Di Con Respet pa Autoridad Ta Esencial?

KEN no ta gradicidu cu polis tin autoridad pa arestá criminal cu ta horta nos pertenencianan of ta menasá nos famia? I nos no ta apreciá cu corte tin autoridad pa castigá criminal pa asina protehá comunidad?

Otro servicionan público útil cu tambe por bini na mente ta: mantencion di caretera, salubridad i educacion—hopi bes pagá dor di belasting cu autoridad gubernamental ta cobra. Cristiannan berdadero ta e proménan pa reconocé cu respet pa autoridad debidamente nombrá ta esencial. Pero con leu e respet ei ta yega? I den ki aspectonan di bida respet pa autoridad ta necesario?

Autoridad den Comunidad

Bijbel ta bisa tur hende, sea creyente of no, pa respetá autoridad civil cu ta traha na bienestar di comunidad. Na Romanonan 13:1-7, apostel cristian Pablo a skirbi compañeronan creyente na Roma tocante esaki, i ta útil pa considerá loke e ta bisa einan.

Pablo tabata un ciudadano romano, i n’e tempu ei Roma tabata e potencia mundial. Pablo su carta, skirbí rond di aña 56 E.C., a consehá cristiannan pa ta ciudadano ehemplar. El a skirbi: “Laga tur alma sea sumiso na autoridadnan superior, pasobra no tin autoridad sino dor di Dios; e autoridadnan cu ta existí, Dios a pone nan den nan posicion relativo.”

Aki Pablo ta splica cu ningun autoridad humano lo a existí si Dios no a permití esei. Den e sentido ei autoridadnan superior tin un posicion relativo den e structura di Dios su propósito. P’esei como consecuencia, “esun cu oponé autoridad a pone su mes contra e areglo di Dios.”

Mescos cu autoridad superior por duna elogio na ciudadanonan cu ta haci bon, nan ta autorisá tambe pa duna castigu na malechor. Hende cu ta haci malu tin hopi motibu pa teme e autoridadnan su derecho di actua como “un vengadó,” ya cu gobiernunan ta haci esei como “minister di Dios.”

 Pablo ta concluí su razonamentu dor di bisa: “P’esei, tin motibu obligatorio pa boso ta sumiso, no solamente pa motibu dje rabia ei, sino tambe pa motibu di boso concenshi. Pasobra p’esei mes tambe boso ta paga belasting; pasobra nan ta sirbidónan público di Dios cu ta sirbi constantemente pa net e propósito aki.”

E responsabilidad di regulá belasting ta cerca autoridadnan superior, no cerca e pagadó di belasting. Como un ciudadano onesto, un cristian ta mantené un bon concenshi. E sa cu dor di someté su mes na autoridadnan superior i paga e belasting cu e debe, no solamente e ta sostené e norma dje comunidad caminda e ta biba, sino tambe e ta biba na armonia cu rekisitonan divino.

Famia i Autoridad

Kico di autoridad den famia? Den e promé dianan di su bida, un baby hopi bes lo exigí atencion dor di yora of asta grita. Pero un mayor sabí lo dicerní kico e berdadero necesidad dje baby ta i lo no laga comportacion maluku dje baby dicta riba dje. Segun cu algun yu ta bira mas grandi, nan ta haña rienda liber i ta permití nan pone nan mes normanan. Dor cu nan falta experencia, nan por haña nan mes enbolbí den crímen of otro malecho, perturbando e famia i e comunidad en general, manera lamentablemente hopi autoridad local sa bon.

Rosalind Miles, autor di Children We Deserve (Yunan Cu Nos Merecé), ta bisa: “Mayornan ta disipliná yu muchu lat. E momento pa cuminsá ta ora un yu nace.” Si for di principio mayornan ta papia cu un autoridad cu ta reflehá bondad i interes, i ta consistente den nan accionnan, pronto nan yunan lo siña aceptá e autoridad ei i e disiplina amoroso cu ta sali for di dje.

Bijbel ta contené un cantidad di informacion relacioná cu autoridad den famia. Den e buki di Proverbionan, e homber sabí Sálomon ta hala atencion na e unidad di mayornan temeroso di Dios dilanti nan yunan, bisando: “Scucha, mi yu, na e disiplina di bo tata, i no bandoná e ley di bo mama.” (Proverbionan 1:8) Ora mayornan ta mantené e clase di solidaridad razonabel ei dilanti di nan yunan, e yunan sa unda nan ta pará. Kisas nan ta purba pone e mayornan bai contra otro pa nan haña nan gana, pero ora mayornan ta uní den nan autoridad, esei ta un proteccion p’e muchanan.

Bijbel ta splica cu e esposo tin e responsabilidad primario p’e bienestar spiritual di no solamente su yunan, sino tambe di su esposa. Esaki ta e descripcion di hefatura. Con mester ehercé e hefatura aki? Pablo a señalá cu mescos cu Cristo ta Cabes dje congregacion, asina homber ta cabes di su esposa. Anto Pablo ta agregá: “Esposonan, sigui stima boso esposa, mescos cu e Cristo tambe a stima e congregacion [su bruid spiritual] i a entregá su mes p’e.” (Efesionan 5:25) Ora un homber ta sigui e ehempel di Jesus i ta ehercé hefatura den un manera amoroso, lo e gana “respet profundo” di su esposa. (Efesionan 5:33) Yunan den un famia asina tambe lo mira e balor di autoridad cu Dios ta duna i lo ser animá pa acept’é.—Efesionan 6:1-3.

