Nos Ta e Clase Cu Tin Fe

Declarando e Bon Nobo den Cunucu di Aros na Taiwan

TAIWAN ta disfrutá generalmente di abundancia di yobida, cu ta haci posibel p’e cosechá dos bon cultivo di aros pa aña. Pero de bes en cuando, no tin yobida n’e tempu cu ta sper’é, i e matanan chikitu ta muri. Ora esaki sosodé, e cunukero ta entregá? No. E sa cu perseverancia ta necesario. E ta planta mata chikitu nobo i ta bolbe sembra e cunucu. Anto, si e situacion mehorá, e cunukero tin un bon cosecha. Planta i cosechá spiritualmente tin biaha ta mescos.

Perseverá den e Cosecha Spiritual

Atrabes di añanan, Testigonan di Jehova na Taiwan a traha duru pa planta i cosechá simia dje berdad bíblico den algun área cu a parce di no ta productivo. Un ehempel ta e provincia di Miao-li. Tabatin masha poco reaccion faborabel riba e intentonan sporádico pa duna testimonio den e área. P’esei na 1973 a asigná un pareha pionero special pa traha einan como proclamadónan di Reino di tempu completo. Na principio, algun a mustra interes den e bon nobo. Sin embargo, e interes ei a marchitá hopi lihé. Anto a asigná e pioneronan special na un otro área.

Na 1991 a asigná dos otro pionero special einan. Pero atrobe desaroyonan a indicá cu e clima no tabata cla pa crecementu spiritual. Despues di un par di aña, a reasigná e pioneronan special na un teritorio cu a spera lo tabata mas productivo. Pues, e tereno a keda un periodo di tempu sin ser cultivá.

Esfuersonan Nobo Ta Cosechá Éxito

Na september 1998 a dicidí pa haci un esfuerso pa busca e áreanan mas productivo den e inmenso teritorio no-asigná na Taiwan. Con lo a logra esaki? Dor di asigná un 40 pionero special temporal pa traha den e teritorionan no-asigná caminda tin hopi hende ta biba.

Entre e teritorionan selectá p’e campaña tabatin dos ciudad pegá cu otro den e provincia di Miao-li. Cuater ruman muher soltera mester a traha einan pa tres luna pa test e teritorio. Poco tempu despues di nan yegada, nan a skirbi un informe entusiasmá tocante e cantidad di hende interesá cu nan tabata haña. Pa ora cu nan a caba cu nan tres lunanan di pionero den e teritorio, nan tabata conduciendo hopi studio bíblico. Tambe nan a establecé un grupo di studio di buki cu yudansa di un anciano di un congregacion cercano.

Tres di e ruman muhernan a duna di comprendé bon cla cu nan ta deseá di sigui percurá pa e “matanan chikitu” delicado cu tabata creciendo asina bon. Como resultado, a nombra dos di nan como pionero special permanente, i e di tres a sigui traha einan como pionero regular. Un anciano for dje congregacion cercano a muda na e área pa yuda nan. Mas cu 60 persona a asistí na e promé discurso público duná den e área ei. Awor e congregacion cercano ta yuda e grupo nobo aki tene reunionnan regular riba diadomingo ademas di vários studio di buki. Pronto lo por forma un congregacion nobo den e área.

 Perseverancia Ta Trece Bendicion den Otro Parti di Taiwan

Otro áreanan a respondé den e mésun manera. Den e provincia di I-lan, den e parti nortoost dje isla, a establecé un Studio di Buki di Congregacion nobo den e área caminda e pioneronan special temporal a traha.

Riba un anochi, miéntras un pionero special temporal tabata haci bishita di cas pa cas, el a encontrá cu un homber hóben i a mustr’é un pamfleta cu ta mencioná e reunionnan di congregacion. Unbes el a puntra: “Mi por asistí na e reunion mañan anochi? Si ta asina, kico mi mester bisti?” E pionero aki a hañ’é ta conducí ocho studio bíblico cu hende interesá tur siman. Vários dje studiantenan di Bijbel pronto a cuminsá traha plan pa bira publicadó dje bon nobo, cu e meta pa ser bautisá.

Un otro persona den e mésun ciudad tabata un baidó di misa pa hopi aña, pero e no por a haña ningun hende pa siñ’é Bijbel. Ora el a tende tocante e areglo di studio di Bijbel, el a probechá dje oportunidad. E pionero a anim’é pa prepará su les di antemano. Ora cu e pionero special temporal a yega pa conducí e studio, el a haña cu e señora a haci su “huiswerk” dor di cumpra un schrift den cua el a skirbi over e preguntanan imprimí for dje buki di studio. Anto el a skirbi su contesta pa cada pregunta. Tambe el a skirbi den su schrift tur e textonan mencioná den su les. Pa ora cu e ruman muher a yega pa conducí e promé studio, ya e señora a prepará e promé tres lesnan caba!

Den Taiwan central, den e pueblo di Dongshih, a mira resultadonan similar. E pioneronan special temporal a laga mas cu 2.000 foyeto den e tres lunanan cu nan a traha einan. Pa e di tres luna, nan tabata conducí 16 studio bíblico. E temblor cu a sagudí Taiwan central dia 21 di september 1999, a destruí mayor parti dje pueblo, pero algun hende interesá a sigui haci progreso spiritual, aunke nan mester biaha un ora pa asistí na reunion na e Salon di Reino mas cerca. Sí, perseverancia ta necesario pa haña un bon cosecha, sea ta di e clase material of di esun spiritual.

[Mapa na página 8]

(Pa e teksto den su formato kompleto, wak e publikashon)

CHINA

Pasashi di Taiwan

TAIWAN

[Rekonosementu]

Mountain High Maps® Copyright © 1997 Digital Wisdom, Inc.