Un Palu di Olijfi Yen di Blachi den e Cas di Dios

DEN e pais di Israel ta crece un palu cu ta prácticamente indestructibel. Asta ora kap e, no ta dura mashá cu su rais ta bolbe saca spruit nobo. I ora cosechá su frutanan, e doño ta ser recompensá cu abundancia di zeta cu por usa pa cushiná, pa cende lus, pa higiena i cosmética.

Segun un comparacion registrá den e buki bíblico di Huesnan, “tabatin un biaha cu e palunan a bai pa ungi un rey riba nan.” Cua palu di mondi nan a scoge promé? Nada ménos cu e palu di olijfi resistente i fructífero.—Huesnan 9:8.

Mas cu 3.500 aña pasá, profeta Moises a describí Israel como un ‘bon tera , un tera di olijfi.’ (Deuteronomio 8:7, 8) Asta awe, tin hofinan di olijfi plamá rond e paisahe, for di pia di ceru Hermon den nort te na rand di Beer-seba den zuid. Ainda nan ta dorna e yanura costero di Saron, e baricanan di ceru yen di baranca di Samaria i e vayenan fértil di Galilea.

Hopi bes escritornan bíblico a usa e palu di olijfi den un sentido figurativo. Rasgonan dje palu aki a sirbi pa ilustrá Dios su misericordia, e promesa di resureccion i bida di famia felis. Un bista mas djacerca dje palu di olijfi lo yuda nos comprendé e referencianan bíblico aki i lo yuda profundisá nos aprecio pa e palu único aki cu ta djoin e resto dje creacion den duna alabansa na su Formador.—Salmo 148:7, 9.

E Palu di Olijfi Resistente

Na promé bista, un palu di olijfi no ta particularmente impresionante. E no ta yega te den shelu manera algun palu di seda mahestuoso di Líbanon. Su palu no ta asina gustá manera esun di pino, i su flornan no ta un bunita bista manera esnan di palu di amandel. (Cantica di Sálomon 1:17; Amos 2:9) E parti mas importante dje palu di olijfi ta invisibel, bou di tera. Su raisnan extenso, cu por bai te 6 meter bou di superficie i hopi mas leu horizontalmente, ta e clave p’e fertilidad dje palu i su sobrebibencia.

E raisnan ei ta pone cu palu di olijfi na barica di ceru yen di piedra ta sobrebibí un secura, miéntras cu palunan den e vaye abou ya caba a muri debí na falta di awa. E raisnan ta permitié sigui producí olijfi pa siglonan, asta ora e stam tur trocí por parce cu ta pa carbon so e ta sirbi. Tur loke e palu resistente aki mester  ta lugá pa crece i tera cu ventilacion p’e por hala rosea, e tera mester ta liber di mal yerba of otro vegetacion cu lo por ta lugá di biba pa pest perhudicial. Si cumpli cu e simpel rekisitonan aki, un palu lo producí te cu 57 liter di zeta pa aña.

Sin duda e israelitanan tabata stima olijfi mashá pa motibu di su zeta precioso. Lampinan cu mecha den zeta di olijfi a iluminá nan cas. (Levítico 24:2) Zeta di olijfi tabata esencial pa cushiná. El a protehá cueru contra solo, i a percurá habon pa e israelitanan por a laba cos. Grano, biña i olijfi tabata e cultivonan principal dje pais. Pues si un cosecha di olijfi a fracasá, esei a nificá desaster pa un famia israelita.—Deuteronomio 7:13; Habacuc 3:17.

Pero, por lo general tabatin zeta di olijfi na abundancia. Probablemente Moises a referí n’e Tera Primintí como ‘un tera di olijfi’ pasobra olijfi tabata e palu mas comun cu nan a cultivá den e área ei. H. B. Tristram, naturalista di siglo 19, a describí olijfi como “e palu típico dje pais.” Debí na su balor i abundancia, zeta di olijfi asta a sirbi como un medio di transaccion internacional den tur e region Mediteráneo. Jesucristo mes a referí na un debe cu a ser calculá na “shen midí di bato di zeta di olijfi.”—Lucas 16:5, 6.

