Presta Atencion na Dios Su Palabra Profetico pa Nos Tempu

“Comprendé, o yu di hende, cu e vision ta pa e tempu di fin.”—DANIEL 8:17.

1. Kico Jehova kier pa henter humanidad sa tocante nos tempu?

JEHOVA no ta tene pa su mes loke e sa ta bai sosodé den futuro. Mas bien, e ta e Revelador di secreto. En realidad e kier pa nos tur sa cu nos ta leu den “e tempu di fin.” Ki un noticia vital esei ta pa e seis mil miyon hendenan cu ta biba riba tera awe!

2. Pakico hende ta preocupá pa futuro di humanidad?

² Acaso ta algu straño cu e mundu aki ta cerca di yega su fin? Hende por cana riba luna, pero na hopi lugá e no por cana sin miedu riba caya dje planeta aki. E por yena un cas cu tur sorto di comodidad moderno, pero e no por para e ola di famianan kibrá. I e por trece e era di informacion, pero e no por siña hende con pa biba na pas cu otro. E fracasonan aki ta apoyá e abundancia di evidencia bíblico cu nos ta bibando den e tempu di fin.

3. Na ki tempu e palabranan “e tempu di fin” a ser usá pa promé bes riba tera?

³ Ta angel Gabriel a usa e palabranan impresionante ei—“e tempu di fin”—pa promé bes un 2.600 aña pasá. Un profeta di Dios tur spantá a tende Gabriel bisa: “Comprendé, o yu di hende, cu e vision ta pa e tempu di fin.”—Daniel 8:17.

Esaki Ta “e Tempu di Fin”!

4. Den ki otro maneranan Bijbel ta referí n’e tempu di fin?

⁴ E expresionnan “e tempu di fin” i “e tempu señalá di fin” ta aparecé seis bes den e buki di Daniel. (Daniel 8:17, 19; 11:35, 40; 12:4, 9) Nan tin di haci cu “e último dianan” cu apostel Pablo a profetisá di dje. (2 Timoteo 3:1-5) Jesucristo a referí n’e periodo aki como su “presencia” como Rey entronisá den shelu.—Mateo 24:37-39.

5, 6. Ken a “bai p’aki i p’aya” durante e tempu di fin, i cu ki resultado?

 ⁵ Daniel 12:4 ta declará: “Pa loke ta abo, o Daniel, haci e palabranan secreto i seya e buki, te cu e tempu di fin. Hopi lo bai p’aki i p’aya, i berdadero conocimentu lo bira abundante.” Pa siglonan, hopi di loke Daniel a skirbi tabata secreto i seyá di manera cu hende no por a comprend’é. Pero kico di awe?

⁶ Den e tempu di fin aki, hopi cristian fiel a “bai p’aki i p’aya” den e páginanan di Bijbel, e Palabra di Dios. Cu ki resultado? Cu Jehova su bendicion riba nan esfuersonan, conocimentu berdadero a bira abundante. Por ehempel, Testigonan di Jehova ungí a ser bendicioná cu perspicacia, cu a yuda nan comprendé cu Jesucristo a bira Rey celestial na aña 1914. Cumpliendo cu e palabranan cu e apostel a skirbi na 2 Pedro 1:19-21, e ungínan ei i nan compañeronan leal ta ‘prestando atencion na e palabra profético’ i nan ta shen porciento sigur cu esaki ta e tempu di fin.

7. Cua ta algun dje relatonan cu ta haci e buki di Daniel único?

⁷ Den hopi manera e buki di Daniel ta único. E ta conta di un rey cu ta menasá di ehecutá su sabionan, pasobra nan no por revelá ni interpretá su soño misterioso, pero Dios su profeta sí ta solucioná e misterio. Ta tira tres homber hóben, cu ta nenga di adorá un imágen haltu, den un fornu extra cayente, i tog nan ta sobrebibí sin niun kimá. Meimei di un fiesta, cientos di persona ta mira un man skirbi palabranan misterioso riba muraya di un palacio. Algun homber malicioso ta conspirá pa laga benta un homber bieu den un cueba di leon, pero e ta sali ileso. Un profeta ta mira cuater bestia den un vision, i un angel ta splik’é nan nificacion profético cu ta extendé te den e tempu di fin.

