Música Cu Ta Agradá Dios

Hende a yega di describí música como “esun mas bieu i mas natural di tur arte fini.” Mescos cu idioma, e ta un don remarcabel cu ta distinguí hende for di bestia. Música ta lanta emocion. E por deleitá e oido, keda den e mente i, riba tur cos, música por agradá Dios.

MANERA Bijbel ta mustra, e israelitanan tabata un pueblo cu talento pa música. Música tabata “un arte prominente den tempu bíblico di antigwedad,” segun comentarionan di Unger’s Bible Dictionary. Como un parti di nan bida diario, tantu cantamentu como música instrumental tabata un rasgo di nan adoracion. Pero nan tabata usa e bos di hende mas tantu.

Rey David a nombra representantenan entre e levitanan “pa dirigí e cantamentu” n’e tabernáculo, promé cu a inaugurá e tempel cu su yu Sálomon a traha. (1 Crónicanan 6:31, 32) Ora e arca di pacto, cu a representá Jehova su presencia, a yega Jerusalem, David a haci areglo pa algun levita ‘laga recordá i gradicí i alabá Jehova.’ Nan a compañá nan canto di alabansa “cu instrumentnan dje tipo cu tin cuerde i cu arpa, . . . cu e cimbalnan cu a zona duru, . . . cu trompet.” E hombernan aki tabata “nombrá na nomber pa gradicí Jehova pasobra ‘su bondad amoroso ta te na tempu indefiní.’”—1 Crónicanan 16:4-6, 41; 25:1.

E refran “[Jehova] su bondad amoroso ta te na tempu indefiní” ta aparecé hopi bes den Salmonan, e buki di Bijbel cu mas ta ser asociá cu música. Por ehempel, den Salmo 136, e ta e segundo parti di tur e 26 versículonan. Un erudito di Bijbel ta bisa: “Dor cu e ta corticu, ta fácil pa hende su lip custumbrá cuné. Ken cu a tend’é por a cord’é.”

E títulonan riba e salmonan ta indicá un uso amplio di instrumentnan musical.  Ademas di cuerde, Salmo 150 ta haci mencion di cachu, arpa, tamborin, fluit i cimbal. Sin embargo, e atraccion principal ta hende su bos. Versículo 6 ta urgi: “Tur cos cu ta hala rosea—alabá Jah. Boso alabá Jah!”

Ya cu música ta expresá nos sintimentunan, den tempu bíblico pensamentunan tristu a inspirá canticanan di lamento. Sin embargo, e tipo di cantamentu aki tabata limitá den e repertorio di música di Israel. Segun e encyclopedia bíblico Perspicacia pa Comprendé e Scritura *: “Ta solamente den caso di un cantica di lamento tabata preferá e estilo di papiamentu cantá riba tantu e melodia di música como riba modulacion i e énfasis di papiamentu normal.”

Jesus i su fiel apostelnan a canta alabansa na Jehova e anochi promé cu Jesus su morto. Sin duda nan a canta e palabranan dje Salmonan di Halel. (Salmo 113-118) Esaki mester a fortalecé e disipelnan di Jesus mashá pa enfrentá e pérdida di nan Doño! Anto mas cu esei, nan determinacion pa keda fiel sirbidó dje Soberano Supremo di universo, Jehova, mester a bira mas fuerte ya cu cincu biaha nan a canta e refran “pasobra su bondad amoroso ta te na tempu indefiní.”—Salmo 118:1-4, 29.

E promé cristiannan di Efeso i Colósas a canta “salmo i alabansa pa Dios” (literalmente “himno”). Na esakinan, nan a agregá “canticanan spiritual” cu nan mester a canta den nan curason. (Efesionan 5:19; Colosensenan 3:16) Mediante cantica i abla, nan a usa nan boca apropiadamente pa expresá alabansa. Jesus no a declará cu “for dje abundancia di curason e boca ta papia”?—Mateo 12:34.

Música Cu Ta Desagradá Dios

No ta tur música cu Bijbel ta mencioná ta agradá Dios. Considerá e incidente cu a tuma lugá n’e ceru di Sinaí, unda Moises tabata ricibiendo e Ley, incluso e Dies Mandamentunan. Ora Moises a baha for dje ceru, kico el a tende? “No ta e zonido di canto pa hazaña poderoso,” “no ta e zonido di canto di derota,” pero “e zonido di otro canto.” Esaki tabata música asociá cu idolatria, un práctica cu a lanta Dios su disgustu i cu a resultá den morto di mas o ménos 3.000 dje músiconan aki.—Exodo 32:18, 25-28.

Aunke hende por componé, toca i disfrutá di tur sorto di música, esei no ta nificá cu tur música ta agradá Dios. Di con no? Apostel cristian Pablo ta splica: “Tur a peca i no ta alcansá e gloria di Dios.” (Romanonan 3:23) Hopi bes ritonan di fertilidad pagano, e doctrina di inmortalidad di alma humano i veneracion di Maria como “mama di Dios” ta sirbi como tema di composicionnan musical. Pero, e creencia i prácticanan aki ta desonrá e Dios di e berdad, pasobra nan ta contrario di loke su Palabra inspirá, Bijbel, ta revelá.—Deuteronomio 18:10-12; Ezekiel 18:4; Lucas 1:35, 38.

