Pakico Ser Razonabel den Nos Expectativanan?

ORA nos realisá nos speransanan i logra loke nos a aspirá, e ta duna nos un sintimentu di satisfaccion. Pero nos tin cu admití sí cu hopi di nos soño i expectativanan no ta resultá manera nos ta deseá. Haña nos confrontá cada bes cu decepcion den bida, por pone nos cunsumí cu nos mes i asta cu otro hende. Corectamente un homber sabí a bisa: “Expectativa posponé ta haci e curason enfermo.”—Proverbionan 13:12.

Kico ta algun factor cu por hiba na sintimentunan di decepcion? Kico nos por haci pa ta razonabel den nos expectativanan? Ademas, di con ta bon pa nos mes pa ta razonabel?

Expectativa i Decepcion

Debí n’e paso rápido di bida djawe, ta parce cu mas nos purba alcansá, mas nos ta cai atras. Por tin masha hopi demanda mes riba nos tempu i energia, i ora nos no logra haci loke nos a proponé, nos tin e tendencia di condená nos mes. Nos por asta cuminsá sinti como si fuera nos ta desapuntá otro hende. Cynthia, un esposa i mama cu conocé e preshonnan cu criamentu di yu ta trece cuné, ta bisa: “Ser inconsistente den corigí mi yunan i sinti cu mi no ta entrená nan manera mester, ta algu cu ta iritá mi.” Stephanie, un tiener, ta bisa di su educacion: “Mi no tin suficiente tempu pa haci tur loke mi kier, i esei ta pone mi bira impaciente.”

Expectativanan irazonablemente haltu ta hiba fácilmente na perfeccionismo, i esaki por ta masha frustrante mes. Ben, un yoncuman casá, ta confesá: “Ora mi examiná mi accion, pensamentu of sintimentunan, semper mi ta mira con nan lo por tabata mihó. Constantemente mi ta busca perfeccion, i esaki ta pone cu mi ta bira impaciente, frustrá i desilusioná.” Gail, un esposa cristian, ta bisa: “Un persona cu tin pensamentu perfeccionista no ta permití fayo. Nos kier ta un supermama i un superesposa. Pa nos ta felis nos mester ta productivo, p’esei ora esfuersonan no tin resultado, e ta iritá nos.”

Un otro factor mas cu por hiba na desilusion ta salú cu ta bai atras i behes. Ora nos no por move bon mas i energia a bira ménos, esei ta aumentá nos limitacionnan i ta frustra nos mas. Elizabeth ta reconocé: “Mi ta perde pacenshi cu mi mes, pasobra mi no por logra cosnan cu promé cu mi a bira malu, tabata asina fácil i normal.”

E casonan aki ta algun ehempel di loke por impulsá sintimentunan di decepcion. Si nos no controlá e sintimentunan ei, nan por pone nos kere cu otro hende no ta apreciá nos. Pues, ki medidanan positivo nos por tuma pa trata cu decepcion i cultivá expectativanan razonabel?

Maneranan pa Cultivá Expectativanan Razonabel

Promé, corda cu Jehova ta un persona razonabel i comprensivo. Salmo 103:14 ta recordá nos: “E mes sa bon con nos ta formá, cordando cu nos ta stof.” Dor cu Jehova conocé nos capacidad i limitacionnan, e ta verwagt solamente loke nos por duna. I un cos cu e ta pidi ta, pa nos “sea modesto canando cu [nos] Dios.”—Mikéas 6:8.

 Tambe Jehova ta urgi nos pa acudí na dje den oracion. (Romanonan 12:12; 1 Tesalonicensenan 5:17) Pero, con esei ta yuda nos? Oracion ta stabilisá i balansá nos manera di pensa. Oracion ferviente ta mustra cu nos ta reconocé cu nos tin mester di yudansa, e ta un señal di modestia i humildad. Jehova ta ansioso pa contestá nos oracionnan dor di duna nos su spiritu santu, cua su frutanan ta incluí amor, amabilidad, bondad i dominio propio. (Lucas 11:13; Galationan 5:22, 23) Tambe oracion ta aliviá ansiedad i frustracion. Mediante oracion “bo ta saca consuelo cu ningun otro fuente conocé,” segun Elizabeth. Kevin ta di acuerdo cu esei: “Mi ta pidi den oracion pa un curason calmu i un mente cla pa mi por trata cu un problema. Nunca Jehova ta laga mi na caya.” Apostel Pablo tabata conocé e balor precioso di oracion. P’esei el a recomendá: “Laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) Sí, comunicacion cu Jehova realmente ta yuda nos cultivá expectativanan razonabel di nos mes i di otro hende.