8, 9. Con e buki di Daniel por beneficiá nos, specialmente awor den e tempu di fin?

⁸ Ta bisto cu e buki di Daniel ta contené dos elemento masha distinto: Unu ta naracion i e otro ta profecia. Tur dos por edificá nos fe. E partinan narativo ta mustra nos cu Jehova Dios ta bendicioná esnan cu ta warda nan integridad na dje. E partinan profético ta edificá fe dor cu nan ta mustra cu Jehova conocé e curso di historia cientos di aña—asta miles di aña—di antemano.

⁹ Vários profecia cu Daniel a skirbi ta dirigí atencion n’e Reino di Dios. Ora nos mira e profecianan ei cumpli, esei ta fortalecé nos fe i tambe nos conviccion di cu nos ta bibando den e tempu di fin. Pero algun crítico ta atacá Daniel. Nan ta bisa cu e profecianan den e buki cu ta carga su nomber en realidad tabata skirbí despues dje sucesonan cu ta parce di cumpli cu nan. Si e pretensionnan ei ta berdad, esei lo lanta duda serio tocante loke e buki di Daniel a pronosticá relacioná cu e tempu di fin. Tambe hende sképtico ta cuestioná e naracionnan den e buki. P’esei laga nos investigá.

Dilanti Tribunal!

10. Den ki sentido e buki di Daniel ta dilanti tribunal?

¹⁰ Imaginá bo sintá den un tribunal pa presenciá un caso. Fiscal ta insistí cu e acusado ta culpabel di fraude. Wel, e buki di Daniel ta presentá su mes como historia auténtico skirbí dor di un profeta hebreo cu a biba durante siglonan 7 i 6 P.E.C. Pero críticonan ta para riba cu e buki ta un fraude. Pues laga nos wak promé si e parti narativo dje buki ta armonisá cu echo histórico.

11, 12. Kico a para dje acusacion cu Bélsasar tabata djis un personahe ficticio?

¹¹ Laga nos considerá loke nos por yama e caso dje monarca cu tabata falta. Daniel capítulo 5 ta mustra cu Bélsasar tabata goberná como rey na Babilonia ora a conkistá e stad ei na aña 539 P.E.C. Críticonan a atacá e punto aki, ya cu no por a haña e nomber di Bélsasar ningun otro caminda fuera di den Bijbel. Na su lugá, historiadónan di antigwedad a señalá Nabonido como e último rey babilonio.

¹² Sin embargo, na aña 1854 nan a saca algun cilinder chikitu di klei for dje ruinanan  na Ur, un antiguo stad babilónico, caminda awor ta Irak. E documentonan aki skirbí cu spijkerschrift, tabata contené un oracion caminda rey Nabonido a referí na “Bel-sar-ussur, mi yu mayó.” Asta críticonan tabatin cu admití: Esaki tabata e Bélsasar dje buki di Daniel. Pues e monarca cu tabata falta, tabat’ei masha bon, pero ta fuentenan seglar no tabata sa di dje ainda. Esaki ta solamente un dje hopi pruebanan cu e skirbimentunan di Daniel ta berdaderamente auténtico. E evidencia ei ta mustra cu e buki di Daniel sigur ta parti di Dios su Palabra cu ta merecé nos sumo atencion awor aki, den e tempu di fin.

13, 14. Ken Nabucodonosor tabata, i na cua dios falsu e tabata masha deboto?

