Di Con Nan No Tin Yu?

DELE i Fola, * un pareha casá, tabata biba i traha n’e oficina di sucursal di Sociedad Watch Tower na Nigeria. Djis despues cu nan a cuminsá traha einan, Fola su mama a bin haci bishita. E mama a bini di leu p’e bin combersá di un asuntu cu a preocup’é mashá, i cu a pone cu vários anochi e no por a drumi.

“Boso ta haci asina tantu cos bon pa mi,” el a bisa nan. “Boso ta manda regalo i boso ta bishitá mi. E expresionnan ei di amor ta balioso pa mi. Pero nan ta preocupá mi tambe, pasobra semper mi ta puntra mi mes ta ken lo bai haci e cosnan ei pa boso ora boso tin mi edad? Boso tin dos aña caba casá i boso no tin yu. Boso no ta kere cu ta tempu pa boso sali for di Betel i cuminsá cu un famia?”

Mama a razoná asina aki: Dele cu Fola a dedicá suficiente tempu na Betel. Awor ta tempu pa nan pensa riba nan futuro. Sigur tin otro hende cu por haci nan trabou. Dele cu Fola no tin nodi bandoná sirbishi di tempu completo, pero nan por cuminsá den un otro rasgo di sirbishi, unu cu lo permití nan haña yu i experenciá e gosonan di ser mayor.

Mama Su Preocupacion

Mama su preocupacion ta comprendibel. E deseo di tin yu ta unu fundamental i comun den tur cultura i época. Hañamentu di yu ta lanta sintimentunan profundo di goso i speransa. “E fruta di barica ta un recompensa,” Bijbel ta bisa. Sí, e abilidad di haña yu ta un regalo precioso for di nos Creador amoroso.—Salmo 127:3.

Den hopi sociedad, parehanan casá ta haña nan confrontá cu tremendo preshon social pa haña yu. Por ehempel na Nigeria, caminda en general hende muher ta haña seis yu, ta normal pa na casamentu bo tende hende deseá esnan recien casá: “Aki nuebe luna nos ta spera di tende un baby yora den bo cas.” Como regalo di casamentu, e bruid i bruidegom por haña un cama pa yu. Suegranan ta vigilá kalender cu sumo atencion. Si denter di mas o ménos un aña e bruid no sali na estado, nan ta chek wak si tin cualkier problema cu nan por yuda solucioná.

Pa hopi mama, e motibu pakico un pareha ta casa ta pa haña yu i sigui cu e liña di desendencia. Fola su mama a bis’é: “Pakico bo a casa si bo no tin intencion di haña yu? Un hende a duna lus na bo; abo tambe mester haña bo mes yunan.”

Fuera di esei, tin asuntunan práctico pa tene cuenta cuné. Den hopi nacion africano, tin masha poco percuracion di parti di gobiernu pa cuida hende grandi. Ta un custumber cu ta yunan ta cuida nan mayornan di edad, mescos cu nan mayornan a cuida nan ora nan tabata chikitu. P’esei Fola su mama a razoná cu si su yunan no tabatin nan mes yunan, nan ta core e riesgo cu ora nan bira bieu, nan lo sufri di soledad, pobresa, sinti nan indeseá i cu lo no tin hende pa dera nan ora nan muri.

Den hopi parti di Africa, hende ta considerá keda sin haña yu como un maldicion. Den algun  área, ta ser verwagt asta pa promé cu casamentu, muhernan proba cu nan por haña yu. Hopi hende muher cu no por sali na estado lo busca remedi i tratamentu desesperadamente pa purba cambia nan condicion steril.

En bista di e actitudnan aki, hende ta pensa cu parehanan cu deliberadamente ta keda sin haña yu, ta priva nan mes di algu bon. Hopi bes otronan ta considerá nan como hende straño, cu no ta pensa riba futuro i ta digno di lástima.

Goso i Responsabilidad

E pueblo di Jehova ta reconocé cu aunke criamentu di yu ta trece goso cuné, e ta trece responsabilidad tambe. Na 1 Timoteo 5:8, Bijbel ta bisa: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia di cas, el a nenga e fe i ta pió cu un persona sin fe.”

Mayornan tin cu percurá pa nan famia tantu den sentido material como spiritual, i esaki ta exigí basta tempu i esfuerso. Nan no ta pensa cu, ya cu ta Dios ta duna yu, ta keda na Dios pa percurá pa nan. Nan ta realisá cu cria yu di acuerdo cu principionan bíblico ta un responsabilidad full-time cu Dios a asigná na mayornan; e no ta un responsabilidad cu mester pone riba otro hende.—Deuteronomio 6:6, 7.

