Historia di Bida

Mi A Haña Yudansa pa Vence Mi Timides

SEGUN E RELATO DI RUTH L. ULRICH

Mi a perde control i a cuminsá yora ei riba stupi dje miembro di clero. El a caba di basha un avalancha di acusacion falsu contra Charles T. Russell, kende a sirbi como e promé presidente di Watch Tower Bible and Tract Society. Laga mi splica di con ami, solamente un mucha muher chikitu, tabata haci bishita asina cerca hende.

NA 1910, mi a nace den un famia masha religioso na un hacienda na Nebraska, Merca. Tur mainta i tur anochi despues di cuminda, nos famia tabata lesa Bijbel huntu. Tata tabata superintendente di zondagschool dje misa metodista den e pueblo chikitu Winside, cu ta situá un 6 kilometer for di nos hacienda. Nos tabatin un garoshi di cabai cu tabatin cortina na su bentananan, pues con cu e weer tabata nos por a bai misa diadomingo mainta.

Ora mi tabatin mas o ménos ocho aña, mi ruman homber chikitu a haña polio, i Mama a hib’é un sanatorio na Iowa p’e haña tratamentu. Aunke Mama a cuid’é cu masha atencion, el a muri ora nan tabata einan. Sin embargo, miéntras cu e tabata aya na Iowa, Mama a topa un Studiante di Bijbel, manera tabata yama Testigonan di Jehova e tempu ei. Nan a papia hopi biaha, i asta Mama a bai algun reunion di Studiantenan di Bijbel huntu cu e señora.

Ora Mama a bolbe cas, el a trece vários volúmen Studio dje Scritura, publicá pa Sociedad Watch Tower. No a dura mashá cu e tabata convencí cu e Studiantenan di Bijbel tabata siña e berdad i cu e siñansanan di inmortalidad di alma humano i di tormento eterno dje malbadonan no tabata berdad.—Génesis 2:7; Eclesiástes 9:5, 10; Ezekiel 18:4.

Sin embargo, Tata a rabia mashá i el a oponé Mama su esfuersonan pa asistí n’e reunionnan  dje Studiantenan di Bijbel. El a sigui hiba ami cu mi ruman homber mas grandi, Clarence, misa huntu cuné. Pero ora Tata no tabata na cas, Mama tabata studia Bijbel cu nos. Como resultado, nos como mucha, tabatin un bon chens pa compará e siñansanan dje Studiantenan di Bijbel cu esnan di nos misa.

Ami cu Clarence tabata asistí n’e zondagschool na misa regularmente, i e tabata haci e maestra pregunta cu esaki no por a contesta. Ora nos a bolbe cas, nos tabata conta nos mama, i esaki tabata hiba na combersacionnan largu riba e temanan aki. Finalmente, mi a stop di bai misa i a cuminsá asistí n’e reunionnan dje Studiantenan di Bijbel huntu cu Mama. I no muchu tempu despues, Clarence a haci mescos.

Tratando cu Timides

Na september 1922, ami cu Mama a asistí n’e congreso memorabel di Studiantenan di Bijbel na Cedar Point, Ohio. Ainda mi por mira e spandoek grandi ei habri segun cu Joseph F. Rutherford, e tempu ei presidente di Sociedad Watch Tower, a urgi e mas cu 18.000 personanan presente, usando e palabranan riba e spandoek: “Anunciá e Rey i e Reino.” Esei a conmové mi profundamente i mi a sinti e urgencia di conta otro hende tocante e bon nobo dje Reino di Dios.—Mateo 6:9, 10; 24:14.

N’e congresonan cu a ser tené durante 1922 te cu 1928, a adoptá un seri di resolucion, i a incorporá e mensahenan den decenas di miyones di tratado cu Studiantenan di Bijbel a distribuí na personanan den henter mundu. Mi tabata flacu i haltu—nan tabata yama mi hazewind—i mi tabata move masha lihé di un cas pa otro distribuyendo e mensahenan imprimí aki. Mi a gusta e trabou aki mashá. Pero papia na porta, esta, papia cu otro hende personalmente tocante e Reino di Dios, tabata un otro asuntu.

