“Boso Tur Ta Ruman”
“Boso Tur Ta Ruman”
“No laga hende yama boso Rabi, pasobra un so ta boso maestro, miéntras cu boso tur ta ruman.”—MATEO 23:8.
1. Ki asuntu ta merecé nos consideracion?
“KEN ta merecé mas onor, un misionero of un betelita?” un señora cristian di un pais oriental a puntra un misionero di Australia inocentemente. E kier a sa ken mester respetá mas, un misionero di un otro pais of un minister local cu ta sirbi den e oficina di sucursal di Sociedad Watch Tower. E pregunta inocente ei, cu ta reflehá un cultura di distincion di clase, a coge e misionero di sorpresa. Sin embargo, e pregunta tocante ken ta mayor ta originá for di un deseo pa sa unda hende ta pará den e fila di poder i influencia.
2. Con nos mester mira nos compañeronan di adoracion?
2 E preocupacion aki no ta nada nobo. Asta Jesus su disipelnan tabatin un debate continuo tocante ken tabata mas importante. (Mateo 20:20-24; Marco 9:33-37; Lucas 22:24-27) Nan tambe a bini for di un cultura cu tabata haci masha distincion di clase, esta hudaismo di promé siglo. Cu un sociedad asina na mente, Jesus a consehá su disipelnan: “No laga hende yama boso Rabi, pasobra un so ta boso maestro, miéntras cu boso tur ta ruman.” (Mateo 23:8) Un título religioso manera “Rabi,” cu ta nificá “Maestro,” “tin tendencia di fomentá orguyo i un sentido di superioridad den esnan cu ta hañ’é, i envidia i un sentido di inferioridad den esnan cu no tin e; i henter e spiritu i tendencia di dje ta contrario cu e ‘simplesa cu ta den Cristo,’” segun e erudito di Bijbel, Albert Barnes. Sí, cristiannan ta abstené di dirigí nan mes n’e superintendentenan den nan como “Anciano Tal-i-tal.” Nan no ta usa e palabra “anciano” como un título pa labia hende. (Job 32:21, 22) Di otro banda, ancianonan cu ta sigui e spiritu di Jesus su conseho ta onra otro miembronan dje congregacion, mescos cu Jehova ta onra adoradónan leal i Jesucristo ta onra siguidónan leal.
E Ehempel di Jehova i di Jesus
3. Den ki manera Jehova a onra su criaturanan spiritual?
3 Aunke Jehova ta e “Haltísimo,” for di cuminsamentu el a onra su criaturanan dor di enbolbé nan den su obranan. (Salmo 83:18) Ora Jehova a crea e promé ser humano, el a incluí su Yu unigénito den e proyecto como un “obrero maestro.” (Proverbionan 8:27-30; Génesis 1:26) Jehova a asta invitá su angelnan celestial pa expresá nan mes riba con pa destruí e rey malbado Acab ora El a dicidí pa haci esei.—1 Reynan 22:19-23.
4, 5. Con Jehova ta onra su criaturanan humano?
4 Jehova ta reina como e Soberano Supremo di universo. (Deuteronomio 3:24) E no tin nodi consultá cu hende. Tog, e ta baha abou, na moda di papia, p’e tuma nota di nan. Un salmista a canta: “Ken ta manera Jehova nos Dios, esun cu ta traha su habitacion na haltu? E ta rebahá su mes p’e mira shelu i tera, ta lanta esun di condicion humilde for di stof mes.”—Salmo 113:5-8.
5 Promé cu el a likidá Sódoma i Gomora, Jehova a scucha Abraham su preguntanan i a satisfacé Abraham su sentido di husticia. (Génesis 18:23-33) Aunke Jehova tabata sa e resultado di Abraham su peticionnan, el a scucha Abraham cu pacenshi i a aceptá su razonamentu.
6. Dor cu Jehova a mustra onor ora Habacuc a hacié un pregunta, den kico esei a resultá?
6 Jehova a scucha Habacuc tambe, kende a puntra: “Pa cuantu tempu, o Jehova, mi tin cu grita pa yudansa, sin cu bo ta tende?” Jehova a mira e pregunta como un desafio di su autoridad? No, el a haña cu Habacuc su preguntanan tabata na nan lugá, i p’esei el a revelá su propósito pa lanta e caldeonan pa ehecutá huicio. El a sigurá e profeta cu ‘e huicio pronosticá aki lo realisá sin falta.’ (Habacuc 1:1, 2, 5, 6, 13, 14; 2:2, 3) Dor di tuma Habacuc su preocupacionnan na serio i contest’é, Jehova a onra e profeta. Como resultado, e profeta tur preocupá a cobra ánimo i a bira gososo, cu pleno confiansa den e Dios di su salbacion. Esaki ta ser reflehá den e buki inspirá di Habacuc cu ta fortalecé nos confiansa den Jehova awe.—Habacuc 3:18, 19.