E tarea di cria yu ta specialmente difícil den e “último dianan” aki di “tempu crítico, duru pa trata cuné.” (2 Timoteo 3:1-5) Fuera dje condicionnan económico cu ta empeorando, e maldad creciente di sociedad ta haci criamentu di yu awe un desafio mas grandi. Asina mes, rond mundu, un cantidad incontabel di cristian a aceptá e reto aki i cu éxito ta lanta yunan deboto “den e disiplina i reglamentu mental di Jehova.” (Efesionan 6:4) Jehova ta stima i bendicioná e mayornan aki pa nan trabou duru.

Di Con Algun No Ta Haña Yu

Na e otro banda, hopi pareha cristian no tin yu. Algun ta infértil i tog no ta adoptá yu. Otro parehanan cu sí por producí yu ta dicidí pa no hacié. E parehanan ei no ta keda sin haña yu pasobra nan kier evitá responsabilidad of pasobra nan tin miedu di aceptá e desafionan cu ser mayor ta trece cuné. Mas bien, nan a dicidí di duna nan pleno atencion na diferente rasgo dje ministerio di tempu completo cu criamentu di yu lo no a permití. Algun ta sirbi como misionero. Otronan ta sirbi Jehova den e trabou biahero of na Betel.

Mescos cu tur otro cristian, nan ta realisá cu tin un trabou urgente pa haci. Jesus a bisa: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” E trabou ei ta ser hací awe. E ta un trabou importante, ya cu “e fin” lo nificá destruccion pa esnan cu no a haci caso dje bon nobo.—Mateo 24:14; 2 Tesalonicensenan 1:7, 8.

Nos tempu ta similar n’e tempu ora cu Noe i su famia a construí e arca gigantesco cu a conserbá nan na bida atrabes dje gran Diluvio. (Génesis 6:13-16; Mateo 24:37) Aunke tur tres yu homber di Noe tabata casá, niun di nan no a haña yu, sino te despues dje Diluvio. Un motibu p’esei lo por tabata cu e parehanan aki kier a dedicá nan pleno atencion i energia n’e trabou cu tabatin nan dilanti. Un otro motibu por tabata cu nan a vacilá pa trece yu den un mundu degradá i violento caminda “e maldad di hende tabata abundante . . . i tur inclinacion dje pensamentunan di su curason tabata solamente malu tur ora.”—Génesis 6:5.

Aunke esaki no ta implicá cu ta malu pa haña yu awe, hopi pareha cristian ta nenga di haña yu pa asina nan por ta mas plenamente enbolbí den e trabou urgente cu Jehova a duna su pueblo pa haci. Algun a warda un periodo di tempu promé cu nan a haña yu; otronan a dicidí di keda sin yu i ta pensa riba e posibilidad di haña yu den Jehova su hustu mundu nobo. E manera di pensa aki ta reflehá un falta di vision? Nan ta perdiendo e chens di nan bida? Mester tene duele di nan?

 Bida Gososo i di Siguridad

Actualmente Dele cu Fola, mencioná anteriormente, tin mas cu dies aña casá i ainda nan ta decididu pa no haña yu. “Ainda nos famianan ta preshoná nos pa haña yu,” Dele ta bisa. “Nan preocupacion principal ta nos futuro siguridad. Semper nos ta expresá aprecio pa nan interes amoroso, pero cu tacto nos ta splica nan cu nos ta felis den loke nos ta haciendo. Pa loke ta siguridad, nos ta mustra nan cu nos confiansa ta den Jehova, kende ta percurá p’e bienestar di tur esnan cu keda fiel i leal na dje. Tambe nos ta splica nan cu haña yu no ta un garantia cu yunan lo cuida nan mayornan ora esakinan bira bieu. Tin hende ta cuida nan mayornan masha tiki, otronan no por yuda nan i tambe tin otronan cu ta muri promé cu nan mayornan. Di otro banda, cerca Jehova sí, nos futuro ta sigur.”

Dele i otronan manera e, tin tur confiansa den e promesa di Jehova na su sirbidónan fiel: “Lo mi no bandoná bo di ningun manera ni desampará bo di ningun manera.” (Hebreonan 13:5) Tambe nan ta kere cu “e man di Jehova no a bira demasiado corticu cu e no por salba, ni su orea no a bira demasiado pisá cu e no por tende.”—Isaías 59:1.

Observá con Jehova ta sostené su sirbidónan fiel, ta un otro motibu pa confiansa. Rey David a skirbi: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente.” Pensa riba esei. Bo conocé cualkier sirbidó fiel di Jehova cu a keda “bandoná henteramente”?—Salmo 37:25.

