Bo Ta Beneficiá for di Bon Ehempelnan?

“BOSO a bira un ehempel pa tur e creyentenan di Macedonia i di Acaya.” Apostel Pablo a skirbi e palabranan aki na cristiannan fiel cu tabata biba na Tesalónica. E ehempel cu nan a pone pa compañeronan creyente, di berdad tabata encomendabel. Asina mes, e tesalonicensenan tabata siguiendo e ehempel cu Pablo i su socionan a pone. Pablo a bisa: “E bon nobo cu nos ta predicá no a resultá di ta entre boso cu papiamentu so, sino tambe cu poder i cu spiritu santu i conviccion fuerte, mescos cu boso sa ki sorto di hende nos a bira pa boso pa causa di boso; i boso a bira imitadó di nos.”—1 Tesalonicensenan 1:5-7.

Sí, Pablo a haci mas cu predicá sermon so. Su bida mes tabata un sermon: un ehempel di fe, awante i sacrificio propio. Debí na esaki, Pablo i su socionan a bira un influencia poderoso den bida dje tesalonicensenan, loke a impulsá nan pa aceptá e berdad “bou di hopi tribulacion.” Pero, no ta Pablo cu su colaboradónan so tabata e único influencia positivo riba e creyentenan ei. E ehempel di otro cristiannan cu a wanta tribulacion tambe tabata un animacion. Pablo a skirbi e tesalonicensenan: “Boso a bira imitadó, rumannan, dje congregacionnan di Dios cu ta den Hudea den union cu Cristo Jesus, pasobra boso tambe a cuminsá sufri na man di boso mes paisanonan e mésun cosnan cu nan tambe ta sufri na man dje hudiunan.”—1 Tesalonicensenan 2:14.

Cristo Jesus—E Ehempel Principal

Aunke Pablo mes a pone un ehempel digno di imitacion, e no a keda sin mustra riba Jesucristo como e ehempel principal cu cristiannan mester sigui. (1 Tesalonicensenan 1:6) Cristo tabata i ta nos Ehempel principal. Apostel Pedro a skirbi: “P’e curso aki boso a ser yamá, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.”—1 Pedro 2:21.

Sin embargo, Jesus a terminá su bida como hende casi 2.000 aña pasá. Awor e “ta biba den lus inacercabel” como un criatura spiritual inmortal. Como tal, ‘ningun hende no a mira ni por mir’é.’ (1 Timoteo 6:16) Con anto nos por imit’é? Un manera ta dor di studia e cuater relatonan bíblico tocante e bida di Jesus. E Evangelionan ta duna un comprendimentu penetrante di su personalidad, curso di bida i “actitud mental.” (Filipensenan 2:5-8) Nos por haña mas comprendimentu dor di studia cuidadosamente e buki E homber mas importante cu hamás a biba, cu ta trata e sucesonan di Jesus su bida cu luho di detaye i den órden cronológico. *

Jesus su ehempel di sacrificio propio tabatin un efecto profundo riba apostel Pablo. El a bisa e cristiannan di Corinto: “Di mi parti cu muchu gustu lo mi gasta i keda completamente gastá pa boso alma.” (2 Corintionan 12:15) Esta parecido na e actitud di Cristo! Segun cu nos ta contemplá e ehempel perfecto di Cristo, nos tambe tin cu ser impulsá pa imit’é den nos propio bida.

Por ehempel, Jesus a siña nos cu nos mester confia den Dios su promesa cu lo e percurá pa nos materialmente. Pero Jesus a haci mas  cu esei. E mes a demostrá e tipo di fe i confiansa ei den Jehova riba un base diario. El a bisa: “Zoronan tin cueba i paranan di shelu tin lugá di sosegá, pero e Yu di hende no tin lugá pa pone su cabes.” (Mateo 6:25; 8:20) Preocupacionnan material ta dominá bo pensamentu i accionnan? Of bo bida ta duna evidencia cu bo ta buscando e Reino promé? I ke tal di bo actitud pa cu e sirbishi di Jehova? E ta mescos cu esun di nos Ehempel principal, Jesus? Bijbel ta mustra cu Jesus no a djis predicá tocante celo, sino a demostrá tambe celo ardiente na hopi ocasion. (Juan 2:14-17) Ademas, esta un excelente ehempel Jesus a pone pa loke ta amor! Sí, el a sacrificá su mes bida pa su disipelnan! (Juan 15:13) Abo ta imitá Jesus dor di mustra amor na bo rumannan cristian? Of bo ta permití imperfeccion di algun ruman stroba bo di stima nan?

Nos lo cai chikí hopi bes den nos esfuerso pa sigui e ehempel di Cristo. Pero Jehova sigur ta keda contentu cu nos esfuerso pa “bisti e Señor Jesucristo.”—Romanonan 13:14.

“Ehempel p’e Tou”

Tin personanan den e congregacion djawe cu por sirbi como ehempel pa nos? Sigur cu sí! Foral ruman hombernan nombrá den puestonan di responsabilidad mester ta un ehempel. Pablo a bisa Tito, kende a sirbi congregacionnan na Creta i a nombra superintendente, cu cada anciano nombrá mester ta un “homber liber di acusacion.” (Tito 1:5, 6) Apostel Pedro tambe a urgi “ancianonan” pa bira “ehempel p’e tou.” (1 Pedro 5:1-3) I kico di esnan cu ta sirbi como sirbidó ministerial? Nan tambe mester ta “hombernan cu ta sirbi di un manera excelente.”—1 Timoteo 3:13.