7. Pakico Pedro su rol na Pentecoste di aña 33 E.C. ta significante?
7 Jesucristo ta un otro ehempel excelente di mustra respet pa otro hende. Jesus a bisa su disipelnan cu “ken cu nenga mi dilanti hende, lo mi nenga tambe dilanti mi Tata.” (Mateo 10:32, 33) Sin embargo, riba e anochi di su traicion, tur su disipelnan a bai lagu’é, i apostel Pedro a nengu’é tres bes. (Mateo 26:34, 35, 69-75) Jesus a wak mas aleu cu e aparencia externo i a tuma nota di Pedro su sintimentunan di mas íntimo, i su repentimentu profundo. (Lucas 22:61, 62) Apénas 51 dia despues, Cristo a duna e apostel repentí e dignidad di lagu’é representá Jesus su 120 disipelnan riba e dia di Pentecoste i usa e promé di “e yabinan dje reino.” (Mateo 16:19; Echonan 2:14-40) Pedro a haña chens di ‘bolbe i fortalecé su rumannan.’—Lucas 22:31-33.
Asignando Onor na Miembronan di Famia
8, 9. Con un esposo por imitá Jehova i Jesus den mustra onor na su casá?
8 Esposonan i mayornan ta haci bon di imitá Jehova i Jesucristo den ehercé e autoridad cu Dios a duna nan. Pedro a spierta: “Boso, esposonan, sigui biba di igual manera cu [boso esposa] segun conocimentu, asignando onor na nan manera na un wea mas swak, esun femenino.” (1 Pedro 3:7) Imaginá cu bo tin un vas delicado di porcelana den bo man, claramente mas frágil cu unu di palu. Lo bo no trat’é cu mas cuidou? Un esposo por haci esei dor di imitá Jehova, scuchando opinion di su esposa ora di dicidí asuntunan di famia. Corda cu Jehova a tuma tempu pa razoná cu Abraham. Dor cu e esposo ta imperfecto, por ta e no ta mira henter e cuadro dje asuntu. Pues, lo no ta sabí p’e onra su esposa dor di sinceramente considerá su opinion?
9 Den paisnan caminda autoridad di hende homber ta fuertemente ankrá, un esposo mester corda cu kisas su esposa lo tin cu vence un barera formidabel pa expresá su sintimentunan di mas íntimo. Imitá e manera cu Jesucristo a trata su disipelnan, un parti di su futuro clase di bruid, tempu cu e tabata riba tera. El a stima nan, teniendo cuenta cu nan limitacionnan físico i spiritual asta promé cu nan a expresá nan necesidadnan. (Marco 6:31; Juan 16:12, 13; Efesionan 5:28-30) Ademas, tuma tempu pa observá loke bo esposa ta haci pa bo i bo famia, i expresá bo aprecio cu echo i palabra. Tantu Jehova como Jesus a apreciá, encomendá i bendicioná hende digno. (1 Reynan 3:10-14; Job 42:12-15; Marco 12:41-44; Juan 12:3-8) Despues cu casá di un señora cristian na Lehano Oriente a bira Testigo di Jehova, e señora a bisa: “Mi casá tabatin custumber di cana tres pa cuater stap dilanti mi, lagando ami carga tur cos. Awor, e ta carga e sacunan i ta mustra aprecio pa loke mi ta haci na cas!” Un palabra di aprecio sincero ta contribuí mashá pa yuda bo esposa sinti cu e tin balor.—Proverbionan 31:28.
10, 11. Kico mayornan por siña for di Jehova su ehempel excelente ora el a trata cu e nacion rebelde di Israel?
10 Ora mayornan ta atendé cu nan yunan, foral ora mester corigí nan, nan mester imitá e ehempel di Dios. “Jehova a sigui spierta Israel i Huda” pa bolbe bek for di nan mal camindanan, pero nan a “sigui haci nan nek stijf.” (2 Reynan 17:13-15) E israelitanan a asta “purba engañ’é cu nan boca; i cu nan lenga nan a purba gañ’é.” Kisas hopi mayor ta haña cu tin bes nan yunan ta haci asina. E israelitanan a “pone Dios na prueba” i a caus’é dolor i a ofend’é. Tog, Jehova “tabata misericordioso; e tabata cubri e eror i no ruiná nan.”—Salmo 78:36-41.
11 Jehova a asta roga e israelitanan: “Bini awor, i laga nos drecha cos entre nos . . . Aunke boso picánan ta resultá di ta manera scarlata, lo mi haci nan blancu manera sneu.” (Isaías 1:18) Aunke no ta Jehova a faya, el a invitá e nacion rebelde pa bini i drecha cos. Ki un actitud excelente pa mayornan imitá ora di trata cu nan yunan! Ora e situacion ta exigí esei, duna nan dignidad dor di scucha, nan banda dje asuntu, i razoná cu nan riba pakico nan tin cu cambia.
