Bo Por Keda Decente den un Mundu Inmoral

E HOMBER tabata color scur i cu bon tipo. E muher tabata bunita i yen di talento. Nan tabata traha p’e mésun compania. E muher tabata duna e homber atencion personal sinfin. E homber tabata expresá su admiracion p’e. Nan tabata cumpra regalo pa otro. No a dura mashá cu nan a bira amante. E homber a laga su casá p’e muher aki. Na final, e muher sí a dicidí di keda cerca su casá i terminá e relacion cu e homber. Cu mala gana e homber a purba di bolbe bek cerca su casá. Sin embargo, dor cu e no a repentí di berdad, e no a logra. Tur persona enbolbí a sigui cu nan bida, aunke no completamente ileso.

E mundu aki no ta considerá moralidad sexual como un birtud mas. Core tras di placer i satisfaccion desenfrená ta parce di ta algu comun. The New Encyclopædia Britannica ta declará: “Ta parce cu adulterio ta mes universal i, den algun caso, mes comun cu matrimonio.”

Pero, ta Jehova Dios su deseo pa matrimonio ta “onorabel entre tur” i p’e cama di matrimonio ta “sin contaminacion.” (Hebreonan 13:4) E Scritura ta declará: “No sea gañá. Ni fornicadó, ni idólatra, ni adúltero, ni homber wardá pa propósito innatural, ni homber cu ta drumi cu homber . . . lo heredá e reino di Dios.” (1 Corintionan 6:9, 10) P’esei, pa disfrutá dje fabor di Dios, nos tin cu keda moralmente limpi den e mundu inmoral aki.

Con nos por protehá nos mes dje influencianan corupto cu ta rondoná nos? Rey Sálomon di antiguo Israel ta duna contesta den capítulo cincu dje buki bíblico di Proverbionan. Laga nos examiná loke e tin di bisa.

Capacidad di Pensa pa Protehá Bo

E rey di Israel ta cuminsá: “Mi yu, na mi sabiduria, o di berdad presta atencion.” E ta agregá: “Na mi dicernimentu incliná bo oreanan, pa warda capacidad di pensa; i cu bo propio lipnan protehá conocimentu mes.”—Proverbionan 5:1, 2.

Pa resistí e tentacion pa cometé inmoralidad, nos tin mester di sabiduria—e capacidad pa pone conocimentu bíblico na práctica—i dicernimentu, esta, e poder pa distinguí bon for di malu i pa scoge e curso corecto. E texto ta urgi nos pa presta atencion na sabiduria i dicernimentu pa asina warda nos capacidad di pensa. Con nos por haci esei? Ora nos ta studia e Palabra di Dios, Bijbel, nos tin cu presta atencion n’e manera cu Jehova ta haci cosnan, i incliná nos orea na su boluntad i propósitonan. Dor di haci esaki, nos lo ta dirigiendo nos manera di pensa den e canalnan corecto. E capacidad di pensa cu nos ta adkerí dje manera ei ta na armonia cu sabiduria i conocimentu divino. Ora nos usa e capacidad aki den e manera corecto, e ta protehá nos di cai den trampa di tentacionnan inmoral.

Tene Cuidou cu Shelu di Boca Suave

E motibu pakico capacidad di pensa ta esencial pa mantené limpiesa moral den un mundu impuru ta pasobra e maneranan di actua di  hende inmoral ta seductivo. Sálomon ta spierta: “Lipnan di un muher stranhero ta sigui lek manera un panal di honing, i su shelu di boca ta mas suave cu zeta. Ma su efecto despues ta mes marga cu absintio; i mes skerpi cu un spada di dos fila.”—Proverbionan 5:3, 4.

E proverbio aki ta describí un persona perverso como “un muher stranhero”—un prostituta. * E palabranan cu e ta usa pa seducí su víctima ta mes dushi cu panal di honing i mas suave cu zeta di olijfi. No ta asina aki mayoria avance sexual inmoral ta cuminsá? Por ehempel, considerá e experencia di un secretaria atractivo di 27 aña cu yama Amy. E ta relatá: “Na trabou e homber aki ta duna mi hopi atencion i cua chens cu e haña e ta elogiá mi. Bo ta sinti bon ora bo tin atencion di hende. Pero mi por mira bon cla cu su interes den mi ta puramente sexual. Mi no ta bai cai pa su avancenan.” Generalmente e palabranan labioso di un homber of muher seductor ta atractivo, a ménos cu nos reconocé nan berdadero motibu. Pa haci esaki nos mester usa nos capacidad di pensa.

E efectonan despues di inmoralidad ta mes marga cu absintio i mes skerpi cu un spada di dos fila—nan ta trece dolor i morto. Hopi bes e consecuencianan amargo di un conducta asina ta: un concenshi molestiá, un embaraso indeseá of un malesa transmití sexualmente. I pensa riba e inmenso dolor emocional cu partner di e persona infiel ta hañ’é cuné. Un acto di infidelidad por causa heridanan cu por dura bida largu. Sí, inmoralidad ta causa dolor.

