornan a duna bo, sea cu nan tabata cristian of no.

Pa miyones di siguidó sincero di Cristo, e Evangelionan a duna e descripcion di e homber pa ken nan tabata dispuesto pa sufri i muri. Tambe, e Evangelionan tabata e base i inspiracion pa curashi, awante, fe i speransa. Bo no ta di acuerdo anto, cu mester di evidencia irefutabel pa considerá e relatonan aki como nada mas cu ficticio? Ora bo considerá e tremendo influencia cu e relatonan di Evangelio tabatin riba pensamentu i conducta humano, lo bo no exigí prueba convincente si un persona kier trece duda riba nan autenticidad?

Nos ta invitá bo pa considerá un cantidad di pregunta cu ta pone bo pensa en cuanto e Evangelionan. Mira pa bo mes kico cierto studiantenan di e Evangelionan ta pensa di e cuestionnan aki, maske algun di nan no ta pretendé di ta cristian. E ora ei bo por saca bo propio conclusionnan basá riba conocimentu.

PREGUNTANAN PA CONSIDERA

◆ E Evangelionan por ta un invento maestral?

Robert Funk, fundadó di e Seminario di Jesus ta bisa: “Mateo, Marco, Lucas i Juan ‘a presentá Mesías’ pa pon’é cuadra cu doctrina cristian cu a desaroyá despues di morto di Jesus.” Pero tempu cu a skirbi e Evangelionan, hopi hende cu a tende Jesus su dichonan, a observá su obranan i a mir’é despues di su resureccion, tabata na bida ainda. Nan no a acusá e skirbidónan di Evangelio di ningun tipo di fraude.

Considerá e morto i resureccion di Cristo. No ta e Evangelionan so ta contené relatonan confiabel di e morto i resureccion di Jesus, pero tambe e promé carta canónico di apostel Pablo na e cristiannan den antiguo Corinto. El a skirbi: “Mi a pasa na boso, entre e promé cosnan, loke ami tambe a ricibí, cu Cristo a muri pa nos picánan segun e Scritura; i cu el a ser derá, sí, cu el a ser lantá e di tres dia segun e Scritura; i cu el a aparecé na Céfas, despues n’e diesdosnan. Despues di esei el a aparecé na mas cu cincushen ruman a la bes, e mayoria di ken ta permanecé te n’e tempu actual, pero algun a bai drumi den morto. Despues di esei el a aparecé na Santiago, caba na tur e apostelnan; pero último di tur el a aparecé na mi tambe como si fuera na un hende nací prematuramente.” (1 Corintionan 15:3-8) E testigonan ocular ei a yuda conserbá e echonan histórico di Jesus su bida.

Den e Scritura Griego Cristian no tin indicacion cu e ta un producto di imaginacion  manera críticonan moderno ta pretendé. Esei ta aparecé mas bien den documentonan di siglo dos E.C. Ora a cuminsá desaroyá un apostasia for di cristianismo berdadero entre e comunidadnan alehá di e congregacion apostólico, cierto relato no-bíblico tocante Cristo a ser producí.—Echonan 20:28-30.

◆ E Evangelionan por ta leyenda?

Autor i crítico C. S. Lewis a haña cu ta difícil pa mira e Evangelionan como djis leyenda. El a skirbi: “Como historiadó literario mi ta plenamente convencí cu loke sea e Evangelionan ta, nan no ta leyenda. Nan no ta suficiente artístico pa ta leyenda. . . . Gran parti di Jesus su bida ta desconocí pa nos, i ningun hende cu ta inventá un leyenda lo permití esei.” Ta interesante tambe cu maske e historiadó bon conocí H. G. Wells no a pretendé di ta un cristian, tog el reconocé: “Tur e cuater [skirbidónan di Evangelio] ta consistente ora nan ta duna nos un cuadro di un personalidad masha único; nan ta transmití e . . . conviccion di realidad.”

Pensa un ratu riba e momento cu Jesus resucitá a aparecé na su disipelnan. Probablemente, un bon inventor di leyenda lo a laga Jesus regresá na un manera masha espectacular, duna un discurso importante, of ser rondoná pa lus i splendor. En bes di esei, e skirbidónan di Evangelio simplemente ta describié pará dilanti su disipelnan. Despues el a puntra: “Muchanan, boso no tin nada pa come, no ta berdad?” (Juan 21:5) Erudito Gregg Easterbrook ta concluí: “Esaki ta e clase di detaye cu ta mustra cu ta trata di un relato auténtico, i no di mito trahá.”

E acusacion di cu e Evangelionan ta leyenda ta trompecá tambe riba e método rabínico estricto di siña cu tabata popular durante e tempu cu a skirbi e Evangelionan. E método aki a pega firmemente na siña for di cabes—un proceso di memorisá usando rutina of ripiticion. Esaki ta faborecé e descripcion exacto i cuidadoso di Jesus su dichonan i obranan, en bes di e creacion di un version floreá.

