Wardadonan Cristian, ‘Habri Boso Curason Hanchu Habrí’!

“JEHOVA ta mi Wardador. Lo mi no falta nada.” Cu e palabranan ei, David a expresá su pleno confiansa den su Dios. Papiando den sentido spiritual, Jehova a gui’é na “sabananan yen di yerba” i “lugánan di sosiegu cu ta abundá cu awa,” dirigiend’e “den e pasonan di husticia.” Ora opositornan a rondoná David, el a ricibí sosten i estímulo, loke a impuls’é na bisa Jehova: “Mi no ta teme nada malu, pasobra abo ta cu mi.” Teniendo un Wardador Supremo asina, David tabata decididu pa “biba den e cas di Jehova te na largura di dianan.”—Salmo 23:1-6.

Dios su Yu unigénito tambe a experenciá e cuido amoroso di Jehova, i el a reflehá e mésun cuido aki perfectamente den su trato cu su disipelnan durante su estadia riba tera. P’esei e Scritura ta referí na dje como “e wardador excelente,” “e gran wardador” i “e wardador principal.”—Juan 10:11; Hebreonan 13:20; 1 Pedro 5:2-4.

Jehova i Jesucristo ta sigui pastoreá esnan cu ta stima nan. En parti nan ta expresá nan pastoreo den e percuracion amoroso di subwardadó den e congregacion. Pablo tabata papia cu e subwardadónan ei ora el a bisa: “Presta atencion na boso mes i na henter e tou, entre cua e spiritu santu a nombra boso como superintendente, pa pastoreá e congregacion di Dios, cua el a cumpra cu e sanger di su propio Yu.”—Echonan 20:28.

Pastoreá e tou di acuerdo cu e patronchi cu Jehova i Cristo Jesus a pone no ta un tarea fácil, pero awor e ta mas vital cu nunca promé. Pensa riba e mas cu un miyon Testigo cu a bautisá e último tres añanan! E personanan nobo ei no tin e experencia spiritual cu ta bini di añanan largu di actividad. Pensa tambe riba e Testigonan cu ainda ta mucha of tiener. Nan tin mester di atencion, no solamente di parti di nan mayornan sino tambe dje subwardadónan dje congregacion.

Sí, tur cristian ta confrontá preshon djafó, incluso preshon di nan pareunan. Tur cristian mester lucha pa resistí e atraccion fuerte cu tin pa sigui mundu su curso di satisfaccion inmoderá di deseonan. Den algun pais, publicadónan di Reino kisas ta desanimá debí n’e falta di reaccion positivo riba nan mensahe. Hopi publicadó tin problema serio cu salú. Problemanan financiero kisas ta kita otro publicadónan di nan motivacion pa busca e Reino promé. En berdad, nos tur—incluso esnan cu tin hopi tempu den e berdad—tin mester i ta merecé e yudansa di wardadónan amoroso.

Motivacion Corecto

Pablo a urgi cristiannan di promé siglo: ‘Habri boso curason hanchu habrí’! (2 Corintionan 6:11-13) Ancianonan cristian ta haci bon di aplicá e conseho aki ora di atendé nan debernan di pastoreo. Con nan por haci esei? I kico dje sirbidónan ministerial, di cua hopi ta prospectivo wardadó?

Pa ancianonan cristian por ta un bendicion pa e tou, nan motivacion mester ta mas cu solamente un sentido di deber. Nan ta ser consehá: “Pastoreá e tou di Dios bou di boso cuido, no obligá, sino di buena gana; tampoco pa amor pa ganashi desonesto, sino cu empeño.” (1 Pedro 5:2) P’esei pastoreo eficas ta encerá un buena gana i un empeño pa sirbi otro hende. (Juan 21:15-17) E ta nificá mira e necesidad dje carnénan i sea lihé pa reaccioná riba dje. E ta nificá demostrá e excelente cualidadnan cristian,  conocí como Dios su fruta di spiritu, ora di trata cu otro hende.—Galationan 5:22, 23.

Tin biaha pastoreo ta encerá bishitá e rumannan na nan cas. * Pero wardadónan cu ta ‘habri nan curason hanchu habrí’ ta gasta nan mes. Es decir, nan ta haci mas cu un bishita di pastoreo de bes en cuando. Nan ta probechá di tur oportunidad pa pastoreá e carnénan den e tou.

Entrenando Otronan pa Bira Wardadó

Sin importá nan edad, tur ruman homber cu “ta percurando pa alcansá un puesto di superintendente . . . ta deseoso di un trabou excelente.” (1 Timoteo 3:1) Hopi sirbidó ministerial a demostrá nan buena gana pa purba alcansá mas privilegio. Pues, gustosamente ancianonan ta yuda e ruman hombernan dispuesto aki pa dal e paso importante den “alcansá un puesto di superintendente.” Esaki ta nificá entrená nan pa ta wardadó eficas.

Dor cu Jehova su congregacion cristian ta pega estrechamente na Dios su normanan haltu, e no a ser debilitá pa causa di wardadónan falsu manera esnan describí na Ezekiel 34:2-6. Den bista di Jehova e wardadónan falsu aki tabata despreciabel i esei tabata na su lugá. En bes di alimentá e tou, nan a alimentá nan mes. Nan no a fortalecé esnan enfermo, cura esnan cu dolor, verband esnan kibrá of trece bek esnan plamá of perdí. Actuando mas manera wolf cu manera wardadó, nan a tiranisá e carnénan. E carnénan neglishá tabata plamá, i a dual rond sin niun hende pa soru pa nan.—Jeremías 23:1, 2; Nahum 3:18; Mateo 9:36.