Comentando riba e estilo di bida di un muher malbado, e rey sabí ta sigui: “Su pianan ta baha bai na morto. Su stapnan mes ta gara Sheol. E caminda di bida e no ta contemplá. Su pasonan a dual, i e no sa unda.” (Proverbionan 5:5, 6) E camindanan di un muher inmoral ta hiba na su morto—su stapnan na Sheol, e graf comun di humanidad. Considerando con malesanan transmití sexualmente, foral AIDS, ta plamá, ki cierto e palabranan ei ta! E resultado p’e muher ta mescos cu pa hende cu ta compañ’é den su pasonan trocí.

Cu interes sincero, e rey ta urgi: “P’esei anto, o yunan, scucha mi i no apartá for dje dichonan di mi boca. Mantené bo caminda leu for di banda di dje, no bai den becindario dje entrada di su cas.”—Proverbionan 5:7, 8.

Nos mester keda mas leu posibel for di influencia di hende inmoral. Pakico nos mester exponé nos mes na nan estilo di bida dor di scucha música degradá, wak programanan corupto of exponé nos mes na material pornográfico? (Proverbionan 6:27; 1 Corintionan 15:33; Efesionan 5:3-5) I ta ki un bobedad pa hala nan atencion dor di flirt of dor di bisti i areglá nos mes na un manera inmodesto!—1 Timoteo 4:8; 1 Pedro 3:3, 4.

Un Prijs Demasiado Haltu

Pa ki motibu nos mester mantené nos caminda leu for di esun di un persona cu ta den mal caminda? Sálomon ta contestá: “Pa bo no entregá bo dignidad na otronan, ni bo añanan na loke ta cruel; pa stranheronan no satisfacé nan mes cu bo poder, ni p’e cosnan cu bo a obtené cu dolor ta den cas di un stranhero, ni pa den bo futuro bo tin cu keha ora bo carni i bo organismo yega na un fin.”—Proverbionan 5:9-11.

Pues Sálomon ta enfatisá e prijs haltu cu un hende ta paga ora e entregá na inmoralidad. Adulterio i pérdida di dignidad of respet propio, ta cana man den man. No ta realmente humiyante pa sirbi djis como un medio pa satisfacé bo mes pasion inmoral of esun di un otro persona? Entregá na intimidad sexual cu un persona cu no ta bo casá, no ta demostrá un falta di respet propio?

Pero, kico ta encerá ‘duna nos añanan, nos poder i fruta di nos trabou na stranheronan’? Un obra di referencia ta declará: “E punto dje versículonan aki ta claro: E prijs di infidelidad por ta haltu; pasobra tur loke un persona ta traha p’e—posicion, poder, prosperidad—por bai perdí sea n’e exigencianan golos dje muher of debí n’e gritu pa paga bek p’e daño hací na comunidad.” Relacionnan inmoral por costa masha hopi mes!

 Despues di a perde su dignidad i gasta su recursonan, un persona bobo lo por keha, bisando: “Con mi a odia disiplina, mi curason a trata reprendementu cu falta di respet! I mi no a scucha n’e bos di mi instructornan, i na mi maestronan mi no a incliná mi orea. Fácilmente mi a cai den tur sorto di maldad meimei dje congregacion i dje asamblea.”—Proverbionan 5:12-14.

Cu tempu e pecadó ta expresá loke un erudito ta yama “un letania di ‘mihó mi a’: mihó mi a scucha mi tata, mihó mi no a sigui mi mes rumbo, mihó mi a haci caso di conseho di otronan.” Sin embargo, e reconocimentu aki ta bini demasiado lat. Bida dje persona cu awor ta indecente ya caba ta ruiná i su reputacion ta dañá. Ta ki vital pa nos considerá e prijs haltu cu un hende ta paga pa inmoralidad, promé cu nos entregá na dje!

“Bebe Awa di Bo Mes Renbak”

Relacion sexual ta tabú pa Bijbel? Absolutamente cu no. E sintimentu di amor romántico i e éxtasis cu un homber i un muher ta disfrutá di dje ta donnan di Dios. Sin embargo, e relacion íntimo aki ta pa hende casá so disfrutá di dje. P’esei Sálomon ta duna e exhortacion aki na un homber casá: “Bebe awa di bo mes renbak, i awa cu ta core for di bo mes pos. Bo fontein mester ta plamá pafó, bo riu di awa den plasa público mes? Laga nan resultá di ser pa bo so, i no pa e stranheronan huntu cu bo.”—Proverbionan 5:15-17.

“Bo mes renbak” i “bo mes pos” ta expresionnan poético pa un esposa stimá. Disfrutá di relacion sexual cuné ta mescos cu bebe awa refrescante. Distinto di suministro di awa den lugánan público, un renbak of un pos ta ser considerá como un propiedad privá. I ta consehá e homber pa haña yu cu su casá na cas, en bes di plama su simia den plasanan público, esta, entre otro muhernan. Ta claro cu e conseho na un hende homber ta, p’e ta fiel na su casá.

