Arogancia Ta Hiba na Desonor

“Arogancia a bini? Anto desonor lo bini; pero sabiduria ta cu esnan modesto.”—PROVERBIONAN 11:2.

1, 2. Kico ta arogancia, i den ki maneranan el a hiba na desaster?

UN LEVITA envidioso ta dirigí un multitud rebelde contra e autoridad cu Jehova a nombra. Un prins ambicioso ta traha un complot astuto pa usurpá e trono di su tata. Un rey impaciente ta pasa e instruccion bon cla di Dios su profeta por haltu. E tres israelitanan aki tin algu en comun: arogancia.

² Arogancia of actua di un manera presumido, ta un característica dje curason cu ta forma un menasa serio pa tur hende. (Salmo 19:13) Un persona arogante cu tribilidad ta tuma e libertad pa haci cos sin tin autorisacion pa esei. Hopi bes, esaki ta hiba na desaster. De echo, arogancia a ruiná reynan i a tumba imperionan. (Jeremías 50:29, 31, 32; Daniel 5:20) Asta algun sirbidó di Jehova a cai den e trampa aki di arogancia i esei a hiba nan na ruina.

3. Kico por yuda nos comprendé e peliger di arogancia?

³ P’esei, cu bon motibu Bijbel ta bisa: “Arogancia a bini? Anto desonor lo bini; pero sabiduria ta cu esnan modesto.” (Proverbionan 11:2) Bijbel ta duna nos ehempelnan cu ta confirmá e berdad dje proverbio aki. Un examinacion di algun dje ehempelnan aki lo yuda nos mira e peliger di pasa por haltu di  límitenan debidamente establecí. P’esei, laga nos considerá con envidia, ambicion i falta di pacenshi a pone e tres hombernan mencioná na principio, actua cu arogancia, i a hiba nan na desonor.

Core—Un Rebelde Envidioso

4. (a) Ken Core tabata, i sin duda e tabata parti di ki sucesonan histórico? (b) Ora el a bira mas grandi, ki accion bergonsoso Core a instigá?

⁴ Core tabata un kohatita levita, primu di Moises cu Aron. Aparentemente, e tabata leal na Jehova pa décadanan. Core tabatin e privilegio di ta entre esnan cu milagrosamente a scapa dor di crusa laman Corá, i probablemente el a participá den ehecutá Jehova su huicio contra e israelitanan cu a adorá e bisé na ceru di Sinaí. (Exodo 32:26) Sin embargo, cu tempu, Core a bira lider di un conspiracion contra Moises i Aron cu a incluí e rubenitanan Datan, Abiram i On, huntu cu 250 cabesante israelita. * Nan a bisa Moises cu Aron: “Ya ta basta cu boso, pasobra henter e asamblea tur ta santu i Jehova ta meimei di nan. Pakico anto, boso mester halsa boso mes riba e congregacion di Jehova?”—Númeronan 16:1-3.

5, 6. (a) Pakico Core a rebelá contra Moises cu Aron? (b) Di con nos por bisa cu Core probablemente a balotá su lugá den Dios su areglo?

⁵ Despues di añanan di fieldad, di con Core a rebelá? E liderato di Moises riba Israel sigur no tabata opresivo, pasobra Moises tabata “na un gran grado esun di mas mansu di tur hende cu tabata riba e superficie dje suela.” (Númeronan 12:3) Sin embargo, ta parce cu Core a envidiá Moises cu Aron i a carga rencor contra nan prominencia, i esaki a pon’é bisa, ekibocadamente, cu nan a halsa nan mes riba e congregacion pa cumbinencia personal i egoismo.—Salmo 106:16.

⁶ Muy probablemente parti di Core su problema tabata cu e no a apreciá su mes privilegio den Dios su areglo. Ta berdad cu e levitanan kohatita no tabata sacerdote, pero nan tabata instructor dje Ley di Dios. Tambe nan a carga e mueblenan i artículonan di uso dje tabernáculo ora mester a transportá esakinan. Esei tabata un tarea importante, pasobra ta solamente personanan cu tabata religiosamente i moralmente limpi por a carga e artículonan  santu di uso. (Isaías 52:11) P’esei, ora Moises a enfrentá Core, eigenlijk el a puntra: Bo ta considerá bo asignacion asina insignificante, cu bo mester haña e sacerdocio tambe? (Númeronan 16:9, 10) Core no a realisá cu e onor di mas grandi ta di sirbi Jehova fielmente di acuerdo cu su areglo, i no e hañamentu di un posicion of státus special.—Salmo 84:10.

