Onra Esnan Cu A Ricibi Autoridad Riba Boso

“Onra hende di tur clase, tene amor pa henter e asociacion di rumannan, keda den temor di Dios, duna onor n’e rey.”—1 PEDRO 2:17.

1, 2. Con hende ta mira autoridad awe? I pakico?

“TA MUCHA tin tur derechi. No tin respet pa mayor,” un mama ta lamentá. Un sticker pa bumper ta bisa: “Cuestioná Autoridad.” Eseinan ta apénas dos ehempel cu ta indicá un situacion cu bo mester sa di dje cu ta reina awe. Un falta general di respet pa mayor, maestro, doño di trabou i funcionarionan di gobiernu ta comun na tur parti di mundu.

² Algun hende por djis hisa nan scouder i bisa: ‘Wel, esnan den puesto di autoridad no ta merecé mi respet.’ Tin bes, ta difícil pa nenga esei. Nos ta haña nos confrontá cu un fluho constante di noticia tocante funcionarionan corupto den gobiernu, doño di trabou golos, maestro incompetente i mayornan cu ta maltratá nan yunan. Afortunadamente, masha poco cristian ta mira esnan den puesto di autoridad den e congregacion den e mésun lus ei.—Mateo 24:45-47.

3, 4. Pakico cristiannan mester mustra respet pa esnan den puesto di autoridad?

³ Como cristian, nos tin “motibu obligatorio” pa respetá esnan cu ta ehercé autoridad seglar. Apostel Pablo a amonestá cristiannan pa ta “sumiso na autoridadnan superior, pasobra no tin autoridad sino dor di Dios; e autoridadnan cu ta existí, Dios a pone den nan posicion relativo.” (Romanonan 13:1, 2, 5; 1 Pedro 2:13-15) Tambe Pablo a mustra un motibu válido pa obedecé e autoridadnan den famia: “Esposanan, keda sumiso na boso esposo, pasobra esei ta bunita den Señor. Yunan, sea obediente na boso mayornan den tur cos, pasobra esaki ta masha agradabel den Señor.” (Colosensenan 3:18, 20) Ancianonan di congregacion ta digno di nos onor pasobra ‘e spiritu santu a nombra nan como superintendente, pa pastoreá e congregacion di Dios.’ (Echonan 20:28) Ta debí na nos respet pa Jehova cu nos ta onra autoridad humano. Claro cu onra Jehova su autoridad semper ta bini na promé lugá den nos bida.—Echonan 5:29.

⁴ Cu Jehova su autoridad supremo na mente, laga nos considerá ehempel di algun cu no a respetá esnan den puesto di autoridad i algun cu sí a haci esei.

Falta di Respet Ta Hiba na Desaprobacion

5. Ki actitud di falta di respet Mical a mustra pa David, i na kico esaki a hiba?

⁵ For dje historia di rey David, nos por saca afó con Jehova ta mira esnan cu ta menospreciá e autoridad cu Dios ta duna cierto personanan. Ora David a laga trece e arca di pacto na Jerusalem, su esposa Mical “a mira rey David ta bula i baila rond dilanti di Jehova; i el a cuminsá despreci’é den su curason.” Eigenlijk Mical mester a reconocé David no solamente como e cabes di famia sino tambe como e rey dje pais. Sin embargo, cu sarcasmo el a expresá su sintimentunan:  “Esta glorioso e rey di Israel a comportá su mes awe ora el a exponé su mes awe den bista dje criánan muher di su sirbidónan, net manera un dje hombernan cabes bashí ta exponé su mes completamente!” Un resultado di esaki tabata cu nunca Mical no a haña yu.—2 Samuel 6:14-23.