En bes di wak atras cu duele, esnan cu a dedicá nan bida na sirbi Jehova i nan compañeronan cristian, ta refleccioná riba nan bida cu satisfaccion. Ruman Iro Umah a traha 45 aña den sirbishi di tempu completo i awor e ta sirbi como un superintendente biahero na Nigeria. E ta bisa: “Aunke ami cu mi casá no tin yu, nos ta tene na mente cu Jehova semper a percurá pa nos tantu spiritualmente como materialmente. Nos no a falta nada. Lo e no bandoná nos segun nos ta bira bieu. E añanan aki den sirbishi di tempu completo a resultá di ta esnan mas felis di nos bida. Nos ta gradicidu cu nos por sirbi nos rumannan, i nos rumannan ta apreciá nos sirbishi i nan ta yuda nos.”

Aunke hopi pareha no a haña yunan carnal, nan a producí un otro clase di yu: disipelnan cristian cu ta adorá Jehova. Apostel Juan tabatin mas o ménos 100 aña di edad ora el a skirbi: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.” (3 Juan 4) E fieldad di Juan su “yunan”—esnan cu el a introducí na “e berdad”—a dun’é hopi goso.

E mésun goso ei ta abundá awe. Bernice, un señora nigeriano, tin 19 aña casá i el a scoge pa no haña yu. E último 14 añanan, el a traha como pionero. Segun cu e ta yega e periodo den su bida ora cu lo no ta posibel mas p’e haña su mes yunan, e no ta sinti duele di a dedicá su bida na e trabou di haci disipel. E ta bisa: “Mira mi yunan spiritual alcansá madures ta haci mi felis. Asta si mi tabatin mi mes yunan, mi ta duda cu nan lo tabata mas pegá na mi cu esnan cu mi a yuda conocé e berdad. Nan ta tratá mi como si fuera mi ta nan mama cu a haña nan, nan ta papia cu mi di nan goso i problemanan i ta pidi mi conseho. Nan ta skirbi mi carta, i nos ta bishitá otro.

Algun hende ta pensa cu si bo no tin bo mes yunan, ta un maldicion. Nan ta bisa cu lo bo sufri ora bo bira bieu. Pero ami no ta mir’é asina. Mi sa cu tanten mi sirbi Jehova di henter alma, lo e recompensá mi i percurá pa mi. Nunca lo e tirá mi afó ora mi bira bieu.”

Stimá i Apreciá dor di Dios

Esnan cu a haña yu i cu a lanta yunan cu “ta sigui cana den e berdad” tin hopi motibu pa ta gradicidu. Nada straño anto cu Bijbel ta bisa: “E tata di un persona hustu sin falta lo ta gososo; esun cu ta bira tata di un persona sabí tambe lo alegrá den dje. Bo tata i bo mama lo alegrá, i esun cu a duna lus na bo lo ta gososo”!—Proverbionan 23:24, 25.

 E cristiannan cu no tabatin e goso di trece yu na mundu, a ser bendicioná den otro maneranan. Hopi dje parehanan aki a hunga un papel importante den avansá e interesnan di Reino den un manera amplio. Atrabes di añanan, nan a gana experencia, sabiduria i abilidadnan cu ta ekipá nan pa duna un contribucion balioso n’e obra di Reino. Hopi di nan ta na vanguardia di e trabou.

Aunke nan a keda sin haña yu pa causa di interesnan di Reino, Jehova a bendicioná nan cu un famia spiritual amoroso cu ta apreciá profundamente e sacrificionan cu nan a haci. Ta manera Jesus a bisa: “Ningun hende a laga [literalmente, “bandoná”] cas of ruman homber of ruman muher of mama of tata of yu of cunucu pa mi causa i pa causa dje bon nobo cu lo no haña shen biaha mas tantu awor den e periodo di tempu aki, cas i ruman homber i ruman muher i mama i yu i cunucu . . . i den e binidero sistema di cosnan bida eterno.”—Marco 10:29, 30.

Ki precioso tur e personanan fiel aki ta pa Jehova! Apostel Pablo ta sigurá tur e hendenan leal ei, tantu esnan cu tin yu como esnan cu no tin: “Dios no ta inhustu p’e lubidá boso trabou i e amor cu boso a mustra pa su nomber, p’e echo cu boso a sirbi e santunan i ta sigui sirbi.”—Hebreonan 6:10.

[Nota]

[Plachinan na página 23]

Parehanan sin yu a ser bendicioná cu un famia spiritual amoroso