E Speransa di Resureccion Tin Poder
E Speransa di Resureccion Tin Poder
“Mi a sufri pérdida di tur cos . . . afin di conocé [Jesucristo] i e poder di su resureccion.”—FILIPENSENAN 3:8-10.
1, 2. (a) Hopi aña pasá, con un pastor a describí e resureccion? (b) Con e resureccion lo tuma lugá?
NA PRINCIPIO di añanan 1890, prensa a informá di un sermon único duná pa un pastor na Brooklyn, New York, Merca. El a bisa cu resureccion lo consistí di recogé i rebibá tur e wesunan i carni cu a yega di ta parti di un curpa humano, sea cu nan tabata destruí pa candela of accidente, tabata comí pa bestia of a bira mest. E predicadó tabata di opinion cu riba un cierto dia di 24 ora, e aire lo bira pretu cu man, brasa, pia, dede, wesu, músculo i cueru di miles di miyones di hende morto. E partinan aki lo ta en busca di otro partinan dje mésun curpa. Anto almanan lo bini for di shelu i fiernu pa biba den e curpanan resucitá aki.
2 Resureccion mediante un reorganisacion dje atomnan original ta ilógico, i hende no tin un alma inmortal. (Eclesiástes 9:5, 10; Ezekiel 18:4) Jehova, e Dios di resureccion, no tin nodi reconstruí atom di materia cu originalmente a forma un curpa humano. E por forma curpanan nobo pa esnan resucitá. Jehova a duna su Yu Jesucristo, e poder pa lanta e mortonan, cu e posibilidad di bida eterno. (Juan 5:26) P’esei Jesus a bisa: “Ami ta e resureccion i e bida. Esun cu ehercé fe den mi, asta si e muri, lo bolbe na bida.” (Juan 11:25, 26) Esta un promesa conmovedor! E ta fortalecé nos pa wanta pruebanan i asta pa enfrentá morto como Testigonan fiel di Jehova.
3. Pakico Pablo mester a haci un defensa di e resureccion?
3 Resureccion no ta cuadra cu e idea cu hende tin un alma inmortal, loke tabata e punto di bista dje filósofo griego Plato. Pues, kico a pasa ora cu apostel Pablo a duna testimonio na griegonan prominente riba Areópago na Aténas, a referí na Jesus i a bisa cu Dios a resucit’é? E relato ta bisa: “Wel, ora nan a tende di resureccion dje mortonan, algun a cuminsá tene mofa.” (Echonan 17:29-34) Hopi hende cu a mira Jesucristo resucitá tabata na bida ainda i, apesar di mofa, nan a testificá cu el a lanta for di morto. Pero maestronan falsu cu a asociá cu e congregacion den Corinto a nenga e resureccion. P’esei Pablo a haci un defensa poderoso dje siñansa cristian aki den 1 Corintionan capítulo 15. Un studio cuidadoso di su argumentonan ta proba fuera di tur duda e poder di e speransa di resureccion i con sigur e ta.
Prueba Sólido di Resureccion di Jesus
4. Ki prueba di testigo ocular Pablo a duna di Jesus su resureccion?
4 Tuma nota con Pablo a cuminsá cu su defensa. (1 Corintionan 15:1-11) E corintionan lo tene e bon nobo di salbacion firmemente gará, a ménos cu ta pornada nan a bira creyente. Cristo a muri pa nos picánan, tabata derá i a ser lantá. De echo, Jesus resucitá a aparecé na Céfas (Pedro), “despues n’e diesdosnan.” (Juan 20:19-23) Un 500 disipel asina a mir’é, kisas ora cu el a manda: ‘Bai, haci disipel.’ (Mateo 28:19, 20) Santiago a mir’é, i tambe tur e fiel apostelnan. (Echonan 1:6-11) Cerca di Damasco, Jesus a aparecé na Saulo “como si fuera na un hende nací prematuramente,” esta, como si fuera a lanta Saulo caba na bida spiritual. (Echonan 9:1-9) E corintionan a bira creyente pasobra Pablo a predicá na nan, i nan a aceptá e bon nobo.
