Informe di Proclamadónan di Reino

Esnan Cu Ta Stima Jehova Ta Precioso den Su Bista

LÍBANON ta famoso pa su recursonan natural desde tempu di Bijbel. (Salmo 72:16; Isaías 60:13) Loke tabata specialmente balioso ta su palunan di seda mahestuoso, cu tabata masha buscá como material di construccion pa motibu di nan beyesa, fragancia i durabilidad. Den promé siglo, algu mas precioso a sali di Líbanon. E Evangelio di Marco ta informá nos cu for di Tiro i Sidon, Líbanon su teritorio di ántes, “un multitud grandi a bini cerca [Jesus], ora nan a tende cuantu cos e tabata haci.”—Marco 3:8.

Awendia ta mescos, Líbanon ta sigui producí fruta cu ta masha precioso den Jehova su bista. E siguiente experencianan ta mustra esaki.

• Wissam, un Testigo hóben, mester a duna un spreekbeurt di 30 minuut dilanti su klas na scol. Wissam a dicidí cu lo ta un bon oportunidad pa duna un testimonio. P’esei el a usa e buki Bida—Con El A Presentá? Dor di Evolucion of Creacion? i a prepará un spreekbeurt cu ta trata e tema di creacion. Sin embargo, ora su maestro a mira e material, el a bisa Wissam cu debí cu e tópico ta asina importante, e tin mag di rek su spreekbeurt te 45 minuut.

Ora Wissam a cuminsá cu su spreekbeurt, su maestro a interumpié i a manda busca e cabes di scol. Un ratu despues el a yega, i Wissam a cuminsá di nobo. Segun cu e cabes di scol tabata scucha e preguntanan cu Wissam a haci den e introduccion di su spreekbeurt, el a bira entusiasmá i a bisa cu tur alumno mester haña un copia dje spreekbeurt.

Un ratu despues un otro maestro cu a pasa eibanda, a ripará e entusiasmo den e klas i a puntra kico ta pasando. Ora a splik’é, el a puntra ta kico Wissam tabata purba proba, creacion of evolucion. “Creacion,” nan a contest’é. Ora cu e maestro ei a haña sa cu Wissam ta un Testigo di Jehova, el a bisa e klas: “Su spreekbeurt lo mustra boso cu ciencia ta apoyá creacion, no evolucion.”

A resultá cu e maestro aki tabatin un buki Creacion i tabata us’é pa duna charla na universidad! Pero promé cu el a bai, el a puntra si e por a bolbe e siguiente dia cu su alumnonan pa Wissam papia cu su klas. Esei a resultá den un otro excelente testimonio pa Jehova.

• Nina di binti dos aña, tabatin sed pa e awa di berdad. Un dia su primu a dun’é un Bijbel i a introducié na Iglesia Pentecostal. Cu gustu Nina a lesa e Bijbel i a siña for di su lesamentu cu cristiannan mester predicá, pues el a cuminsá papia cu su conocínan. Tur hende cu el a papia cuné tabata puntr’é: “Bo ta un Testigo di Jehova?” Esei a strañ’é.

Seis aña despues, Testigonan di Jehova a yama na Nina su cas i cont’é tocante e Reino di Dios. Promé, el a purba criticá nan siñansanan. Sin embargo, el a ripará cu tur nan contestanan tabata lógico i basá riba Bijbel.

Loke Nina a siña cu tempu—e nomber di Dios, Jehova, e bendicionnan dje Reino, etcétera—a convenc’é cu el a haña e berdad. El a dedicá su bida na Dios i a bautisá. E último shete añanan, Nina a sirbi como un predicadó di tempu completo. En berdad, Jehova ta bendicioná esnan cu tin berdadero amor p’e.—1 Corintionan 2:9.