Unda Bo Por Acudí pa Bon Conseho?

Awor e “negoshi di duna conseho” a bira unu cu ta producí biyones di florin pa aña. Hende kier yudansa. Heinz Lehmann, profesional di salú mental, ta bisa: “[E sociedad djawe] tin un déficit educacional i social. Normanan religioso a cambia. Famianan ta hopi ménos stabil . . . , i esei ta pone cu hende ta tambaleá.” Escritor Eric Maisel ta bisa: “Hendenan cu na un tempu tabata acudí cerca curandero di nan tribu, pastor of dokter di cas pa haña yudansa pa problemanan mental, spiritual i físico, awor ta busca solucion den bukinan cu ta duna conseho riba con bo por desaroyá of mehorá personalmente.”

E ASOCIACION Mericano di Sicologia a forma un tim special pa investigá e negoshi floreciente aki. E tim a bisa cu aunke tin “tremendo potencial pa yuda hende comprendé nan mes i otronan . . . , e propaganda i titularnan cu ta compañá e programanan aki ta birando mas i mas exagerá i sensacional.” Un escritor den e korant Toronto Star ta bisa: “Sea conciente cu tin cantidad di falsificadó religioso-spiritual. . . . Tene cuidou foral cu tur buki di guia, caset of seminario pa desaroyo i adelanto personal cu ta ofrecé demasiado hopi, den un tempu demasiado corticu, pa muchu tiki esfuerso of disiplina propio.” Ta cierto cu tin un gran cantidad di hende cu sinceramente ta trata na yuda esnan den necesidad. Sin embargo, ta existí e realidad tristu cu un cantidad di individuo sin escrúpulo ta haci nan mes ricu riba custia di hende su soledad i sufrimentu dor di ofrecé nan un yudansa of solucion cu no ta real.

En bista di esaki, kico ta un fuente clave di yudansa cu nos por confia? Unda nos por haña yudansa práctico cu semper lo duna bon resultado?

Fuente di Guia Infalibel

E predicadó mericano di siglo 19, Henry Ward Beecher a bisa: “Bijbel ta Dios su mapa pa guia bo, pa spar bo di naufragio, i pa mustra bo unda e haf ta i con pa alcans’é sin dal contra baranca of banki di santu.” Un otro homber a bisa di Bijbel: “Hamas un hende ta bira muchu grandi pa e Scritura, segun cu nos ta crece e buki ta bira mas amplio i profundo.” Di con nos mester considerá e fuente aki seriamente?

Recomendando su mes, Bijbel ta bisa: “Tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.” (2 Timoteo 3:16, 17) Bijbel su contenido ta originá cu e Fuente di bida mes, Jehova Dios. (Salmo 36:9) Como tal, e conocé nos composicion íntimamente, manera Salmo 103:14 ta recordá nos:  “Pasobra e mes sa bon con nos ta formá, cordando cu nos ta stof.” P’esei, nos por tin pleno confiansa den e balor di Bijbel.

De echo, Bijbel ta contené un cantidad di principio i guia cu por ta aplicá na bo beneficio den cualkier circunstancia cu bo por haña bo aden. Mediante Bijbel Dios ta bisa nos: “Esaki ta e caminda. Cana den dje.” (Isaías 30:21) En berdad Bijbel por yena necesidad di hende awe? Laga nos wak.

Bijbel Ta Yena Nos Necesidad . . .

Ora di Trata cu Ansiedad. Bijbel ta bisa nos: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) Oracion a resultá eficas den trata cu e ansiedad causá pa problemanan económico, abusu sexual i verbal of e morto di un ser kerí? Considerá e siguiente experencia.

Despues cu Jackie a haña sa dje abusu sexual di su yu muher, e ta reconocé: “No tin palabra pa expresá e sintimentu di culpa cu bo tin ora cu bo ta incapas pa protehá bo yu. Mi mester a lucha contra sintimentunan di amargura, rencor i rabia. E sintimentunan aki a cuminsá ruiná mi bida. Mi tabatin mester di Jehova desesperadamente p’e protehá mi curason.” Despues di lesa i bolbe lesa Filipensenan 4:6 i 7, Jackie a traha duru pa aplicá loke e texto ta consehá. “Tur dia mi ta haci oracion, bes tras bes pidiendo pa mi no laga e sintimentunan negativo aki destruí mi, i Jehova a yuda mi cultivá un curason trankil i felis. Di berdad mi ta sinti mi na pas cu mi mes,” Jackie ta relatá.

