“Sabiduria Ta cu Esnan Modesto”

“Kico Jehova ta pidi bek di bo sino . . . sea modesto canando cu bo Dios?”—MIKÉAS 6:8.

1, 2. Kico ta modestia, i kico ta hacié distinto di arogancia?

UN APOSTEL prominente ta nenga di hala atencion na su mes. Un hues israelita yen di curashi ta yama su mes esun di mas chikitu dje cas di su tata. E homber mas importante cu hamas a biba ta reconocé cu su autoridad tin límite. Cada un dje hombernan aki a desplegá modestia.

² Modestia ta lo contrario di arogancia. Un persona modesto no tin un opinion exagerá di su abilidadnan i balor i no ta hinchá cu orguyo. En bes di ta orguyoso, bromadó of ambicioso, e persona modesto semper ta conciente di su limitacionnan. P’esei, e ta respetá i ta tene e debido cuenta cu sintimentu i opinion di otro hende.

3. Den ki manera sabiduria “ta cu esnan modesto”?

³ Cu bon motibu Bijbel ta bisa: “Sabiduria ta cu esnan modesto.” (Proverbionan 11:2) E persona modesto ta sabí pasobra e ta sigui un curso cu Dios ta aprobá, i e ta evitá un spiritu di arogancia cu ta resultá den desonor. (Proverbionan 8:13; 1 Pedro 5:5) E curso di bida di vários sirbidó di Dios ta confirmá e sabiduria di modestia. Laga nos considerá e tres ehempelnan mencioná den e promé paragraf.

Pablo—Un “Subordiná” i un ‘Mayordomo’

4. Ki privilegionan único Pablo a disfrutá di dje?

⁴ Pablo tabata un figura prominente entre e cristiannan di promé, i esei ta di comprendé. Den transcurso di su ministerio, el a biaha miles di kilometer riba tera i laman, i el a establecé hopi congregacion. Ademas, Jehova a bendicioná Pablo cu visionnan i e don di papia den idiomanan stranhero. (1 Corintionan 14:18; 2 Corintionan 12:1-5) Tambe, Jehova a inspirá Pablo pa skirbi 14 carta cu awor ta parti dje Scritura Griego Cristian. Claramente anto, por ser bisá cu Pablo su labornan tabata mas tantu cu di tur e otro apostelnan.—1 Corintionan 15:10.

5. Con Pablo a demostrá cu e tabatin un punto di bista modesto di su mes?

⁵ Siendo cu Pablo tabata na vanguardia dje trabou cristian di predicá, algun kisas a spera di  hañ’é ta gosa di ta den ‘spotlight,’ asta bromando cu su autoridad. Sin embargo, esei no tabata e caso, pasobra Pablo tabata modesto. El a yama su mes “esun menor dje apostelnan” i a agregá: “mi no ta digno di ser yamá un apostel pasobra mi a persiguí e congregacion di Dios.” (1 Corintionan 15:9) Como un ex-persiguidó dje cristiannan, Pablo nunca a lubidá cu ta solamente dor di bondad inmerecí tabata posibel p’e tin un relacion cu Dios, pa no papia mes di gosa di privilegionan di sirbishi. (Juan 6:44; Efesionan 2:8) P’esei, Pablo no a sinti cu su logronan extraordinario den e ministerio a hacié superior cu otro hende.—1 Corintionan 9:16.

6. Con Pablo a mustra modestia den e manera cu el a trata cu e corintionan?

⁶ Pablo su modestia ta particularmente bisto den su trato cu e corintionan. Aparentemente, algun di nan tabata impresioná cu esnan cu nan a considerá superintendentenan prominente, incluyendo Apólos, Céfas i Pablo mes. (1 Corintionan 1:11-15) Pero Pablo no a pidi elogio dje corintionan ni a probechá di nan admiracion. Ora el a bai bishitá nan, e no a presentá su mes “cu extravagancia di abla of di sabiduria.” En bes di esei, Pablo a bisa tocante su mes i su compañeronan: “Laga un hende evaluá nos como esnan subordiná di Cristo i mayordomonan di secretonan sagrado di Dios.” *—1 Corintionan 2:1-5; 4:1.

7. Con Pablo a desplegá modestia asta ora di duna conseho?

⁷ Asta ora Pablo tabatin cu duna conseho fuerte i direccion, el a desplegá modestia. El a suplicá su compañeronan cristian “p’e compasion di Dios” i a “base di amor” mas bien cu a base di e peso di su autoridad apostólico. (Romanonan 12:1, 2; Filemon 8, 9) Di con Pablo a haci esei? Pasobra di berdad el a mira su mes como un ‘colaboradó’ di su rumannan, no como un ‘doño di nan fe.’ (2 Corintionan 1:24) Sin duda, tabata Pablo su modestia cu a pone cu e congregacionnan cristian di promé siglo a stim’é asina tantu.—Echonan 20:36-38.

