Tene Fe den Dios Su Palabra Profetico!

“Nos tin e palabra profético hací mas sigur.”—2 PEDRO 1:19.

1, 2. Cua tabata e promé profecia cu a yega di ser skirbí, i cua tabata un dje preguntanan cu el a lanta?

JEHOVA tabata e Fuente di e promé profecia cu a yega di ser skirbí. Despues cu Adam i Eva a peca, Dios a bisa e colebra: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” (Génesis 3:1-7, 14, 15) Siglonan lo a pasa promé cu hende a comprendé e palabranan profético ei plenamente.

² E promé profecia ei a contené berdadero speransa pa humanidad pecaminoso. Mas despues e Scritura a identificá Satanas e Diabel como “e colebra original.” (Revelacion 12:9) Pero ken lo tabata Dios su Simia primintí?

En Busca dje Simia

3. Con Abel a ehercé fe den e promé profecia?

³ Distinto di su tata, e deboto Abel sí a ehercé fe den e promé profecia. Ta bisto cu Abel a realisá cu lo mester a drama sanger pa cubri picá. P’esei fe a impuls’é pa ofrecé un sacrificio di animal cu a cai na agrado di Dios. (Génesis 4:2-4) Ma e identidad dje Simia primintí a keda un misterio.

4. Ki promesa Dios a duna Abraham, i kico esaki a indicá relacioná cu e Simia primintí?

⁴ Rond di 2.000 aña despues dje tempu di Abel, Jehova a duna e patriarca Abraham e promesa profético aki: “Siguramente lo mi bendicioná bo i lo mi siguramente multiplicá bo simia manera e streanan di shelu . . . I pa medio di bo simia tur nacion di tera sigur lo bendicioná nan mes.” (Génesis 22:17, 18) E palabranan ei a conectá Abraham cu e cumplimentu dje promé profecia. Nan a indicá cu e Simia mediante ken lo a caba cu Satanas su obranan, lo a presentá den Abraham su liña di desendencia. (1 Juan 3:8) “Debí n’e promesa di Dios, [Abraham] no a vacilá den un falta di fe,” ni tampoco e otro testigonan di Jehova pre-cristian cu “no a obtené cumplimentu dje promesa.” (Romanonan 4:20, 21; Hebreonan 11:39) Mas bien, nan a mantené fe den Dios su palabra profético.

5. Den ken Dios su promesa dje Simia a cumpli, i pakico bo ta contestá asina?

⁵ Apostel Pablo a identificá Dios su Simia primintí ora el a skirbi: “E promesanan a ser papiá na Abraham i na su simia. E no ta bisa: ‘I na simianan,’ manera den e caso di hopi di eseinan, sino manera den e caso di un so: ‘I na bo simia,’ cu ta Cristo.” (Galationan 3:16) E Simia mediante ken e nacionnan mester a bendicioná nan mes no a incluí tur desendiente di Abraham. Dios no a usa desendiente  di Abraham su yu Ismael i di su yunan cu Ketura pa bendicioná humanidad. E Simia di bendicion a bini mediante su yu Isaac i su nietu Jacob. (Génesis 21:12; 25:23, 31-34; 27:18-29, 37; 28:14) Jacob a mustra cu “pueblonan” lo tabata obediente na Silo dje tribu di Huda, pero despues e Simia a keda limitá n’e liña di desendencia di David. (Génesis 49:10; 2 Samuel 7:12-16) E hudiunan di promé siglo a spera pa un persona bini como e Mesías, of Cristo. (Juan 7:41, 42) I e profecia di Dios dje Simia a cumpli den su Yu, Jesucristo.

E Mesías Ta Presentá!

6. (a) Con nos tin cu comprendé e profecia dje setenta simannan? (b) Na ki tempu i con Jesus a “caba cu picá”?

⁶ Profeta Daniel a skirbi un profecia Mesiánico importante. Den e promé aña di Dario e medo, el a realisá cu Jerusalem su desolacion di 70 aña tabata yegando su fin. (Jeremías 29:10; Daniel 9:1-4) Daniel tabata haciendo oracion ora angel Gabriel a bini i a revelá cu ‘a determiná setenta siman pa caba cu picá.’ E Mesías lo a ser cortá meimei di e di setenta siman. “Setenta siman di aña” a cuminsá na aña 455 P.E.C., ora e rey perso Artahérhes I ‘a saca e palabra pa reconstruí Jerusalem.’ (Daniel 9:20-27; Moffatt; Nehemías 2:1-8) E Mesías lo a bini despues di 7 siman plus 62 siman. E 483 añanan aki a core for di aña 455 P.E.C. pa 29 E.C., ora Jesus a ser bautisá i Dios a ungié como e Mesías, of Cristo. (Lucas 3:21, 22) Jesus ‘a caba cu picá’ dor di duna su bida como un rescate na aña 33 E.C. (Marco 10:45) Ki un motibu sólido pa pone fe den Dios su palabra profético! *