6. Con Jehova a mira Core su falta di respet pa Jehova su ungínan?

⁶ Un ehempel notorio di no onra lidernan teocrático cu Dios a nombra, tabata esun di Core. Como un kohatita, esta un privilegio grandi e tabatin di por a sirbi Jehova n’e tabernáculo! Tog, el a criticá Moises i Aron, Dios su lidernan ungí dje israelitanan. Core a cera cabes huntu cu otro cabesantenan di Israel i di un manera frepostu el a bisa Moises i Aron: “Henter e asamblea tur ta santu i Jehova ta meimei di nan. Pakico anto, boso mester halsa boso mes riba e congregacion di Jehova?” Con Jehova a mira e actitud di Core i su apoyadónan? Dios a mira nan accion como algu cu ta desonrá Jehova mes. Despues di mira con tera a guli tur persona na nan banda, un candela di parti di Jehova a destruí Core i e 250 cabesantenan.—Númeronan 16:1-3, 28-35.

7. E “apostelnan superfini” tabatin motibu pa criticá Pablo su autoridad?

⁷ Den e congregacion cristian di promé siglo, tabatin personanan cu a falta respet pa autoridad teocrático. E “apostelnan superfini” den e congregacion corintio tabatin un actitud di falta di respet pa Pablo. Nan a criticá su abilidad di papia, bisando: “Su presencia en persona ta débil, i su papiamentu ta despreciabel.” (2 Corintionan 10:10; 11:5) Sea cu Pablo tabata un orador elocuente of no, el a merecé respet como apostel. Pero Pablo su papiamentu di berdad tabata despreciabel? Su discursonan público registrá den Bijbel ta duna evidencia di con convincente e tabata como orador. Sí, como resultado di un combersacion corticu cu Herodes Agripa II, un “experto den tur . . . e puntonan di controversia entre e hudiunan,” Pablo a trece e rey te n’e punto caminda el a bisa: “Den poco tempu lo bo convencé mi pa bira un cristian”! (Echonan 13:15-43; 17:22-34; 26:1-28) Sin embargo, e apostelnan superfini na Corinto a acus’é di ta despreciabel den su papiamentu! Con Jehova a mira nan actitud? Den un mensahe p’e superintendentenan dje congregacion di Efeso, Jesucristo a papia faborablemente di esnan cu a nenga di laga personanan ‘cu a bisa cu nan ta apostel, pero cu no tabata,’ alehá nan.—Revelacion 2:2.

Respet Apesar di Imperfeccion

8. Con David a mustra cu el a onra e autoridad cu Jehova a duna Saul?

⁸ Tin hopi ehempel den Bijbel di hende cu a onra personanan den puesto di autoridad, asta ora esakinan a malusá of abusá di nan autoridad. David tabata un ehempel excelente den esaki. Rey Saul, bou di kende el a sirbi, a bira yalurs riba David su logronan i a trata na mat’é. (1 Samuel 18:8-12; 19:9-11; 23:26) Tog, aunke David a haña oportunidad pa mata Saul, el a bisa: “Di mi parti, mirá for dje punto di bista di Jehova, ta impensabel pa mi saca mi man contra e ungí di Jehova!” (1 Samuel 24:3-6; 26:7-13) David tabata sa cu Saul ta robes, pero el a laga pa Jehova husgu’é. (1 Samuel 24:12, 15; 26:22-24) E no a papia malu cu Saul ni di dje.

9. (a) Con David a sinti ora Saul tabata maltrat’é? (b) Con nos por sa cu David su respet pa Saul tabata sincero?

⁹ E maltrato a afligí David? “Tin . . . tirano cu di berdad ta busca mi alma,” David a sclama na Jehova. (Salmo 54:3) El a deshogá su mes na Jehova: “Libra mi di mi enemigunan, o mi Dios . . . Esnan fuerte ta lansa un atake contra mi, no pa motibu di rebeldia di mi parti, ni ningun  picá di mi parti, o Jehova. Aunke no tin eror, nan ta core bin i prepará nan mes. Lanta, sí, riba mi yamada i mira.” (Salmo 59:1-4) Abo a yega di sinti bo asina, esta, cu bo no a haci un persona den puesto di autoridad nada malu, i tog el a sigui causa dificultad pa bo? David no a keda sin mustra respet pa Saul. Ora Saul a muri, en bes di alegrá riba esei, David a componé un cantica di lamento: “Saul i Jonatan, esnan amabel i esnan agradabel durante nan bida . . . Mas velos cu águila nan tabata, mas poderoso cu leon nan tabata. Yu muhernan di Israel, yora pa motibu di Saul.” (2 Samuel 1:23, 24) Ki un bunita ehempel di respet sincero p’e ungí di Jehova, maske David a pasa mal ratu na man di Saul!