Scoge Música na un Manera Sabí

Tin asina tantu música pa scoge for di dje cu e ta confundí hende. E kaftnan dje disconan compacto ta diseñá pa motivá e cliente pa cumpra tur sorto di grabacion musical. Pero si un adoradó di Dios kier agrad’E, lo e ta cauteloso i lo e scoge música na un manera sabí pa asina evitá cantica i música instrumental cu ta inspirá dor di creencianan religioso falsu of cu ta enfocá riba inmoralidad i demonismo.

Albert, cu un tempu a sirbi como misionero cristian na Africa, ta admití cu einan e no tabatin masha chens di toca piano. Pero loke sí el a haci ta scucha bes tras bes e par di Lp-nan cu el a bai cuné. Awor Albert ta bek den su pais natal i ta bishitá e congregacionnan como superintendente biahero. Su tempu pa scucha música ta limitá. E ta remarcá: “Mi compositor faborito ta Beethoven. Atrabes di añanan mi a coleccioná grabacionnan di su sinfonia, concierto, sonata i cuartetonan.” Scuchando esakinan a dun’é hopi goso. Ta claro cu cada hende tin su mes smak pa loke ta música, pero como cristian, nos ta tene e conseho di Pablo na mente: “Sea cu boso ta comiendo of bebiendo  of haciendo cualkier otro cos, haci tur cos pa e gloria di Dios.”—1 Corintionan 10:31.

Música i Dedicacion

Música tabata Susie su bida. “Mi a cuminsá toca piano cu 6 aña, violin cu 10 aña i finalmente arpa cu 12 aña,” e ta splica. Despues Susie a bai Colegio Real di Música na Londen, Inglatera, pa studia arpa. I pa cuater aña el a studia huntu cu un famoso spañó tocadó di arpa i un aña mas n’e Conservatorio di Paris, i el a haña e grado di onor den música i tambe diploma pa toca arpa i duna les di piano.

Susie a cuminsá asociá cu un congregacion di Testigonan di Jehova na Londen. Einan el a experenciá berdadero interes i amor entre compañeronan Testigo. Tiki-tiki su amor pa Jehova a crece, i su celo pa Dios su sirbishi a motiv’é pa busca maneranan pa sirbié. Esaki a hiba na dedicacion i bautismo. Susie ta bisa: “Cu música como carera, bo ta hiba un bida dedicá, pues un bida di dedicacion no tabata algu straño pa mi.” Su tempu pa duna concierto a mengua segun cu el a participá den e ministerio cristian di predicá e bon nobo dje Reino di Dios den obedencia na e instruccionnan di Jesus.—Mateo 24:14; Marco 13:10.

Con e ta sinti awor cu ta un poco tempu so e ta dedicá na presentacionnan musical? E ta admití: “Tin bes un tiki frustrá cu mi no tin mas tempu pa ensayá, pero ainda mi ta toca mi instrumentnan i ta disfrutá di música. Música ta un don di Jehova. Mi ta disfrutá mas di dje awor cu mi a pone e sirbishi di Dios na promé lugá den mi bida.”—Mateo 6:33.

Música Cu Ta Alabá Dios

Albert i Susie huntu cu casi seis miyon otro Testigo di Jehova ta alabá Jehova Dios cu música regularmente. Na reunionnan cristian cu ta ser tené den Salonnan di Reino den 234 pais, nan ta iniciá i terminá nan reunionnan, caminda ta posibel, dor di canta cantica na Jehova. Den tono mayor i menor, melodianan bunita ta presentá letranan bíblico den alabansa na Jehova Dios.

Tur presente ta hisa nan bos cantando calurosamente cu Jehova ta un Dios amoroso. (Cantica 44) Nan ta canta un cantica di alabansa na Jehova. (Cantica 190) Nan canticanan ta identificá e goso i responsabilidadnan di hermandad cristian, bida cristian i cualidadnan cristian. Loke ta duna nan mas goso ta e variedad di estilo musical cu Testigonan na Asia, Australia, Europa i Nort i Sur América a usa ora nan a componé e melodianan. *

“Canta un cantica nobo pa Jehova. Canta pa Jehova, boso tur dje tera. Canta pa Jehova, bendicioná su nomber,” ta palabranan di apertura di un magnífico himno real skirbí den tempu dje salmista. “Dia tras dia anunciá e bon nobo di salbacion dor di dje. Declará entre e nacionnan su gloria, entre tur e pueblonan su obranan maraviyoso.” (Salmo 96:1-3) Esaki ta loke Testigonan di Jehova ta haci caminda bo ta biba tambe, i nan ta invitá bo pa djoin nan den canta e alabansa aki. Lo bo ta bon biní na nan Salon di Reino, caminda bo por siña con pa alabá Jehova cu música cu ta agrad’é.

[Nota]

[Plachi na página 28]

Cantando alabansa na Jehova