12. (a) Pakico nos mester evitá di onra nos yunan mas cu Jehova? (b) Kico nos tin cu haci si nos kier respetá e dignidad di nos yunan ora di corigí nan?
12 Claro cu tin biaha yunan mester di conseho fuerte. Mayornan lo no kier ta manera Eli, cu a ‘sigui onra su yunan mas cu Jehova.’ (1 Samuel 2:29) Sin embargo, hóbennan mester mira e motivacion amoroso tras dje coreccion. Nan mester por comprendé cu nan mayornan ta ègt stima nan. Pablo ta spierta tatanan: “No iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) E punto ta esaki: Aunke e tata ta asumí su autoridad como mayor, e mester respetá e dignidad dje yunan dor di no pone nan rabia pa motibu cu e ta muchu streng. Sí, tempu i esfuerso di parti dje mayornan ta necesario pa tene cuenta cu e dignidad dje yunan, pero e resultado di esei ta bal tur e sacrificionan.
13. Kico ta e punto di bista bíblico di esnan di edad den un famia?
13 Mustra onor na miembronan di famia ta bai mas aleu cu trata bo esposa i yunan cu dignidad. Un proverbio hapones ta bisa: “Ora bo ta bieu, obedecé bo yunan.” E punto dje proverbio ei ta cu mayornan di edad mester evitá di surpasá nan autoridad como mayor i mester tuma nota di loke nan yunan grandi caba ta bisa. Aunke ta bíblico pa mayornan onra nan yunan dor di scucha nan, e muchanan no mag mustra un actitud di falta di respet pa miembronan mas bieu dje famia. “No despreciá bo mama simplemente pa motibu cu el a bira bieu,” segun Proverbionan 23:22. Rey Sálomon a aplicá e proverbio aki i a onra su mama ora esaki a acerk’é p’e hacié un peticion. Sálomon a laga pone un trono na banda drechi di esun di dje i a scucha loke Bat-seba, su mama di edad avansá, tabatin di bis’é.—1 Reynan 2:19, 20.
14. Con nos por onra e miembronan di edad dje congregacion?
14 Den nos gran famia spiritual, nos ta den un bon posicion pa “hiba delantera” den mustra onor n’e miembronan di edad dje congregacion. (Romanonan 12:10) Kisas nan no por haci mes tantu cu nan a haci un tempu, i esei tal bes ta frustra nan. (Eclesiástes 12:1-7) Un Testigo ungí di edad avansá cu tabata malu na cama den un cas di cuido a yega di expresá e frustracion ei: “Mi ta purá pa mi muri pa caba pa mi bai traha bek.” Si nos mustra debido reconocimentu i onor p’e hendenan di edad ei, esei por yuda. Dios a manda e israelitanan: “Bo mester lanta para pa cabei blancu, i bo tin cu mustra consideracion pa e persona di un homber bieu.” (Levítico 19:32) Mustra consideracion dor di laga esnan di edad sinti nan útil i apreciá. “Lanta para” por encerá cai sinta i scucha nan relatá loke nan a logra hopi aña pasá. Esei lo duna dignidad na esnan di edad i enrikesé nos mes bida spiritual.
‘Den Mustra Onor, Hiba Delantera’
15. Kico ancianonan por haci pa mustra dignidad na miembronan dje congregacion?
15 Miembronan di congregacion ta bona ora e ancianonan ta pone un bon ehempel pa nan. (1 Pedro 5:2, 3) Apesar di nan programa ocupá, ancianonan cu tin interes di otronan na pechu ta tuma iniciativa pa acercá e hóbennan, cabesnan di famia, mamanan soltero, amanan di cas i esnan di edad, sea cu esakinan ta enfrentá problema of no. E ancianonan ta scucha loke miembronan dje congregacion tin di bisa i ta encomendá nan pa loke nan por haci. Un anciano cu ta un bon observadó i cu ta expresá aprecio pa loke un ruman homber of muher ta haci, ta imitando Jehova, kende ta apreciá su criaturanan terenal.