¹³ Un parti integral dje buki di Daniel ta profecianan cu tin di haber cu e marcha di potencianan mundial i e actonan di algun di nan gobernantenan. Un dje gobernantenan aki nos por yama e guerero cu a construí un imperio. Como Babilonia su príncipe heredero, e i su ehército a destrosá e ehército di Neko, e fárao egipcio, na Carkemis. Pero un mensahe a obligá e príncipe victorioso di Babilonia pa laga su generalnan finalisá e conkista. Ora e hóben Nabucodonosor a haña sa cu su tata, Nabopolasar, a muri, el a subi trono na aña 624 P.E.C. Durante su reinado di 43 aña, el a construí un imperio cu a abarcá teritorionan cu un tempu Asiria a ocupá, i el a extendé su dominio te den Siria i Palestina i te abou n’e frontera di Egipto.

¹⁴ Nabucodonosor tabata un deboto foral di Marduk, e dios principal di Babilonia. E rey a duna Marduk e mérito pa tur su conkistanan. Na Babilonia, Nabucodonosor a construí i a embeyecé e tempelnan di Marduk i di masha hopi otro dios babilónico. Podisé e imágen di oro cu e rey babilonio aki a traha riba e yanura di Dura tabata dedicá na Marduk. (Daniel 3:1, 2) I ta parce cu Nabucodonosor a dependé pisá riba divinacion ora di planea su estrategianan militar.

15, 16. Kico Nabucodonosor a haci pa Babilonia, i kico a sosodé ora el a broma tocante grandesa dje stad?

¹⁵ Dor di completá Babilonia su murayanan dòbel masivo cu su tata a cuminsá construí, Nabucodonosor a haci e stad capital aparentemente invencibel. Nan ta bisa cu pa satisfacé su reina di Media, kende tabatin nostalgia pa e ceru i selvanan di su patria, Nabucodonosor a traha e hardinnan cologante, catalogá como un dje shete maraviyanan dje mundu antiguo. El a haci Babilonia e stad cerá cu muraya, mas grandi dje tempu ei. I esta orguyoso e tabata dje sede di adoracion falsu ei!

¹⁶ Riba un dia, Nabucodonosor a broma: “No ta Babilonia e Grandi esaki ta, cu mi mes a construí?” Pero segun Daniel 4:30 pa 36, “miéntras cu e palabra ainda tabata den boca di rey,” locura a dal e. Incapas pa goberná pa shete aña, el a come vegetacion, net manera Daniel a profetisá. Despues el a ricibí su reino bek. Abo sa kico ta e nificacion profético di tur esaki? Bo por splica con su cumplimentu principal ta hiba nos te na e tempu di fin?

Diferente Profecia

17. Con lo bo describí e soño profético cu Dios a duna Nabucodonosor den e di dos aña di su reinado como gobernante di mundu?

¹⁷ Laga nos trata awor algun profecia for dje buki di Daniel. Durante e di dos aña dje reinado di Nabucodonosor como gobernante di mundu di profecia di Bijbel (606 pa 605 P.E.C.), Dios a dun’é un soño spantoso.  Segun Daniel capítulo 2, e soño tabata tocante un imágen inmenso cu un cabes di oro, pechu i brasanan di plata, barica i belnan di koper, pal’i pianan di heru i pianan di heru mesclá cu klei. Kico e vários partinan dje imágen a representá?

18. Kico e cabes di oro, e pechu i brasanan di plata, e barica i belnan di koper dje imágen dje soño a representá?

¹⁸ E profeta di Dios a bisa Nabucodonosor: “Abo, o rey, . . . abo mes ta e cabes di oro.” (Daniel 2:37, 38) Nabucodonosor a encabesá un dinastia cu a goberná riba e Imperio Babilónico. Medo-Persia, representá dor dje imágen su pechu i brasanan di plata, a conkistá Babilonia. Despues a bini e Imperio Griego, representá dor dje barica i belnan di koper. Con e potencia mundial ei a cuminsá?

19, 20. Ken Alexander e Grandi tabata, i ki papel el a hunga den haci Grecia un potencia mundial?

¹⁹ Den siglo 4 P.E.C., un homber hóben a hunga un papel importante den e cumplimentu di Daniel su profecia. El a nace na aña 356 P.E.C., i despues mundu a yam’é Alexander e Grandi. Ora nan a asesiná su tata, Filipo, na aña 336 P.E.C., Alexander a heredá e trono di Macedonia na edad di 20 aña.