7. Usando e Scritura, mustra con Jesus a cumpli cu profecia Mesiánico.

⁷ Fe den Dios su palabra profético ta permití nos identificá e Mesías. Dje hopi profecianan Mesiánico registrá den e Scritura Hebreo, escritornan dje Scritura Griego Cristian a aplicá basta di nan directamente na Jesus. Por ehempel: Jesus a nace di un bírgen na Betlehem. (Isaías 7:14; Mikéas 5:2; Mateo 1:18-23; Lucas 2:4-11) A yam’é for di Egipto, i a mata babynan despues di su nacementu. (Jeremías 31:15; Oséas 11:1; Mateo 2:13-18) Jesus a carga nos enfermedadnan. (Isaías 53:4; Mateo 8:16, 17) Manera a ser profetisá, el a drenta Jerusalem riba un yu di buricu. (Zacarías 9:9; Juan 12:12-15) E palabranan dje salmista a cumpli despues cu a claba Jesus na staca ora e soldánan a parti su bistí den nan cu nan i a lot su paña interior. (Salmo 22:18; Juan 19:23, 24) E echo cu no a kibra Jesus su wesunan i cu a hink’é cu lansa tambe a cumpli cu profecia. (Salmo 34:20; Zacarías 12:10; Juan 19:33-37) Esakinan ta djis un par di ehempel di profecia Mesiánico cu escritornan bíblico inspirá pa Dios a aplicá na Jesus. *

Aclamá e Rey Mesiánico!

8. Ken ta e Anciano di Dianan, i con e profecia registrá na Daniel 7:9-14 a cumpli?

⁸ Den e promé aña dje rey babilonio Bélsasar, Jehova a duna su profeta Daniel un soño i visionnan remarcabel. Promé, e profeta a mira cuater bestia enorme. E angel di Dios a identificá nan como “cuater rey,” indicando asina cu nan a simbolisá potencianan mundial sucesivo. (Daniel 7:1-8, 17) Despues Daniel a contemplá Jehova, “e Anciano di Dianan,” sintá riba su trono glorioso. El a dicta un huicio desfaborabel riba e bestianan i a kita gobernacion for di nan i a destruí e di cuater bestia. Anto el a otorgá gobernacion duradero riba “pueblo, grupo nacional i idioma” na “un persona parecido na yu di hende.” (Daniel 7:9-14) Ki un profecia maraviyoso relacioná cu e entronisacion di “e Yu di hende,” Jesucristo, den shelu na aña 1914!—Mateo 16:13.

9, 10. (a) Na kico e vários partinan dje imágen dje soño a señalá? (b) Con abo lo splica e cumplimentu di Daniel 2:44?

 ⁹ Daniel tabata sa cu ta Dios ta ‘eliminá rey i pone rey.’ (Daniel 2:21) Cu fe den Jehova, e “Revelador di secreto,” e profeta a revelá e nificacion dje soño di un imágen inmenso cu e rey di Babilonia, Nabucodonosor, a haña. Su vários partinan a señalá n’e lantamentu i caida di potencianan mundial manera Babilonia, Medo-Persia, Grecia i Roma. Tambe Dios a usa Daniel pa describí sucesonan mundial te den nos tempu i mas aleu.—Daniel 2:24-30.

¹⁰ “Den e dianan dje reynan ei,” segun e profecia, “e Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní.” (Daniel 2:44) Ora “e tempu señalá dje nacionnan” a terminá na 1914, Dios a establecé e Reino celestial bou di Cristo. (Lucas 21:24; Revelacion 12:1-5) E ora ei, pa medio di poder divino e piedra dje Reino Mesiánico a ser cortá for dje “ceru” di Dios su soberania universal. Na Armagedon e piedra ei lo dal e imágen i garn’é na puiru. Como un ceru gubernamental cu lo tin un efecto riba “henter e tera,” e Reino Mesiánico lo existí pa semper.—Daniel 2:35, 45; Revelacion 16:14, 16. *

11. Jesus su transfiguracion tabata un bistaso adelantá di kico, i ki impacto e vision ei tabatin riba Pedro?

¹¹ Cu su gobernacion di Reino na mente, Jesus a bisa su disipelnan: “Tin algun di esnan cu ta pará aki cu lo no purba morto di ningun manera te cu promé nan mira e Yu di hende bini den su reino.” (Mateo 16:28) Seis dia despues, Jesus a hiba Pedro, Santiago i Juan na un ceru haltu caminda el a transfigurá dilanti nan. Miéntras un nubia briyante a tapa e apostelnan, Dios a declará: “Esaki ta mi Yu, esun stimá, cu mi a aprobá; scuch’é.” (Mateo 17:1-9; Marco 9:1-9) Ki un bistaso adelantá di Cristo su gloria den Reino! Nada straño cu Pedro a referí n’e vision impresionante ei i a bisa: “P’e motibu ei nos tin e palabra profético hací mas sigur.”—2 Pedro 1:16-19. *

