Unda Bo Por Haña Pas Interno?

Tin hopi diferencia entre nos tempu cu esun di Thoreau, mencioná den e artículo anterior. Un diferencia principal ta cu awe tin conseho na granèl riba con pa haña pas mental. Sicólogo i escritornan di buki di guia pa desaroyo i adelanto personal—asta columnista di korant—ta ofrecé nan ideanan. Tal bes nan conseho por yuda un tiki riba término corticu; pero pa solucionnan di término largu, algu mas profundo ta necesario. Esei ta loke e personanan mencioná den e artículo anterior a descubrí.

ANTÔNIO, Marcos, Gerson, Vania i Marcelo, cada un tabatin nan mes antecedente i nan mes problemanan. Pero nan tabatin por lo ménos tres cos en comun. Di promé, un tempu nan “no tabatin speransa i tabata sin Dios den mundu.” (Efesionan 2:12) Di dos, nan tabata anhelá pas mental. I di tres, nan tur a haña e pas interno cu nan tabata kier, despues cu nan a aceptá un studio di Bijbel cu Testigonan di Jehova. Segun cu nan a progresá, nan a bin realisá cu Dios ta interesá den nan. En berdad, manera Pablo a bisa e atenonan di su tempu, Dios “no ta leu for di cada un di nos.” (Echonan 17:27) Si bo ta  sinceramente convencí di esaki, lo e ta un factor determinante pa bo haña pas interno.

Pakico Asina Tiki Pas?

Bijbel ta duna dos motibu básico pakico no tin pas na mundu—sea ta pas interno of pas entre hende. Jeremías 10:23 ta splica e promé: “E caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” Hende no tin ni e sabiduria ni e pre-vision pa goberná su mes sin yudansa, i e único yudansa cu tin berdadero balor ta bini di Dios. Hende cu no ta busca Dios su guia hamas lo logra haña pas duradero. E di dos motibu p’e falta di pas ta bisto for dje palabranan di apostel Juan: “Henter e mundu ta drumí den poder dje malbado.” (1 Juan 5:19) Sin guia divino, e actividadnan di Satanas, e “malbado” invisibel pero masha real—i masha poderoso—semper lo frustra hende su esfuersonan pa alcansá pas.

P’e dos motibunan aki—esta cu mayoria hende no ta busca e guia di Dios i cu Satanas ta masha activo den mundu—e rasa humano den su totalidad ta den un condicion miserabel. Apostel Pablo a duna un bon descripcion di esei: “Henter e creacion ta sigui suspirá huntu i keda den dolor huntu te awor.” (Romanonan 8:22) Ken por desmentí e evaluacion ei? Den tantu nacion ricu como pober, problema di famia, crímen, inhusticia, conflicto di personalidad, insiguridad económico, odio entre tribu i odio étnico, opresion, enfermedad i hopi mas, ta stroba hende di haña pas mental.

Unda pa Haña Pas Interno

Ora Antônio, Marcos, Gerson, Vania i Marcelo a studia e Palabra di Dios, Bijbel, nan a siña cosnan cu a cambia nan bida. Na promé lugá, nan a siña cu un dia e situacion di mundu lo ta diferente. Esaki no ta djis un speransa vago cu al final tur cos lo sali bon. E ta un confiansa real, bon fundá cu Dios tin un propósito pa humanidad i cu awor aki mes nos por beneficiá dje propósito ei si nos haci su boluntad. Nan a aplicá den nan bida loke nan a siña for di Bijbel, i cos a bai mihó pa nan. Nan a haña mas felicidad i pas cu nan a pensa tabata posibel.

Antônio no ta enbolbí mas den protesta i conflicto laboral. E sa cu cambionan producí den e manera ei ta solamente limitá i temporal. E ex-lider sindical aki a siña tocante e Reino di Dios. Ta e Reino cu miyones di hende ta pidi p’e den oracion ora nan ta resa e Oracion di Nos Tata i ta bisa Dios: “Ku Bo reino bin.” (Mateo 6:10a, Beibel Santu) Antônio a siña cu e Reino di Dios ta un berdadero gobiernu celestial cu lo trece pas genuino pa humanidad.