²⁰ Na cuminsamentu di mei di aña 334 P.E.C., Alexander a sali riba un campaña di conkista. E tabatin un ehército chikitu pero eficiente di 30.000 soldá na pia i 5.000 riba cabai. E mésun aña ei, na riu Gránico den nortwest di Asia Menor (awor Turkia), Alexander a gana su promé bataya contra e personan na aña 334 P.E.C. Pa aña 326 P.E.C., e conkistadó implacabel aki a dominá e personan i a bai oost te na riu Indo, cu ta situá den Pakistan djawe. Pero Alexander a perde su bataya final ora e tabata na Babilonia. Dia 13 di juni 323 P.E.C., na edad di solamente 32 aña i 8 luna, Alexander a capitulá n’e enemigu di mas grandi, morto. (1 Corintionan 15:55) Pero dor di su conkistanan, Grecia a bira un potencia mundial, manera e profecia di Daniel a pronosticá.

21. Ademas dje Imperio Romano, ki otro potencia mundial e pal’i pianan di heru dje imágen dje soño a representá?

²¹ Kico e pal’i pianan di heru dje imágen a representá? Wel, tabata Roma cu mescos cu heru a aplastá i destrosá e Imperio Griego. E romanonan a mustra un falta di respet p’e Reino di Dios cu Jesucristo a proclamá dor di laga mata Jesus riba un staca di tormento na aña 33 E.C. Den un intento pa destrosá cristianismo berdadero, Roma a persiguí e disipelnan di Jesus. Sin embargo, e pal’i pianan di heru dje soño di Nabucodonosor no a representá e Imperio Romano so, sino tambe e formacionnan político cu a sali for di dje: e Potencia Mundial Anglo-Americano.

22. Con e imágen dje soño ta yuda nos mira cu nos ta leu den e tempu di fin?

²² Un estudio cuidadoso ta demostrá cu nos ta leu den e tempu di fin, pasobra nos a alcansá e pia di heru mesclá cu klei dje imágen di e soño. Algun gobiernu djawe ta duru manera heru, esta autoritario, miéntras cu otronan ta manera klei. Apesar dje naturalesa frágil di klei, for di cua e “desendencia di hende” ta trahá, gobernacionnan duru manera heru a haña nan obligá na duna hende comun algun participacion den e gobiernunan cu ta manda riba nan. (Daniel 2:43; Job 10:9) Claro cu mescos cu heru i klei no ta pega na otro, asina mando autoritario i hende comun tampoco no ta uni cu otro. Pero pronto e Reino di Dios lo pone fin n’e mundu políticamente dividí aki.—Daniel 2:44.

23. Con lo bo describí e soño i visionnan cu Daniel a haña den e promé aña dje reinado di Bélsasar?

²³ Capítulo 7 di Daniel su profecia fasinante tambe ta hiba nos na e tempu di fin. E ta relatá un suceso den e promé aña dje rey babilonio Bélsasar. Daniel, p’e tempu ei den su 70 i picu aña, ta haña “un soño i visionnan di su cabes riba su cama.” E visionnan ei sí ta spant’é! “Ata!” e ta sclama. “E cuater bientunan di shelu tabata agitá e laman ganchu. I cuater bestia enorme a sali for di laman, cada un distinto for dje otronan.” (Daniel 7:1-8, 15) E bestianan  aki sí ta impresionante! E promé ta un leon cu ala i e di dos ta manera un oso. Caba ta bini un leopardo cu cuater hala i cuater cabes! E di cuater bestia extraordinariamente fuerte tin djente grandi di heru i dies cachu. Meimei di su dies cachunan ta sali un cachu “chikitu” cu tin “wowo manera wowo di hende” i “un boca [cu] ta papia cosnan grandioso.” Esta poco bestia horibel!