5. Kico tabata Pablo su liña di razonamentu manera ta pará skirbí na 1 Corintionan 15:12-19?
5 Examiná Pablo su liña di razonamentu. (1 Corintionan 15:12-19) Siendo cu testigonan ocular a predicá cu Cristo a resucitá, con hende por a bisa cu no tin resureccion? Si Jesus no a ser lantá for di morto, nos predicacion i nos fe ta en bano, i nos ta hende mentiroso cu ta duna testimonio contra Dios dor di bisa cu el a resucitá Cristo. Si e mortonan no ta ser lantá, ‘nos ta den nos picánan ainda,’ i esnan morto den union cu Cristo a perecé. Ademas, “si ta den e bida aki so nos a spera den Cristo, di tur hende nos ta esnan mas digno di lástima.”
6. (a) Kico Pablo a bisa como afirmacion di Jesus su resureccion? (b) Kico ta “e último enemigu,” i con lo e ser reducí na nada?
6 Pablo ta afirmá Jesus su resureccion. (1 Corintionan 15:20-28) Siendo cu Cristo ta e “promé fruta” di esnan cu ta drumí den morto, otronan tambe lo ser resucitá. Mescos cu morto a resultá dor di desobedencia di e homber Adam, resureccion ta mediante un homber: Jesus. Lo a lanta esnan cu ta pertenecé na dje durante su presencia. Cristo ta “reducí na nada tur gobiernu i tur autoridad i poder” cu ta oponé Dios su soberania i ta reina como Rey te ora Jehova pone tur enemigu bou di su pia. Asta “e último enemigu”—morto heredá for di Adam—lo ser reducí na nada mediante e balor di Jesus su sacrificio. Anto Cristo lo entregá e Reino na su Dios i Tata, sometiendo su mes “na Esun cu a someté tur cos na dje, pa Dios por ta tur cos pa tur hende.”
Bautisá pa Morto?
7. Ken ta “ser bautisá p’e propósito di ser hende morto,” i kico esaki ta nificá pa nan?
7 Pablo ta puntra e opositornan di resureccion: “Kico esnan cu ta ser bautisá p’e propósito di ser hende morto, lo haci?” (1 Corintionan 15:29) Pablo no tabata kier men cu lo bautisá e bibunan na fabor dje mortonan, pasobra personalmente Jesus su disipelnan mester siña, kere i bautisá. (Mateo 28:19, 20; Echonan 2:41) Cristiannan ungí ta “ser bautisá p’e propósito di ser hende morto” dor di dedicá nan mes na un curso di bida cu ta hiba na morto i resureccion. E tipo di bautismo aki ta cuminsá ora Dios su spiritu ta crea e speransa celestial den nan i ta terminá ora cu nan ser lantá for di morto na bida spiritual inmortal den shelu.—Romanonan 6:3-5; 8:16, 17; 1 Corintionan 6:14.
8. Di kico cristiannan por ta sigur, asta si Satanas i su sirbidónan mester mata nan?
8 Manera Pablo su palabranan ta indicá, e speransa di resureccion ta capacitá cristiannan pa enfrentá peliger i morto constantemente pasobra nan ta haci e trabou di predicá e Reino. (1 Corintionan 15:30, 31) Nan sa cu Jehova por resucitá nan si e permití Satanas i su sirbidónan mata nan. Ta Dios so por destruí nan alma, esta nan bida, den Gehena, cu ta simbolisá destruccion eterno.—Lucas 12:5.
Tin Necesidad pa Ta Alerto
9. Pa e speransa di resureccion por tin e poder di sostené nos den nos bida, kico nos mester evitá?
9 E speransa di resureccion a sostené Pablo. Tempu e tabata na Efeso, kisas su enemigunan a tir’é den arena pa bringa cu bestia salbahe. (1 Corintionan 15:32) Si ta esei a sosodé, e tabata librá, mescos cu Daniel tabata rescatá for di leon. (Daniel 6:16-22; Hebreonan 11:32, 33) Como cu Pablo a spera den e resureccion, e no tabatin e actitud di apóstata hudiu den e dianan di Isaías. Nan a bisa: “Laga nos come i bebe, pasobra mañan nos ta muri.” (Isaías 22:13, Septuaginta) Pa e speransa di resureccion por tin e poder di sostené nos den nos bida manera den Pablo su caso, nos mester evitá hende cu tin un spiritu insaludabel asina. “No sea gañá,” Pablo a spierta. “Mal asociacion ta daña custumbernan útil.” (1 Corintionan 15:33) Naturalmente, e principio aki ta aplicá na vários aspecto di bida.