Bo sa, mi tabata asina tímido cu asta mi tabata bira anshá ora Mama invitá grupo grandi di famia tur aña na nos cas. Mi tabata disparcé bai den mi kamber i keda eiden. Un biaha, Mama kier a saca potret di henter e famia, i el a bisa mi pa bini afó. Dor cu mi no kier a djoin nan, mi a grita segun cu literalmente el a lastra mi saca for di mi kamber.

 Sin embargo, e dia a yega ora cu decididu mi a pone algun literatura bíblico den mi tas. Bes tras bes mi a bisa: “Mi no por hacié.” Pero djis despues mi tabata bisa mi mes: “Mi tin cu hacié.” Por fin, mi a bai predicá. Despues, mi tabata masha contentu mes cu mi a tuma e curashi pa bai. Mi mayor goso tabata e satisfaccion cu mi a haci e trabou, i no ora mi tabata hacié mes. Tabata rond dje tempu ei cu mi a topa e miembro di clero mencioná anteriormente i mi a cana bai na yoramentu. Segun cu tempu a pasa, cu yudansa di Jehova mi por a papia cu hende na porta, i mi goso a crece. Anto na 1925, mi a simbolisá mi dedicacion na Jehova mediante bautismo bou di awa.

Mi Ta Cuminsá den e Ministerio di Tempu Completo

Ora mi tabatin 18 aña, mi a cumprá un auto cu e cen cu mi a heredá di un tanta i mi a cuminsá traha pionero, manera ta yama e ministerio di tempu completo. Dos aña despues, na 1930, ami cu un compañera pionero a aceptá un asignacion pa bai predicá. P’e tempu ei Clarence tambe a cuminsá traha pionero. Djis despues, el a aceptá un invitacion pa sirbi na Betel, e sede mundial di Testigonan di Jehova na Brooklyn, New York.

Rond dje tempu ei mi mayornan a separá, p’esei, ami cu Mama a laga traha un trailer cu nos por a biba aden i nos a cuminsá traha pionero huntu. Tabata tempu cu e Gran Depresion a cuminsá na Merca. Sigui traha pionero a bira un desafio basta grandi, pero nos tabata determiná pa no stop. Nos a cambia literatura bíblico pa galiña, webu i productonan di hofi i tambe pa cosnan manera bateria bieu i aluminio cu no tabata sirbi mas. Nos tabata bende e cosnan bieu aki pa haña cen pa cumpra gasolin p’e auto i pa cubri otro gastunan. Tambe mi a siña con pa gris e auto i cambia zeta pa nos por a scapa cen. Nos a mira cu Jehova a cumpli cu su promesa di habri caminda pa nos vence obstáculonan.—Mateo 6:33.

Mi Ta Bai pa Asignacion di Misionero

Na 1946, mi a haña invitacion pa asistí n’e di shete klas dje Scol Bíblico di Galad di Watchtower cu tabata situá cerca di South Lansing, New York. P’e tempu ei, ami cu Mama a traha pionero huntu pa mas cu 15 aña, tog e no kier a stroba mi chens di ricibí entrenamentu p’e trabou di misionero. P’esei, el a animá mi pa aceptá e privilegio pa asistí n’e Scol di Galad. Despues cu nos a gradua, ami cu Martha Hess di Peoria, Illinois, a bira partner. Huntu cu dos otro ruman muher, nos a ser asigná na Cleveland, Ohio, pa un aña miéntras nos tabata spera riba un asignacion den exterior.

E asignacion ei a yega na 1947. Ami cu Martha a haña asignacion pa bai Hawai. Ya cu tabata fácil pa imigrá bai n’e islanan aki, Mama a bin biba banda di nos den e stad Honolulu. Su salú tabata bayendo atras, pues mi tabata cumpli cu mi actividadnan di misionero, i tambe yuda Mama. Mi por a cuid’é te dia el a muri na Hawai na 1956, na edad di 77 aña. Ora nos a yega tabatin mas o ménos 130 Testigo na Hawai, pero p’e tempu cu Mama a muri, tabatin mas cu mil, i e isla no tabatin mester di misionero mas.