7. (a) Con Moises a trata cu Core i su hombernan? (b) Den ki manera Core su rebelion a yega na un final desastroso?

⁷ Moises a invitá Core i su hombernan pa reuní e siguiente mainta na e tent di reunion cu pochi di candela i censia. Core i su hombernan no tabatin autorisacion pa ofrecé censia, ya cu nan no tabata sacerdote. Si nan a bini cu pochi di candela i censia, esaki lo a mustra claramente cu ainda nan tabata sinti cu nan tin derecho pa actua como sacerdote—asta despues di a haña henter un anochi pa reconsiderá e asuntu. Ora nan a presentá e siguiente dia, Jehova tabatin rason pa expresá su rabia. En cuanto e rubenitanan, “tera a habri su boca i a traga nan.” Candela di Dios a caba cu tur e otro rebeldenan, incluso Core. (Deuteronomio 11:6; Númeronan 16:16-35; 26:10) Core su arogancia a hiba n’e desonor mas grandi: Dios su desaprobacion!

Resistí e “Tendencia pa cu Envidia”

8. Con “un tendencia pa cu envidia” por manifestá su mes entre cristiannan?

⁸ E relato di Core ta un spiertamentu pa nos. Ya cu tin “un tendencia pa cu envidia” den hende imperfecto, e por manifestá su mes asta den e congregacion cristian. (Santiago 4:5) Por ehempel, kisas nos ta hopi conciente di posicion. Mescos cu Core, nos por cuminsá envidiá esnan cu tin privilegionan cu nos ta deseá. Of nos por bira manera e cristian di promé siglo yamá Diótrefes. E tabata sumamente crítico di autoridad apostólico, aparentemente pasobra e a deseá di ta na cabes. Cu rason Juan a skirbi cu Diótrefes “gusta haña e promé lugá.”—3 Juan 9.

9. (a) Ki actitud pa cu responsabilidadnan di congregacion nos mester evitá? (b) Cua ta e punto di bista corecto di nos lugá den Dios su areglo?

⁹ Claro cu no ta malu pa un ruman homber cristian haci esfuerso pa haña responsabilidad den congregacion. Pablo a asta animá esei. (1 Timoteo 3:1) Sin embargo, nunca nos mester mira privilegionan di sirbishi como un karnet di mérito, como si fuera cu ora nos haña nan, nos a bai un stap mas haltu riba e asina yamá trapi di progreso. Corda cu Jesus a bisa: “Ken cu kier bira grandi den boso mester ta boso sirbidó, i ken cu kier ta e promé den boso mester ta boso esclabo.” (Mateo 20:26, 27) Claramente, ta robes pa envidiá esnan cu tin responsabilidad mas grandi, como si fuera nos balor den bista di Dios ta dependé riba nos “rango” den su organisacion. Jesus a bisa: “Boso tur ta ruman.” (Mateo 23:8) Sí, sea nos ta publicadó of pionero, recien bautisá of wardadó di integridad di hopi tempu—tur hende cu ta sirbi Jehova cu henter nan curason, tin un lugá precioso den su areglo. (Lucas 10:27; 12:6, 7; Galationan 3:28; Hebreonan 6:10) Di berdad e ta un privilegio pa traha scouder cu scouder cu miyones di hende cu ta haci esfuerso pa aplicá e conseho di Bijbel: “Faha boso mes cu humildad di mente un pa cu otro.”—1 Pedro 5:5.

Absalom—Un Oportunista Ambicioso

10. Ken Absalom tabata, i con el a purba haña e fabor di esnan cu tabata bini cerca e rey pa huicio?

¹⁰ E curso di bida di Absalom, e di tres yu di rey David, ta siña nos un les práctico tocante ambicion. E oportunista mañoso aki a purba gana fabor di esnan cu a bini cerca e rey pa huicio. Promé, el a insinuá cu David tabata indiferente pa cu nan necesidadnan. Despues el a stop di ta sutil i a revelá precis kico e tabata kier. Absalom tabata bisa ketu bai: “Mare nan a nombra ami hues den e pais, pa asina tur hende cu tin un caso legal of huicio bini cerca mi! E ora ei lo mi a haci husticia p’e sigur.” Absalom su politikeria no tabatin límite. Bijbel  ta bisa: “Ora un homber tabata yega cerca pa buig dilanti dje, e tabata saca su man i gar’é i sunch’é. I Absalom a sigui haci dje manera aki cu tur e israelitanan cu tabata bini cerca e rey pa huicio.” Cu ki resultado? “Absalom a sigui horta e curason di e hombernan di Israel.”—2 Samuel 15:1-6.