Marcos a siña pone na práctica Bijbel su conseho sabí riba e asuntu di matrimonio. Como resultado, awor e ex-político aki ta felismente reuní cu su esposa. E tambe ta anhelá e tempu, cu lo bini pronto, ora e Reino di Dios lo remplasá e sistema dje mundu golos i egoista aki pa unu mihó. E tin un comprendimentu muchu mas profundo dje frase den e Oracion di Nos Tata cu ta bisa: “Ku Bo boluntat sosodé na tera meskos ku den shelu.” (Mateo 6:10b, BS) Ora e boluntad di Dios sosodé na tera, hende lo experimentá un calidad di bida nunca bisto promé.

Kico di Gerson? E no ta un bagamundu ni ladron mas. Awor e bida dje ex-mucha di caya aki tin nificacion pasobra e ta usa su energia pa yuda otronan haña pas interno. Manera  e experencianan aki ta mustra, studia Bijbel i aplicá loke e ta bisa por haci cambio grandi den un persona su bida pa lo mihó.

Pas Interno den un Mundu Turbulento

E figura central histórico den e realisacion di Dios su boluntad ta Jesucristo, i ora hende studia Bijbel cu Testigonan di Jehova, nan ta siña hopi cos tocante dje. Riba e anochi cu el a nace, angelnan a canta alabansa na Dios: “Gloria den haltura na Dios, i riba tera pas entre hende di bon boluntad.” (Lucas 2:14) Ora Jesus a crece, e tabata preocupá pa mehorá bida di hende. El a comprendé nan sintimentunan i a mustra compasion extraordinario pa esnan afligí i enfermo. I, na armonia cu e palabranan dje angelnan, el a trece un midí di pas interno pa hende mansu. Na final di su ministerio, el a bisa su disipelnan: “Mi ta laga pas cu boso, mi ta duna boso mi pas. Mi no ta dun’é na boso e manera cu mundu ta dun’é. No laga boso curason keda molestiá ni no lagu’e krimp di miedu.”—Juan 14:27.

Jesus tabata mas cu un persona humanitario. El a compará su mes cu un wardadó di carné, i el a compará su siguidónan mansu cu carné ora el a bisa: “Ami a bini pa nan haña bida i hañ’é na abundancia. Ami ta e wardadó excelente; e wardadó excelente ta entregá su alma na fabor dje carnénan.” (Juan 10:10, 11) Sí, na contraste cu asina tantu lider awe cu ta wak promé i principalmente pa nan mes, Jesus a duna su bida pa su carnénan.

Con nos por beneficiá for di loke Jesus a haci? Hopi hende conocé e palabranan: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Ehercé fe den Jesus ta rekerí, na promé lugá, conocimentu di dje i di su Tata, Jehova. Conocimentu di Dios i Jesucristo por hiba na un relacion íntimo cu Jehova Dios cu lo yuda nos logra pas mental.

Jesus a bisa: “Mi carnénan ta scucha mi bos, i mi conocé nan, i nan ta sigui mi. I mi ta duna nan bida eterno, i di ningun manera nan lo no ser destruí nunca, i ningun hende lo ranca nan for di mi man.” (Juan 10:27, 28) Palabranan alentador i consolador! Ta cierto cu Jesus a expresá nan casi dos mil aña pasá, pero nan tin mes tantu forsa awe cu nan tabatin e tempu ei. Nunca lubidá cu ainda Jesucristo ta bibu i activo, gobernando awor como e Rey entronisá di Dios su Reino celestial. Mescos cu tempu el a cana riba tera hopi aña pasá, ainda e ta interesá den e mansunan cu ta anhelá pas mental. Ademas, ainda e ta e Wardadór di su carnénan. Si nos siguié, lo e yuda nos gana pas interno, cu ta encerá un expectativa sigur di mira pas total den futuro—i esei lo nificá ausencia di violencia, guera i crímen.