Claro cu no ta realístico pa verwagt cu tur anciano of sirbidó ministerial lo ta sobresalientemente ábil den tur aspecto dje ministerio cristian. Pablo a bisa e cristiannan na Roma: “Nos tin donnan distinto segun e bondad inmerecí duná na nos.” (Romanonan 12:6) Rumannan distinto ta sobresalí riba terenonan distinto. No ta razonabel pa verwagt cu ancianonan lo haci i bisa tur cos den un manera perfecto. Bijbel ta bisa na Santiago 3:2: “Nos tur ta trompecá hopi biaha. Si un hende no ta trompecá den palabra, esaki ta un hende perfecto, capas pa frena tambe henter su curpa.” Ma, apesar di nan imperfeccionnan, tog ancianonan por, mescos cu Timoteo, “bira ehempel pa esnan fiel den papiamentu, den conducta, den amor, den fe, den decencia.” (1 Timoteo 4:12) Ora ancianonan ta haci esei, esnan den e tou lo aplicá di buena gana e conseho di Hebreonan 13:7: “Corda esnan cu ta hibando delantera entre boso, . . . i segun boso ta contemplá e resultado di nan conducta, imitá nan fe.”

Otro Ehempelnan di Nos Tempu

Durante e último par di décadanan, un cantidad incontabel di otro hende a demostrá cu nan ta bon ehempel. Kico dje miles di misioneronan kendenan cu un spiritu di sacrificio propio “a bandoná cas of rumannan homber of rumannan muher of tata of mama of yunan of terenonan” pa cumpli cu e comision cristian den estranheria? (Mateo 19:29) Considerá tambe superintendentenan biahero i nan casá, e homber i muhernan cu ta sirbi como boluntario na e oficinanan di Sociedad Watch Tower i e pioneronan cu ta sirbi e congregacionnan. E ehempelnan ei por motivá otro hende? Un evangelisadó cristian na Asia ta corda un misionero for dje di ocho klas dje Scol Bíblico di Galad di Watchtower. El a bisa cu e ruman fiel aki tabata “dispuesto pa enfrentá e gran cantidad di sangura i e humedad sofocante. . . . Mas impresionante ainda tabata su abilidad di haci presentacionnan tantu na idioma chines como malayo aunke e tabata di Inglatera.” Cua tabata e efecto dje  ehempel excelente aki? E ruman a bisa: “Su trankilidad i confiansa a inspirá mi di kier a bira misionero ora mi bira grandi.” No ta un sorpresa cu e ruman aki a bira misionero tambe.

E Index di Publicacionnan Watch Tower tin un lista largu di historia di bida cu a sali den e revistanan Toren di Vigilancia i Spierta! E relatonan aki ta conta di personanan cu a bandoná carera i metanan mundano, superá debilidadnan, haci cambionan drástico di personalidad, mantené un actitud positivo apesar di contratempu i cu a desplegá diligencia, awante, lealtad, humildad i un spiritu di sacrificio propio. Un lector a skirbi en cuanto e relatonan aki: “Nan ta haci mi un cristian mas humilde i gradicidu ora mi lesa kico otronan a pasa aden, i nan a yuda mi pa no pensa muchu di mi mes of ser egoista.”

Ademas, no lubidá e ehempelnan excelente cu tin den bo mes congregacion: cabesnan di famia cu consistentemente ta soru pa tantu e necesidadnan material como spiritual di nan famia; rumannan muher—entre nan mamanan soltero—cu ta manehá e preshonnan di cria yu i tog na mésun tempu ta participá activamente den e ministerio; esnan di edad i esnan enfermo cu ta sigui fiel apesar di creciente debilidad i problema cu salú. E ehempelnan ei no ta conmové bo?

Ta berdad cu mundu ta yen di mal ehempel. (2 Timoteo 3:13) No obstante, considerá e apelacion urgente cu Pablo a haci riba cristiannan cu tabata biba den Hudea. Despues di a relatá tocante e comportacion ehemplar di hopi homber i muher di fe di antiguo, apostel Pablo a urgi nan: “Pues anto, dor cu nos tin un nubia asina grandi di testigo rond di nos, laga nos tambe . . . core e careda cu ta poné dilanti nos cu awante, miéntras nos ta mira atentamente n’e Agente Principal i Perfeccionador di nos fe, Jesus.” (Hebreonan 12:1, 2) Cristiannan awe tambe ta rondoná pa un ‘nubia grandi’ di bon ehempel, tantu di antiguo como di tempu actual. Di berdad bo ta beneficiando for di nan? Bo por, si bo ta decididu pa no ser “imitadó di loke ta malu, sino di loke ta bon.”—3 Juan 11.

[Nota]

[Komentario na página 20]

No ta realístico pa verwagt cu tur anciano of sirbidó ministerial lo ta sobresalientemente ábil den tur aspecto dje ministerio cristian

[Plachinan na página 21]

Ancianonan mester ta “ehempel p’e tou”