24. Segun Daniel 7:9-14, kico Daniel ta contemplá den shelu, i na kico e vision aki ta señalá?

²⁴ Awor Daniel su visionnan ta bira pa shelu. (Daniel 7:9-14) E ta mira “e Anciano di Dianan,” Jehova Dios, sintá riba su trono glorioso como Hues. ‘Mil di miles ta sirbié, i dies mil bes dies mil ta sigui para su dilanti.’ Dios ta dicta huicio desfaborabel contra e bestianan i ta kita gobernacion for di nan i ta destruí e di cuater bestia. Ta otorgá gobernacion duradero riba “pueblo, grupo nacional i idioma” na “un persona parecido na yu di hende.” Esaki ta señalá na e tempu di fin i na e entronisacion dje Yu di hende, Jesucristo, na aña 1914.

25, 26. Ki preguntanan por lanta ora nos lesa e buki di Daniel, i cua publicacion por yuda contestá nan?

²⁵ Ken cu lesa e buki di Daniel sigur lo tin vários pregunta. Por ehempel: Kico e cuater bestianan di Daniel capítulo 7 ta representá? Kico ta e splicacion dje ‘setenta simannan’ profético di Daniel 9:24-27? Kico di Daniel capítulo 11 i dje conflicto profético entre “e rey di nort” i “e rey di zuid?” Kico nos por verwagt dje reynan aki den e tempu di fin?

²⁶ Jehova a duna comprendimentu penetrante den e asuntunan ei na su sirbidónan ungí riba tera, “e santunan dje Supremo” manera Daniel 7:18 ta yama nan. Ademas, “e esclabo fiel i discreto” a haci percuracion pa nos haña mas comprendimentu penetrante den e skirbimentunan inspirá di profeta Daniel. (Mateo 24:45) Esaki ta disponibel awor mediante e presentacion recien dje buki Presta Atencion na e Profecia di Daniel! E publicacion aki di 320 página, yen di plachi bunita, ta trata delaster un parti dje buki di Daniel. E ta trata cada profecia cu ta fortificá fe i tambe tur naracion cu e kerido profeta Daniel a skirbi.

Berdadero Nificacion pa Nos Tempu

27, 28. (a) Te na ki grado e profecianan den e buki di Daniel a cumpli? (b) Den ki periodo nos ta bibando, i kico nos mester haci?

²⁷ Pensa un ratu riba e punto importante aki: Cu excepcion di un par di detaye, tur e profecianan den e buki di Daniel a cumpli. Por ehempel, ya caba nos ta mira e situacion mundial cu e pianan dje imágen dje soño di Daniel capítulo 2 a representá. Na aña 1914 a kita e banchi dje troncon dje palu di Daniel capítulo 4, cu entronisacion dje Rey Mesiánico, Jesucristo. Sí, manera Daniel capítulo 7 a pronosticá, e ora ei e Anciano di Dianan a duna gobernacion na e Yu di hende.—Daniel 7:13, 14; Mateo 16:27–17:9.

²⁸ E 2.300 dianan di Daniel capítulo 8 i tambe e 1.290 dianan i e 1.335 dianan di capítulo 12, tur a pasa caba—nan ta nos tras den e coriente di tempu. Ora nos studia Daniel capítulo 11, nos ta mira cu e conflicto entre “e rey di nort” i “e rey di zuid” a yega su etapanan final. Tur esaki ta duna mas evidencia bíblico cu awor nos ta leu den e tempu di fin. Considerando nos lugá único den e coriente di tempu, kico nos mester ta determiná pa haci? Sin duda, nos mester presta atencion na Jehova Dios su palabra profético.

Con Lo Bo Contestá?

• Kico Dios kier pa henter humanidad sa tocante nos tempu?

• Con e buki di Daniel por edificá nos fe?

• Ki rasgonan e imágen dje soño di Nabucodonosor tabatin, i kico esakinan a simbolisá?

• Kico ta notabel tocante e cumplimentu di profecianan hañá den e buki di Daniel?

[Preguntanan di Estudio]