 Un Punto di Bista Modesto di Nos Privilegionan

8, 9. (a) Di con nos mester tin un punto di bista modesto di nos mes? (b) Con esnan cu tin un midí di responsabilidad por desplegá modestia?

⁸ Pablo a pone un bon ehempel pa cristiannan djawe. No ta importá ki responsabilidad a ser confiá na nos, ningun di nos mester sinti cu nos ta superior cu otro hende. Pablo a skirbi: “Si un hende ta kere cu e ta algu, miéntras cu e no ta nada, e ta gaña su mes mente.” (Galationan 6:3) Di con? Pasobra “tur a peca i no ta alcansá e gloria di Dios.” (Romanonan 3:23; 5:12) Sí, nos no mester lubidá nunca cu nos tur a heredá picá i morto for di Adam. Privilegionan special no ta elevá nos di nos condicion pecaminoso. (Eclesiástes 9:2) Manera tabata e caso cu Pablo, ta solamente dor di bondad inmerecí cu hende por drenta den un relacion cu Dios, pa no papia mes di sirbié den un posicion privilegiá.—Romanonan 3:12, 24.

⁹ Ora un hende modesto realisá esaki, lo e no ta orguyoso di su privilegionan ni broma di su logronan. (1 Corintionan 4:7) Ora di duna conseho of direccion, e ta haci esei como un colaboradó—no manera un doño. Sin duda, lo ta robes pa un hende cu ta sobresalí den cierto tareanan, pidi elogio di otronan of probechá dje admiracion di compañeronan creyente. (Proverbionan 25:27; Mateo 6:2-4) E único elogio cu bal algu ta bini di otro hende—i e mester bini sin cu nos a pidié. Si nos haña elogio, nos no mester lagu’é pone nos pensa mas di nos mes cu ta necesario.—Proverbionan 27:2; Romanonan 12:3.

10. Splica con algun cu por parce di condicion humilde en realidad por ta “ricu den fe.”

¹⁰ Ora nos ser confiá cu un midí di responsabilidad, modestia lo yuda nos evitá di pone indebido énfasis riba nos mes, i crea e impresion cu e congregacion ta bai bon solamente dor di nos esfuerso i abilidadnan. Por ehempel, kisas nos por ta hopi bon den siña otro hende. (Efesionan 4:11, 12) Sin embargo, si nos ta modesto, nos tin cu reconocé cu algun dje lesnan di mas grandi cu nos ta siña na reunion di congregacion no ta for di plataforma. Por ehempel, bo no ta sinti bo animá ora bo mira e mayor soltero cu regularmente ta bini Salon di Reino cu su yunan su tras? Of e alma deprimí cu fielmente ta bini reunion apesar di sintimentunan persistente di no ta bal nada? Of e hóben cu ta haci progreso continuo apesar di mal influencia na scol i otro caminda? (Salmo 84:10) E personanan aki kisas no ta den spotlight. Mayoria test di integridad cu nan ta pasa aden otro hende no ta ripará. Sin embargo, nan por ta mes “ricu den fe” cu esnan cu tin mas prominencia. (Santiago 2:5) Pasobra, na final, ta fieldad ta loke ta gana Jehova su fabor.—Mateo 10:22; 1 Corintionan 4:2.

Gídeon—“E Mas Chikitu” den Cas di Su Tata

11. Den ki manera Gídeon a mustra modestia ora el a papia cu e angel di Dios?

¹¹ Gídeon, un yoncuman fiel i confiabel dje tribu di Manases, a biba durante un tempu turbulento den e historia di Israel. Pa shete aña, Dios su pueblo a sufri bou di opresion madianita. Sin embargo, e tempu pa Jehova libra su pueblo a yega. P’esei un angel a aparecé na Gídeon i a bisa: “Jehova ta cu bo, abo homber balente i fuerte.” Gídeon tabata modesto, pues e no a gosa den e gloria dje compliment inesperá aki. En bes di esei, el a bisa e angel cu respet: “Dispensá mi, mi señor, pero si Jehova ta cu nos, anto di con tur esaki a bini riba nos?” E angel a aclará e asuntu i a bisa Gídeon: “Sigur  lo bo salba Israel for di plant’i man di Madian.” Con Gídeon a reaccioná? En bes di tuma e asignacion ansiosamente como un oportunidad pa haci su mes un héroe nacional, Gídeon a contestá: “Dispensá mi, Jehova. Cu kico lo mi salba Israel? Mira! Mi mil ta esun di mas ménos di Manases, i ami esun di mas chikitu den cas di mi tata.” Esta modesto!—Huesnan 6:11-15.

