Ta Urgi e di 108 Klas di Galad pa Rindi Sirbishi Sagrado

BIJBEL ta usa e expresion “sirbishi sagrado” hopi bes pa referí na adoracion di Dios. E ta bini for di un palabra griego cu ta referí na rindi sirbishi na Dios. (Romanonan 9:4) E 5.562 personanan cu a scucha e programa di graduacion dje di 108 klas dje Scol Bíblico di Galad di Watchtower a tende e oradornan duna conseho práctico cu lo bai yuda e graduadonan rindi sirbishi sagrado aceptabel na Jehova Dios. *

Theodore Jaracz, miembro dje Cuerpo Gobernante di Testigonan di Jehova, a sirbi como presidente. E programa a cuminsá cu cantica 52, “E Nomber di Nos Tata.” E di dos cuplet dje cantica ei ta bisa: “Tur manera nos ke halsa bo mes nomber único.” E palabranan ei sigur a expresá e deseo sincero dje graduadonan dje klas (cu a bini di 10 pais) pa usa nan entrenamentu den nan asignacion di misionero. Nan lo bai 17 diferente pais.

Den su introduccion, ruman Jaracz a hala atencion n’e cincu lunanan di studio di Bijbel intensivo cu a prepará nan pa sirbishi den campo stranhero. Esaki a yuda nan “haci sigur di tur cos,” esta, scudriñá den lus dje Palabra di Dios loke nan a siña anteriormente, i “tene firme na loke ta excelente.” (1 Tesalonicensenan 5:21) El a animá nan pa pega fielmente na Jehova, na su Palabra i n’e asignacion pa cua nan a ser entrená. Kico lo yuda nan segun cu nan ta haci tur esaki?

Conseho Práctico pa Rindi Sirbishi Sagrado

Lon Schilling, miembro dje Comité di Funcionamentu di Betel, a papia riba e tema “Lo Bo Pasa e Test di Razonabilidad?” El a resaltá e balor di ta razonabel, cu na su turno ta reflehá sabiduria divino. (Santiago 3:17) Ser razonabel ta encerá ser flexibel, imparcial, moderá, comprensivo i tene pacenshi. “Hende razonabel ta balansá den nan trato cu otronan. Nan no ta bai den extremo,” ruman Schilling a bisa. Kico por yuda un misionero p’e ta razonabel? Tene un punto di bista modesto di bo mes, probechá di oportunidad pa scucha i siña for di otro hende i ta dispuesto pa tene cuenta cu punto di bista di otro hende pero sin comprometé principionan divino.—1 Corintionan 9:19-23.

“No Lubidá di Come!” tabata e título intrigante dje siguiente parti riba programa cu Samuel Herd, un otro miembro dje Cuerpo  Gobernante, a presentá. El a resaltá e balor di tin un bon dieta spiritual pa por keda den bon condicion pa rindi sirbishi sagrado. Ruman Herd a bisa: “Asina cu boso cuminsá den boso asignacion di predicá i siña, boso actividad spiritual lo crece. P’esei, lo bai ta necesario pa boso aumentá loke boso ta come na alimento spiritual pa asina boso por balansá i mantené boso fortalesa.” Un dieta constante di alimento spiritual por yuda un misionero prevení depresion spiritual i heimwee. E ta contribuí na contentamentu i n’e determinacion pa pega na bo asignacion di sirbishi sagrado.—Filipensenan 4:13.

Lawrence Bowen, instructor di Galad, a animá e studiantenan cu a gradua pa “Bai Bek na Principio.” Kico e tabata kier men? El a pidi henter e auditorio busca Proverbionan 1:7, cu ta bisa: “E temor di Jehova ta e principio di conocimentu.” E orador a splica: “Cualkier cos cu ta ignorá e realidad primordial di Jehova su existencia, nunca por cualificá realmente como berdadero conocimentu ni hiba na bon comprendimentu.” Ruman Bowen a compará e detayenan den e Palabra di Dios, Bijbel, cu e pidanan di un puzel. Ora pone e pidanan huntu bo ta haña un cuadro. Mas tantu pida bo pega, mas grandi i  mas cla e cuadro ta bira i mas aprecio un hende ta haña. Esaki por yuda tur hende rindi sirbishi sagrado na Dios.