10. Con nos por mantené nos speransa di resureccion na bida?
10 Pablo a bisa esnan cu ta duda den e resureccion: “Spierta di un manera hustu i bira sobrio i no practicá picá, pasobra algun ta sin conocimentu di Dios. Mi ta papia pa haci boso sinti bergwensa.” (1 Corintionan 15:34) Den e “tempu di fin” aki, nos mester actua na armonia cu conocimentu exacto di Dios i Cristo. (Daniel 12:4; Juan 17:3) Esaki lo mantené nos speransa di resureccion na bida.
Resucitá cu Cua Curpa?
11. Con Pablo a ilustrá e resureccion di cristiannan ungí?
11 Siguientemente Pablo a trata cu cierto preguntanan. (1 Corintionan 15:35-41) Kisas den un esfuerso pa lanta duda den resureccion, un hende lo por a puntra: “Con e mortonan lo ser lantá? Sí, cu ki sorto di curpa nan ta bini?” Manera Pablo a mustra, un simia plantá den tera básicamente ta muri segun cu e ta cambia pa bira un mata chikitu. Asina tambe, un hende engendrá pa spiritu mester muri. Mescos cu un mata ta sali for di un simia como un curpa nobo, asina e curpa resucitá di e cristian ungí ta diferente for di carni humano. Maske e tin e mésun patronchi di bida cu e tabatin promé cu el a muri, e ta ser lantá como un criatura nobo cu un curpa spiritual cu por biba den shelu. Naturalmente, esnan resucitá riba tera lo ser lantá cu curpa humano.
12. Kico e expresionnan “curpa celestial” i “curpa terenal” ta nificá?
12 Manera Pablo a bisa, carni humano ta diferenciá for di esun di bestia. Asta carni di bestia ta varia di un sorto pa otro. (Génesis 1:20-25) E “curpa celestial” di criaturanan spiritual ta diferenciá den gloria for dje “curpa terenal” di carni. Tin diferencia tambe den e gloria di solo, luna i streanan. Pero esnan ungí resucitá tin un gloria muchu mas grandi.
13. Di acuerdo cu 1 Corintionan 15:42-44, kico ta ser sembrá i kico ta ser lantá?
13 Despues di a mencioná e diferencianan, Pablo a agregá: “Asina tambe ta resureccion dje mortonan.” (1 Corintionan 15:42-44) El a bisa: “E ta ser sembrá den corupcion, e ta ser lantá den incorupcion.” Aki Pablo lo kier men e ungínan como grupo. Sembrá den corupcion na ora di morto, nan ta ser lantá den incorupcion, liber di picá. Aunke mundu ta desonrá nan, nan ta ser lantá na bida celestial i lo keda manifestá cu Cristo den gloria. (Echonan 5:41; Colosensenan 3:4) Na ora di morto nan ta sembra “un curpa físico” i ta lanta “un curpa spiritual.” Ya cu esaki ta posibel den e caso di cristiannan engendrá pa spiritu, nos por ta sigur cu otronan por ser lantá pa bida riba tera.
14. Con Pablo a haci un contraste entre Cristo i Adam?
14 Siguientemente Pablo a haci un contraste entre Cristo i Adam. (1 Corintionan 15:45-49) Adam e promé hende, “a bira un alma bibiente.” (Génesis 2:7) “E último Adam”—Jesus—“a bira un spiritu cu ta duna bida.” El a duna su bida como un sacrificio di rescate, na promé lugá na fabor di su siguidónan ungí. (Marco 10:45) Como hende, nan ‘ta carga e imágen di esun trahá di stof,’ pero ora nan resucitá nan ta bira mescos cu e último Adam. Naturalmente, Jesus su sacrificio lo beneficiá henter humanidad obediente, incluso esnan resucitá riba tera.—1 Juan 2:1, 2.