Distinto dje wardadónan infiel ei, wardadónan cristian ta sigui e ehempel di Jehova. Nan ta yuda guia e carnénan den un sentido spiritual na “sabananan yen di yerba” i “lugánan di sosiegu cu ta abundá cu awa.” Nan ta purba dirigí nan “den e pasonan di husticia” dor di yuda nan comprendé Jehova su Palabra corectamente i aplik’é personalmente. Nan por haci esaki den un manera eficas pasobra nan ta “capacitá pa siña.”—1 Timoteo 3:2.

Gran parti dje ancianonan su trabou di siña otro hende ta tuma lugá for di plataforma durante reunionnan di congregacion. Sin embargo, na nivel personal tambe e ancianonan ta duna siñansa. Claro cu tin anciano ta mas mihó den duna siñansa riba un base personal, miéntras cu otronan tin mas talento den duna discurso. Pero e echo cu un persona tin ménos abilidad den un aspecto di siña otro hende, no necesariamente ta descualifik’é como maestro. Ancianonan ta siña otronan usando tur medio cu nan tin disponibel, incluso pastoreo. Tin cierto pastoreo ta tuma lugá riba un base formal, por ehempel, durante bishitanan planeá. Pero por haci hopi pastoreo tambe den un manera mas informal, loke tambe ta di gran beneficio.

Wardadó i Maestro na Tur Ocasion

Pa un dokter por haci su trabou e tin mester di conocimentu i experencia. Pero su pashentnan ta apreci’é ora e ta demostrá bondad, compasion, interes intenso i sincero. E cualidadnan aki mester ta parti di su personalidad. E mésun cualidadnan ei tambe mester bira parti dje personalidad di un bon maestro i wardadó, parti di su manera di ser diario. Un berdadero maestro lo ta prepará pa instruí esnan rond di dje ki ora cu ta necesario. Proverbionan 15:23 ta bisa: “Un palabra na su tempu apropiado, o esta bon e ta!” E “tempu apropiado” por ta ora e ta papia for di plataforma, ora e ta predicá di cas pa cas of ora e ta tene un combersacion den Salon di Reino of na telefon. Asina tambe, un bon wardadó ta haci esfuerso pa desplegá na tur ocasion cualidadnan excelente cu ta reflehá interes, no ora e ta haci bishita di pastoreo so. Dor cu el a ‘habri su curason hanchu habrí,’ lo e probechá di tur oportunidad pa pastoreá e tou, i asina duna nan e cuido cu nan tin mester na e tempu apropiado. Esaki ta loke ta hacié stimá den bista dje carnénan.—Marco 10:43.

 Wolfgang, cu awor ta anciano, ta corda un bishita social cu un sirbidó ministerial cu su casá a haci cerca su famia. E ta bisa: “Nos yunan a keda encantá cu e atencion cu nan a haña i cu e dushi ratu cu nos a pasa. Te ainda nan ta papia di dje.” Sí, e sirbidó ministerial aki a demostrá cu e ta interesá; el a ‘habri su curason hanchu habrí.’

Un otro oportunidad pa ‘habri bo curason hanchu habrí’ ta dor di bishitá esnan enfermo, manda un nota corticu di animacion pa nan of yama nan na telefon, cualkier cos cu ta laga nan sa cu bo ta interesá! Ofrecé pa yuda ora cu ta necesario. Si nan kier papia, scucha cu atencion. Papia tocante actividadnan positivo i excitante den e congregacion local i di otro caminda. Yuda nan enfocá riba e futuro glorioso cu tin reservá pa esnan cu ta stima Jehova.—2 Corintionan 4:16-18.

Fuera di Bishitanan di Pastoreo

Si tene na mente e propósito di pastoreo, ta bisto cu haci bishitanan di pastoreo na cas dje rumannan, maske e ta importante, ta solamente un parti di loke esei ta encerá. Un wardadó amoroso ‘ta habri su curason hanchu habrí’ dor di ta acercabel bou di tur circunstancia i na tur ocasion. E relacion caluroso cu e ta cultivá cu e rumannan ta sigurá nan cu den tempu di scuridad, nan no tin cu teme nada malu, dor  cu nan sa cu nan ruman amoroso, e wardadó cristian, ta soru pa nan.—Salmo 23:4.

Sí, boso tur wardadónan cristian ‘habri boso curason hanchu habrí.’ Demostrá amor sincero pa boso rumannan, animá nan, refrescá nan, edificá nan spiritualmente den tur manera cu boso por. Yuda nan pa ta firme den e fe. (Colosensenan 1:23) Carnénan bendicioná cu wardadónan cristian cu ta ‘habri nan curason hanchu habrí,’ lo no falta nada. Nan lo ta decididu, mescos cu David tabata, pa biba den e cas di Jehova te na largura di dianan. (Salmo 23:1, 6) Kico mas un wardadó amoroso lo por kier?

[Nota]

[Kuadro na página 30]

Wardadónan Cristian

• Ta sirbi cu empeño i di buena gana

• Ta alimentá i cuida e tou

• Ta yuda otronan haci esfuerso pa bira wardadó

• Ta bishitá esnan enfermo i ta soru pa nan

• Ta alerto pa yuda nan rumannan na tur ocasion

[Plachinan na página 31]

Sea ta den sirbishi di veld, na reunion of na ocasionnan social, ancianonan semper ta wardadó