16. Pakico nos mester mira ancianonan como personanan cu ta merecé onor huntu cu otro rumannan den e congregacion?
16 Dor di imitá Jehova, e ancianonan ta pone un bon ehempel den aplicá e conseho di Pablo: “Den amor fraternal tene tierno cariño pa otro. Den mustra onor na otro hiba delantera.” (Romanonan 12:10) Kisas esaki ta mas difícil pa ancianonan cu ta biba den paisnan caminda ta reina distincion di clase. Por ehempel, den un pais oriental, tin dos palabra pa “ruman,” unu como título di onor i e otro como algu comun. Te cu recien, miembronan di congregacion tabata dirigí nan mes n’e ancianonan i esnan cu ta di mas edad cu e título di onor, i nan tabata usa e término comun pa otro ruman. Sin embargo, a animá nan pa usa e término comun tur ora pasobra, manera Jesus a bisa su siguidónan, “boso tur ta ruman.” (Mateo 23:8) Aunke e distincion kisas no ta asina bisto den otro pais, nos tur mester ta conciente dje tendencia humano di haci distincion di clase.—Santiago 2:4.
17. (a) Pakico ancianonan mester ta acercabel? (b) Den ki maneranan ancianonan por imitá Jehova ora di trata cu miembronan di congregacion?
17 Ta berdad cu Pablo a animá nos pa trata cierto ancianonan como digno di “dòbel onor,” pero nan ta keda ruman. (1 Timoteo 5:17) Si nos por acercá e Soberano di Universo su “trono di bondad inmerecí cu frankesa di expresion,” nos lo no mester por acercá e ancianonan, cu tin cu imitá Jehova? (Hebreonan 4:16; Efesionan 5:1) Superintendentenan por evaluá con acercabel nan ta dor di wak cuantu biaha otronan ta bini cerca nan pa busca conseho of pa duna sugerencia. Siña un les for dje manera cu Jehova ta enbolbé otronan den su proyectonan. E ta duna dignidad na otronan dor di delegá responsabilidad. Asta ora un otro Testigo ofrecé algun sugerencia cu por parce impráctico, e ancianonan mester apreciá e interes mustrá. Corda con Jehova a trata Abraham su preguntanan penetrante i Habacuc su sclamacion di angustia.
18. Con ancianonan por imitá Jehova ora di reahustá esnan cu mester di yudansa?
18 Tin algun compañero cristian cu mester ser reahustá. (Galationan 6:1) Tog, nan ta balioso den bista di Jehova, i nan ta merecé pa ser tratá cu dignidad. Un Testigo a bisa: “Ora un persona cu ta duna mi conseho ta trata mi cu respet, mi ta sinti mi liber pa acerk’é.” Mayoria hende ta respondé bon na conseho ora trata nan cu dignidad. Kisas e ta tuma mas tempu, pero si laga esnan cu a dal un paso falsu expresá nan mes ampliamente, ta mas fácil pa nan aceptá cualkier conseho necesario. Corda con Jehova a razoná cu e israelitanan bes tras bes pa motibu di su compasion pa nan. (2 Crónicanan 36:15; Tito 3:2) Conseho duná cu comprension i compasion lo toca curason di esnan cu mester di yudansa.—Proverbionan 17:17; Filipensenan 2:2, 3; 1 Pedro 3:8.
19. Con nos mester mira hende cu no tin mésun creencia cu cristiannan?
19 Tambe nos tin cu mustra onor na esnan cu kisas ta den fila pa bira nos rumannan spiritual den futuro. Por ta nan ta slow pa aceptá nos mensahe awor, pero tog nos mester tin pacenshi cu nan i reconocé nan dignidad como hende. Jehova “no ta deseá pa ningun hende ser destruí, sino ta deseá pa tur alcansá repentimentu.” (2 Pedro 3:9) Nos no mester tin Jehova su punto di bista? Considerando hende en general, nos por prepará e caminda pa duna un testimonio si semper nos ta purba di ta bondadoso. Naturalmente, nos ta evitá e tipo di asociacion cu por encerá peliger spiritual. (1 Corintionan 15:33) Pero, tog nos ta mustra “bondad humano,” sin despreciá hende cu no tin mésun creencia cu nos.—Echonan 27:3.
20. Kico e ehempel di Jehova i di Jesucristo mester impulsá nos pa haci?
20 Sí, Jehova i Jesucristo tin cada un di nos como personanan digno di respet. Laga nos semper corda con nan ta actua i nos tambe hiba delantera den mustra onor na otro. I laga nos semper corda e palabranan di nos Señor Jesucristo: “Boso tur ta ruman.”—Mateo 23:8.
Con Lo Bo Contestá?
• Con bo mester mira bo compañeronan di adoracion?
• Con e ehempel di Jehova i di Jesus ta impulsá bo pa onra otro hende?
• Con esposo i mayornan por onra otronan?
• Ancianonan ta ser impulsá pa actua den ki maneranan ora nan ta mira compañeronan cristian como nan rumannan?
[Preguntanan di Estudio]
[Plachi na página 18]
Onra bo esposa cu palabranan di aprecio
[Plachi na página 18]
Mustra dignidad na bo yunan dor di scucha nan
[Plachi na página 18]
Trata miembronan di congregacion cu dignidad