‘Salba Bo Mes i Esnan Cu Ta Scucha Bo’

“Presta atencion constante na bo mes i na bo siñamentu. . . . Haciendo esaki lo bo salba tantu bo mes como esnan cu ta scucha bo.”—1 TIMOTEO 4:16.

1, 2. Kico ta motivá cristiannan berdadero pa sigui den nan trabou cu ta salba bida?

DEN un pueblito isolá den nort di Tailandia, un pareha casá cu ta Testigo di Jehova ta test nan idioma nobo riba miembronan di un tribu cu ta biba den ceru. Pa nan por compartí e bon nobo dje Reino di Dios cu e hendenan dje pueblito, recientemente e pareha a siña e idioma lahu.

² E esposo ta splica: “Ta difícil pa describí e goso i satisfaccion cu nos tin dor di traha entre e hendenan interesante aki. Nos ta ègt sinti nos enbolbí den e cumplimentu di Revelacion 14:6 i 7, declarando noticia alegre ‘na tur nacion i tribu i lenga.’ No a sobra masha frontera cu e bon nobo no a penetrá ainda, i sin duda esun aki ta un di nan. Casi nos tin mas studio di Bijbel cu nos por atendé.” Claramente, e pareha aki tin speransa di salba, no nan mes so, sino tambe esnan cu ta scucha nan. Como cristian, nos tur no ta spera di haci mescos?

“Presta Atencion Constante na Bo Mes”

3. Pa salba otronan, kico nos mester haci promé?

³ Apostel Pablo a consehá Timoteo: “Presta atencion constante na bo mes i na bo siñamentu,” i esaki ta conta pa tur cristian. (1 Timoteo 4:16) Sí, pa nos yuda otro hende gana salbacion, nos mester presta atencion na nos mes promé. Con nos por haci esaki? Entre otro, nos  mester keda alerto tocante e tempu cu nos ta biba aden. Jesus a duna un señal componí di vários rasgo pa su siguidónan por a sa cu e “conclusion dje sistema di cosnan” a yega. Pero Jesus a bisa tambe cu nos lo no sa precis ki ora e fin lo bini. (Mateo 24:3, 36) Kico e echo aki mester motivá nos pa haci?

4. (a) Ki actitud nos lo mester adoptá relacioná cu e tempu cu a sobra p’e sistema aki? (b) Ki actitud nos mester evitá?

⁴ Nos tur lo por puntra nos mes: ‘Mi ta usa e tempu cu a sobra p’e sistema aki pa salba mi mes i esnan cu ta scucha mi? Of mi ta pensa: “Ya cu nos no sa precis ki ora e fin lo bini, lo mi no preocupá cuné”?’ E último actitud aki ta peligroso. E ta bai net contrali cu e spiertamentu di Jesus: “Demostrá cu boso ta cla, pasobra na un ora cu boso no ta pensa cu e ta, e Yu di hende ta bini.” (Mateo 24:44) Definitivamente, esaki no ta tempu pa perde nos entusiasmo pa Jehova su sirbishi of pa acudí na mundu pa busca siguridad of satisfaccion.—Lucas 21:34-36.

5. Ki ehempel Jehova su testigonan pre-cristian a pone?

⁵ Un otro manera cu nos por mustra cu nos ta presta atencion na nos mes ta dor di perseverá fielmente como cristian. Dios su sirbidónan di pasado a sigui perseverá, sea cu nan a spera liberacion inmediato of no. Despues  di cita ehempel di testigonan pre-cristian manera Abel, Enoc, Noe, Abraham i Sara, Pablo a remarcá: “Nan no a obtené e cumplimentu dje promesanan, sino nan a mira nan di leu i a ricibí nan cu gustu i a declará públicamente cu nan tabata stranhero i residente temporal den e tera.” Nan no a entregá na ningun deseo pa un bida trankil, ni nan no a sucumbí na e preshonnan inmoral rond di nan, sino a anticipá “e cumplimentu dje promesanan” ansiosamente.—Hebreonan 11:13; 12:1.

6. Con e punto di bista cu cristiannan di promé siglo tabatin tocante salbacion a influenciá nan moda di biba?

⁶ Cristiannan di promé siglo tambe a considerá nan mes “stranhero” den e mundu aki. (1 Pedro 2:11) Asta despues cu nan a salba dje destruccion di Jerusalem na aña 70 E.C., cristiannan berdadero no a stop di predicá ni a cai bek den un estilo di bida seglar. Nan tabata sa cu tabatin un salbacion grandioso ta spera esnan cu keda fiel. De echo, te na aña 98 E.C., ainda apostel Juan a skirbi: “Mundu ta pasa bai i tambe su deseo, pero esun cu haci e boluntad di Dios ta permanecé pa semper.”—1 Juan 2:17, 28.