Kisas bo tambe ta den un situacion fuera di bo control of cu bo no por resolvé i cu ta haci bo anshá emocionalmente. Dor di sigui e conseho bíblico pa haci oracion, bo por trata cuné eficasmente. E salmista ta animá nos cu e palabranan aki: “Lora bo caminda riba Jehova, i dependé riba dje, i e mes lo actua.”—Salmo 37:5.

Pa Animacion. E salmista a expresá e aprecio aki: “Jehova, mi a stima e habitacion di bo cas i e lugá di biba di bo gloria. Mi propio pia lo para sigur riba un lugá plano; entre e multitudnan congregá lo mi bendicioná Jehova.” (Salmo 26:8, 12) Bijbel ta animá nos pa reuní huntu regularmente pa adorá Jehova. Con e asociacion aki por yena nos necesidadnan? Kico otronan a descubrí?

Becky ta relatá: “Dor cu mi mayornan no ta sirbi Jehova, nan ta contra ora cu mi kier haci cualkier cos cu tin di haber cu sirbishi na Dios. Mi tin cu haci esfuerso grandi pa asistí n’e reunionnan.” Becky ta pensa cu el a haña hopi bendicion pasobra el a haci gran esfuerso pa asistí na reunionnan cristian regularmente. “E reunionnan ta fortalecé mi fe, pa asina mi por wanta e preshon di tur dia cu ta bini riba mi como alumno, yu muher i sirbidó di Jehova. E hendenan na Salon di Reino ta hopi diferente for dje alumnonan na scol! Nan ta interesá den bo i ta cla pa yuda, i nos combersacionnan ta semper animante. Nan ta berdadero amigunan.”

Sí, dor di sigui e conseho bíblico pa reuní huntu regularmente, nos por logra cu Jehova ta yena nos necesidad pa animacion. Ta aki ta caminda nos ta experenciá e berdad dje palabranan dje salmista: “Dios ta pa nos un refugio i fortalesa, un yudansa cu por ser hañá fácilmente durante angustia.”—Salmo 46:1.

Pa Trabou Satisfaciente i Cu Ta Bale la Pena. “Bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor,” Bijbel ta animá. (1 Corintionan 15:58) “E trabou di Señor” ta realmente satisfaciente? E ministerio cristian ta cumpli cu algu cu ta bale la pena?

 Amelia ta expresá con e ta sinti: “Mi a studia Bijbel cu un pareha cu tabata cerca di kibra for di otro. Tambe mi a yuda un señora kende su yu muher nan a mata violentamente. Duda tocante e condicion dje mortonan tabata tormentá e señora. Den tur dos caso, aplicacion di principionan bíblico a trece pas i speransa den nan bida. Mi ta sinti un gran satisfaccion i goso pasobra mi tabatin un parti den yuda nan.” Scott ta bisa: “Si bo tin un bon experencia den e ministerio di veld, bo a cuminsá un studio di Bijbel nobo of bo tabatin éxito den duna testimonio informal, p’e próximo añanan lo bo sigui papia tocante dje. Cada bes cu bo cont’é, bo ta rebibá e mésun sintimentu i entusiasmo! Ta for dje ministerio bo ta saca e goso di mas grandi i duradero.”

Ta bon cla anto cu aplicá e direccion cu Bijbel ta duna pa bira ministernan activo a yena e personanan aki su necesidad pa trabou satisfaciente i cu ta bale la pena. Bo tambe ta ser invitá pa participá den e trabou aki di educá otro hende den e caminda i principionan di Dios, i na e mésun tempu beneficiá bo mes.—Isaías 48:17; Mateo 28:19, 20.

Saca Beneficio for dje Palabra di Dios

Sin duda, Bijbel ta un fuente di guia práctico i digno di confiansa den nos mundu djawe. Pa beneficiá di dje, nos tin cu haci esfuerso consistente. Nos mester lesa Bijbel, studi’é i meditá riba dje regularmente. Pablo a consehá: “Refleccioná riba e cosnan aki; sea intensamente ocupá den nan, pa bo progreso por ser manifestá na tur hende.” (1 Timoteo 4:15; Deuteronomio 11:18-21) Dios ta garantisá cu si bo traha pa aplicá su conseho hañá den Bijbel, lo bo tin éxito. E ta primintí: “Confia den Jehova . . . Den tur bo camindanan tuma nota di dje, i e mes lo haci bo camindanan stret.”—Proverbionan 3:5, 6.

[Plachinan na página 31]

Sigui conseho bíblico ta duna bo un bida satisfaciente i recompensador