10. Ki ehempel excelente Pablo a pone den onra e autoridad cu Dios a duna e cuerpo gobernante, i na kico esei a hiba?

¹⁰ Den e era cristian tambe nos ta haña ehempel sobresaliente di esnan cu a onra personanan cu Dios a duna como autoridad. Tuma por ehempel Pablo. El a mustra respet p’e decisionnan dje cuerpo gobernante di promé siglo dje congregacion cristian. Durante Pablo su último bishita na Jerusalem, e cuerpo gobernante a conseh’é p’e haci su mes ceremonialmente limpi pa asina e mustra otronan cu e no a carga rencor contra e Ley di Moises. Pablo por a razoná: ‘E rumannan ei a instruí mi anteriormente pa bandoná Jerusalem ora mi bida tabata na peliger. Awor nan kier pa mi demostrá públicamente cu mi ta respetá e Ley di Moises. Mi a skirbi un carta caba n’e galationan consehando nan pa no warda e Ley. Si mi bai n’e tempel, otro hende por malinterpretá mi accion, pensando cu mi ta haci compromiso cu esnan dje clase circuncidá.’ Sin embargo, Pablo evidentemente no a razoná asina. Ya cu esei no a comprometé ningun principio cristian, el a respetá i cumpli cu e conseho dje cuerpo gobernante di promé siglo. E resultado directo tabata cu mester a rescatá Pablo for di un multitud hudiu desordená, i despues di esei el a pasa dos aña den prizon. A lo largu, esei a cumpli cu e boluntad di Dios. Pablo a duna testimonio dilanti oficialnan haltu na Cesarea i despues a ser hibá Roma riba gastu di gobiernu p’e duna testimonio dilanti César mes.—Echonan 9:26-30; 21:20-26; 23:11; 24:27; Galationan 2:12; 4:9, 10.

Abo Ta Mustra Respet?

11. Con nos por mustra respet pa autoridad seglar?

¹¹ Abo ta mustra debido respet na esnan den puesto di autoridad? Bijbel ta manda cristiannan pa “rindi na tur loke ta debí na nan, . . . na esun cu ta exigí onor, tal onor.” Sí, nos sumision na “autoridadnan superior” no ta nificá solamente paga nos belasting sino tambe cu nos ta onra e autoridadnan cu nos conducta i forma di papia. (Romanonan 13:1-7) Ora nos haña nos confrontá cu funcionarionan di gobiernu cu tal bes ta severo, con nos ta reaccioná? Na Estado Chiapas, México, e autoridadnan den un comunidad a kita e tera di plantacion cu tabata pertenecé na 57 famia Testigo di Jehova pa motibu cu e cristiannan aki no a participá den cierto fiestanan religioso. N’e reunionnan cu a ser tené pa solucioná e asuntu, e Testigonan, limpi i nechi bistí, semper a papia cu dignidad i respet. Mas cu un aña despues, e decision a cai na nan fabor. Nan actitud a gana e respet di algun observadó te n’e grado cu nan tambe kier a bira Testigo di Jehova!

12. Pakico ta importante pa tene “respet profundo” pa bo casá incrédulo?

¹² Con bo por mustra respet p’e autoridad cu Dios a pone den famia? Despues di a papia dje ehempel di Jesus den sufri maldad, apostel Pedro a bisa: “Boso, esposanan, di igual manera sea sumiso na boso mes esposo, afin cu, si algun no ta obediente n’e palabra, nan por ser ganá sin un palabra dor dje conducta di nan esposa, debí cu nan tabata testigo ocular di boso conducta decente huntu cu respet profundo.” (1 Pedro 3:1, 2; Efesionan 5:22-24) Aki Pedro a enfatisá con importante ta pa un esposa ta sumiso na su casá cu “respet profundo,” aunke algun esposo kisas ta haci masha poco pa merecé e respet ei. Un actitud respetuoso di un esposa por gana e curason di su casá incrédulo.