7. Con Testigonan di Jehova a demostrá awante den tempu moderno?

⁷ Den tempu moderno, Testigonan di Jehova tambe a perseverá den e trabou cristian, apesar cu nan a pasa den persecucion cruel. Nan awante tabata pornada? Sigur cu no, pasobra Jesus a sigurá nos: “Esun cu a wanta te na fin ta esun cu lo ser salbá,” sea cu esei resultá di ta fin dje sistema bieu aki of fin di nos bida actual. Den e resureccion, Jehova lo corda i recompensá tur su sirbidónan fiel cu a muri.—Mateo 24:13; Hebreonan 6:10.

8. Con nos por mustra cu nos ta apreciá e awante di cristiannan di pasado?

⁸ Ademas, nos ta contentu cu cristiannan fiel di pasado no a preocupá cu nan propio salbacion so. Sin duda nos cu a siña tocante e Reino di Dios pa medio di nan esfuerso ta gradicidu cu nan a mustra awante den efectuá e comision aki di Jesus: “Bai, pues, i haci disipel di hende di tur nacion, . . . siñando nan pa warda tur loke mi a manda boso.” (Mateo 28:19, 20) Tanten cu nos tin oportunidad ainda, nos por mustra nos gratitud dor di predicá na otronan cu no a tende e bon nobo ainda. Pero predicá ta djis e promé paso pa haci disipel.

‘Presta Atencion na Bo Siñamentu’

9. Con un actitud positivo por yuda nos cuminsá studio di Bijbel?

⁹ Nos asignacion no ta incluí predicacion so, sino siñamentu tambe. Jesus a comisioná nos pa siña hende warda tur e cosnan cu el a manda. Ta berdad cu den algun teritorio ta parce di tin poco hende cu kier sa tocante Jehova. Pero un punto di bista negativo di nos teritorio por stroba nos esfuersonan pa cuminsá studio di Bijbel. Yvette, un pionero den un teritorio cu segun algun ruman no tabata productivo, a nota cu esnan cu a bishitá e bario sin un actitud negativo asina tabata cuminsá studio di Bijbel. Despues di adoptá un actitud mas positivo, Yvette tambe a haña hende cu kier a studia Bijbel.

10. Básicamente, kico ta nos papel como maestro di Bijbel?

¹⁰ Kisas algun cristian ta vacilá pa ofrecé un studio di Bijbel na hende interesá dor cu nan no ta kere cu nan lo por conducí un studio. Ta berdad cu nos grado di capacidad ta varia. Pero nos no tin nodi ta sumamente ábil pa por tin éxito como maestro dje Palabra di Dios. E mensahe puru di Bijbel ta poderoso, i Jesus a bisa cu esnan cu ta manera carné ta reconocé stem dje Wardador berdadero ora nan tend’é. P’esei, nos trabou ta simplemente di transmití e mensahe dje Wardador Excelente Jesus, mas cla posibel.—Juan 10:4, 14.

11. Con bo por yuda un studiante di Bijbel den un forma mas eficas?

¹¹ Con bo por transmití Jesus su mensahe di un forma mas eficas? Pa cuminsá, familiarisá bo mes cu loke Bijbel ta bisa tocante e tópico cu boso ta considerando. Bo mes mester comprendé  un tema promé cu bo por siña otronan tocante dje. Ademas, purba mantené un ambiente formal pero amical durante e studio. Studiantenan, asta esnan hopi yong, ta siña mihó ora nan ta relahá i e maestro ta mustra respet i bondad na nan.—Proverbionan 16:21.

12. Con bo por haci sigur cu e studiante ta comprendé loke bo ta siñ’é?

¹² Como maestro, bo no kier djis presentá e echonan pa e studiante ripití nan for di cabes. Yud’é comprendé loke e ta siña. Un studiante su educacion, su experencia di bida i su familiaridad cu Bijbel lo afectá e manera cu e ta comprendé loke bo ta bisa. P’esei, lo bo por puntra bo mes: ‘E ta capta e nificacion dje textonan di Bijbel citá den e material di studio?’ Bo por saca afó dor di haci pregunta cu no por ser contestá cu un simpel sí of no, pregunta cu ta rekerí un splicacion. (Lucas 9:18-20) Di otro banda, algun studiante ta duda pa haci un maestro pregunta. Pues, kisas nan ta sigui participá sin comprendé completamente loke nan ta siñando. Animá e studiante p’e haci pregunta i bisa bo ora e no ta comprendé un asuntu.—Marco 4:10; 9:32, 33.