◆ Si e Evangelionan tabata leyenda, por a compilá nan asina lihé despues di Jesus su morto?

Segun evidencia disponibel, a skirbi e Evangelionan entre e añanan 41 i 98 E.C. Jesus a muri na aña 33 E.C. Esaki ta nificá cu e relatonan di su bida a ser compilá den un periodo relativamente corticu despues cu el a terminá su ministerio. Esaki ta un tremendo obstáculo pa e argumento di cu e relatonan di Evangelio ta djis leyenda. Tempu ta necesario pa leyenda desaroyá. Tuma como ehempel e Iliada i e Odisea cu e poëta griego di antigwedad, Homer, a skirbi. Algun hende ta pensa cu e texto di e dos leyendanan di héroe ei a desaroyá i stabilisá despues di cientos di aña. Kico di e Evangelionan?

Den su buki Caesar and Christ (César i Cristo), historiadó Will Durant a skirbi: “Pa algun hende simpel . . . inventá un personalidad asina poderoso i atractivo, cu principio asina elevá i cu un vision asina inspirador di hermandad humano, lo ta un milager hopi mas increibel cu cualkier milager mencioná den e Evangelionan. Despues di dos siglo di Crítica Textual di Bijbel, e cuadro general dje bida, personalidad i siñansa di Cristo, ta keda razonablemente claro i ta forma e rasgo mas fasinante den e historia di hende di West.”

◆ A adaptá e Evangelionan mas despues pa yena e necesidadnan dje comunidad cristian di promé?

Algun crítico ta argumentá cu e division den e gruponan di interes di e comunidad cristian a pone e skirbidónan di Evangelio adaptá e relato di Jesus of agregá na dje. Sin embargo, un estudio cuidadoso di e Evangelionan ta mustra cu no tabatin tal falsificacion. Si a cambia e relatonan di Evangelio tocante Jesus como resultado di intriga di e cristiannan di promé siglo, di con te ainda tin remarkenan negativo di tantu hudiu como gentil den e texto?

Un ehempel di esaki ta na Mateo 6:5-7, caminda a cita Jesus bisando: “Ora boso ta haci oracion, boso no mag ta manera e hipócritanan; pasobra nan ta gusta haci oracion pará  den e snoanan i na skina dje camindanan hanchu pa hende mira nan. En berdad mi ta bisa boso: Nan tin nan recompensa completo caba.” Claramente, esaki a condená e lidernan religioso hudiu. Jesus a sigui bisa: “Pero ora di haci oracion, no bisa e mésun cosnan bes tras bes, mescos cu e hendenan dje nacionnan [e gentilnan] ta haci, pasobra nan ta imaginá cu dor di usa hopi palabra nan lo ser tendé.” Dor di cita Jesus su palabranan den e manera aki, e skirbidónan di Evangelio no tabata busca hende pa combertí. Nan simplemente a skirbi loke Jesucristo realmente a bisa.

Considerá tambe e relatonan di Evangelio tocante e muher cu a bishitá Jesus su graf i cu a mira cu e tabata bashí. (Marco 16:1-8) Segun Gregg Easterbrook, “den e sociologia di Medio Oriente di antigwedad, di mes tabata considerá testimonio di hende muher como inconfiabel: por ehempel, dos testigo masculino tabata suficiente pa proba cu un muher a cometé adulterio, siendo cu ningun testimonio di muher por a condená un homber.” Sí, ni Jesus su mes disipelnan no a kere e muhernan! (Lucas 24:11) P’esei, ta masha improbabel cu e relato ei a ser inventá deliberadamente.

E ausencia di comparacion den e cartanan di e apostelnan i den e buki di Echonan ta un argumento fuerte cu esnan den e Evangelionan no ta agregá dor di e cristiannan di promé pero ta loke Jesus mes a papia. Ademas, un comparacion cuidadoso di e Evangelionan cu e cartanan di apostel ta revelá cu ni Pablo su palabranan ni esnan dje otro skirbidónan di e Scritura Griego tabata ábilmente cambiá i atribuí na Jesus. Si e comunidad cristian di promé a haci un cos asina, nos lo mester spera di haña maske ta algun informacion dje cartanan di apostel den e relatonan di Evangelio. Ya cu nos no ta haña esei, nos por concluí sin mas cu e material hañá den e Evangelionan ta original i auténtico.

◆ Kico di aparente contradiccion den e Evangelionan?

Pa hopi tempu críticonan a bisa cu e Evangelionan ta yen di contradiccion. Historiadó Durant a trata na examiná e Evangelionan for di un punto di bista puramente obhetivo—como documentonan histórico. Apesar cu e ta bisa cu ta parce di tin contradiccion den nan, e ta concluí: “E contradiccionnan ta masha chikitu [detayenan insignificante], no fundamental; den lo mas esencial e evangelionan sinóptico ta armonisá remarcablemente bon i ta forma un cuadro consistente di Cristo.”