Con mayornan soltero, incluso esnan cu a perde nan casá den morto, por trata cu e asuntu aki? No ta importá si ta mama of tata, nan por apelá directamente n’e autoridad di Jehova Dios i Jesucristo. Jesus semper a papia cu autoridad: cu esun di su Tata i esun dje  Scritura inspirá.—Mateo 4:1-10; 7:29; Juan 5:19, 30; 8:28.

Bijbel ta proveé un abundancia di principionan balioso relacioná cu problemanan cu yunan ta enfrentá. Dor di localisá e principionan aki i aplicá nan, un mayor lo por duna conseho amoroso i útil n’e yunan. (Génesis 6:22; Proverbionan 13:20; Mateo 6:33; 1 Corintionan 15:33; Filipensenan 4:8, 9) Tambe mayornan por acudí na material basá riba Bijbel specialmente diseñá pa yuda nan train nan yu pa comprendé e beneficionan di respetá e autoridad dje Scritura. *

E Congregacion Cristian i Autoridad

“Esaki ta mi Yu, esun stimá, cu mi a aprobá; scuch’é.” (Mateo 17:5) E palabranan aki, expresá dor di Jehova Dios mes, a duna prueba cu Jesus ta papia cu autoridad divino. Loke el a bisa ta pará skirbí den e cuater relatonan di Evangelio, na cua nos por referí fácilmente.

Net promé cu el a subi na shelu, Jesus a informá su disipelnan: “Tur autoridad a ser duná na mi den shelu i riba tera.” (Mateo 28:18) Jesus, como Cabes di su congregacion, no solamente a vigilá su siguidónan ungí cu ta cana den su pasonan riba tera, sino tambe, desde cu a drama spiritu santu na Pentecoste di aña 33 E.C., el a usa nan como un canal di berdad, como un “esclabo fiel i discreto.” (Mateo 24:45-47; Echonan 2:1-36) Kico el a haci pa logra tur esaki pa asina fortificá e congregacion cristian? “Ora el a subi na haltu . . . , el a duna donnan den hende.” (Efesionan 4:8) E “donnan den hende” aki ta ancianonan cristian, nombrá dor di spiritu santu i duná e autoridad pa cuida interes spiritual di compañeronan cristian.—Echonan 20:28.

P’e motibu aki Pablo ta consehá: “Corda esnan cu ta hibando delantera entre boso, cu a papia e palabra di Dios cu boso, i segun boso ta contemplá e resultado di nan conducta, imitá nan fe.” Siendo cu e hombernan fiel aki ta sigui Jesus su pasonan cu sumo cuidou i atencion, imitá nan fe sigur ta e curso di sabiduria. Anto Pablo ta agregá: “Sea obediente na esnan cu ta hiba delantera den boso i sea sumiso, [“continuamente reconocé nan autoridad riba boso,” The Amplified Bible] pasobra nan ta vigilá riba boso alma como esnan cu lo rindi cuenta, pa nan haci esaki cu goso i no cu suspiro, pasobra esei lo ta severamente dañoso pa boso.”—Hebreonan 13:7, 17.

Kico ta sosodé ora pasa por haltu dje instruccion ei? Algun miembro dje congregacion cristian di promé a haci net esei i a bira apóstata. Bijbel ta mencioná Himeneo i Fileto como hombernan cu a debilitá e fe di algun i cu nan abla bashí ‘a violá loke ta santu.’ Un di nan declaracionnan tabata cu e resureccion a tuma lugá caba, aparentemente sea un resureccion spiritual of simbólico, i p’esei ningun resureccion lo a tuma lugá mas den futuro bou dje Reino di Dios.—2 Timoteo 2:16-18.

Autoridad nombrá a salba e situacion ei. Ancianonan cristian a logra refutá e argumentonan ei pasobra como representante di  Jesucristo, nan a usa e autoridad dje Scritura. (2 Timoteo 3:16, 17) E mésun cos ta sosodé den e congregacion cristian djawe, describí como “un pilar i apoyo dje berdad.” (1 Timoteo 3:15) Nunca lo permití siñansa falsu daña “e patronchi di palabranan saludabel,” preservá pa nos como un depósito excelente den e páginanan di Bijbel.—2 Timoteo 1:13, 14.

Miéntras cu respet pa autoridad ta disparcé rápidamente den mundu, nos como cristian ta reconocé cu debido autoridad den comunidad, den famia i den e congregacion cristian a ser establecí pa nos beneficio. Respet pa autoridad ta esencial pa nos bienestar físico, emocional i spiritual. Ora nos aceptá i respetá e autoridadnan ei duná di Dios, e autoridadnan di mas haltu—Jehova Dios i Jesucristo—lo protehá nos, pa nos bienestar eterno.—Salmo 119:165; Hebreonan 12:9.

[Nota]

[Komentario na página 5]

Bijbel ta contené un cantidad di informacion relacioná cu autoridad den famia

[Plachi na página 6]

Mayornan soltero por apelá directamente n’e autoridad di Jehova Dios i Jesucristo

[Plachinan na página 7]

Cristiannan ta reconocé cu debido autoridad den famia, den congregacion cristian i den comunidad a ser establecí pa nan beneficio

[Rekonosementu pa Potrèt na página 4]

Potret di Josh Mathes, Coleccion di Corte Supremo di Merca