13. Con bo por yuda e studiante bira un maestro?

¹³ Un propósito importante di conducí un studio di Bijbel ta di yuda e studiante bira un maestro. (Galationan 6:6) Cu esei na mente, como repaso di boso studio lo bo por pidié p’e splica bo un asuntu na un manera simpel, manera lo e splica un hende cu ta tende di dje pa promé bes. Despues, ora e ta cualificá pa participá den e ministerio, bo por invit’é p’e compañá bo den veld. Probablemente lo e sintié cómodo trahando cu bo, i e experencia lo yud’é haña mas confiansa, te ora e ta cla pa por sali den sirbishi riba su mes.

Yuda e Studiante Bira Jehova Su Amigu

14. Como maestro, kico ta bo meta principal, i kico lo yuda bo tin éxito pa logra esei?

¹⁴ E meta principal di tur maestro cristian ta di yuda e studiante gana Jehova su amistad. No ta cu bo palabranan so lo bo logra esaki, sino cu bo ehempel tambe. Siña dor di pone ehempel tin un efecto poderoso riba curason di studiantenan. Di berdad echo ta bal mas cu palabra, principalmente ora loke bo kier haci ta inculcá cualidadnan moral i inspirá celo den e studiante. Si e mira cu bo palabra i accionnan ta bini di un bon relacion cu Jehova, lo e por ta mas motivá pa e mes cultivá un relacion asina.

15. (a) Di con ta importante p’e studiante desaroyá e motivacion corecto pa sirbi Jehova? (b) Con bo por yuda e studiante sigui haci progreso spiritual?

¹⁵ Bo kier pa e studiante sirbi Jehova dor cu e ta stim’é, no djis pasobra e no kier bai destruí na Armagedon. Dor di yud’é desaroyá e motivacion puru ei, lo bo ta construyendo cu material cu ta resistí candela cu lo sobrebibí pruebanan di su fe. (1 Corintionan 3:10-15) Un motivacion robes, manera un deseo inapropiado di imitá abo of cualkier otro ser humano, lo no dun’é ni e forsa pa resistí influencia no-cristian, ni e curashi pa haci loke ta bon. Corda, lo bo no keda su maestro pa semper. Miéntras cu bo tin chens ainda, anim’é p’e hala mas i mas cerca di Jehova dor di lesa e Palabra di Dios tur dia i pensa riba dje. Asina lo e sigui absorbá “e patronchi di palabranan saludabel” for di Bijbel i publicacionnan basá riba Bijbel, hopi tempu despues cu bo studio cuné a finalisá.—2 Timoteo 1:13.

16. Con bo por siña bo studiante haci oracion di curason?

¹⁶ Otro manera cu bo por yuda e studiante hala mas cerca di Jehova ta dor di siñ’é haci oracion di curason. Con bo por haci esaki? Kisas bo por mustr’é riba Jesus su oracion modelo, i tambe tur e hopi oracionnan hací di henter curason cu tin registrá den Bijbel, por ehempel esnan den Salmonan. (Salmo 17, 86, 143; Mateo 6:9, 10) Ademas, ora bo studiante tende bo haci oracion pa cuminsá i caba e studio, lo e capta con bo ta sinti pa Jehova. P’esei, semper bo oracionnan mester reflehá sinceridad i frankesa, i tambe un balansa spiritual i emocional.

 Traha pa Salba Bo Yunan

17. Con mayornan por yuda nan yunan keda riba e caminda pa salbacion?

¹⁷ Claro cu entre esnan cu nos kier salba ta nos miembronan di famia. Un gran cantidad di yu di mayornan cristian ta sincero i “sólido den fe.” Pero den curason di algun otro kisas e berdad no tin rais profundo. (1 Pedro 5:9; Efesionan 3:17; Colosensenan 2:7) Hopi dje hóbennan aki ta bandoná e caminda cristian ora nan ta yegando, of ora nan yega edad adulto. Si bo ta un mayor, kico bo por haci pa reducí e posibilidad di un resultado asina? Di promé, bo por traha pa crea un ambiente familiar saludabel. Un bon bida di famia ta e fundeshi pa un punto di bista saludabel di autoridad, aprecio pa balornan apropiado i bon relacion cu otro hende. (Hebreonan 12:9) Pues, relacion íntimo den famia por ta e cuna caminda e mucha su amistad cu Jehova por crece. (Salmo 22:10) Famianan fuerte ta haci cos huntu, asta si mayornan tin cu sacrificá tempu cu nan lo por a usa pa bentaha personal. Asina, dor di bo ehempel bo por siña bo yunan tuma decision corecto den bida. Mayornan, loke boso yunan tin mas mester di dje for di boso no ta bentaha material, sino boso, boso tempu, energia i amor. Boso ta dunando boso yunan e cosnan aki?

