Informe di Proclamadonan di Reino

El A Siña Conocé e Dios Amoroso

NA EDAD di 16 aña, ya caba un brazilero cu yama Antônio tabata desilusioná cu bida. Sintimentunan di cu bida no tin sentido a pone cu el a cai den droga i alcoholismo. El a pensa hopi bes di cometé suicidio. Tabata na momentonan asina cu e tabata corda cu su mama a bis’é: “Dios ta amor.” (1 Juan 4:8) Pero unda e Dios amoroso aki tabata?

Den un intento pa recuperá di su adiccionnan, Antônio a bai busca yudansa cerca e pastor dje parokia local. Aunke Antônio a bira masha activo den Iglesia Católico, ainda e tabatin hopi pregunta. Por ehempel, e palabranan aki di Jesus a confundié: “Boso lo conocé e berdad, i e berdad lo haci boso liber.” (Juan 8:32) Ki clase di libertad Jesus a primintí? Iglesia no por a dun’é ningun contesta satisfactorio pa su preguntanan. Cu tempu, Antônio a drif bai i a bolbe cai den su hábitonan bieu. De facto, su adiccionnan a bira pió.

Den e tempu ei, Antônio su casá Maria, a cuminsá studia Bijbel cu Testigonan di Jehova. Aunke Antônio no a stroba su casá di studia, el a rechasá e Testigonan como “un religion mericano cu ta sirbi interes di imperialismo mericano.”

Sin desanimá, Maria tabata laga e revistanan Toren di Vigilancia i Spierta! cu a trata artículonan cu segun e lo por a interesá Antônio, aki i aya den cas. Ya cu Antônio tabata gusta lesa, de bes en cuando ora su casá no tabata na cas, e tabata tira un bista den e revistanan. Pa promé bes den su bida, el a haña contesta pa su preguntanan bíblico. E ta corda: “Tambe mi a cuminsá ripará e amor i bondad cu mi casá i e Testigonan tabata demostrá na mi.”

Meimei di 1992, Antônio a dicidí cu e tambe kier studia Bijbel cu Testigonan di Jehova. Sin embargo el a sigui usa droga i e tabata bebe pisá. Un anochi lat ora e cu un amigu tabata bolbe cas for di un bario pober, polis a para nan. Ora e polisnan a haña Antônio cu cocaina den su poder, nan a cuminsá batié. Un dje polisnan a push’é den lodo i a pone un scopet serca di su cara. E otro polisnan a grita: “Caba cuné!”

Ora Antônio tabata drumí den lodo, su bida a pasa su dilanti. E único cosnan bon cu e por a corda tabata su famia i Jehova. El a haci un oracion corticu, rogando Jehova pa yud’é. Pa un motibu desconocí, e polisnan a lagu’é. El a bai cas convencí cu ta Jehova a proteh’é.

Antônio a cuminsá studia Bijbel cu un vigor nobo. Tiki-tiki, el a cuminsá haci cambio p’e por agradá Jehova. (Efesionan 4:22-24) Dor di cultivá dominio propio, el a cuminsá trata su problema di droga. Pero tog e tabatin mester di yudansa médico. Kedando dos luna den un clínica di rehabilitacion, a dun’é chens di lesa diferente publicacion bíblico, entre nan e buki Conocimentu cu Ta Hiba na Bida Eterno. Anto Antônio a compartí loke el a siña for dje bukinan aki cu e otro pashentnan.

Despues cu Antônio a sali for dje clínica, el a sigui studia Bijbel cu e Testigonan. Awe, Antônio, Maria, nan dos yu muhernan i Antônio su mama ta sirbi Jehova huntu como un famia felis i uní. Antônio ta bisa: “Awor mi ta comprendé e berdadero nificacion dje palabranan ‘Dios ta amor.’”

[Plachi na página 8]

Predicando den Rio de Janeiro