Wallace Liverance, secretario dje Scol di Galad, tabatin e último discurso den e seri aki. Su tema tabata “Ofrecé Gradicimentu Como Bo Sacrificio na Dios.” El a hala atencion n’e relato caminda Jesus a cura dies leproso. (Lucas 17:11-19) Un so a bolbe bek pa alabá Dios i gradicí Jesus. “Sin duda, e otronan tabata emocioná cu nan a cura. Nan tabata contentu cu nan a bira limpi, pero parce cu e único cos cu nan tabata kier ta pa e sacerdote declará nan limpi,” ruman Liverance a remarcá. E limpiesa spiritual cu ta resultá dor di siña e berdad, combiná cu gradicimentu, mester motivá un persona pa yama Dios danki pa su bondad. E studiantenan dje di 108 klas di Galad a haña animacion pa meditá riba tur Dios su actividadnan i bondad pa asina nan por reflehá nan gradicimentu na Dios mediante nan sirbishi i sacrificionan.—Salmo 50:14, 23; 116:12, 17.

Experencia i Entrevistanan Cu Ta Mustra Con pa Hacié

Mark Noumair, un otro instructor di Galad, a dirigí e siguiente parti dje programa. E parti a trata experencianan cu e klas tabatin den sirbishi di veld durante e periodo di nan entrenamentu. Como promedio, e studiantenan a dedicá rond di 12 aña den e ministerio di tempu completo promé cu nan a bin Galad. Miéntras nan tabata n’e scol, nan a cuminsá hopi studio bíblico cu personanan di diferente antecedente. Esaki a mustra cu e studiantenan tabata sa con pa “bira tur cos pa tur clase di hende.”—1 Corintionan 9:22.

Despues dje experencianan dje studiantenan, Charles Molohan i William Samuelson a entrevistá algun miembro dje famia di Betel i superintendente biahero cu a bai scol di Galad. Un ruman homber cu nan a entrevistá, Robert Pevy, a sirbi na Filipínas despues di a gradua dje di 51 klas di Galad. El a recordá e klas: “Ki ora cu tin un problema, tur hende ta duna nan sugerencia con pa solucioná e problema. Semper tin un hende mas sabí cu bo, un hende cu ta bini cu un mihó idea. Pero si bo wak den Bijbel i purba haña Dios su punto di bista riba un asuntu, niun hende lo no tin un mihó sugerencia cu esei. Esei semper lo ta e mihó contesta.”

Pa completá e excelente programa spiritual, John Barr, miembro dje Cuerpo Gobernante, a papia riba e tema “Rindi Sirbishi Sagrado Aceptabel na Jehova.” El a mustra con por reflehá sirbishi sagrado den e ministerio di veld pa yuda personanan di curason recto adorá Dios den un manera aceptabel. Despues di a acudí n’e palabranan di Jesus na Mateo 4:10, ruman Barr a bisa: “Si nos kier adorá Jehova so, nos tin cu evitá tur forma sutil di idolatria, manera golosidad, deseo pa rikesa i recomendá bo mes como esun mihó. Nos ta bira masha contentu ora nos pensa cu nos misioneronan for di principio di añanan 1940 bini abou, a establecé un registro excelente den e aspecto aki! I nos tin sigur cu boso, graduadonan dje di 108 klas di Galad, lo sigui nan bon ehempel. Boso ta bai rindi sirbishi sagrado na Jehova, kende ta e único persona digno di ricibié.”

E discurso ei tabata ègt un culminacion positivo di un programa edificante. Anto tabata ora pa tende cumindamentu i felicitacion for di hende rond mundu, pa parti diploma i pa lesa un carta den cua e klas ta expresá aprecio p’e entrenamentu cu nan a ricibí. A urgi e klas dje graduadonan pa manifestá e cualidad di pega tenasmente na nan asignacion i den sirbi Jehova. Tur esnan presente, incluso e bishitantenan for di 25 pais, a uni pa finalisá e programa cu cantica i oracion.

[Nota]

[Kuadro na página 23]

ESTADISTICANAN DJE KLAS

Cantidad di pais representá: 10

Cantidad di pais na cua a asigná nan: 17

Cantidad di alumno: 46

Edad promedio: 34

Promedio di aña den berdad: 16

Promedio di aña den e ministerio di tempu completo: 12

[Plachi na página 24]

E di 108 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.