Hopi bes ta fácil pa resolvé e aparente contradiccionnan den e relatonan di Evangelio. Pa ilustrá esaki: Mateo 8:5 ta bisa cu “un oficial di ehército a acercá [Jesus], rogand’e” p’e cura un criá. Na Lucas 7:3, nos por lesa cu e oficial “a manda ancianonan dje hudiunan cerca [Jesus] pa pidié p’e bin saca [e] esclabo for di  peliger.” E oficial a manda e ancianonan como su representantenan. Mateo ta bisa cu e oficial di ehército mes a pidi Jesus pa motibu cu el a haci su peticion mediante e ancianonan cu a sirbi como su bocero. Esaki ta djis un ehempel pa mustra con por resolvé supuesto discrepancianan den e Evangelionan.

Kico di loke Crítica Textual di Bijbel ta bisa tocante e echo cu e Evangelionan no ta cumpli cu e criterio di historia real? Durant ta sigui bisa: “Den e entusiasmo di su descubrimentunan, Crítica Textual di Bijbel a aplicá test di autenticidad asina severo na e Testament Nobo cu dor di esei, shen homber famoso di ántes—manera Hammurabi, David, Sócrates—lo a caba na leyenda. Apesar di prehuicio i idea teológico contra e skirbidónan di Evangelio, nan a registrá hopi incidente cu simpel inventornan lo a sconde, tal como, e competencia entre e apostelnan pa posicion mas haltu den e Reino, nan huida despues di Jesus su aresto, Pedro su nengamentu . . . Ningun hende cu lesa e relatonan aki por duda di e existencia real di e personahe tras di nan.”

◆ Cristianismo djawe ta representá e Jesus dje Evangelionan?

E Seminario di Jesus a declará cu su investigacion di e Evangelionan “no ta mará na loke e concilio di iglesia ta bisa.” Pero historiadó Wells a realisá cu tin un diferencia grandi entre e siñansanan di Jesus presentá den e Evangelionan i esnan di cristiandad. El a skirbi: “No tin evidencia cu e apostelnan di Jesus a yega di tende di Trinidad—na ningun momento for di dje. . . . Ni tampoco [Jesus] a bisa ni un pia di palabra tocante adoracion di su mama Maria, representá pa Isis, e reina di shelu. El a ignorá net e cosnan cu hende ta usa i adorá den cristianismo.” P’esei, bo no por husga e balor di e Evangelionan a base di e siñansanan di cristiandad.

 KICO TA BO CONCLUSION?

Despues di a considerá e puntonan aki, kico abo ta pensa awor? Tin ègt prueba convincente cu e Evangelionan ta simplemente mito? Hopi ta haña e pregunta i dudanan lantá tocante e autenticidad di e Evangelionan swak i poco convincente. Pa forma un opinion personal, bo mester lesa e Evangelionan cu un mente habrí. (Echonan 17:11) Ora bo considerá e consistencia, onestidad i e exactitud cu cua e Evangelionan ta presentá e personalidad di Jesus, lo bo realisá cu e relatonan aki definitivamente no ta un coleccion di fábula. *

Si bo examiná Bijbel i aplicá su conseho, lo bo mira con e por transformá bo bida pa mihó. (Juan 6:68) Esaki ta specialmente e caso cu e dichonan di Jesus skirbí den e Evangelionan. Ademas, eiden bo por siña tocante un maraviyoso futuro wardá pa humanidad obediente.—Juan 3:16; 17:3, 17.

[Nota]

[Kuadro na página 7]

Evidencia di Reportahe Auténtico

ALGUN aña pasá un escritor australiano i ex-crítico di Bijbel a confesá: “Pa promé bes den mi bida mi a haci loke normalmente ta e promé deber di un reportero: averiguá mi datonan. . . . I nan a shok mi, pasobra loke mi tabata lesa [den e relatonan di Evangelio] no tabata leyenda i e no tabata zona manera ficticio. E tabata reportahe. Relatonan di testigo ocular i di otro fuente di sucesonan extraordinario . . . Reportahe tin un sabor distintivo, i e sabor ei ta den e Evangelionan.”

Di mes manera, E. M. Blaiklock, profesor di literatura clásico na e Universidad Auckland, a razoná: “Mi ta bisa cu mi ta un historiadó. Mi ta duna les den e materia di literatura clásico for dje punto di bista di historia. I mi por sigurá bo cu e evidencia di e bida, morto i resureccion di Cristo ta mas auténtico cu mayoria di e echonan di historia bieu.”

[Mapa/Plachinan na página 8, 9]

(Pa e teksto den su formato kompleto, wak e publikashon)

FENICIA

GALILEA

Riu Jordan

HUDEA

[Plachinan]

“E evidencia di e bida, ta mas auténtico cu mayoria morto i resureccion di Cristo di e echonan di historia bieu.”—PROFESOR E. M. BLAIKLOCK

[Rekonosementu]

Mapanan den fondo: Basá riba derecho di copia dor di Pictorial Archive (Near Eastern History) Est. and Survey of Israel.