13. Con esposanan por onra nan casá?

¹³ Den e contexto dje scrituranan aki, Pedro  ta hala nos atencion n’e ehempel di Sara, kende su casá, Abraham, tabata un ehempel sobresaliente di fe. (Romanonan 4:16, 17; Galationan 3:6-9; 1 Pedro 3:6) Acaso esposanan cu tin casá creyente mester duna nan casá ménos onor cu esposanan cu casá incrédulo ta duna esnan di nan? Kico si bo no ta di acuerdo cu bo casá riba algun asuntu? Jesus a duna algun conseho cu por aplicá aki na un manera general: “Si un hende bou di autoridad ta obligá bo pa haci un miya di sirbishi, bai dos miya cuné.” (Mateo 5:41) Bo ta onra bo esposo dor di bai di acuerdo cu su deseonan? Si esaki ta parce muchu difícil, bis’é con bo ta sinti tocante e asuntu. No asumí cu e sa con bo ta sinti. Pero ora bo ta lagu’é sa bo deseonan, haci esei na un manera respetuoso. Bijbel ta urgi nos: “Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.”—Colosensenan 4:6.

14. Kico ta encerá mustra onor na mayornan?

¹⁴ Kico di boso, muchanan? E Palabra di Dios ta manda: “Yunan, sea obediente na boso mayornan den union cu Señor, pasobra esaki ta hustu: ‘Onra bo tata i bo mama’; cu ta e promé mandamentu cu un promesa.” (Efesionan 6:1-3) Ripará cu ser obediente na bo mayornan ta ser considerá como sinónimo di ‘onra bo tata i bo mama.’ E palabra griego traducí como “onra” tin e nificacion di “premia” of “fiha un balor riba.” Pues, ser obediente ta rekerí mas cu sigui cu mala gana e reglanan di bo mayornan cu por parce irazonabel pa bo. Dios ta pidi bo pa apreciá bo mayornan i duna balor na nan guia.—Proverbionan 15:5.

15. Con yunan por keda mustra respet asta ora nan ta sinti cu nan mayornan a cometé un ekibocacion?

¹⁵ Si bo mayornan haci algu cu tin tendencia di mengua bo respet pa nan, kico pa haci? Purba mira cos for di nan punto di bista. No ta nan a “causa bo nacementu” i a percurá pa bo? (Proverbionan 23:22) No ta amor pa bo ta motivá nan? (Hebreonan 12:7-11) Papia cu bo mayornan cu respet, splicando nan den un spiritu di  suavedad con bo ta sinti. Asta ora nan respondé na un manera cu bo no ta gusta, abstené bo di papia cu falta di respet pa nan. (Proverbionan 24:29) Corda con David a keda mustra respet na Saul asta ora e rey no tabata sigui Dios su conseho mas. Pidi Jehova yuda bo trata cu bo sintimentunan. “Deshogá boso curason dilanti dje,” David a bisa. “Dios ta un refugio pa nos.”—Salmo 62:8; Lamentacionnan 3:25-27.

Onra Esnan Cu Ta Hiba Delantera

16. Kico nos por siña for dje ehempel dje maestronan falsu i e angelnan?

¹⁶ Aunke ancianonan di congregacion ta nombrá pa spiritu santu, tog nan ta imperfecto i ta cometé fayo. (Salmo 130:3; Eclesiástes 7:20; Echonan 20:28; Santiago 3:2) Como resultado, algun persona den e congregacion por sinti nan malcontentu cu e ancianonan. Con nos mester reaccioná ora nos ta haña cu e ancianonan no ta atendé un asuntu den e congregacion na un forma corecto, of por lo ménos asina ta parce? Ripará e contraste entre e maestronan falsu di promé siglo i e angelnan: “Tribí, cabesura, [e maestronan falsu] no ta tembla dilanti di esnan glorioso sino ta papia ofensivamente, miéntras cu angel, aunke nan ta mas grandi den forsa i poder, no ta trece contra nan un acusacion den términonan ofensivo, no haciendo asina pa respet pa Jehova.” (2 Pedro 2:10-13) Miéntras e maestronan falsu tabata papia ofensivamente di “esnan glorioso”—ancianonan cu a haña autoridad den e congregacion cristian di promé siglo—e angelnan no a papia ofensivamente dje maestronan falsu cu tabata causa desunion entre e rumannan. E angelnan, cu tin un posicion superior i un sentido mas skerpi di husticia cu hende, tabata na haltura di loke tabata tuma lugá den e congregacion. Tog, debí na nan “respet pa Jehova,” nan a laga e huicio den man di Dios.—Hebreonan 2:6, 7; Hudas 9.