15. Pakico cristiannan ungí no ta resucitá den carni, i con nan ta ser lantá durante e presencia di Jesus?
15 Ora cristiannan ungí muri, nan no ta ser lantá den carni. (1 Corintionan 15:50-53) Un curpa coruptibel di carni i sanger no por heredá incorupcion i e Reino celestial. Algun di esnan ungí lo no tin cu experenciá un soño largu den morto. Ora nan terminá nan curso di bida terenal den fieldad durante Jesus su presencia, nan “lo ser cambiá, den un momento, den un kinipí di wowo.” Nan lo ser lantá instantáneamente na bida spiritual den incorupcion i gloria. Finalmente, Cristo su “bruid” celestial lo yega e cantidad di 144.000.—Revelacion 14:1; 19:7-9; 21:9; 1 Tesalonicensenan 4:15-17.
Victoria Riba Morto!
16. Segun Pablo i profetanan di antigwedad, kico lo pasa cu morto heredá for di Adam pecaminoso?
16 Pablo a declará triunfantemente cu morto lo ser tragá pa semper. (1 Corintionan 15:54-57) Ora loke ta coruptibel i mortal bisti incorupcion i inmortalidad, e siguiente palabranan lo ser cumplí: “Morto ta ser tragá pa semper.” “Morto, unda bo victoria ta? Morto, unda bo pui ta?” (Isaías 25:8; Oséas 13:14) E pui cu ta producí morto ta picá, i e forsa di picá tabata e Ley, cu a condená pecadónan na morto. Pero dor di Jesus su sacrificio i resureccion, morto heredá for di Adam pecaminoso lo no ta victorioso mas.—Romanonan 5:12; 6:23.
17. Con e palabranan di 1 Corintionan 15:58 ta aplicá awe?
17 “P’esei, mi rumannan stimá,” Pablo a bisa: “bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor.” (1 Corintionan 15:58) E palabranan ei ta aplicá n’e resto ungí djawe i na Jesus su “otro carnénan” asta si nan muri den e último dianan aki. (Juan 10:16) Nan labor como proclamadó di Reino no ta en bano, pasobra un resureccion ta spera nan. Pues como sirbidónan di Jehova, laga nos keda ocupá den e trabou di Señor miéntras nos ta spera e dia cu nos por sclama gososamente: “Morto, unda bo victoria ta?”
E Speransa di Resureccion Cumplí!
18. Con fuerte Pablo su speransa den e resureccion tabata?
18 E palabranan di Pablo registrá na 1 Corintionan capítulo 15 ta duna evidencia cu e speransa di resureccion tabatin poder den su bida. E tabata absolutamente sigur cu Jesus a lanta for di morto i cu otronan tambe lo ser librá for dje graf comun di humanidad. Abo tin tal conviccion fuerte? Pablo a considerá bentahanan egoista “como un monton di basura” i “a sufri pérdida di tur cos” pa asina e por ‘conocé Cristo i e poder di su resureccion.’ E apostel tabata dispuesto pa someté su mes na un morto mescos cu di Cristo den e speransa di ricibí “e resureccion mas trempan.” E resureccion ei, yamá tambe “e promé resureccion,” ta ser experenciá pa Jesus su 144.000 siguidónan ungí. Sí, nan ta ser lantá na bida spiritual den shelu, miéntras cu “e resto dje mortonan” lo ser resucitá riba tera.—Filipensenan 3:8-11; Revelacion 7:4; 20:5, 6.
19, 20. (a) Cua personanan di relato bíblico lo ser lantá na bida riba tera? (b) Ken su resureccion bo ta anticipá?
