Di Con No Tin Respet pa Autoridad?

“E fenómeno di desafiá autoridad establecí, religioso i seglar, social i político, riba un escala mundial, un dia lo por ser considerá e evento sobresaliente dje último década.”

AÑANAN a pasa desde e añanan 1960, e década cu e historiadó i filósofo Hannah Arendt a referí na dje ariba. Awe, e ola di falta di respet pa autoridad ta mas pió cu nunca.

Por ehempel, un reportahe recien den The Times di Londen ta bisa: “Algun mayor ta nenga di aceptá e autoridad di un maestro riba nan yu i ora purba disipliná nan yu, e mayornan ta keha.” Hopi bes, ora nan yunan haña disiplina na scol, mayornan ta bai scol no solamente pa menasá e maestronan sino tambe pa atacá nan.

Un bocero dje Asociacion Nacional di Cabes di Scol na Gran Bretania a declará un biaha: “Público ta bisa: ‘Mi tin derecho,’ en bes di: ‘Mi tin responsabilidad.’” Algun mayor, fuera di keda sin inculcá un respet saludabel pa autoridad den nan yunan, no ta corigí nan yunan hóben, i ta nenga di laga otro hende haci esei. Ta permití yunan cu ta exigí nan “derecho” pa ignorá tantu autoridad di nan mayornan como di nan maestronan, i e resultado no ta inesperá. Columnista Margarette Driscoll ta skirbi cu e resultado ta: “Un generacion nobo cu no tin respet pa autoridad i casi ningun idea di kico ta bon i malu.”

Revista Time den su artículo “Generacion Perdí,” a señalá n’e desilusion di hopi hóben ruso dor di cita un cantante popular di rap cu a bisa: “Con cualkier hende cu a nace den e mundu aki, caminda nada ta dura hopi ni nada ta hustu, por tin confiansa den sociedad?” Sociólogo Mikhail Topalov a bai di acuerdo cu e opinion aki: “E hóbennan aki no ta kens. Nan a mira con gobiernu a gaña nan mayornan, nan a mira nan mayornan perde nan placa cu nan a spar i nan trabou. Nos por spera cu nan ta bai respetá autoridad?”

Sin embargo, lo ta robes pa concluí cu desconfiá autoridad ta un característica di solamente e generacion hóben. Awendia, hende di tur edad ta mira cualkier tipo di autoridad cu desconfiansa, asta cu desprecio. Esaki ta nificá cu ningun autoridad ta confiabel? Autoridad, definí como “e poder of derecho di controlá, husga of prohibí accionnan di otro hende,” por tin un bon influencia, si eherc’é den e manera corecto. E por beneficiá tantu hende individual como un comunidad. E siguiente artículo lo considerá con esaki ta posibel.