17. Ki papel bo fe ta hunga ora bo ta trata cu problemanan caminda bo ta haña cu e ancianonan no tin rason?

¹⁷ Asta ora e ancianonan no atendé un asuntu den e forma cu nan mester hacié, nos no mester tin fe den Jesucristo como e Cabes bibu dje congregacion cristian? Acaso e no ta conciente di loke ta pasando den su mes congregacion mundial? Nos no mester respetá su manera di atendé e situacion i reconocé su abilidad pa controlá asuntunan? Realmente, ‘ken nos ta pa husga nos próhimo?’ (Santiago 4:12; 1 Corintionan 11:3; Colosensenan 1:18) Pakico no trece bo preocupacionnan dilanti Jehova den bo oracionnan?

18, 19. Kico bo por haci ora bo ta sinti cu un anciano a faya?

¹⁸ Pa motibu di imperfeccion humano, por surgi dificultad of problema. Por sosodé asta cu un anciano ta faya, i pone algun ruman sinti nan molestiá. E echo cu nos ta actua purá bou  dje circunstancianan ei lo no cambia e situacion. Pió so e por haci e problema bira. Esnan cu tin dicernimentu spiritual lo spera riba Jehova pa rectificá cosnan i duna cualkier disiplina cu por ta necesario na su debido tempu i manera.—2 Timoteo 3:16; Hebreonan 12:7-11.

¹⁹ Kico si un of otro asuntu ta afligí bo? En bes di papia cu otro hende den congregacion, pakico no acercá e ancianonan respetuosamente i pidi nan yudansa? Sin ser crítico, splica con e asuntu a afectá bo. Semper mustra “sintimentu di compañero” na nan, i mantené respet miéntras bo ta confia nan e asuntu. (1 Pedro 3:8) No bira sarcástico, sino confia den nan madures cristian. Apreciá cualkier animacion bíblico cu nan por ofrecé bo bondadosamente. I si ta parce cu otro medidanan ta necesario pa drecha e asuntu, tene confiansa cu Jehova lo guia e ancianonan pa haci loke ta hustu i corecto.—Galationan 6:10; 2 Tesalonicensenan 3:13.

20. Kico nos ta bai considerá den e siguiente artículo?

²⁰ Sin embargo, tin un otro aspecto pa considerá relacioná cu onra i respetá esnan cu ta den un puesto di autoridad. Esnan cu ser poné den un puesto asina no mester respetá e personanan cu ta bou di nan cuido? Laga nos examiná esei den e siguiente artículo.

Con Lo Bo Contestá?

• Ki bon motibu nos tin pa onra esnan cu tin autoridad?

• Con Jehova i Jesus ta mira esnan cu no ta respetá e autoridad cu Dios a duna cierto personanan?

• Ki ehempelnan sobresaliente nos tin di esnan cu a onra personanan cu tabatin autoridad?

• Kico nos por haci si ta parce cu un persona cu tin autoridad riba nos a faya?

[Preguntanan di Estudio]

[Plachi na página 12]

Sara a respetá Abraham su autoridad profundamente i tabata felis

[Plachi na página 13]

Mical no a respetá David su autoridad como cabes di famia i rey

[Plachi na página 15]

“Di mi parti, . . . ta impensabel pa mi saca mi man contra e ungí di Jehova!”

[Plachi na página 16]

Pakico no trece bo preocupacionnan dilanti Jehova den bo oracionnan?