11. Con Absalom a purba usurpá e trono di David?

¹¹ Absalom tabata determiná pa usurpá e reinado di su tata. Cincu aña promé, el a asesiná Amnon, e yu mayó di David, aparentemente p’e venga e violacion di Tamar, Absalom su ruman muher. (2 Samuel 13:28, 29) Sin embargo, kisas for dje tempu ei caba Absalom tabatin su bista riba e trono, mirando e asesinato di Amnon como un manera cumbiniente pa eliminá un rival. * En todo caso, n’e debido tempu, Absalom a actua. El a laga proclamá den henter e pais cu el a bira rey.—2 Samuel 15:10.

12. Splica con Absalom su arogancia a hib’é na desonor.

¹² Pa un tempu, Absalom tabatin éxito, dor cu “e conspiracion a sigui bira mas fuerte, i e hendenan cu a uni nan mes cu Absalom a sigui aumentá den cantidad.” Cu tempu, rey David a hañ’é obligá ta hui pa su bida. (2 Samuel 15:12-17) Tog, poco despues Absalom su carera a caba ora Joab a mat’é, i nan a tir’é den un buracu, i tap’é cu piedra. Imaginá bo, e homber ambicioso aki cu tabata kier a bira rey no a haña ni un entiero decente ora el a muri! * Arogancia di berdad a hiba na Absalom su desonor.—2 Samuel 18:9-17.

Rechasá Ambicion Egoista

13. Con un spiritu di ambicion por saca rais den curason di un cristian?

¹³ E manera cu Absalom a subi na poder i despues a cai for di poder, ta siña nos un les. Den e mundu djawe sin escrúpulo, ta comun pa hende busca fabor di nan superiornan dor di labia nan, purba haci nan mes gustá cerca nan djis pa impresioná nan of kisas pa haña un tipo di privilegio of promocion. Na mes momento, e labiadónan aki por broma cu cierto declaracionnan cerca esnan cu ta bou di nan, sperando di haña nan fabor i apoyo. Si nos no tene cuidou, e spiritu ambicioso ei por saca rais den nos curason. Ta parce cu esaki a sosodé cu algun den promé siglo, p’esei tabata necesario pa e apostelnan duna conseho fuerte contra e personanan aki.—Galationan 4:17; 3 Juan 9, 10.

14. Di con nos mester evitá un spiritu di ambicion i di engrandecé nos mes?

¹⁴ Jehova no tin lugá den su organisacion pa hende cu ta planea pa engrandecé nan mes i asina purba “busca nan mes gloria.” (Proverbionan 25:27) Sí, Bijbel ta spierta: “Jehova lo corta kita afó tur lip suave, e lenga cu ta papia cos grandi.” (Salmo 12:3) Absalom tabatin lip suave. El a bisa cosnan labioso na hende cu e tabatin mester di nan fabor, tur esei pa e haña un posicion di autoridad cu el a cudishá. Na contraste, ki bendicioná nos ta meimei di un hermandad cu ta sigui Pablo su conseho: “[No] haci nada motivá pa gana di pleita of motivá pa egoismo, sino considerá cu humildad di mente cu e otronan ta superior cu boso.”—Filipensenan 2:3.

Saul—Un Rey sin Pacenshi

15. Con Saul a demostrá un tempu cu e tabata modesto?

¹⁵ Na un tempu Saul, cu despues a bira rey di Israel, tabata modesto. Por ehempel, considerá loke a sosodé tempu e tabata hóben. Ora cu e profeta di Dios Samuel a papia bon di dje, Saul a contestá humildemente: “No ta un benjamita mi ta for di esun mas chikitu dje tribunan di Israel, i mi famia esun mas insignificante di tur e famianan dje tribu di Benjamin? Pakico anto bo ta papia un cos asina cu mi?”—1 Samuel 9:21.

16. Den ki manera Saul a manifestá un actitud impaciente?

 ¹⁶ Sin embargo, despues Saul su modestia a disparcé. Miéntras e tabata den guera cu e filisteonan, el a retirá bai Gilgal, caminda e mester a warda pa Samuel bini i suplicá Dios cu sacrificio. Ora cu Samuel no a yega n’e tempu cumbiní, cu tribilidad Saul mes a ofrecé e sacrificio kimá. Net ora el a caba Samuel a yega. Samuel a puntr’é: “Kico bo a haci?” Saul a contestá: “Mi a mira cu e pueblo a plama bai laga mi, i abo—abo no a yega denter di e dianan señalá . . . P’esei mi a obligá mi mes i a bai ofrecé e sacrificio kimá.”—1 Samuel 13:8-12.