Beneficionan real ta bini for di sa i kere cu Jehova, mediante Jesus, lo yuda nos. Bo ta corda Vania, kende como hobencita a ser lagá cu responsabilidad pisá i a pensa cu Dios a lubidá riba dje? Awor Vania sa cu Dios no a bandon’é. E ta bisa: “Mi a siña cu Dios ta un persona real cu cualidadnan masha atractivo. Su amor a impuls’é p’e manda su Yu na tera pa duna nos bida. Ta masha importante pa sa esaki.”

Marcelo ta mustra cu su relacion cu Dios ta real. E ex-baidó di fiesta aki ta comentá: “Hopi bes hóbennan no sa kico pa haci, i nan ta haña nan ta perhudicá nan mes. Algun ta cuminsá usa droga, manera ami a haci. Mi ta spera cu hopi mas lo ser bendicioná, mescos cu ami, dor di siña e berdad tocante Dios i su Yu.”

 Atrabes di un estudio cuidadoso di Bijbel, Vania i Marcelo a desaroyá un fe firme den Dios i un confiansa cu e ta dispuesto pa yuda nan trata cu nan problemanan. Si nos haci loke nan a haci—studia Bijbel i aplicá loke e ta bisa—nos lo descubrí un midí grandi di pas interno, mescos cu nan. E animacion di apostel Pablo lo aplicá di berdad den nos caso: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”—Filipensenan 4:6, 7.

Con pa Haña Berdadero Pas Awe

Jesucristo ta guiando hende cu tin hamber p’e berdad riba e caminda cu ta hiba na bida eterno den un paradijs terenal. Segun cu e ta guia nan n’e adoracion puru di Dios, nan ta experimentá un pas similar na esun cu Bijbel ta describí: “Mi pueblo tin cu biba den un lugá di habitacion pacífico i den residencianan di pleno confiansa i den lugánan di descanso sin disturbio.” (Isaías 32:18) I esei ta solamente un muestra dje pas cu nan lo disfrutá di dje den futuro. Nos ta lesa: “E mansunan mes lo poseé e tera, i berdaderamente nan lo haña nan deleite exkisito den e abundancia di pas. E hustunan mes lo poseé e tera, i nan lo biba pa semper riba dje.”—Salmo 37:11, 29.

Pues, nos por haña pas interno awe? Sí. Es mas, nos por ta sigur cu den futuro cercano, Dios lo bendicioná humanidad obediente cu pas manera nunca promé. Anto, pakico no pidié den oracion p’e duna bo su pas? Si bo tin problema cu ta kita bo pas, haci oracion den e manera cu rey David a haci: “E angustianan di mi curason a multiplicá; ai, saca mi for di e preshonnan cu ta riba mi. Mira mi afliccion i mi penoso afan, i pordoná tur mi picánan.” (Salmo 25:17, 18) Bo por ta sigur cu Dios ta scucha oracion asina. E ta extendé su man i ta otorgá pas na tur hende cu ta busca esei cu sinceridad di curason. Bijbel ta sigurá nos amorosamente: “Jehova ta cerca tur hende cu ta inbok’é, cerca tur hende cu ta inbok’é cu sinceridad. Lo e cumpli cu e deseo di hende cu ta tem’é, i lo e tende nan sclamacion pa yudansa, i lo e salba nan.”—Salmo 145:18, 19.

[Komentario na página 5]

Hende no tin ni e sabiduria ni e pre-vision pa goberná su mes sin yudansa, i e único yudansa cu tin berdadero balor ta bini di Dios

[Komentario na página 6]

Conocimentu di Dios i Jesucristo por hiba na un relacion íntimo cu Jehova Dios cu lo yuda nos logra pas mental

[Plachi na página 7]

Sigui conseho di Bijbel ta contribuí na un bida di famia pacífico