“Manera Stèknan di Palu di Olijfi”

E palu di olijfi útil ta bon pa ilustrá bendicion divino. Con un homber temeroso di Dios lo a ser recompensá? “Bo esposa lo ta manera un mata di druif cu ta producí fruta den e parti mas interior di bo cas,” e salmista a canta. “Bo yu hombernan lo ta manera stèknan di palu di olijfi tur rond di bo mesa.” (Salmo 128:3) Kico e “stèknan di palu di olijfi” aki ta, i di con e salmista ta compará nan cu yu homber?

Algu extraordinario cerca palu di olijfi ta, cu constant tin spruit nobo ta sali na pia dje stam. * Ora cu pa motibu di behes, e stam principal no ta duna fruta mas manera ántes, cultivadónan lo por permití vários stek, of spruit nobo, crece te cu nan ta bira un parti integral dje palu. Despues di tempu, e palu original lo tin tres of cuater stam yong i vigoroso rond di dje, manera yunan rondó di un mesa. E stèknan aki ta bini di mésun rais, i nan ta participá den producí un bon cosecha di olijfi.

E rasgo aki dje palu di olijfi ta ilustrá aptamente con yu homber i yu muhernan por crece firme den fe, danki n’e raisnan spiritual fuerte di nan mayornan. Segun cu e yunan ta bira grandi, nan tambe ta participá den duna fruta i apoyá nan mayornan, kendenan ta keda contentu di mira nan yunan sirbi Jehova lado a lado cu nan.—Proverbionan 15:20.

“Ta Existí Speransa Asta pa un Palu”

Un tata di edad cu ta sirbi Jehova tin goso den su yunan deboto na Dios. Pero e mésun yunan aki ta lamentá ora nan tata, cu tempu, “bai e caminda di henter tera.” (1 Reynan 2:2) Pa yuda nos trata cu un tragedia di famia asina, Bijbel ta sigurá nos cu lo tin un resureccion.—Juan 5:28, 29; 11:25.

Job, un tata di hopi yu, tabata sumamente conciente di hende su bida corticu. El a compar’é cu un flor cu ta seca lihé. (Job 1:2; 14:1, 2) Job a anhelá morto como un scapatorio for di su agonia, ya cu el a mira graf como un lugá di sconde for di cua e por a regresá. Job a puntra: “Si un homber físicamente capacitá muri, e por biba atrobe?” Anto el a contestá cu confiansa: “Tur e dianan di mi sirbishi obligatorio lo mi spera, te ora mi relevo yega. [Jehova] lo bo yama, i mi mes lo contestá bo. Pa e obra di bo mannan lo bo sinti un anhelo.”—Job 14:13-15.

Con Job a ilustrá su conviccion cu Dios lo yam’é for di graf? Mediante un palu, di cua e descripcion ta indicá cu probablemente e tabata referí na esun di olijfi. Job a bisa: “Ta existí speransa asta pa un palu. Si kap e basha abou, lo e asta spruit di nobo.” (Job 14:7) Si kap un palu di olijfi, esei lo no caba cuné. Ta solamente si bo saca e palu cu rais, lo e muri. Si e raisnan keda intacto, e  palu lo bolbe spruit, anto cu vigor renobá.

Asta si un secura pa largu tempu marchitá un palu di olijfi bieu severamente, e pida troncon secu por bolbe biba. “Si un rais bira bieu den tera i su troncon muri den stof, riba holó di awa lo e spruit, i lo e producí sigur un taki grandi manera un mata nobo.” (Job 14:8, 9) Job a biba den un pais secu, yen di stof unda probablemente hopi bes el a mira un troncon di olijfi bieu cu a parce secu i sin bida. Sin embargo, ora awaceru a cai, un palu ‘morto’ asina tabata bolbe na bida i un stam nobo ta surgi for di su raisnan como si fuera ta trata di “un mata nobo.” E resistencia remarcabel aki a pone cu un experto di mata di Tunisia a bisa: “Bo por bisa cu palu di olijfi ta inmortal.”