12. Con Gídeon a mustra discrecion ora di cumpli cu su asignacion?

¹² Jehova a test Gídeon promé cu el a mand’é den bataya. Con? Jehova a bisa Gídeon p’e basha su tata su altar di Baal abou i kap e palu sagrado cu tabata pará banda dje altar. E asignacion aki lo a exigí curashi, pero Gídeon tambe a mustra modestia i discrecion den e forma cu el a cumpli cuné. En bes di cumpli cu e asignacion públicamente, Gídeon a traha durante scuridad di anochi, ora cu muy probablemente hende lo no a ripar’é. Ademas, Gídeon a efectuá su asignacion cu e debido cautela. El a hiba dies sirbidó huntu cuné—kisas pa algun por a vigilá miéntras cu e otronan a yud’é destruí e altar i e palu sagrado. * En todo caso, cu Jehova su bendicion, Gídeon a cumpli cu su asignacion, i cu tempu Dios a us’é p’e libra Israel dje madianitanan.—Huesnan 6:25-27.

Desplegá Modestia i Discrecion

13, 14. (a) Con nos por mustra modestia ora extendé un privilegio di sirbishi na nos? (b) Con ruman A. H. Macmillan a pone un excelente ehempel den desplegá modestia?

¹³ Tin hopi cos cu nos por siña di Gídeon su modestia. Por ehempel, ora extendé un privilegio di sirbishi na nos, con nos ta reaccioná? Nos ta pensa promé riba e prominencia of e prestigio cu lo e trece cuné? Of cu modestia nos lo considerá den oracion si  nos por cumpli cu e exigencianan dje asignacion? Ruman A. H. Macmillan, kende a terminá su carera terenal na 1966, a pone un excelente ehempel den e aspecto aki. C. T. Russell, e promé presidente di Sociedad Watch Tower, un biaha a puntra ruman Macmillan pa su opinion en cuanto ken e ta kere lo por tuma encargo dje trabou durante su ausencia. Den e combersacion cu a sigui, ruman Macmillan no a recomendá su mes ni un biaha, aunke esaki lo tabata basta cumbiniente pa e mes si el a haci esei. Na final, ruman Russell a pidi ruman Macmillan p’e pensa i wak si lo e kier aceptá e asignacion. Ruman Macmillan a skirbi añanan despues: “Mi a keda boca habrí. I mi a pensa seriamente riba e asuntu, i a haci oracion tocante dje pa un poco tempu promé cu finalmente mi a bis’é cu gustosamente lo mi haci tur loke mi por pa asistié.”

¹⁴ No muchu tempu despues, ruman Russell a fayecé, lagando e funcion di presidente di Sociedad Watch Tower habrí. Dor cu ruman Macmillan tabata encargá cu e trabou durante ruman Russell su último gira di predicá, un ruman homber a bis’é: “Mac, abo tin hopi chens di haña e puesto di presidente. Bo tabata ruman Russell su representante special ora e no tabata t’ei, i el a bisa nos tur pa haci loke abo bisa. Wel, el a bai i no a bolbe mas. Ta parce cu abo ta e homber cu lo sigui.” Ruman Macmillan a contest’é: “Ruman, esei no ta e manera pa mira e asuntu aki. Esaki ta e trabou di Señor i e único puesto cu bo ta haña den e organisacion di Señor ta loke Señor ta mira ta pas pa bo; i mi tin sigur cu ami no ta e persona indicá p’e trabou aki.” Anto ruman Macmillan a recomendá un otro persona pa e puesto. Manera Gídeon, e tabatin un punto di bista modesto di su mes, un punto di bista cu ta bon pa nos adoptá.

15. Mencioná algun manera práctico cu nos por usa dicernimentu ora nos ta predicá na otro hende.

¹⁵ Nos tambe mester ta modesto den e manera cu nos ta cumpli cu nos asignacion. Gídeon tabata discreto, i el purba di no pone su opositornan rabia innecesariamente. Di igual manera, den nos trabou di predicá, nos mester ta modesto i discreto den e manera cu nos ta papia cu otro hende. Ta berdad cu nos ta den un guera spiritual pa tumba “cosnan fuertemente ankrá” i “razonamentunan.” (2 Corintionan 10:4, 5) Pero nos no mester rebahá otro hende of duna nan motibu válido pa sinti nan ofendí dor di nos mensahe. En bes di esei, nos mester respetá nan opinion, enfatisá loke nos por tin en comun, i e ora ei enfocá riba e aspectonan positivo di nos mensahe.—Echonan 22:1-3; 1 Corintionan 9:22; Revelacion 21:4.