12. Pakico awor aki specialmente ta e tempu pa demostrá nos fe den Dios su palabra profético?

¹² Aparentemente “e palabra profético” ta encerá no solamente profecianan dje Scritura Hebreo tocante e Mesías sino tambe Jesus su declaracion cu lo e bini “cu poder i gran gloria.” (Mateo 24:30) E transfiguracion a verificá e palabra profético tocante Cristo su glorioso binida den poder di Reino. Masha pronto, su revelacion den gloria lo nificá destruccion pa esnan sin fe i bendicion pa esnan cu ta ehercé fe. (2 Tesalonicensenan 1:6-10) Cumplimentu di profecia di Bijbel ta proba cu awor aki nos ta den “e último dianan.” (2 Timoteo 3:1-5, 16, 17; Mateo 24:3-14) Como Jehova su Ehecutor Principal, Miguel, cu ta Jesucristo, ta para cla pa pone fin n’e mal sistema di cosnan aki durante e “tribulacion grandi.” (Mateo 24:21; Daniel 12:1) Esaki anto sigur ta e tempu pa demostrá cu nos tin fe den Dios su palabra profético.

Mantené Fe den Dios Su Palabra Profético

13. Kico por yuda nos mantené nos amor pa Dios i tene nos fe bibu den su palabra?

¹³ Nos sigur a yena di emocion ora nos a siña pa promé bes tocante cumplimentunan di Dios su palabra profético. Pero nos fe a mengua i nos amor a fria desde e tempu ei? Laga nos nunca bira manera e cristiannan na Efeso cu a ‘bandoná e amor cu nan tabatin na principio.’ (Revelacion 2:1-4) Sin importá cuantu aña nos a sirbi Jehova, nos por perde e amor ei, a ménos cu nos ‘sigui busca promé e reino di Dios i su husticia’ pa asina acumulá tesoro den shelu. (Mateo 6:19-21, 31-33)  Studio diligente di Bijbel, participacion regular den reunion cristian i actividad celoso di predicá e Reino lo yuda nos mantené nos amor pa Jehova, pa su Yu i p’e Scritura. (Salmo 119:105; Marco 13:10; Hebreonan 10:24, 25) En buelta, esaki lo tene nos fe bibu den Dios su palabra.—Salmo 106:12.

14. Den ki manera cristiannan ungí ta ser recompensá pa nan fe den Jehova su palabra profético?

¹⁴ Mescos cu Dios su palabra profético a cumpli den pasado, asina nos por tin fe den loke e ta predicí pa futuro. Por ehempel, Cristo su presencia den gloria di Reino ta un realidad awor, i cristiannan ungí cu tabata fiel te na morto a experimentá e cumplimentu dje promesa profético: “Na esun cu ta vence lo mi permití come dje palu di bida, cu ta den e paradijs di Dios.” (Revelacion 2:7, 10; 1 Tesalonicensenan 4:14-17) Jesus ta otorgá e cristiannan victorioso aki e privilegio di “come dje palu di bida” den e “paradijs [celestial] di Dios.” Na momento di nan resureccion i pa medio di Jesucristo, Jehova, “e Rey di eternidad, incoruptibel, invisibel, e único Dios,” ta otorgá nan inmortalidad i incorupcion. (1 Timoteo 1:17; 1 Corintionan 15:50-54; 2 Timoteo 1:10) Ki un recompensa magnífico pa nan amor eterno pa Dios i nan fe insagudibel den su palabra profético!

15. Den ken Dios a pone e fundeshi dje “tera nobo,” i ken ta nan socionan?

¹⁵ Djis despues cu Dios a resucitá e ungínan fiel cu a muri pa bida den e “paradijs” celestial, el a libra e resto di Israel spiritual riba tera for di “Babilonia e Grandi,” e imperio mundial di religion falsu. (Revelacion 14:8; Galationan 6:16) Den nan el a pone e fundeshi pa e “tera nobo.” (Revelacion 21:1) Asina Dios a producí “un tera,” i a desaroy’é den un paradijs spiritual cu ta florecé rond mundu awe. (Isaías 66:8) Multitud di socio di Israel spiritual semehante na carné ta basha bini den dje awor aki, “den e parti final dje dianan.”—Isaías 2:2-4; Zacarías 8:23; Juan 10:16; Revelacion 7:9.