19 E speransa di resureccion a bira un realidad glorioso pa esnan ungí cu tabata fiel te na morto. (Romanonan 8:18; 1 Tesalonicensenan 4:15-18; Revelacion 2:10) Sobrebibientenan “dje tribulacion grandi” lo mira e speransa di resureccion realisá riba tera ora cu ‘laman ta entregá esnan morto den dje, i morto i Hádes entregá esnan morto den nan.’ (Revelacion 7:9, 13, 14; 20:13) Entre esnan lantá na bida riba tera lo ta Job, cu a sufri e pérdida di shete yu homber i tres yu muher. Imaginá su goso ora di yama nan bon biní bek—i con contentu nan lo ta cu nan tin shete ruman homber mas i tres otro ruman muher bunita!—Job 1:1, 2, 18, 19; 42:12-15.
20 Ki un bendicion lo e ta ora cu Abraham cu Sara, Isaac cu Rebeca—sí, i asina hopi otro hende mas, incluso “tur e profetanan”—ta lantá na bida riba tera! (Lucas 13:28) Un dje profetanan ei tabata Daniel, cu a ser primintí un resureccion bou dje gobiernu Mesiánico. Pa rond di 2.500 aña Daniel a sosegá den graf, pero mediante e poder di resureccion, pronto lo e ‘lanta para pa su porcion’ como un dje ‘prinsnan riba tur e tera.’ (Daniel 12:13; Salmo 45:16) Ki emocionante lo ta pa yama bon biní bek no solamente na esnan fiel di hopi tempu pasá, sino tambe na bo propio tata, mama, yu homber, yu muher of otro ser kerí cu e enemigu morto a kita for di bo!
21. Pakico nos no mester tarda pa haci bon cosnan pa otronan?
21 Algun di nos amigunan i sernan kerí a sirbi Dios pa década i ta hende grandi di basta edad. Edad avansá kisas ta hacié difícil pa nan enfrentá e desafionan di bida. Ki amoroso ta pa duna nan loke sea e yudansa cu nos por awor akí! Anto nos lo no tin duele cu nos a keda sin cumpli cu nan den algun manera, si morto mester tuma nan como su víctima. (Eclesiástes 9:11; 12:1-7; 1 Timoteo 5:3, 8) Nos por tin sigur cu Jehova lo no lubidá e bon cosnan cu nos ta haci pa otronan, sin importá nan edad of circunstancia. “Miéntras cu nos tin tempu faborabel p’e,” Pablo a skirbi, “laga nos obra loke ta bon pa cu tur, pero specialmente pa cu esnan relacioná cu nos den e fe.”—Galationan 6:10; Hebreonan 6:10.
22. Kico nos mester ta determiná pa haci te ora e speransa di resureccion cumpli?
22 Jehova ta “e Tata di tierno misericordia i e Dios di tur consuelo.” (2 Corintionan 1:3, 4) Su Palabra ta consolá nos i ta yuda nos pa consolá otronan cu e speransa poderoso di resureccion. Laga nos ta manera Pablo i tene fe den e resureccion, te ora nos mira e cumplimentu di e speransa ei mediante lantamentu di e mortonan na bida riba tera. Laga nos imitá foral Jesus, kende su speransa den Dios su poder pa resucit’é tabata realisá. Esnan den graf conmemorativo pronto lo tende Cristo su bos i sali. Cu esaki duna nos consuelo i goso. Pero riba tur cos, laga nos ta gradicidu na Jehova, kende a haci e victoria riba morto posibel mediante nos Señor Jesucristo!
Kico Ta Bo Contesta?
• Ki prueba di testigo ocular Pablo a duna di Jesus su resureccion?
• Cua ta “e último enemigu,” i con lo e ser reducí na nada?
• Den e caso di cristiannan ungí, kico ta ser sembrá i kico ta ser lantá?
• Cua personanan di relato bíblico lo bo tin gana di topa ora nan ser lantá na bida riba tera?
[Preguntanan di Estudio]
[Plachi na página 16]
Apostel Pablo a haci un defensa poderoso di e resureccion
[Plachinan na página 20]
E resureccion di Job, su famia, i asina tantu otro hende mas lo ta un causa di goso inmenso!