E homber sabí ta sigui: “Laga bo fuente di awa resultá di ser bendicioná, i alegrá bo cu e esposa di bo hubentud, un biná hembra amabel i un cabritu di ceru encantador. Laga su mes pechunan haci bo burachi na tur tempu. Sea cu su amor den un éxtasis constantemente.”—Proverbionan 5:18, 19.

“Fuente di awa,” of fontein, ta referí na e fuente di satisfaccion sexual. Placer sexual cu bo mes casá ta “bendicioná,” algu for di Dios. P’esei, ta urgi hende homber pa alegrá cu e esposa di su hubentud. P’e homber, su casá ta amabel i bunita manera un biná hembra, i mésun encantador i elegante cu un cabritu di ceru.

Siguientemente, Sálomon ta haci dos pregunta retórico: “Pues, pakico abo, mi yu, mester ta den éxtasis cu muher straño of brasa pechu di muher di estranheria?” (Proverbionan 5:20) Sí, pakico un persona casá mester laga contactonan hací na trabou, na scol of otro caminda, tent’é pa tene intimidad sexual pafó di matrimonio?

Apostel Pablo ta duna cristiannan casá e conseho aki: “Mi ta bisa esaki, rumannan, e tempu cu a keda ta reducí. Di awor  padilanti, laga esnan cu tin esposa haci como si nan no tin.” (1 Corintionan 7:29) Kico esaki ta encerá? Wel, cu siguidónan di Jesucristo mester ‘sigui busca e reino promé.’ (Mateo 6:33) P’esei, parehanan casá no mester ta asina ocupá cu otro, te cu nan ta pone interesnan di Reino na di dos lugá den nan bida.

Dominio Propio Ta Necesario

Por controlá deseonan sexual. Hende cu kier aprobacion di Jehova tin cu hacié. Pablo ta amonestá: “Esaki ta e boluntad di Dios, boso santificacion, pa boso abstené di fornicacion; pa cada un di boso sa con pa haña posesion di su mes wea [su mes curpa] den santificacion i onor.”—1 Tesalonicensenan 4:3, 4.

Pues, hóbennan no mester bula casá asina nan ripará cu nan a cuminsá sinti impulsonan sexual. Matrimonio ta rekerí un compromiso, i pa cumpli cu e responsabilidad ei, bo mester ta madurá. (Génesis 2:24) Ta mihó pa warda te ora un persona a “pasa e flor di hubentud,” esta, e periodo ora cu e sintimentunan sexual ta fuerte i por stroba un persona di husga bon. (1 Corintionan 7:36) I ta ki un bobedad i picá pa un adulto cu tin deseo di casa, enbolbé su mes den relacionnan inmoral djis pasobra e no por haña un persona pa casa cuné!

“E Propio Erornan dje Malbado Lo Captur’é”

E motibu básico pakico inmoralidad sexual ta robes ta pasobra Jehova—e Dunador di bida i di capacidad sexual den hende—no ta aprob’é. P’esei, dunando e motibu di mas fuerte pa keda moralmente decente, rey Sálomon ta declará: “Pasobra e camindanan di un homber ta dilanti wowo di Jehova, i e ta contemplá tur su pasonan.” (Proverbionan 5:21) Sí, nada no ta scondí p’e bista di Dios, “esun na ken nos tin cu rindi cuenta.” (Hebreonan 4:13) Tur acto sexual sushi ta daña nos relacion cu Jehova, sin importá con secreto i kico su consecuencianan físico i social lo por ta. Ta ki un bobedad pa sacrificá nos pas cu Dios pa algun ratu di placer prohibí!

Por parce cu algun hende cu di un manera sin bergwensa ta entregá nan mes den camindanan inmoral, no ta haña castigu. Pero no pa hopi tempu. Sálomon ta declará: “E propio erornan dje malbado lo captur’é, i den e cabuyanan di su mes picá lo gar’é. E lo ta esun cu ta muri pasobra no tin disiplina, i pasobra den e abundancia di bobedad e ta desviá.”—Proverbionan 5:22, 23.

Pakico cualkier un di nos lo mester desviá un dia? Al fin i al cabo, di antemano e buki di Proverbionan ta spierta nos dje camindanan seductivo di mundu. I e ta pone nos dilanti e prijs cu por lo general inmoralidad sexual ta exigí—nos salú, nos pertenencianan material, nos forsa i nos dignidad. Cu un pre-vision asina cla, hamas nos mester ta den e posicion di expresá un letania di “mihó mi a.” Sí, dor di aplicá e conseho cu Jehova a duna mediante su Palabra inspirá, nos por keda moralmente decente den un mundu inmoral.

[Nota]

[Plachi na página 30]

E efectonan despues di inmoralidad ta marga manera absintio

[Plachi na página 31]

“Alegrá bo cu e esposa di bo hubentud”