Mescos cu un cunukero ta anhelá pa mira su palunan di olijfi marchitá spruit atrobe, asina Jehova tambe tin un deseo intenso pa resucitá su fiel sirbidónan. E ta mira padilanti n’e tempu ora cu individuonan fiel manera Abraham cu Sara, Isaac cu Rebeca i hopi otronan mas lo ser restorá na bida. (Mateo 22:31, 32) Esta maraviyoso lo ta pa duna e mortonan un bon boní, i mira nan hiba un bida completo i fructífero un biaha mas!

E Palu di Olijfi Simbólico

Dios ta manifestá su misericordia den e echo cu e ta imparcial i tambe den su percuracion pa un resureccion. Apostel Pablo a usa e palu di olijfi pa ilustrá con Jehova su misericordia ta extendé na hende sin importá nan rasa of antecedente. Pa hopi siglo hudiunan tabata orguyoso cu nan tabata Dios su pueblo scogí, “desendiente di Abraham.”—Juan 8:33; Lucas 3:8.

Riba su mes, nace como parti dje nacion hudiu no tabata un rekisito pa obtené fabor divino. Sin embargo, tur Jesus su promé disipelnan tabata hudiu, i nan tabatin e privilegio pa ta e promé hendenan cu Dios a scoge pa forma parti dje simia primintí di Abraham. (Génesis 22:18; Galationan 3:29) Pablo a compará e disipelnan hudiu aki cu rama di un palu di olijfi simbólico.

Mayoria hudiu natural a rechasá Jesus, i asina descualificá nan mes pa ta futuro miembro dje “trupa chikitu,” esta “e Israel di Dios.” (Lucas 12:32; Galationan 6:16) Pues, nan a bira manera e ramanan di olijfi simbólico cu a ser cortá afó. Ken lo a tuma nan lugá? Na aña 36 E.C., hende no-hudiu a ser scogé pa forma parti dje simia di Abraham. Ta como si fuera Jehova a ènter taki di olijfi shimaron n’e palu di olijfi di hofi. Lo a bai tin hende dje nacionnan tambe entre esnan cu ta forma parti dje simia primintí di Abraham. Awor cristiannan no-hudiu por a bira “participante di gordura di rais dje olijfi.”—Romanonan 11:17.

Pa un cunukero, ènter un taki di olijfi shimaron na un olijfi di hofi, lo ta algu impensabel i “contrario cu naturalesa.” (Romanonan 11:24) E buki The Land and the Book (E Pais i e Buki) ta splica: “Enter esun bon riba esun shimaron, i, manera e arabirnan ta bisa, lo e vence esun shimaron, pero bo no por haci e proceso net lo contrario cu éxito.” Cristiannan hudiu tambe a keda asombrá ora Jehova “pa promé biaha a dirigí su atencion n’e nacionnan p’e saca for di nan un pueblo pa su nomber.” (Echonan 10:44-48; 15:14) Sin embargo, esaki  tabata un indicacion bisto cu e realisacion di Dios su propósito no a dependé di ningun nacion. No, pasobra “den tur nacion e hende cu ta tem’é i ta obra husticia ta aceptabel p’e.”—Echonan 10:35.

Pablo a indicá cu mescos cu a kap e “ramanan” hudiu infiel dje palu di olijfi, asina por a sosodé tambe cu tur otro hende cu debí na orguyo i desobedencia no a keda den Jehova su fabor. (Romanonan 11:19, 20) Esaki sigur ta ilustrá cu nunca nos no mester considerá Dios su bondad inmerecí como algu gewoon.—2 Corintionan 6:1.