E ora ei, ami cu Martha a ricibí un carta for di Sociedad Watch Tower cu a ofrecé nos un asignacion na Hapon. Nos promé preocupacion tabata si nos lo por a siña hapones cu e edad cu nos tabatin. P’e tempu ei mi tabatin 48 aña, i Martha tabata cuater aña so mas yong. Pero nos a laga e asuntu den man di Jehova i nos a aceptá e asignacion.

Djis despues dje congreso internacional na Yankee Stadium i Polo Grounds na New York City na 1958, nos a subi barcu rumbo pa Tokio.  Ora nos tabata yegando e haf di Yokohama, un tifon a asotá nos. N’e haf nos a topa cu Don cu Mabel Haslett, Lloyd cu Melba Barry i otro misioneronan. E tempu ei tabatin 1.124 Testigo so na Hapon.

Mesora nos a cuminsá studia e idioma hapones i participá den e ministerio di cas pa cas. Nos a usa e alfabet ingles pa skirbi nos presentacionnan na hapones cu nos tabata lesa p’e hendenan. Como contesta e doñonan di cas tabata bisa “yoroshii desu” of “kekko desu,” cu segun nos a siña ta nificá, “ta excelente” of “ta bon.” Pero no ta tur biaha nos tabata sa si e doño di cas ta interesá of no, ya cu nan tabata usa e palabranan aki tambe pa bisa no. E nificacion a dependé dje tono di bos cu e persona a usa of su expresion di cara. A tuma tempu promé cu nos por a siña interpretá esakinan.

Experencianan Cu A Alegrá Mi Curason

Luchando ainda cu e idioma, mi a yama un dia n’e apartamentonan dje compania Mitsubishi i mi a topa un mucha muher di 20 aña. El progresá bon den conocimentu di Bijbel i a bautisá na 1966. Un aña despues el a cuminsá traha pionero i djis despues el a ser nombrá como pionero special. Esei el a sigui haci te awe. Mirando con el a usa su tempu i energia for di su hubentud padilanti den e ministerio di tempu completo, semper a sirbi como un inspiracion pa mi.

Tuma un posicion na fabor di berdad bíblico ta un gran desafio foral pa hende cu ta biba den un sociedad no-cristian. Tog, miles di hende a enfrentá e desafio aki cu éxito, incluso un cantidad di esnan cu ken mi a studia Bijbel. Nan a deshací di altarnan budista caru i altarnan sinto cu tradicionalmente bo ta haña den casnan di  famia hapones. Esnan nobo mester tin curashi pa haci esaki ya cu tin bes parientenan ta malinterpretá e accionnan ei como un falta di respet pa antepasadonan morto. Nan actonan di curashi ta haci nos corda esnan di cristiannan di promé cu a deshací di artículonan cu tabatin di haber cu adoracion falsu.—Echonan 19:18-20.

Mi ta corda un studiante di Bijbel, un ama di cas, cu a planea pa muda for di Tokio cu su famia. E kier a bai biba den un cas nobo cu no tabatin obhetonan cu tin di haber cu adoracion pagano. Pues, el a conta su esposo di su deseo, i e esposo a cooperá di buena gana. Contentu el a conta mi tocante esaki, pero e ora ei el a corda cu el a paketá un vas grandi i caru di marmer cu el a cumpra pasobra nan di e ta trece felicidad den cas. Ya cu e tabata sospechá cu e vas tabatin di haber cu adoracion falsu, el a kibra e vas cu un martin i a deshací di dje.

Mirando con e muher aki i otronan tabata dispuesto pa deshací di obhetonan caru cu ta conectá cu adoracion falsu i con cu curashi nan a cuminsá un bida nobo di sirbishi na Jehova, tabata un experencia masha recompensador cu a duna mi hopi satisfaccion. Regularmente mi ta gradicí Jehova cu mi por a disfrutá di mas cu 40 aña di sirbishi di misionero na Hapon.

