Bo Bida Por Tin un Nificacion Mas Grandi?

ALGU di berdadero balor no ta semper bisto na e aparencia. E biyete di banco di mas balor cu ta circulá na Merca ta di 10.000 dollar. Sin embargo, e papel riba cua e ta imprimí ta bal solamente un par di cen.

Bo a yega di puntra bo mes si un pida papel cu riba su mes ta di poco balor, por duna bo bida berdadero nificacion? Hopi hende ta pensa cu sí. Miyones di hende ta traha di dia i anochi pa nan gana mas tantu placa posibel. Tin biaha corementu tras di placa ta nificá sacrificá nan salú, nan amigunan i asta nan famia. Cu ki propósito? Placa, of loke nos cumpra cuné, por duna nos satisfaccion berdadero i permanente?

Segun investigadónan, mas nos busca satisfaccion basá riba posesionnan material, ménos chens nos tin di hañ’é. E periodista Alfie Kohn a concluí cu “satisfaccion simplemente no ta na benta. . . . Hende cu tin rikesa como e cos mas importante den nan bida, tin e tendencia di experenciá un grado extraordinario di  ansiedad i depresion i tambe un nivel mas abou di bienestar general.”—International Herald Tribune.

Aunke investigadónan tal bes ta realisá cu un bida significativo ta rekerí algu diferente cu no ta placa, tog hopi hende ta pensa otro. Esaki no ta nada straño, ya cu esnan cu ta biba na paisnan occidental por ser bombardiá cu te asta 3.000 propaganda pa dia. Sea cu esakinan ta propaganda pa auto of mangel, e idea tras di esaki ta: ‘Cumpra e producto aki, i lo bo ta mas felis.’

Kico ta e resultado di e promocion nonstop aki di balornan material? Wel, hopi bes ta ignorá balornan spiritual! Segun un informe den e revista Newsweek, e arsobispu di Keulen, Alemania, a declará recientemente cu “den nos sociedad, Dios no ta un tópico di combersacion mas.”

Kisas bo a dedicá casi tur bo energia pa gana bo pan di cada dia. Por ta bo ta sinti cu bo tin poco tempu pa haci cualkier otro cos. Sin embargo, podisé tin biaha bo ta sinti cu bida mester tin algu mas cu djis sigui nonstop tras di un rutina monótono te ora cu bo salú of edad pone un paro na esaki.

Mas atencion na asuntunan spiritual por duna bo mas satisfaccion? Kico lo duna bo bida un nificacion mas grandi?