Pero de bes en cuando, nos mester ser trankilisá mesora. Un palabra n’e tempu apropiado ta bon. Un combersacion confidencial cu un amigu maduro i di confiansa por yuda nos haña un punto di bista frescu di loke ta pone nos sinti nos decepcioná of nervioso. (Proverbionan 15:23; 17:17; 27:9) Hóbennan cu ta lucha cu frustracion, ta descubrí cu busca conseho cerca nan mayornan ta yuda nan haña ekilibrio. Cu aprecio Kandi ta reconocé: “Guia amoroso di mi mayornan a haci mi un persona mas razonabel i balansá i mas placentero pa trata cuné.” Sí, e recordatorio na Proverbionan 1:8 i 9 ta masha oportuno mes: “Scucha, mi yu, na e disiplina di bo tata, i no bandoná e ley di bo mama. Pasobra nan ta un krans atractivo pa bo cabes i un bunita coyar pa bo garganta.”

E consecuencianan dje forma di pensa perfeccionista ta ser bon resumí den e dicho: “Spera pa bida adaptá na loke nos ta stipulá ta nificá pidi pa frustracion.” Pa evitá esaki, ta necesario pa nos ahustá nos forma di pensa. Humildad i modestia—tene un punto di bista realístico di nos limitacionnan—sigur lo cultivá den nos expectativanan balansá i razonabel. Apropiadamente Romanonan 12:3 ta spierta nos “pa no pensa mas di [nos] mes cu ta necesario pa pensa.” Ademas, Filipensenan 2:3 ta animá nos pa manifestá humildad di mente i considerá otronan superior cu nos.

Elizabeth, mencioná anteriormente, a perde pacenshi cu su mes debí na su enfermedad. E tabatin mester di tempu pa haña Jehova su punto di bista di asuntunan, i laga e echo cu e sa cu Dios no ta lubidá nos sirbishi, consol’é. Como resultado di un malesa debilitador, Colin no por move. Na principio, e tabatin e sintimentu cu su ministerio no tabata bal casi nada na comparacion cu loke e tabata haci tempu su salú tabata bon. Dor di meditá riba textonan bíblico manera 2 Corintionan 8:12, e por a deshací dje sintimentunan aki. E versículo aki ta bisa: “Pasobra si e disponibilidad t’ei promé, e ta specialmente aceptabel segun loke un persona tin, no segun loke un persona no tin.” Colin ta bisa: “Aunke mi tin hopi ménos pa duna, ainda mi por duna, i esei ta aceptabel pa Jehova.” Na Hebreonan 6:10 nos ta ser recordá: “Dios no ta inhustu p’e lubidá boso trabou i e amor cu boso a mustra pa su nomber.”

Con anto nos por sa si nos expectativanan ta razonabel? Puntra bo mes: ‘Mi expectativanan ta cuadra cu esnan di Dios?’ Galationan 6:4 ta declará: “Laga cada un duna prueba di loke su mes trabou ta, i e ora ei lo e tin motibu pa hubilá en cuanto su mes so, i no den comparacion cu e otro persona.” Corda, Jesus a bisa: “Mi yugo ta suave i mi carga ta leve.” Sí, como cristian, nos tin un yugo pa carga, pero e ta “suave” i “leve,” i Jesus a primintí cu lo e ta refrescante si nos siña cargu’é corectamente.—Mateo 11:28-30

 Expectativanan Razonabel Ta Trece Recompensa

Nos ta haña recompensa inmediato i duradero dor di scucha i aplicá conseho for dje Palabra di Dios segun cu nos ta cultivá expectativanan razonabel. Pa di promé, esaki tin un efecto faborabel riba nos condicion físico. Jennifer, kende a beneficiá dje recordatorionan di Jehova, ta admití: “Mi tin mas energia i entusiasmo pa bida.” Apropiadamente, Proverbionan 4:21 i 22 ta urgi nos pa presta atencion n’e dichonan di Jehova cu nos wowo i curason, “pasobra nan ta bida pa hende cu ta haña nan i salú pa tur nan carni.”

Un otro recompensa ta bienestar mental i emocional. “Ora mi exponé mi mente i curason na e Palabra di Dios, mi ta ripará cu semper mi ta un persona mas felis,” Theresa ta bisa. Ta cierto cu ainda nos lo haña nos cu decepcion den bida. Sin embargo, nos lo por enfrentá nan cu mas buena gana. Santiago 4:8 ta urgi: “Hala cerca Dios, i lo e hala cerca boso.” Tambe Jehova ta primintí di fortalecé nos ora nos ta trata cu desafionan di bida i di bendicioná nos cu pas.—Salmo 29:11.

Tene expectativanan razonabel ta permití nos keda stabil spiritualmente. Esaki tambe ta un bendicion. Nos por keda mantené un enfoke cla riba e cosnan mas importante den bida. (Filipensenan 1:10) E ora ei nos metanan ta realístico i alcansabel, loke ta trece mas goso i contentamentu. Nos lo ta mas dispuesto pa confia nos mes na Jehova, sabiendo cu lo e percurá pa cosnan resultá lo mihó. Pedro ta bisa: “Humiyá boso mes, anto, bou dje man poderoso di Dios, p’e por halsa boso n’e debido tempu.” (1 Pedro 5:6) Por tin algu mas recompensador cu ser onrá dor di Jehova?

[Plachinan na página 31]

Cultivá expectativanan razonabel por yuda nos trata cu frustracion i decepcion