“Milagernan” di Tempu Moderno

Ora mi wak bek riba mi mas cu 70 aña den e ministerio di tempu completo, mi ta keda asombrá di cosnan cu ta parce mi milager di tempu moderno. Como un hóben cu a sufri di timides, nunca lo mi a pensa cu mi por a dedicá henter mi bida na tuma e iniciativa pa papia cu hende tocante un Reino cu mayoria hende no kier tende nada di dje. Sin embargo, no solamente mi por a hacié, sino tambe mi a mira cientos, si no ta miles di otro hende haci mescos. I nan a hacié asina eficas cu e poco mas cu mil Testigonan cu tabatin nan Hapon ora mi a yega na 1958, a aumentá bira mas cu 222.000 awe!

 Na principio ora ami cu Martha a yega Hapon, nos a haña asignacion pa biba n’e oficina di sucursal na Tokio. Na 1963 a construí un facilidad di sucursal nobo di seis piso n’e sitio ei, i for dje tempu ei nos ta biba einan. Na november 1963, nos tabata entre e 163 personanan cu tabata presente n’e discurso di dedicacion na encargo di nos superintendente di sucursal, Lloyd Barry. P’e tempu ei nos tabata 3.000 Testigo na Hapon.

Tabata un goso pa mira con e predicacion di Reino a crece drásticamente, yegando mas cu 14.000 publicadó na 1972 ora cu un sucursal mas grandi tabata cla den e stad Numazu. Pero pa 1982, tabatin mas cu 68.000 proclamadó di Reino na Hapon, i a construí un facilidad di sucursal hopi mas grandi n’e stad Ebina, un 80 kilometer asina for di Tokio.

Miéntras tantu, a renobá e edificio anterior di sucursal den curason di Tokio. Cu tempu el a sirbi como un cas di misionero pa mas cu 20 misionero cu a sirbi na Hapon pa 40, 50 aña of mas tantu. Ami cu mi partner di hopi tempu, Marta Hess, tambe ta entre e personanan ei. Un dokter i su casá, cu ta verpleegster, tambe ta biba den nos cas. Nan ta cuida nos, amorosamente nan ta percurá pa nos necesidadnan di salú. Recientemente, e staf a haña un verpleegster mas, i durante dia ruman muhernan cristian ta bin yuda cuida nos. Dos miembro dje famia di Betel na Ebina ta tuma turno pa prepará cuminda i limpia nos cas. Sí, Jehova ta cuida nos bon.—Salmo 34:8, 10.

Algu cu a sobresalí durante mi bida como misionero a sosodé november aña pasá, 36 aña despues cu a dedicá e edificio den cua hopi di nos cu a sirbi como misionero pa hopi tempu, ta biba awor. Dia 13 di november 1999, mi tabata entre e 4.486 Testigonan, entre cua tabatin tambe cientos di Testigo di hopi tempu for di 37 pais, cu a asistí n’e dedicacion dje extension dje facilidadnan dje sucursal di Hapon di Watch Tower Bible and Tract Society na Ebina. Actualmente e famia di sucursal ta consistí di mas o ménos 650 persona.

Durante e casi 80 añanan cu a pasa Jehova tabata un yudansa fortalecedor pa mi, for di tempu cu yen di timides mi a cuminsá bai di cas pa cas hibando mensahenan bíblico. El a yuda mi vence mi timides. Mi ta kere firmemente cu Jehova por usa ken cu pone confiansa den dje, asta esnan cu ta extremadamente tímido manera ami. I esta un bida satisfaciente mi a hiba dor di papia cu hende straño tocante nos Dios, Jehova!

[Plachi na página 21]

Huntu cu Mama i Clarence, kende a bin bishitá nos for di Betel

[Plachi na página 23]

Miembronan di nos klas ta studia den yerba na Scol di Galad banda di South Lansing, New York

[Plachi na página 23]

Na man robes: Ami, Martha Hess i mama, na Hawai

[Plachi na página 24]

Na man drechi: Miembronan di nos cas di misionero na Tokio

[Plachi na página 24]

Abou: Huntu cu mi partner di hopi tempu, Martha Hess

[Plachi na página 25]

November aña pasá a dedicá e extension di nos facilidadnan di sucursal na Ebina