Pakico Vence Perfeccionismo?

Semper bo ta haci hopi esfuerso pa haci lo mihó cu bo por? Ta claro cu ora bo ta haci esei bo por beneficiá bo mes i esnan rond di bo den hopi manera. Na otro banda, algun hende a bai te den extremo i a bira perfeccionista. Kico esei ta encerá?

WEL, un nificacion di e palabra “perfeccionismo” ta “un inclinacion di mira tur cos cu no ta perfecto como inaceptabel.” Casi sigur bo a yega di topa hende cu e caracter ei. Bo por mira cu e exigencianan extremo cu nan ta pone riba otronan por causa hopi problema, creando un ambiente di malcontentu i di desanimacion. Mayoria di hende balansá ta reconocé cu perfeccionismo, den e sentido di exigí cosnan extremo i irazonabel den tur aspecto di bida, no ta algu realmente deseabel. E ta algu cu mester vence. Sin embargo, un problema ta cu na momento cu ta trata di nos mes actitud of caracter, por ta difícil pa reconocé un tendencia den direccion di tal perfeccionismo i p’esei e ta un desafio pa venc’é.

Nelson tin masha hopi responsabilidad i hopi problema pa solucioná. Regularmente e ta analisá estadísticanan, i produccion ta un prioridad p’e. Hopi bes hende ta mira perfeccionismo como necesario pa por tin éxito riba un mercado di trabou cu hopi competencia. Apesar cu algun hende kisas ta apreciá Nelson su eficiencia, su perfeccionismo ta caus’é problema físico, manera dolor di cabes i stres. Bo ta mira e característicanan di Nelson den bo mes?

Perfeccionismo ta afectá hóbennan tambe. Na mucha, Rita, di Rio de Janeiro, tabata gusta bai scol. E tabata purba pa no parce ambicioso, pero tog e tabata keda aplastá ora e no haña punto haltu. Rita ta bisa: “Desde mi infancia, mi tabata compará mi mes cu otronan cu tabatin hopi tempu, miéntras ami semper tabatin stres i tabata pura pa haci cosnan. Nunca mi a sinti cu mi tabatin tempu pa sosegá pasobra semper tabatin cos cu mester haci.”

 Ora Maria tabata mucha chikitu, e tabata yora di frustracion ora e no por a pinta mes bon cu otro mucha. Ademas, den su búskeda pa perfeccion artístico den música, hopi bes el a haña stres i a preocupá en bes di disfrutá di su tocamentu i cantamentu. Un otro mucha muher brazileño, Tânia, kende a purba di ta discreto i evitá competencia, a admití cu tog e tabata pone norma pa su mes cu tabata muchu haltu, tantu na scol como na cas. E tabata sinti cu si su trabou no tabata perfecto, hende lo no a gust’é mashá. Ademas, tin bes Tânia tabata spera demasiado di otronan, loke tabata lagu’e sinti decepcioná i tristu.

Apesar cu competencia, diligencia i un sentido di satisfaccion personal ta importante, sintimentunan negativo, manera miedu di fracaso, por ta e resultado di pone metanan inalcansabel. Mayornan of otronan por pone norma di perfeccion pa tareanan di scol of den deporte cu hóbennan ta haña difícil pa alcansá. Por ehempel, Ricardo su mama tabatin expectativanan haltu p’e, deseando p’e bira dokter, siña toca piano i papia diferente idioma. Bo por mira cu e actitud aki ora e ta extremo tin mas chens di trece problema i decepcion cuné?

Pakico Evitá Perfeccionismo?

Trabou di calidad superior, alcansá normanan haltu di precision i excelencia, ta den demanda. P’esei hende mester competí riba mercado di trabou. Un otro factor cu ta pone hopi hende haci mas i mas esfuerso ta miedu di perde nan medio di sostené nan mes. Algun trahadó ta bira manera e atleta cu ta haci sacrificionan extremo pa pone un récord nobo. Anto ora e hañ’é confrontá cu competencia pisá, e por sintié obligá na entrená mas ainda, kisas usando substancianan kímico pa mehorá i—e ta spera—pa gana. En bes di purba alcansá excelencia na un manera saludabel, perfeccionismo su motivacion ta “miedu di fracasá” of “pa ta number unu.”—The Feeling Good Handbook (E Manual Con pa Sinti Bon).

Ta cierto cu algun hende ta sinti cu loke nan ta haci den arte of deporte semper por mehorá. Tog segun dr. Robert S. Eliot, “perfeccionismo ta expectativa cu nunca por realisá.” E ta agregá: “E ta consistí di culpa, ser defensivo i miedu di cherche.” P’esei mes, ki cierto ta e palabranan di e rey sabí Sálomon: “Mi mes a mira tur e trabou duru i tur e abilidad sobresaliente den trabou, cu e ta nificá e rivalidad di un pa cu otro; esaki tambe ta banidad i un corementu tras di bientu.”—Eclesiástes 4:4.

Kico bo por haci si bo ta incliná di ta perfeccionista? No ta berdad cu mas esfuerso bo haci, mas decepcioná bo ta keda? Bo ta deseá di ta ménos exigente i mas relahá? Kico ta nificá ser perfecto? Bo no ta deseá di usa bo pleno potencial pero evitando perfeccionismo? Si hende imperfecto por usa nan abilidadnan cu Dios a duna nan pa descubrí cosnan pa e beneficio di otronan, imaginá bo kico humanidad lo por logra bou di condicionnan perfecto i guia divino!

[Plachi na página 4]

Mayornan of otro hende por exigí perfeccion cu hóbennan no por alcansá