18. Ki tipo di pregunta mayornan tin cu yuda nan yunan contestá?

¹⁸ Mayornan cristian no mester asumí nunca cu nan yunan lo bira cristian tambe automáticamente. Daniel, un anciano, tata di cincu yu,  ta remarcá: “Mayornan tin cu tuma tempu pa kita e dudanan cu nan yunan ta haña inevitablemente na scol i otro caminda. Cu pacenshi nan mester yuda nan yunan haña contesta pa preguntanan manera: ‘Di berdad nos ta biba den e tempu di fin? En berdad ta un religion berdadero so tin? Di con un compañero di scol cu parce un bon mucha tog no ta bon asociacion? Semper ta malu pa tene relacion sexual promé cu matrimonio?’” Mayornan, boso por conta cu Jehova pa bendicioná boso esfuersonan, pasobra e tambe ta interesá den bienestar di boso yunan.

19. Di con ta mihó pa mayornan mes studia cu nan yunan?

¹⁹ Kisas algun mayor no ta sinti nan capacitá pa studia cu nan propio yunan. Pero bo no mester sinti asina, pasobra niun hende no ta den mihó posicion pa studia cu bo yunan, cu bo mes. (Efesionan 6:4) Studia cu bo propio yunan lo permití bo sa di nan mes kico ta biba den nan mente i curason. Loke nan ta bisa ta bini di curason, of e ta superficial? Nan ta ègt kere den loke nan ta siña? Jehova ta real pa nan? Ta únicamente dor di bo mes studia cu bo yunan bo por haña contesta pa e preguntanan vital aki, i otronan.—2 Timoteo 1:5.

20. Con mayornan por haci e studio di famia bira mas agradabel i beneficioso?

²⁰ Con boso por mantené boso programa di studio di famia despues cu boso a cuminsá? Joseph, un anciano, tata di un yu homber i un yu muher chikitu, ta bisa: “Mescos cu tur studio di Bijbel, e studio di famia mester ta placentero, algu cu tur hende ta spera ariba. Pa logra esei den nos famia, nos no por ta muchu streng relacioná cu tempu. Nos studio por dura un ora, pero si de bes en cuando ta dies minuut so nos tin, nos ta studia tog. Un cos cu ta pone cu e studio di famia ta un momento special den siman pa nos yunan ta cu nos ta actua esenanan for di Mi buki di relato bíblico. * Loke ta hopi mas importante cu e cantidad di paragraf cu nos a cubri ta cuantu impresion e informacion a haci riba nan i con profundo nan a comprendé e les.”

21. Ki ora mayornan por instruí nan yunan?

²¹ Claro cu siñamentu di bo yunan no ta limitá na periodonan di studio formal so. (Deuteronomio 6:5-7) E Testigo na Tailandia cu nos a mencioná na principio ta bisa: “Mi ta corda cla-cla con Papa tabata bai cu mi den e trabou di predicá, riba baiskel, te n’e partinan mas leu dje teritorio di nos congregacion. Definitivamente ta e bon ehempel di nos mayornan i e echo cu nan tabata siña nos bou di tur tipo di circunstancia, a yuda nos dicidí di drenta e trabou di tempu completo. I algu dje lesnan ei mester a keda den mi. Ainda mi ta traha den e partinan mas leu dje teritorio!”

22. Kico lo ta e resultado si bo ‘presta atencion na bo mes i na bo siñamentu’?

²² Pronto, net n’e momento apropiado, Jesus lo bini pa ehecutá Dios su huicio riba e sistema aki. E gran evento ei lo pasa pa historia universal, pero Jehova su sirbidónan fiel lo sigui stret bai den su sirbishi cu salbacion eterno na bista. Bo ta spera di ta entre nan, huntu cu bo yunan i bo studiantenan di Bijbel? Wel, corda: “Presta atencion constante na bo mes i na bo siñamentu. Persistí den e cosnan aki, pasobra haciendo esaki lo bo salba tantu bo mes como esnan cu ta scucha bo.”—1 Timoteo 4:16.

[Nota]

Bo Por Splica?

• Ki actitud nos mester tin, ya cu nos no sa precis ki ora Dios su huicio lo bini?

• Den ki maneranan nos por ‘presta atencion na nos siñamentu’?

• Con bo por yuda un studiante bira Jehova su amigu?

• Di con ta importante pa mayornan tuma tempu pa siña nan yunan?

[Preguntanan di Estudio]

[Plachi na página 15]

Siñamentu ta sosodé mihó den un atmósfera formal pero amical

[Plachi na página 18]

Hunga relato bíblico, manera Sálomon husgando e dos prostitutanan, ta haci studionan di famia agradabel