 Jesus—E Ehempel Supremo di Modestia

16. Con Jesus a mustra cu e tabatin un punto di bista modesto di su mes?

¹⁶ E ehempel mas sobresaliente di modestia ta esun di Jesucristo. * Maske Jesus tabatin un relacion íntimo cu su Tata, e no a vacilá pa reconocé cu algun asuntu tabata fuera dje límite di su autoridad. (Juan 1:14) Por ehempel, ora cu e mama di Santiago cu Juan a pidi pa su dos yunan sinta banda di Jesus den su reino, Jesus a bisa: “En cuanto di sinta na mi man drechi i na mi man robes, no ta na ami pa duna.” (Mateo 20:20-23) Na un otro ocasion, Jesus a admití francamente: “Mi no por haci ni un solo cos di mi mes iniciativa . . . Mi no ta busca mi mes boluntad, sino e boluntad di esun cu a manda mi.”—Juan 5:30; 14:28; Filipensenan 2:5, 6.

17. Con Jesus a mustra modestia den su trato cu otro hende?

¹⁷ Jesus tabata superior na hende imperfecto den tur cos, i e tabatin autoridad sin igual cu su Tata, Jehova, a dun’é. Tog, Jesus tabata modesto den su trato cu su siguidónan. E no a hoga nan cu un despliegue impresionante di conocimentu. El a mustra cu e tabatin sintimentu i compasion i a tene cuenta cu nan necesidadnan humano. (Mateo 15:32; 26:40, 41; Marco 6:31) Kier men cu maske Jesus tabata perfecto, e no tabata perfeccionista. Nunca el a exigí mas di su disipelnan cu loke nan por a duna, i nunca el a pone mas carga riba nan cu nan por a wanta. (Juan 16:12) Nada straño anto cu asina hopi hende a hañ’é refrescante!—Mateo 11:29.

Imitá Jesus Su Ehempel di Modestia

18, 19. Con nos por imitá Jesus su modestia den (a) e manera cu nos ta mira nos mes, i (b) e manera cu nos ta trata otro hende?

¹⁸ Si e homber di mas importante cu hamas a biba a mustra modestia, cuanto mas nos mester mustra modestia. Hende imperfecto hopi bes no ta masha dispuesto pa admití cu nan simplemente no ta poseé autoridad absoluto. Sin embargo, cristiannan ta haci esfuerso pa imitá Jesus su modestia. Nan no ta demasiado orguyoso pa duna responsabilidad na esnan cu ta cualificá pa ricibié; ni nan no ta halsá i indispuesto pa aceptá direccion di esnan cu ta autorisá pa dun’é. Mustrando un spiritu di cooperacion, nan ta laga tur cos den congregacion tuma lugá “decentemente i segun areglo.”—1 Corintionan 14:40.

¹⁹ Tambe modestia lo impulsá nos pa ta razonabel den loke nos ta spera di otro hende i tene cuenta cu nan necesidadnan. (Filipensenan 4:5) Nos kisas tin cierto abilidad i punto fuerte cu otro hende no tin. Sin embargo, si nos ta modesto, nos lo no spera semper di otro hende pa nan haci cos manera nos lo a deseá pa nan hacié. Sabiendo cu cada hende tin su mes limitacionnan, cu modestia nos lo tene pacenshi cu fayo di otro hende. Pedro a skirbi: “Riba tur cos, tene amor intenso pa otro, pasobra amor ta tapa un multitud di picá.”—1 Pedro 4:8.

20. Kico nos por haci pa vence cualkier inclinacion pa cu inmodestia?

²⁰ Manera nos a siña, sabiduria sin duda ta cu esnan modesto. Awor, kico si bo descubrí cu bo tin inclinacion pa cu inmodestia of arogancia? No desanimá. Sino, sigui e ehempel di David cu a resa: “Stroba bo sirbidó di cometé actonan di arogancia; no laga nan dominá mi.” (Salmo 19:13) Dor di imitá e fe di hombernan manera Pablo, Gídeon i—riba tur otro hende—Jesucristo, nos lo experimentá personalmente e berdad dje palabranan: “Sabiduria ta cu esnan modesto.”—Proverbionan 11:2.

[Nota]

Bo Ta Corda?

• Kico ta modestia?

• Con nos por imitá Pablo su modestia?

• Kico nos por siña tocante modestia for dje ehempel di Gídeon?

• Con Jesus a pone e ehempel supremo den modestia?

[Preguntanan di Estudio]

[Plachi na página 15]

Pablo su modestia a pone su compañeronan cristian stim’é

[Plachi na página 17]

Gídeon a usa discrecion den cumpli cu Dios su boluntad

[Plachi na página 18]

Jesus, e Yu di Dios, ta mustra modestia den tur loke e ta haci