17. (a) Na promé bistaso, di con loke Saul a haci por a parce hustificá? (b) Di con Jehova a censurá Saul p’e forma sin pacenshi cu el actua?

¹⁷ Na promé bistaso, loke Saul a haci por a parce hustificá. Con cu bai bin, Dios su pueblo tabata “den pertá,” “bou di hopi preshon,” i temblando pa motibu dje situacion desesperá cu nan tabata aden. (1 Samuel 13:6, 7) Sigur no ta malu pa tuma iniciativa ora circunstancia ta rekerí esei. * Pero corda sí, cu Jehova por lesa curason i ta mira nos motivacion di mas íntimo. (1 Samuel 16:7) Pues, e mester a mira algun factor tocante Saul cu no ta directamente skirbí den e relato bíblico. Por ehempel, kisas Jehova a mira cu Saul tabata impaciente pa motibu di orguyo. Probablemente Saul tabata hopi iritá cu e—e rey di henter Israel—tabatin cu warda riba un profeta cu el a considerá bieu i cu tabata tarda! Sea cual sea e caso, Saul a sinti cu Samuel su tardansa a dun’é derecho pa tuma asuntu den su man i pasa por haltu dje instruccionnan cla cu el a ricibí. Kico tabata e resultado? Samuel no a elogiá Saul su iniciativa. Al contrario, el a reprendé Saul, bisando: “Bo reino lo no dura . . . pasobra abo no a warda loke Jehova a manda bo.” (1 Samuel 13:13, 14) Un biaha mas, arogancia a hiba na desonor.

Tene Cuidou cu Falta di Pacenshi

18, 19. (a) Describí con falta di pacenshi por pone un sirbidó di Dios djawe actua cu arogancia. (b) Kico nos mester corda en cuanto e funcionamentu dje congregacion cristian?

¹⁸ E relato di Saul su forma arogante di actua ta registrá den e Palabra di Dios pa nos beneficio. (1 Corintionan 10:11) Ta asina fácil pa nos bira iritá dor dje imperfeccion di nos rumannan. Kisas nos por bira impaciente mescos cu Saul, anto sinti cu pa trata e asuntunan debidamente, nos mester tuma cos den nos mes man. Por ehempel, suponé cu un ruman homber ta sobresalí den cierto abilidad organisacional. E ta puntual, sa bon di proceduranan di congregacion i tin don di papia i siña. Pero na mes momento, e ta sinti cu otronan no ta na e nivel di su normanan di precision, i nan no ta dje eficiente ei manera lo e kier. Esaki ta dun’é motibu pa expresá falta di pacenshi? E mester criticá su rumannan, kisas insinuando cu si no tabata pa su esfuerso nada lo a ser hací i e congregacion lo a tambaleá? Esaki lo ta arogancia!

¹⁹ En realidad, ta kico ta tene e congregacion cristian huntu? Abilidad di dirigí? eficiencia? profundidad di conocimentu? Claro, e cosnan aki ta bentahoso pa cos por cana bon den un congregacion. (1 Corintionan 14:40; Filipensenan 3:16; 2 Pedro 3:18) Sin embargo, Jesus a  bisa cu lo a identificá su sirbidónan principalmente dor di nan amor. (Juan 13:35) Ta p’esei ancianonan amoroso, maske nan ta ordená, ta realisá cu e congregacion no ta un empresa cu mester di maneho severo; mas bien, e ta consistí di un tou cu mester di cuido tierno. (Isaías 32:1, 2; 40:11) Ora pasa por haltu dje principionan ei den un forma arogante, hopi bes e ta resultá den contencion. Na contraste, órden divino ta producí pas.—1 Corintionan 14:33; Galationan 6:16.

20. Kico lo ser considerá den e siguiente artículo?

²⁰ E relato bíblico di Core, Absalom i Saul ta mustra claramente cu arogancia ta hiba na desonor, manera ta pará skirbí na Proverbionan 11:2. Di otro banda, e mésun texto ei ta sigui: “Sabiduria ta cu esnan modesto.” Kico ta modestia? Ki ehempel bíblico por yuda tira lus riba e cualidad aki, i con nos por desplegá modestia awe? Lo considerá e preguntanan aki den e siguiente artículo.

[Nota]

Bo Ta Corda?

• Kico ta arogancia?

• Con envidia a pone Core actua cu arogancia?

• Kico nos por siña dje relato di Absalom ambicioso?

• Con nos por evitá e spiritu impaciente cu Saul a manifestá?

[Preguntanan di Estudio]

[Plachi na página 10]

Saul a bira impaciente i a actua cu arogancia