Hunta cu Zeta

E Scritura ta referí na tantu e uso literal como esun figurativo di zeta di olijfi. Den tempu di antigwedad, tabata ‘suavisá herida i sla cu zeta’ pa nan cura mas lihé. (Isaías 1:6) Di acuerdo cu un di Jesus su ilustracionnan, e samaritano cu a yuda su próhimo, a basha zeta di olijfi i biña riba herida dje homber cu el a haña riba caminda pa Jérico.—Lucas 10:34.

Zeta di olijfi riba bo cabes ta refrescante i relahante. (Salmo 141:5) I ora nan ta trata cu casonan di malesa spiritual, ancianonan cristian por ‘hunta un miembro dje congregacion cu zeta den e nomber di Jehova.’ (Santiago 5:14) Ta compará e ancianonan su conseho amoroso basá riba e Scritura i nan oracion sincero na fabor dje compañero creyente cu ta spiritualmente malu, cu zeta di olijfi cu ta duna alivio. Ta interesante cu na hebreo tin un expresion cu ta describí un bon hende tin biaha como “zeta di olijfi puru.”

“Un Palu di Olijfi Yen di Blachi den e Cas di Dios”

En bista dje puntonan mencioná, no ta un sorpresa anto cu por compará sirbidónan di Dios cu palu di olijfi. David tabatin gana di ta manera “un palu di olijfi yen di blachi den e cas di Dios.” (Salmo 52:8) David a deseá di tin un relacion estrecho cu Jehova i producí fruta na Dios su alabansa, mescos cu hopi bes famianan israelita tabatin palunan di olijfi rondó di nan cas.—Salmo 52:9.

Miéntras e reino di dos tribu di Huda tabata fiel na Jehova, e tabata manera “un palu di olijfi yen di blachi, cu bunita fruta i forma.” (Jeremías 11:15, 16) Pero e pueblo di Huda a perde e posicion privilegiá ei ora ‘nan a nenga di obedecé Jehova su palabranan i a sigui otro diosnan.’—Jeremías 11:10.

Pa nos bira un palu di olijfi yen di blachi den e cas di Dios, nos tin cu obedecé Jehova i ta dispuesto pa aceptá e disiplina mediante cua e ta “snui” nos pa nos por producí mas fruta cristian. (Hebreonan 12:5, 6) Ademas, mescos cu un palu di olijfi natural tin mester di raisnan extenso pa sobrebibí un periodo di secura, nos tambe mester fortificá nos raisnan spiritual pa nos por wanta prueba i persecucion.—Mateo 13:21; Colosensenan 2:6, 7.

E palu di olijfi ta un bon símbolo pa e cristian fiel, cu den e mundu kisas ta desconocí, pero cu Dios sí ta reconocé. Si e persona ei mester muri den e sistema aki, lo e biba atrobe den e mundu nobo cu tin cu bini.—2 Corintionan 6:9; 2 Pedro 3:13.

E palu di olijfi, prácticamente indestructibel, cu ta sigui duna fruta aña den aña afó, ta haci nos corda e promesa di Dios: “E dianan di mi pueblo lo ta mescos cu e dianan di un palu; i mi scogínan lo gosa completamente dje trabou di nan mes man.” (Isaías 65:22) E promesa profético ei lo cumpli den Dios su mundu nobo.—2 Pedro 3:13.

[Nota]

[Plachi na página 25]

Un stam bieu hañá na Jávea, provincia Alicante, Spaña

 [Plachinan na página 26]

Hofinan di olijfi n’e provincia Granada, Spaña

[Plachi na página 26]

Un antiguo palu di olijfi pafó dje murayanan di Jerusalem

[Plachi na página 26]

Bijbel ta mencioná e entermentu di takinan den un palu di olijfi

[Plachi na página 26]

E palu di olijfi bieu aki ta rondoná cu stèk di takinan nobo