Nos Ta e Clase Cu Tin Fe

Edificando Fe na India Mediante Studio di Bijbel

FOR dje cerunan mahestuoso di Himalaya cubrí cu sneu den nort te n’e costanan cayente i húmedo di océano Indio den zuid, India ta un pais di variedad geográfico i religioso. Su poblacion di mas cu un mil miyon hende ta consistí di mas o ménos 83 porciento di hindú, 11 porciento ta moslim i e resto ta consistí principalmente di hende cu ta cristian pa nomber, sikh, budista i jain. Tur hende tin libertad di adoracion. Segun The World Book Encyclopedia: “Religion ta hunga un papel vital den bida di hende na India.”

Bo por describí e mas cu 21.200 Testigonan di Jehova na India como personanan cu ta biba na armonia cu nan fe cristian. Mescos cu nan compañeronan spiritual na otro parti di mundu, e Testigonan na India ta consider’é un privilegio pa yuda nan próhimo edificá un fe fuerte i firme den e Palabra di Dios, Bijbel Santu. (2 Timoteo 3:16, 17) Lesa con un famia na Chennai den zuid di India a conocé berdad bíblico.

Promé cu e famia aki a haña contacto cu Testigonan di Jehova, nan tabata activo den movementunan católico carismático, i a bisa di ta mira vision, papia den lenga i cura hende malu. Nan tabatin un lugá prominente den e iglesia i comunidad, i hende tabata asta yama algun miembro dje famia “swami,” cu ta nificá “señor.” Anto un dia un Testigo a bishitá e famia i a mustra nan for di Bijbel cu Jesus ta e Yu di Dios, i no Dios Todopoderoso manera hende en general ta kere. Tambe e Testigo a mustra nan cu e nomber di Dios ta Jehova, i cu ta Jehova su propósito pa haci e tera un paradijs bunita.—Salmo 83:18; Lucas 23:43; Juan 3:16.

Dor cu nan a respetá e Palabra di Dios i nan a gusta loke nan a tende, miembronan dje famia aki a bai di acuerdo pa aceptá un studio di Bijbel regular cu Testigonan di Jehova. Esaki a pone cu nan conocínan di misa a cuminsá tene mofa di nan. Tog, e famia a keda determiná pa sigui cu nan studio di Bijbel. Segun cu nan conocimentu a aumentá i nan fe a bira mas fuerte, nan a stop cu nan prácticanan religioso falsu. Awe, tres miembro dje famia aki ta Testigo celoso bautisá, i e mama ta sirbi como pionero auxiliar ki ora cu e por.

Fe pa Vence Desabilidad

Sunder Lal, un yoncuman cu ta biba den un pueblo na Punjab, tabatin mester di hopi fe i curashi p’e por a compartí e bon nobo dje Reino di Dios cu otro hende. (Mateo 24:14) Un motibu tabata cu el a bandoná e creencia den hopi dios cu su famia i pueblo tin, p’e adorá e Dios berdadero, Jehova. Un otro motibu ta cu Sunder Lal no tin pia.

Te cu 1992 bida di Sunder Lal tabata un rutina. El a traha como asistent di dokter i a uni cu su famia den adoracion di vários dios bou di guia di un guru cu nan a scoge. Anto un anochi ora e tabata crusa un rail di trein, el a cai. Un trein a pasa riba dje i a kita tur dos su pianan afó te na su bel. Aunke el a keda bibu, su mundu a bini abou. Ta di comprendé cu Sunder Lal a bira profundamente deprimí i cu asta el a pensa di  cometé suicidio. Su famia tabata un apoyo p’e, pero su futuro a mustra sin speransa.

Anto un Testigo di Jehova a bishitá Sunder Lal i a mustr’é for di Bijbel cu Dios a primintí di haci e tera un paradijs placentero i duna salú perfecto na tur esnan cu ta stim’é i tem’é. Sunder Lal a aceptá un studio di Bijbel, i pa un aña largu el a studia diligentemente. El a haña invitacion pa asistí na reunionnan cristian i finalmente el a bai, sintá patras riba baiskel di un amigu. Aunke e careda tabata doloroso, el a ser recompensá grandiosamente. Loke el a siña den su studio di Bijbel personal a ser confirmá ora el a topa otronan cu ègt a kere den e promesanan dje Palabra di Dios i cu a biba na armonia cu siñansanan bíblico.

Sunder Lal a cuminsá compartí e bon nobo cu su próhimo, i el a bautisá na 1995. Na promé instante, el a participá den e ministerio dor di lastra su mes di cas pa cas den su pueblo. Asina e tabata move normalmente. Pero awor e tin un regalo cu su rumannan spiritual a dun’é, esta, un vehículo di tres wiel specialmente modificá cu “pedal” di man. Danki na e vehículo di tres wiel aki, awor e ta mas independiente i e mes por haci e biahe di 12 kilometer p’e asistí n’e reunionnan di congregacion. Tin biaha e ta core den awaceru torencial, i otro biaha e temperatura ta mas cu 43° Celsius.

Ademas di asistí n’e reunionnan, Sunder Lal ta conducí hopi studio di Bijbel cu otro hende cu ta deseá yudansa pa edificá un fe fuerte den e Dios berdadero, Jehova. De facto, shete di su ex-studiantenan di Bijbel ta bautisá awor, mescos cu tres otro persona cu ken el a papia promé, pero cu a studia Bijbel cu otro compañeronan Testigo.

Segun Bijbel, “no ta tur hende tin fe.” (2 Tesalonicensenan 3:2) Pero pa loke ta esnan “corectamente dispuesto pa bida eterno,” un studio regular dje Palabra di Dios por edificá un fe fuerte den nan. (Echonan 13:48) Un studio asina tambe ta haci e wowonan briya cu speransa di un futuro maraviyoso, un speransa cu un cantidad creciente di hende na India ta ehercé fe den dje.

[Mapa na página 30]

(Pa e teksto den su formato kompleto, wak e publikashon)

AFGANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

TAILANDIA

VIETNAM

CAMBODIA

SRI LANKA

INDIA

[Rekonosementu]

Mountain High Maps® Copyright © 1997 Digital Wisdom, Inc.