Futuro di Humanidad Predicí den Dios Su Palabra Profético

16. Kico ta warda esnan cu ta apoyá e ungínan lealmente?

¹⁶ Kico ta warda esnan cu ta apoyá e ungínan  lealmente? Nan tambe tin fe den Dios su palabra profético, i nan speransa ta pa drenta e Paradijs terenal. (Lucas 23:39-43) Ei nan lo bebe for di “un riu di awa di bida” cu ta sostené bida i nan lo haña curacion for di “e blachinan dje palunan” plantá cantu di dje. (Revelacion 22:1, 2) Si abo tin un speransa maraviyoso asina, sigui demostrá amor profundo pa Jehova i fe den su palabra profético. Mare bo por ta entre esnan cu ta experimentá e goso sin límite di bida eterno den e Paradijs riba tera.

17. Ki bendicion bida den e Paradijs terenal lo encerá?

¹⁷ Hende imperfecto no ta capas pa describí bida en detaye den e binidero Paradijs terenal, pero Dios su palabra profético ta duna nos comprendimentu penetrante den e bendicionnan cu tin wardá pa humanidad obediente. Ora Dios su Reino ta goberná sin oposicion i su boluntad ta sosodé riba tera mescos cu den shelu, ningun hende feros—no, ni sikiera animal—lo ‘haci daño ni causa ruina.’ (Isaías 11:9; Mateo 6:9, 10) E mansunan lo habitá e tera, i “berdaderamente nan lo haña nan deleite exkisito den e abundancia di pas.” (Salmo 37:11) Lo no tin masa di hende ta muri di hamber, pasobra “lo yega di tin abundancia di grano riba tera; riba top dje cerunan lo tin sobreabundancia.” (Salmo 72:16) Hende lo no drama lágrima di tristesa mas. Enfermedad lo disparcé, ni morto lo no existí mas. (Isaías 33:24; Revelacion 21:4) Imaginá bo—un mundu sin dokter, sin remedi, sin hospital, sin instituto pa cuido mental, sin entiero. Esta un prospecto estupendo!

18. (a) Di kico Daniel a haña siguransa? (b) Kico lo ta Daniel su “porcion”?

¹⁸ Asta graf comun di humanidad lo bira bashí segun cu e mortonan ta resucitá. E homber hustu Job tabatin un speransa asina. (Job 14:14, 15) Profeta Daniel tambe, pasobra e angel di Jehova a dun’é e siguransa consolador: “Pa loke ta abo mes, bai den direccion dje fin; i lo bo sosegá, pero lo bo lanta para pa bo porcion na fin dje dianan.” (Daniel 12:13) Daniel a sirbi Dios fielmente te na fin di su bida. Awor e ta sosegando den morto, pero lo e “lanta para” den “e resureccion dje hustunan” durante Cristo su Reinado di Mil Aña. (Lucas 14:14) I kico lo ta e “porcion” di Daniel? Wel, den su cumplimentu paradísico, Ezekiel su profecia ta indicá cu tur sirbidó di Jehova lo haña un lugá, i cu e tera lo ser partí na un manera hustu i ordená. (Ezekiel 47:13–48:35) Pues Daniel lo haña un lugá den Paradijs, pero su porcion lo ta mas cu un pida tereno so. Esei lo encerá su lugá den Jehova su propósito.

19. Kico ta e rekisito pa gana bida den e Paradijs terenal?

¹⁹ Kico di abo i bo porcion? Si bo tin fe den Bijbel, e Palabra di Dios, muy probablemente bo ta anhelá pa biba den e Paradijs terenal. Bo por asta imaginá bo mes ei, disfrutando di su hopi bendicionnan, cuidando e tera i ricibiendo gososamente esnan cu ta bini bek for di morto. Al fin i al cabo, ta den Paradijs humanidad mester ta. Dios a crea e promé pareha humano pa biba den un lugá asina. (Génesis 2:7-9) I e kier pa hende obediente biba pa semper den Paradijs. Lo bo actua na armonia cu e Scritura pa bo por ta entre e miles di miyones di hendenan cu un dia lo biba den e Paradijs riba tera? Bo por ta einan si bo tin berdadero amor pa nos Tata celestial, Jehova, i fe duradero den Dios su palabra profético.

[Nota]

Con Lo Bo Contestá?

• Cua tabata e promé profecia, i ken tabata e Simia primintí?

• Cua tabata algun profecia Mesiánico cu a cumpli den Jesus?

• Con Daniel 2:44 i 45 lo cumpli?

• Na ki futuro Dios su palabra profético ta señalá pa humanidad obediente?

[Preguntanan di Estudio]

[Plachi na página 18]

Abo ta anhelá pa biba den e Paradijs terenal?